ਨਥਾਣਾ-ਗੰਗਾ ਰੋਡ ਖ਼ਰਾਬ, ਮੇਲੇ ’ਚ ਆਉਣ ਵਾਲੇ ਪਰੇਸ਼ਾਨ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਨਥਾਣਾ

ਬਾਬਾ ਕਾਲੂ ਨਾਥ ਜੀ ਦਾ ਜੋੜ ਮੇਲਾ ਅੱਜ ਤੋਂ 21 ਮਾਰਚ ਤਕ ਨਥਾਣਾ ਤੇ ਗੰਗਾ ਪਿੰਡ ’ਚ ਮਨਾਇਆ ਜਾ ਰਿਹਾ ਹੈ। ਇਸ ਦੌਰਾਨ ਦੂਰ-ਦੂਰ ਤੋਂ ਵੱਡੀ ਗਿਣਤੀ ’ਚ ਸ਼ਰਧਾਲੂ ਦਰਸ਼ਨ ਲਈ ਪਹੁੰਚ ਰਹੇ ਹਨ। ਮੇਲੇ ਦੇ ਮੁੱਖ ਸਥਾਨਾਂ ਵਿੱਚ ਤਪ ਸਥਾਨ ਮੰਦਰ ਬਾਬਾ ਕਾਲੂ ਨਾਥ ਜੀ, ਸਰੋਵਰ ਗੰਗਾ ਮਾਈ, ਬਲਿੰਦ ਬਾਬਾ ਕਾਲੂ ਨਾਥ ਜੀ, ਸਰਬਾਂਗੀ ਟਿੱਲਾ ਬਾਬਾ ਕਾਲੂ ਨਾਥ ਜੀ, ਡੇਰਾ ਬਾਬਾ ਰਾਜਾ ਰਾਮ ਜੀ ਨਥਾਣਾ ਤੇ ਡੇਰਾ ਅਲੋਪ ਟਿੱਲਾ ਸ਼ਾਮਲ ਹਨ। ਇਨ੍ਹਾਂ ਤਕ ਜਾਣ ਵਾਲੇ ਬਹੁਤ ਸਾਰੇ ਰਸਤੇ ਠੀਕ ਹਾਲਤ ਵਿੱਚ ਹਨ। ਪਰ ਨਥਾਣਾ-ਗੰਗਾ ਰਸਤਾ ਖਰਾਬ ਹੋਣ ਕਾਰਨ ਸ਼ਰਧਾਲੂਆਂ ਨੂੰ ਕਾਫੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਖ਼ਾਸ ਕਰਕੇ ਨਥਾਣਾ ਬੱਸ ਅੱਡੇ ਅੱਗੇ ਵਾਲਾ ਬਾਈਪਾਸ, ਜੋ ਗੰਗਾ ਪਿੰਡ ਅਤੇ ਗੋਨਿਆਣਾ ਰੋਡ ਨਾਲ ਜੁੜਦਾ ਹੈ ਤੇ ਫਰੀਦਕੋਟ ਜ਼ਿਲ੍ਹੇ ਤੋਂ ਆਉਣ ਵਾਲੇ ਸ਼ਰਧਾਲੂਆਂ ਦਾ ਮੁੱਖ ਰਸਤਾ ਹੈ, ਕਾਫ਼ੀ ਜਰਜਰ ਹਾਲਤ ਵਿਚ ਹੈ। ਸੜਕ 'ਤੇ ਖੱਡੇ ਜ਼ਿਆਦਾ ਹਨ ਅਤੇ ਕਈ ਥਾਵਾਂ 'ਤੇ ਰਸਤਾ ਉੱਚਾ-ਨੀਵਾਂ ਹੋ ਗਿਆ ਹੈ। ਗੰਗਾ ਪਿੰਡ ਵੱਲ ਜਾਣ ਵਾਲਾ ਰਸਤਾ ਪਾਈਪ ਲਾਈਨ ਬਿਛਾਉਣ ਕਾਰਨ ਖੋਦਿਆ ਗਿਆ ਹੈ, ਜਿਸ ਨੂੰ ਅਸਥਾਈ ਤੌਰ 'ਤੇ ਮਿੱਟੀ ਨਾਲ ਢੱਕ ਕੇ ਖੋਲ੍ਹਿਆ ਗਿਆ ਹੈ। ਸੜਕ ਦੇ ਕੰਧਿਆਂ 'ਤੇ ਬਜਰੀ ਦੇ ਢੇਰ ਲੱਗੇ ਹੋਏ ਹਨ, ਜਿਸ ਕਾਰਨ ਹਾਦਸਿਆਂ ਦਾ ਖ਼ਤਰਾ ਵਧ ਗਿਆ ਹੈ।

ਸਥਾਨਕ ਦੁਕਾਨਦਾਰ ਤੇ ਵਾਸੀ ਵੀ ਇਸ ਸਮੱਸਿਆ ਨਾਲ ਪ੍ਰਭਾਵਿਤ ਹੋ ਰਹੇ ਹਨ। ਰਸਤੇ 'ਤੇ ਧੂੜ ਉੱਡਦੀ ਰਹਿੰਦੀ ਹੈ ਅਤੇ ਪਾਣੀ ਛਿੜਕਣ 'ਤੇ ਚਿੱਕੜ ਬਣ ਜਾਂਦਾ ਹੈ, ਜਿਸ ਨਾਲ ਫਿਸਲਣ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ। ਭਾਰੀ ਵਾਹਨਾਂ ਦੇ ਗੁਜ਼ਰਨ ਕਾਰਨ ਮਿੱਟੀ ਧਸਣ ਦਾ ਡਰ ਵੀ ਹੈ। ਸਲਾਨੀ ਪੱਤੀ ਤੋਂ ਜੰਡਵਾਲਾ ਰੋਡ ਤਕ ਲਗਭਗ 2 ਕਿਲੋਮੀਟਰ ਰਸਤੇ ਦੀ ਹਾਲਤ ਬਹੁਤ ਖ਼ਰਾਬ ਹੈ ਅਤੇ ਹਰ ਜਗ੍ਹਾ ਖੱਡੇ ਪਏ ਹੋਏ ਹਨ। ਦੁਰਗਾ ਮੰਦਰ ਨਥਾਣਾ ਦੇ ਸਾਹਮਣੇ ਵਾਲਾ ਪੈਦਲ ਮੁੱਖ ਰਸਤਾ ਵੀ ਖ਼ਰਾਬ ਹੈ, ਜਿਸ ਨਾਲ ਮੇਲੇ ਵਿਚ ਆਉਣ ਵਾਲੇ ਬੱਚੇ, ਬਜ਼ੁਰਗ ਅਤੇ ਰੋਜ਼ਾਨਾਂ ਆਉਣ-ਜਾਣ ਵਾਲੇ ਲੋਕ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਹਨ। ਖੇਤਰ ਦੇ ਲੋਕਾਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਮੇਲੇ ਦੌਰਾਨ ਸ਼ਰਧਾਲੂਆਂ ਦੀ ਸਹੂਲਤ ਲਈ ਸੜਕਾਂ ਦੀ ਤੁਰੰਤ ਮੁਰੰਮਤ ਕੀਤੀ ਜਾਵੇ, ਤਾਂ ਜੋ ਕਿਸੇ ਵੀ ਤਰ੍ਹਾਂ ਦੀ ਦੁਰਘਟਨਾ ਤੋਂ ਬਚਿਆ ਜਾ ਸਕੇ।