ਪਹਿਲੇ ਹੀ ਦਿਨ ਜਨਤਾ ਦਰਬਾਰ ’ਚ ਭਾਰੀ ਭੀੜ

- ਮੇਅਰ ਸੌਰਭ ਜੋਸ਼ੀ ਨੇ ਪਾਰਕਿੰਗ ’ਚ ਸੁਣੀਆਂ ਲੋਕਾਂ ਦੀਆਂ ਸਮੱਸਿਆਵਾਂ

ਤਰੁਣ ਭਜਨੀ, ਪੰਜਾਬੀ ਜਾਗਰਣ

ਚੰਡੀਗੜ੍ਹ : ਨਗਰ ਨਿਗਮ ਚੰਡੀਗੜ੍ਹ ਦੇ ਨਵ-ਨਿਯੁਕਤ ਮੇਅਰ ਸੌਰਭ ਜੋਸ਼ੀ ਦੇ ਪਹਿਲੇ ਹੀ ਜਨਤਾ ਦਰਬਾਰ ਵਿੱਚ ਜਨਤਾ ਦਾ ਜ਼ਬਰਦਸਤ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਹਾਲਾਤ ਅਜਿਹੇ ਬਣ ਗਏ ਕਿ ਮੇਅਰ ਦਫ਼ਤਰ ਵਿੱਚ ਲੋਕਾਂ ਦੀ ਇੰਨੀ ਭੀੜ ਉਮੜ ਪਈ ਕਿ ਮੇਅਰ ਨੂੰ ਦਫ਼ਤਰ ਛੱਡ ਕੇ ਬਾਹਰ ਆਉਣਾ ਪਿਆ ਅਤੇ ਪਾਰਕਿੰਗ ਵਿੱਚ ਹੀ ਖੜ੍ਹ ਕੇ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣਣੀਆਂ ਪਈਆਂ। ਸਵੇਰੇ ਤੋਂ ਹੀ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ਤੋਂ ਵੱਡੀ ਗਿਣਤੀ ਵਿੱਚ ਲੋਕ ਆਪਣੀਆਂ ਨਿੱਜੀ ਅਤੇ ਸਾਂਝੀਆਂ ਸਮੱਸਿਆਵਾਂ ਲੈ ਕੇ ਮੇਅਰ ਦਫ਼ਤਰ ਪਹੁੰਚਣ ਲੱਗ ਪਏ। ਕੁਝ ਹੀ ਸਮੇਂ ਵਿੱਚ ਦਫ਼ਤਰ ਦੇ ਅੰਦਰ ਅਤੇ ਬਾਹਰ ਲੋਕਾਂ ਦੀ ਭੀੜ ਇੰਨੀ ਵੱਧ ਗਈ ਕਿ ਅੰਦਰ ਬੈਠ ਕੇ ਜਨਤਾ ਦਰਬਾਰ ਲਗਾਉਣਾ ਸੰਭਵ ਨਹੀਂ ਰਿਹਾ। ਸਥਿਤੀ ਨੂੰ ਵੇਖਦੇ ਹੋਏ ਮੇਅਰ ਸੌਰਭ ਜੋਸ਼ੀ ਖੁਦ ਬਾਹਰ ਆਏ ਅਤੇ ਪਾਰਕਿੰਗ ਵਿੱਚ ਹੀ ਲੋਕਾਂ ਨਾਲ ਸਿੱਧੀ ਗੱਲਬਾਤ ਸ਼ੁਰੂ ਕੀਤੀ।

ਇਸ ਦੌਰਾਨ ਇੱਕ ਵੱਖਰਾ ਹੀ ਦ੍ਰਿਸ਼ ਦੇਖਣ ਨੂੰ ਮਿਲਿਆ, ਜਦੋਂ ਮੇਅਰ ਨੇ ਆਪਣੇ ਸਵਾਗਤ ਲਈ ਲਿਆਂਦੇ ਗੁਲਦਸਤੇ ਅਤੇ ਮਿਠਾਈਆਂ ਲੈਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਅੱਜ ਸਵਾਗਤ ਨਹੀਂ, ਅੱਜ ਜਨਤਾ ਦਰਬਾਰ ਹੋਵੇਗਾ। ਪਹਿਲਾਂ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣੀਆਂ ਜਾਣਗੀਆਂ। ਮੇਅਰ ਦਾ ਇਹ ਰੁਖ ਉੱਥੇ ਮੌਜੂਦ ਲੋਕਾਂ ਅਤੇ ਨਿਗਮ ਅਧਿਕਾਰੀਆਂ ਲਈ ਵੀ ਇੱਕ ਸੰਦੇਸ਼ ਬਣ ਗਿਆ ਕਿ ਉਨ੍ਹਾਂ ਦੀ ਪਹਿਲ ਦਿਖਾਵਾ ਨਹੀਂ, ਸਗੋਂ ਜਨਤਾ ਦੀ ਸੁਣਵਾਈ ਹੈ। ਜਨਤਾ ਦਰਬਾਰ ਵਿੱਚ ਸੜਕਾਂ, ਸੀਵਰੇਜ, ਪਾਣੀ ਦੀ ਸਪਲਾਈ, ਸਫ਼ਾਈ ਪ੍ਰਣਾਲੀ, ਸਟਰੀਟ ਲਾਈਟਾਂ, ਪਾਰਕਾਂ ਦੀ ਬਦਹਾਲੀ ਅਤੇ ਮਕਾਨ ਸਬੰਧੀ ਸ਼ਿਕਾਇਤਾਂ ਨੂੰ ਲੈ ਕੇ ਵੱਡੀ ਗਿਣਤੀ ਵਿੱਚ ਅਰਜ਼ੀਆਂ ਦਿੱਤੀਆਂ ਗਈਆਂ। ਮੇਅਰ ਨੇ ਕਈ ਮਾਮਲਿਆਂ ਵਿੱਚ ਮੌਕੇ ’ਤੇ ਹੀ ਅਧਿਕਾਰੀਆਂ ਨੂੰ ਹੁਕਮ ਦਿੱਤੇ ਅਤੇ ਬਾਕੀ ਸ਼ਿਕਾਇਤਾਂ ਨੂੰ ਨਿਰਧਾਰਤ ਸਮਾਂ-ਸੀਮਾ ਵਿੱਚ ਨਿਪਟਾਉਣ ਦਾ ਭਰੋਸਾ ਦਿੱਤਾ। ਮੇਅਰ ਸੌਰਭ ਜੋਸ਼ੀ ਨੇ ਕਿਹਾ ਕਿ ਜਨਤਾ ਦਰਬਾਰ ਕੇਵਲ ਇੱਕ ਫਾਰਮੈਲਿਟੀ ਨਹੀਂ, ਬਲਕਿ ਲੋਕਾਂ ਨਾਲ ਸਿੱਧੇ ਤੌਰ ’ਤੇ ਜੁੜਨ ਦਾ ਮਾਧਿਅਮ ਹੈ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਆਉਣ ਵਾਲੇ ਦਿਨਾਂ ਵਿੱਚ ਵੀ ਨਿਯਮਿਤ ਤੌਰ ’ਤੇ ਜਨਤਾ ਦਰਬਾਰ ਲਗਾਏ ਜਾਣਗੇ, ਤਾਂ ਜੋ ਆਮ ਨਾਗਰਿਕਾਂ ਨੂੰ ਦਫ਼ਤਰਾਂ ਦੇ ਚੱਕਰ ਨਾ ਕੱਟਣੇ ਪੈਣ। ਪਹਿਲੇ ਹੀ ਦਿਨ ਜਨਤਾ ਦਰਬਾਰ ਵਿੱਚ ਉਮੜੀ ਭਾਰੀ ਭੀੜ ਨੇ ਇਹ ਸਾਫ਼ ਕਰ ਦਿੱਤਾ ਕਿ ਸ਼ਹਿਰ ਦੀ ਜਨਤਾ ਨੂੰ ਮੇਅਰ ਤੋਂ ਵੱਡੀਆਂ ਉਮੀਦਾਂ ਹਨ ਅਤੇ ਮੇਅਰ ਸੌਰਭ ਜੋਸ਼ੀ ਵੀ ਇਨ੍ਹਾਂ ਉਮੀਦਾਂ ’ਤੇ ਖਰਾ ਉਤਰਣ ਦਾ ਸੰਕੇਤ ਆਪਣੇ ਪਹਿਲੇ ਕਦਮ ਵਿੱਚ ਹੀ ਦੇ ਗਏ ਹਨ।