ਬਜ਼ੁਰਗ ਵੱਲੋਂ ਗੁਆਂਢਣ ਨੂੰ ਅੱਖ ਮਾਰਨਾ ਪਿਆ ਮਹਿੰਗਾ, ਅਦਾਲਤ ਨੇ 10 ਹਜ਼ਾਰ ਰੁਪਏ ਹਰਜਾਨਾ ਲਾਇਆ

ਤਰੁਣ ਭਜਨੀ, ਪੰਜਾਬੀ ਜਾਗਰਣ ਚੰਡੀਗੜ੍ਹ : ਗੁਆਂਢ ਵਿੱਚ ਰਹਿੰਦੀ ਇੱਕ ਔਰਤ ਨੂੰ ਅੱਖ ਮਾਰਨਾ ਅਤੇ ਗਲਤ ਇਸ਼ਾਰੇ ਕਰਨਾ 62 ਸਾਲਾ ਬਜ਼ੁਰਗ ਲਈ ਭਾਰੀ ਸਾਬਤ ਹੋਇਆ। ਜ਼ਿਲ੍ਹਾ ਅਦਾਲਤ ਨੇ ਔਰਤ ਨਾਲ ਛੇੜਛਾੜ ਦੇ ਮਾਮਲੇ ਵਿੱਚ ਰਾਮ ਦਰਬਾਰ ਵਾਸੀ ਬਜ਼ੁਰਗ ਨੂੰ ਦੋਸ਼ੀ ਕਰਾਰ ਦਿੰਦਿਆਂ 10 ਹਜ਼ਾਰ ਰੁਪਏ ਹਰਜਾਨਾ ਲਾਇਆ। ਇਹ ਹਰਜਾਨਾ ਰਕਮ ਪੀੜਤ ਔਰਤ ਨੂੰ ਅਦਾ ਕੀਤੀ ਜਾਵੇਗੀ। ਹਾਲਾਂਕਿ ਅਦਾਲਤ ਨੇ ਉਸ ਨੂੰ ਸਜ਼ਾ ਨਹੀਂ ਸੁਣਾਈ ਅਤੇ ਪ੍ਰੋਬੇਸ਼ਨ, ਅਰਥਾਤ ਚੰਗੇ ਆਚਰਨ ਦੀ ਸ਼ਰਤ ’ਤੇ ਰਿਹਾਅ ਕਰ ਦਿੱਤਾ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਉਸ ਨੂੰ ਛੇ ਮਹੀਨੇ ਤਕ ਆਪਣੇ ਵਿਹਾਰ ਵਿੱਚ ਸੁਧਾਰ ਲਿਆਉਣਾ ਹੋਵੇਗਾ। ਇਸ ਦੌਰਾਨ ਪੁਲਿਸ ਦੀ ਉਸ ’ਤੇ ਨਿਗਰਾਨੀ ਰਹੇਗੀ ਅਤੇ ਜੇ ਇਸ ਸਮੇਂ ਦੌਰਾਨ ਉਸ ਖ਼ਿਲਾਫ਼ ਮੁੜ ਅਜਿਹੀ ਕੋਈ ਸ਼ਿਕਾਇਤ ਆਈ ਤਾਂ ਸਖ਼ਤ ਕਾਰਵਾਈ ਕੀਤੀ ਜਾ ਸਕਦੀ ਹੈ। ਸੈਕਟਰ-31 ਥਾਣਾ ਪੁਲਿਸ ਨੇ ਦੋਸ਼ੀ ਬਜ਼ੁਰਗ ਖ਼ਿਲਾਫ਼ 1 ਸਤੰਬਰ 2021 ਨੂੰ ਆਈਪੀਸੀ ਦੀ ਧਾਰਾ 354ਏ (ਛੇੜਛਾੜ) ਅਤੇ 509 (ਔਰਤ ਦਾ ਅਪਮਾਨ) ਤਹਿਤ ਐੱਫਆਈਆਰ ਦਰਜ ਕੀਤੀ ਸੀ। ਉਸ ਖ਼ਿਲਾਫ਼ ਗੁਆਂਢ ਵਿੱਚ ਰਹਿੰਦੀ ਔਰਤ ਨੇ ਸ਼ਿਕਾਇਤ ਦਿੱਤੀ ਸੀ। ਔਰਤ ਨੇ ਦੱਸਿਆ ਕਿ 28 ਅਗਸਤ 2021 ਦੀ ਸਵੇਰ ਉਹ ਘਰ ਦੇ ਬਾਹਰ ਝਾੜੂ ਲਾ ਰਹੀ ਸੀ, ਤਾਂ ਦੋਸ਼ੀ ਬਜ਼ੁਰਗ ਉੱਥੇ ਆਇਆ ਅਤੇ ਉਸ ਨਾਲ ਛੇੜਛਾੜ ਕਰਨ ਲੱਗ ਪਿਆ। ਬਜ਼ੁਰਗ ਨੇ ਔਰਤ ਨੂੰ ਅੱਖ ਮਾਰੀ, ਗਲਤ ਇਸ਼ਾਰੇ ਕੀਤੇ ਅਤੇ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ। ਜਦੋਂ ਔਰਤ ਨੇ ਵਿਰੋਧ ਕੀਤਾ ਤਾਂ ਉਹ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਪੀੜਤ ਔਰਤ ਨੇ ਦੱਸਿਆ ਕਿ ਉਸ ਸਮੇਂ ਦੋਸ਼ੀ ਸ਼ਰਾਬ ਦੇ ਨਸ਼ੇ ਵਿੱਚ ਸੀ। ਉਹ ਪਹਿਲਾਂ ਵੀ ਕਈ ਵਾਰ ਅਜਿਹੀ ਹਰਕਤਾਂ ਕਰ ਚੁੱਕਾ ਸੀ, ਪਰ ਸ਼ਰਮ ਦੇ ਮਾਰੇ ਉਸ ਨੇ ਕਿਸੇ ਨੂੰ ਇਸ ਬਾਰੇ ਨਹੀਂ ਦੱਸਿਆ। ਹੁਣ ਜਦੋਂ ਉਸ ਨੇ ਹੱਦਾਂ ਪਾਰ ਕਰ ਦਿੱਤੀਆਂ ਤਾਂ ਉਸ ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ। ਉਲਟਾ ਦੋਸ਼ੀ ਦਾ ਪਰਿਵਾਰ ਝਗੜਾ ਕਰਨ ਆ ਗਿਆ : ਔਰਤ ਨੇ ਦੱਸਿਆ ਕਿ ਜਦੋਂ ਇਹ ਗੱਲ ਦੋਸ਼ੀ ਬਜ਼ੁਰਗ ਦੇ ਪਰਿਵਾਰ ਤਕ ਪਹੁੰਚੀ ਤਾਂ ਉਲਟਾ ਉਨ੍ਹਾਂ ਨੇ ਝਗੜਾ ਕਰਨਾ ਸ਼ੁਰੂ ਕਰ ਦਿੱਤਾ। ਦੋਸ਼ੀ ਦੇ ਪੁੱਤਰ ਸ਼ਰਾਬ ਦੇ ਨਸ਼ੇ ਵਿੱਚ ਪੀੜਤ ਔਰਤ ਦੇ ਘਰ ਝਗੜਾ ਕਰਨ ਪਹੁੰਚ ਗਏ। ਇਸ ਤੋਂ ਬਾਅਦ ਔਰਤ ਦੀ ਸ਼ਿਕਾਇਤ ’ਤੇ ਪੁਲਿਸ ਨੇ ਮੁਲਜ਼ਮ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ। ਉੱਧਰ ਦੋਸ਼ੀ ਦੇ ਵਕੀਲ ਨੇ ਅਦਾਲਤ ਵਿੱਚ ਦਲੀਲ ਦਿੱਤੀ ਕਿ ਬਜ਼ੁਰਗ ਨੂੰ ਝੂਠੀ ਸ਼ਿਕਾਇਤ ਦੇ ਕੇ ਫਸਾਇਆ ਗਿਆ ਹੈ ਅਤੇ ਉਸ ਨੇ ਔਰਤ ਨਾਲ ਕੋਈ ਛੇੜਛਾੜ ਨਹੀਂ ਕੀਤੀ। ਪਰ ਅਦਾਲਤ ਨੇ ਇਹ ਦਲੀਲਾਂ ਮਨਜ਼ੂਰ ਨਹੀਂ ਕੀਤੀਆਂ।