53 ਲੱਖ 88 ਹਜ਼ਾਰ ’ਚ ਵਿਕਿਆ ਸੀਐੱਚ 01-ਡੀਡੀ -0001, 53.88 ਲੱਖ ਵਿੱਚ ਵਿਕਿਆ ਸਭ ਤੋਂ ਮਹਿੰਗਾ ਨੰਬਰ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ। ਸ਼ਹਿਰ ਵਿਚ ਫੈਂਸੀ ਵਾਹਨ ਨੰਬਰਾਂ ਲਈ ਲੋਕਾਂ ਦਾ ਵਧਦਾ ਸ਼ੌਂਕ ਇਕ ਵਾਰ ਫਿਰ ਵੇਖਣ ਨੂੰ ਮਿਲਿਆ ਹੈ। ਰਜਿਸਟਰਿੰਗ ਐਂਡ ਲਾਇਸੈਂਸਿੰਗ ਅਥਾਰਟੀ (ਆਰਐੱਲਏ) ਚੰਡੀਗੜ੍ਹ ਵੱਲੋਂ ਨਵੀਂ ਵਾਹਨ ਰਜਿਸਟ੍ਰੇਸ਼ਨ ਸਿਰੀਜ਼ ਸੀਐਚ 01-ਡੀਡੀ ਦੇ ਫੈਂਸੀ ਅਤੇ ਚੋਇਸ ਨੰਬਰਾਂ ਦੀ ਈ-ਨੀਲਾਮੀ ਵਿਚ ਇਸ ਵਾਰ ਰਿਕਾਰਡ ਬੋਲੀ ਲੱਗੀ। ਤਿੰਨ ਦਿਨ ਚੱਲੀ ਇਸ ਈ-ਨੀਲਾਮੀ ਤੋਂ ਪ੍ਰਸ਼ਾਸਨ ਨੂੰ ਕੁੱਲ 4 ਕਰੋੜ 48 ਲੱਖ 87 ਹਜ਼ਾਰ ਰੁਪਏ ਦੀ ਆਮਦਨ ਹੋਈ ਹੈ, ਜੋ ਆਰਐੱਲਏ ਦੀ ਨੀਲਾਮੀ ਦੇ ਇਤਿਹਾਸ ਵਿਚ ਹੁਣ ਤੱਕ ਦੀ ਸਭ ਤੋਂ ਵੱਧ ਕਮਾਈ ਦੱਸੀ ਜਾ ਰਹੀ ਹੈ।

ਆਰਐਲਏ ਵੱਲੋਂ ਇਹ ਈ-ਨੀਲਾਮੀ 4 ਮਾਰਚ ਤੋਂ 6 ਮਾਰਚ 2026 ਤੱਕ ਕਰਵਾਈ ਗਈ ਸੀ। ਇਸ ਨੀਲਾਮੀ ਵਿਚ ਨਵੀਂ ਸਿਰੀਜ਼ ਸੀਐਚ 01-ਡੀਡੀ ਦੇ 0001 ਤੋਂ 9999 ਤੱਕ ਦੇ ਨੰਬਰਾਂ ਦੇ ਨਾਲ ਪਿਛਲੀਆਂ ਸਿਰੀਜ਼ਾਂ ਦੇ ਬਚੇ ਹੋਏ ਫੈਂਸੀ ਅਤੇ ਖਾਸ ਨੰਬਰ ਵੀ ਸ਼ਾਮਲ ਕੀਤੇ ਗਏ ਸਨ। ਆਨਲਾਈਨ ਮਾਧਿਅਮ ਰਾਹੀਂ ਹੋਈ ਇਸ ਨੀਲਾਮੀ ਵਿੱਚ ਸ਼ਹਿਰ ਦੇ ਵਾਹਨ ਮਾਲਕਾਂ ਨੇ ਵੱਡੀ ਗਿਣਤੀ ਵਿੱਚ ਹਿੱਸਾ ਲਿਆ।