ਬਠਿੰਡਾ ਪ੍ਰੀਮੀਅਰ ਲੀਗ ਸ਼ੁਰੂ, ਮੇਅਰ ਵਾਰਡ ਨੇ ਜਿੱਤਿਆ ਪਹਿਲਾ ਮੈਚ

ਸੀਨੀਅਰ ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਬਠਿੰਡਾ : ਪੰਜਾਬ ਸਰਕਾਰ ਦੀ “ਯੁੱਧ ਨਸ਼ਿਆਂ ਵਿਰੁੱਧ” ਮੁਹਿੰਮ ਦੇ ਸਮਰਥਨ ਵਿਚ ਕਰਵਾਈ ਬਠਿੰਡਾ ਪ੍ਰੀਮੀਅਰ ਲੀਗ (ਬੀਪੀਐਲ ਟੀ20) ਦਾ ਉਦਘਾਟਨ ਪੁਲਿਸ ਲਾਈਨਜ਼ ਸਥਿਤ ਕਾਪਸ ਕਲੱਬ ਗਰਾਊਂਡ ਵਿਚ ਧੂਮਧਾਮ ਨਾਲ ਕੀਤਾ ਗਿਆ। ਲੀਗ ਦੇ ਪਹਿਲੇ ਹੀ ਮੈਚ ਵਿੱਚ ਮੇਅਰ ਵਾਰਡ ਨੰਬਰ 48 ਦੀ ਟੀਮ ਨੇ ਵਾਰਡ ਨੰਬਰ 9 ਦੀ ਟੀਮ ਨੂੰ ਰੋਮਾਂਚਕ ਮੁਕਾਬਲੇ ਵਿੱਚ ਹਰਾਕੇ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਮੇਅਰ ਪਦਮਜੀਤ ਸਿੰਘ ਮਹਿਤਾ ਦੀ ਅਗਵਾਈ ਹੇਠ ਇਸ ਪਹਿਲ ਦਾ ਉਦੇਸ਼ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੋੜ ਕੇ ਨਸ਼ਿਆਂ ਤੋਂ ਦੂਰ ਰੱਖਣਾ ਹੈ। ਮੈਚ ਦੌਰਾਨ ਵਾਰਡ ਨੰਬਰ 9 (ਦਿੱਲੀ ਹਾਰਟ ਇੰਸਟੀਚਿਊਟ ਟੀਮ) ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 20 ਓਵਰਾਂ ਵਿੱਚ 174 ਦੌੜਾਂ ਬਣਾਈਆਂ। ਜਵਾਬ ਵਿਚ ਮੇਅਰ ਵਾਰਡ ਨੰਬਰ 48 (ਐਫ ਲਾਉਂਜ ਟੀਮ) ਨੇ ਹਮਲਾਵਰ ਅੰਦਾਜ਼ ਵਿੱਚ ਖੇਡਦਿਆਂ ਸਿਰਫ਼ 12.5 ਓਵਰਾਂ ਵਿੱਚ 6 ਵਿਕਟਾਂ ਦੇ ਨੁਕਸਾਨ ‘ਤੇ 177 ਦੌੜਾਂ ਬਣਾ ਕੇ ਟੀਚਾ ਹਾਸਲ ਕਰ ਲਿਆ। ਦਰਸ਼ਕਾਂ ਨੇ ਚੌਕਿਆਂ-ਛੱਕਿਆਂ ‘ਤੇ ਤਾੜੀਆਂ ਨਾਲ ਖਿਡਾਰੀਆਂ ਦਾ ਹੌਸਲਾ ਵਧਾਇਆ। ਅਰਵਿੰਦ ਉਰਫ਼ “ਵਿਰਾਟ” ਨੂੰ ਮੈਨ ਆਫ਼ ਦਿ ਮੈਚ ਐਲਾਨਿਆ। ਜਸ਼ਨ ਨੂੰ ਸਰਵੋਤਮ ਪ੍ਰਦਰਸ਼ਨਕਾਰ, ਸ਼ੁਭਮ ਨੂੰ ਸ਼ਾਨਦਾਰ ਪ੍ਰਦਰਸ਼ਨ, ਪਲਵਿੰਦਰ ਤੱਪੀ ਨੂੰ ਕੀਮਤੀ ਯੋਗਦਾਨ ਅਤੇ ਬ੍ਰਹਮ ਠਾਕੁਰ ਨੂੰ ਕੈਚ ਆਫ਼ ਦ ਮੈਚ ਦਾ ਖਿਤਾਬ ਮਿਲਿਆ। ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਦੇ ਪ੍ਰਧਾਨ ਅਮਰਜੀਤ ਮਹਿਤਾ ਮੁੱਖ ਮਹਿਮਾਨ ਵਜੋਂ ਮੌਜੂਦ ਰਹੇ। ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਪਹਿਲ ਨਾਲ ਨੌਜਵਾਨਾਂ ਨੂੰ ਆਪਣੀ ਯੋਗਤਾ ਦਿਖਾਉਣ ਲਈ ਵੱਡਾ ਮੰਚ ਮਿਲੇਗਾ ਅਤੇ ਸਮਾਜ ਨੂੰ ਨਸ਼ਾ-ਮੁਕਤ ਬਣਾਉਣ ਵਿੱਚ ਮਦਦ ਮਿਲੇਗੀ। ਸ਼ਹਿਰ ਦੇ 50 ਵਾਰਡਾਂ ਦੀਆਂ ਟੀਮਾਂ ਵਾਲੀ ਇਹ ਲੀਗ ਹਰ ਸ਼ਨੀਵਾਰ ਅਤੇ ਐਤਵਾਰ ਨੂੰ ਕਰਵਾਈ ਜਾਵੇਗੀ। ਅੱਗੇ ਚੱਲ ਕੇ ਕੁਆਰਟਰ ਫਾਈਨਲ, ਸੈਮੀਫਾਈਨਲ ਅਤੇ ਫਾਈਨਲ ਮੁਕਾਬਲੇ ਹੋਣਗੇ। ਬਠਿੰਡਾ ਵਿਚ ਖੇਡਾਂ ਅਤੇ ਸਮਾਜਿਕ ਜਾਗਰੂਕਤਾ ਨੂੰ ਜੋੜਦੀ ਇਹ ਪਹਿਲ ਨੌਜਵਾਨਾਂ ਲਈ ਪ੍ਰੇਰਣਾ ਬਣ ਰਹੀ ਹੈ।