ਬਠਿੰਡਾ ਪ੍ਰੀਮੀਅਰ ਲੀਗ ਦਾ 15 ਨੂੰ ਹੋਵੇਗਾ ਸ਼ਾਨਦਾਰ ਆਗਾਜ਼ : ਮੇਅਰ

-ਕਿਹਾ, ਬਠਿੰਡਾ ਦੇ ਨੌਜਵਾਨ ਬਣਨਗੇ ਕ੍ਰਿਕਟ ਦੇ ਸਿਤਾਰੇ, ਬੀਪੀਐੱਲ 2026 ਦੇਵੇਗਾ ਵਰਲਡ ਕੱਪ ਜਿਹਾ ਅਹਿਸਾਸ

ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਬਠਿੰਡਾ : ਨਸ਼ਿਆਂ ਨੂੰ ਜੜ੍ਹੋਂ ਪੁੱਟਣ ਦੇ ਮਕਸਦ ਤਹਿਤ ਪੰਜਾਬ ਦੀ ਆਪ ਸਰਕਾਰ ਵੱਲੋਂ ਮੁੱਖ ਮੰਤਰੀ ਸਰਦਾਰ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਚਲਾਈ ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਤਹਿਤ, ਮੇਅਰ ਪਦਮਜੀਤ ਸਿੰਘ ਮਹਿਤਾ ਨੇ ਇਕ ਇਤਿਹਾਸਕ ਅਤੇ ਪ੍ਰੇਰਣਾਦਾਇਕ ਪਹਿਲਕਦਮੀ ਕੀਤੀ ਹੈ। ਸ਼ਹਿਰ ਦੇ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੋੜਨ ਅਤੇ ਉਨ੍ਹਾਂ ਨੂੰ ਇਕ ਸਕਾਰਾਤਮਕ ਦਿਸ਼ਾ ਦੇਣ ਲਈ ਸ਼ਾਨਦਾਰ ਬਠਿੰਡਾ ਪ੍ਰੀਮੀਅਰ ਲੀਗ ਬੀਪੀਐਲ 2026 ਦਾ ਇਤਿਹਾਸਕ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਸ ਇਤਿਹਾਸਕ ਕ੍ਰਿਕਟ ਲੀਗ ਦਾ ਸ਼ੁਭ ਆਰੰਭ 15 ਫਰਵਰੀ ਨੂੰ ਪੁਲਿਸ ਲਾਈਨ ਗਰਾਊਂਡ ਦੇ ਕਾਪਸ ਕਲੱਬ ਵਿਖੇ ਕੀਤਾ ਜਾਵੇਗਾ। ਬੀਪੀਐੱਲ 2026 ਦੇ ਪਹਿਲੇ ਹੀ ਦਿਨ ਦਰਸ਼ਕਾਂ ਨੂੰ ਜ਼ਬਰਦਸਤ ਰੋਮਾਂਚ ਵੇਖਣ ਨੂੰ ਮਿਲੇਗਾ, ਜਦੋਂ ਵਾਰਡ ਨੰਬਰ 48 ਅਤੇ ਵਾਰਡ ਨੰਬਰ 9 ਦੀਆਂ ਟੀਮਾਂ ਆਹਮੋ-ਸਾਹਮਣੇ ਹੋਣਗੀਆਂ ਤੇ ਚੌਕਿਆਂ ਤੇ ਛੱਕਿਆਂ ਦੀ ਬਾਰਿਸ਼ ਨਾਲ ਮੈਦਾਨ ਗੂੰਜ ਉੱਠੇਗਾ।

ਮੇਅਰ ਪਦਮਜੀਤ ਸਿੰਘ ਮਹਿਤਾ ਨੇ ਜਾਣਕਾਰੀ ਦਿੱਤੀ ਕਿ ਬਠਿੰਡਾ ਦੇ ਇਤਿਹਾਸ ਵਿਚ ਪਹਿਲੀ ਵਾਰ, 50 ਵਾਰਡਾਂ ਦੀਆਂ 50 ਟੀਮਾਂ ਇਸ ਪ੍ਰੀਮੀਅਰ ਲੀਗ ਵਿਚ ਹਿੱਸਾ ਲੈ ਰਹੀਆਂ ਹਨ। ਇਹ ਟੂਰਨਾਮੈਂਟ ਸ਼ਹਿਰ ਦੇ ਨੌਜਵਾਨਾਂ ਲਈ ਆਪਣੀ ਕ੍ਰਿਕਟ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕਰਨ ਲਈ ਇਕ ਸ਼ਕਤੀਸ਼ਾਲੀ ਪਲੇਟਫਾਰਮ ਸਾਬਤ ਹੋਵੇਗਾ। ਬੀਪੀਐੱਲ 2026 ਵਿਚ ਵਿਸ਼ਵ ਕੱਪ ਵਰਗਾ ਅਹਿਸਾਸ ਹੋਵੇਗਾ। ਟੂਰਨਾਮੈਂਟ ਵਿਚ ਕੁਆਰਟਰ ਫਾਈਨਲ, ਸੈਮੀਫਾਈਨਲ ਅਤੇ ਫਾਈਨਲ ਸਮੇਤ ਹਾਈ-ਪ੍ਰੋਫਾਈਲ ਮੈਚ ਹੋਣਗੇ ਤੇ ਜੇਤੂ ਟੀਮਾਂ ਨੂੰ ਆਕਰਸ਼ਕ ਇਨਾਮ ਮਿਲਣਗੇ।

ਉਨ੍ਹਾਂ ਕਿਹਾ ਕਿ 15 ਫਰਵਰੀ ਤੋਂ ਬਾਅਦ ਹਰ ਸ਼ਨੀਵਾਰ ਅਤੇ ਐਤਵਾਰ ਨੂੰ ਅੱਠ-ਅੱਠ ਮੈਚ ਖੇਡੇ ਜਾਣਗੇ। ਸਾਰੇ ਮੈਚ ਪੂਲ ਸਿਸਟਮ ਅਧੀਨ ਖੇਡੇ ਜਾਣਗੇ। ਹਰੇਕ ਪੂਲ ਵਿੱਚ ਪੰਜ ਟੀਮਾਂ ਹੋਣਗੀਆਂ ਤੇ ਹਰੇਕ ਟੀਮ ਆਪਣੇ ਪੂਲ ਦੀਆਂ ਦੂਜੀਆਂ ਟੀਮਾਂ ਨਾਲ ਚਾਰ-ਚਾਰ ਮੈਚ ਖੇਡੇਗੀ। ਸਾਰੇ ਮੈਚ ਬੀਪੀਐਲ 20-20 ਫਾਰਮੈਟ ਵਿੱਚ ਹੋਣਗੇ। ਟੂਰਨਾਮੈਂਟ ਢਾਂਚੇ ਦਾ ਵੇਰਵਾ ਦਿੰਦੇ ਹੋਏ ਮੇਅਰ ਮਹਿਤਾ ਨੇ ਦੱਸਿਆ ਕਿ 50 ਟੀਮਾਂ ਵਿੱਚੋਂ ਚੋਟੀ ਦੀਆਂ 24 ਟੀਮਾਂ ਅਗਲੇ ਦੌਰ ਵਿਚ ਜਾਣਗੀਆਂ। ਇਨ੍ਹਾਂ ਵਿੱਚੋਂ, ਚੋਟੀ ਦੀਆਂ ਅੱਠ ਟੀਮਾਂ ਸਿੱਧੇ ਪ੍ਰੀ-ਕੁਆਰਟਰ ਫਾਈਨਲ ਵਿਚ ਜਾਣਗੀਆਂ, ਜਦੋਂ ਕਿ ਬਾਕੀ 16 ਟੀਮਾਂ ਐਲੀਮੀਨੇਸ਼ਨ ਦੌਰ ਵਿਚ ਮੁਕਾਬਲਾ ਕਰਨਗੀਆਂ। ਅੱਠ ਟੀਮਾਂ ਕੁਆਰਟਰ ਫਾਈਨਲ ਵਿਚ ਜਾਣਗੀਆਂ, ਚਾਰ ਸੈਮੀਫਾਈਨਲ ’ਚ ਜਾਣਗੀਆਂ ਅਤੇ ਅੰਤ ਵਿਚ ਦੋ ਟੀਮਾਂ ਫਾਈਨਲ ਵਿਚ ਜਾਣਗੀਆਂ। ਮੇਅਰ ਨੇ ਸਪੱਸ਼ਟ ਕੀਤਾ ਕਿ ਇਸ ਪੂਰੇ ਟੂਰਨਾਮੈਂਟ ਵਿਚ ਕੋਈ ਵੀ ਨਗਰ ਨਿਗਮ ਫੰਡ ਨਹੀਂ ਵਰਤਿਆ ਗਿਆ। ਬਠਿੰਡਾ ਦੇ ਕਾਰੋਬਾਰੀਆਂ ਨੇ ਸਾਰੇ 50 ਵਾਰਡਾਂ ਦੀਆਂ ਟੀਮਾਂ ਨੂੰ ਸਪਾਂਸਰ ਕੀਤਾ ਹੈ, ਜਿਨ੍ਹਾਂ ਨੇ ਸਮਾਜ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਦਾ ਪ੍ਰਦਰਸ਼ਨ ਕੀਤਾ ਹੈ।ਉਨ੍ਹਾਂ ਕਿਹਾ ਕਿ 15 ਫਰਵਰੀ ਤੋਂ ਬਾਅਦ, 21-22 ਫਰਵਰੀ, 28 ਫਰਵਰੀ-1 ਮਾਰਚ, 7-8 ਮਾਰਚ, 14-15 ਮਾਰਚ, 21-22 ਮਾਰਚ ਤੇ 28-29 ਮਾਰਚ ਨੂੰ ਮੈਚ ਖੇਡੇ ਜਾਣਗੇ, ਕੁੱਲ 100 ਮੈਚ ਹੋਣਗੇ। ਕੁਆਰਟਰ ਫਾਈਨਲ, ਸੈਮੀਫਾਈਨਲ ਅਤੇ ਫਾਈਨਲ ਦੇ ਸਥਾਨਾਂ ਅਤੇ ਵਿਸਤ੍ਰਿਤ ਸ਼ਡਿਊਲ ਦਾ ਐਲਾਨ ਸਮੇਂ-ਸਮੇਂ 'ਤੇ ਕੀਤਾ ਜਾਵੇਗਾ। ਮੇਅਰ ਨੇ ਕਿਹਾ ਕਿ ਬਠਿੰਡਾ ਪ੍ਰੀਮੀਅਰ ਲੀਗ ਨਾ ਸਿਰਫ਼ ਕ੍ਰਿਕਟ ਦਾ ਇਕ ਮੈਗਾ-ਈਵੈਂਟ ਹੋਵੇਗਾ, ਸਗੋਂ ਨਸ਼ਿਆਂ ਵਿਰੁੱਧ ਲੜਾਈ ਵਿਚ ਨੌਜਵਾਨਾਂ ਨੂੰ ਇਕ ਨਵਾਂ ਰਸਤਾ ਵੀ ਦਿਖਾਏਗਾ, ਜਿਨ੍ਹਾਂ ਨੂੰ ਬੀਪੀਐਲ. 20-20 ਇਕ ਵੱਡਾ ਕ੍ਰਿਕਟ ਪਲੇਟਫਾਰਮ ਪ੍ਰਦਾਨ ਕਰੇਗਾ।