ਉੱਤਰੀ ਰੇਲਵੇ ਦੇ ਡੀਆਰਐੱਮ ਵੱਲੋਂ ਰਾਮਾਂ ਮੰਡੀ ਰੇਲਵੇ ਸਟੇਸ਼ਨ ਦਾ ਦੌਰਾ

ਮੁਕੇਸ਼ ਸੋਨੀ, ਪੰਜਾਬੀ ਜਾਗਰਣ, ਰਾਮਾਂ ਮੰਡੀ : ਸਥਾਨਕ ਸ਼ਹਿਰ ਦੇ ਰੇਲਵੇ ਸਟੇਸ਼ਨ ‘ਤੇ ਨੋਰਥਰਨ ਰੇਲਵੇ, ਬੀਕਾਨੇਰ ਡਿਵੀਜ਼ਨ ਦੇ ਡਿਵੀਜ਼ਨਲ ਰੇਲਵੇ ਮੈਨੇਜਰ (ਡੀਆਰਐਮ) ਗੌਰਵ ਗੋਬਿੰਦ ਵੱਲੋਂ ਦੌਰਾ ਕੀਤਾ ਗਿਆ। ਇਸ ਮੌਕੇ ਰਾਮਾਂ ਮੰਡੀ ਦੀ ਭਾਜਪਾ ਜਥੇਬੰਦੀ ਦੇ ਆਗੂਆਂ ਤੇ ਇਲਾਕੇ ਦੀਆਂ ਪ੍ਰਮੁੱਖ ਸਮਾਜ ਸੇਵੀ, ਧਾਰਮਿਕ ਅਤੇ ਵਪਾਰੀ ਸੰਸਥਾਵਾਂ ਵੱਲੋਂ ਰਾਮਾਂ ਮੰਡੀ ਸਟੇਸ਼ਨ ‘ਤੇ ਕੁਝ ਲੰਬੇ ਰੂਟ ਦੀਆਂ ਰੇਲ ਗੱਡੀਆਂ ਦੇ ਠਹਿਰਾਅ ਅਤੇ ਕੁਝ ਗੱਡੀਆਂ ਦੇ ਰੂਟ ਵਧਾਉਣ ਦੀ ਮੰਗ ਰੱਖੀ ਗਈ। ਭਾਜਪਾ ਜ਼ਿਲ੍ਹਾ ਪ੍ਰਧਾਨ ਬਠਿੰਡਾ ਦਿਹਾਤੀ ਗੁਰਪ੍ਰੀਤ ਸਿੰਘ ਮਲੂਕਾ ਦੀ ਅਗਵਾਈ ਹੇਠ ਜ਼ਿਲ੍ਹਾ ਸਕੱਤਰ ਭਾਜਪਾ ਅਮਨ ਕਾਂਤ ਚੱਠਾ ਸਮੇਤ ਹੈਲਪ ਲਾਈਨ ਵੈਲਫੇਅਰ, ਗੀਤਾ ਭਵਨ, ਸਹਾਰਾ ਕਲੱਬ, ਮਹਿੰਦੀਪੁਰ ਬਾਲਾ ਜੀ ਕਮੇਟੀ, ਆਰਐਸਐਸ ਰਾਮਾਂ ਇਕਾਈ, ਰੇਲਵੇ ਬੋਰਡ ਰਾਮਾਂ ਤੇ ਵੱਖ-ਵੱਖ ਧਾਰਮਿਕ ਤੇ ਵਪਾਰੀ ਸੰਸਥਾਵਾਂ ਦੇ ਨੁਮਾਇੰਦਿਆਂ ਵੱਲੋਂ ਡੀਆਰਐੱਮ ਗੌਰਵ ਗੋਬਿੰਦ ਨੂੰ ਲਿਖਤੀ ਮੰਗ ਪੱਤਰ ਸੌਂਪਿਆ ਗਿਆ। ਆਗੂਆਂ ਵੱਲੋਂ ਅਜਮੇਰ–ਅੰਮ੍ਰਿਤਸਰ ਐਕਸਪ੍ਰੈਸ ਅਤੇ ਗੋਰਖਧਾਮ ਐਕਸਪ੍ਰੈਸ ਦੇ ਰਾਮਾਂ ਮੰਡੀ ਰੇਲਵੇ ਸਟੇਸ਼ਨ ‘ਤੇ ਠਹਿਰਾਅ ਦੀ ਮੰਗ ਕੀਤੀ ਗਈ। ਇਸ ਤੋਂ ਇਲਾਵਾ ਰਾਮਾਂ ਮੰਡੀ ਰਾਹੀਂ ਗੁਜ਼ਰਨ ਵਾਲੀਆਂ ਕੁਝ ਹੋਰ ਰੇਲ ਗੱਡੀਆਂ ਦੇ ਰੂਟ ਵਧਾਉਣ ਦੀ ਵੀ ਮੰਗ ਰੱਖੀ ਗਈ। ਆਗੂਆਂ ਨੇ ਕਿਹਾ ਕਿ ਰਾਮਾਂ ਮੰਡੀ ਇਕ ਵੱਡੀ ਅਨਾਜ ਮੰਡੀ ਹੈ, ਜਿਸ ਕਾਰਨ ਵਪਾਰੀ ਵਰਗ ਅਤੇ ਆਮ ਲੋਕਾਂ ਦੀ ਸਹੂਲਤ ਲਈ ਰੇਲ ਸੇਵਾਵਾਂ ਦਾ ਵਧਾਇਆ ਜਾਣਾ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਦੱਸਿਆ ਕਿ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਨੂੰ ਵੀ ਰਾਮਾਂ ਮੰਡੀ ਸਟੇਸ਼ਨ ਹੀ ਰੇਲ ਲਿੰਕ ਨਾਲ ਜੋੜਦਾ ਹੈ, ਜਿਸ ਨਾਲ ਧਾਰਮਿਕ ਯਾਤਰੀਆਂ ਨੂੰ ਵੱਡੀ ਸਹੂਲਤ ਮਿਲਦੀ ਹੈ। ਇਸ ਤੋਂ ਇਲਾਵਾ ਰਾਮਾਂ ਰਿਫਾਈਨਰੀ ਨਾਲ ਜੁੜੇ ਕਰਮਚਾਰੀਆਂ ਅਤੇ ਵਪਾਰੀਆਂ ਲਈ ਵੀ ਇਨ੍ਹਾਂ ਮੰਗਾਂ ਦੀ ਪੂਰਤੀ ਨਾਲ ਆਵਾਜਾਈ ਦੀ ਸਹੂਲਤ ਵਿੱਚ ਵਾਧਾ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਲੋਕ ਸਭਾ ਹਲਕਾ ਬਠਿੰਡਾ ਦੇ ਕਨਵੀਨਰ ਪਰਮਪਾਲ ਕੌਰ ਸਿੱਧੂ ਅਤੇ ਗੁਰਪ੍ਰੀਤ ਸਿੰਘ ਮਲੂਕਾ ਵੱਲੋਂ ਰਾਮਪੁਰਾ, ਮਾਨਸਾ, ਬਠਿੰਡਾ, ਗੋਨਿਆਣਾ ਅਤੇ ਰਾਮਾਂ ਮੰਡੀ ਨਾਲ ਸਬੰਧਿਤ ਰੇਲਵੇ ਮੰਗਾਂ ਨੂੰ ਲਗਾਤਾਰ ਉਠਾਇਆ ਜਾ ਰਿਹਾ ਹੈ। ਇਸ ਮੌਕੇ ਤੇਲੂ ਰਾਮ ਦੁਆਰਕਾ ਦਾਸ, ਨਿਰਮਲ ਸ਼ਰਮਾ, ਹਨੀ ਸ਼ਰਮਾ, ਡਾ. ਗੌਰਵ ਵਰਮਾ, ਰਾਕੇਸ਼ ਮਹਾਜਨ, ਮੱਖਣ ਲਾਲ ਗਿਆਨਾ, ਦਵਿੰਦਰ ਕੁਮਾਰ ਬਾਂਸਲ (ਭੋਲੀ ਚੱਠਾ), ਸੁਭਾਸ਼ ਗਿਆਨਾ, ਪੰਡਿਤ ਕਲਾਸ਼ ਚੰਦ ਕੌਸ਼ਿਕ, ਬੋਬੀ ਲਹਿਰੀ, ਵਿਕਾਸ, ਮੇਸ਼ੀ ਕਾਂਸਲ, ਡਾ. ਸੋਹਨ ਲਾਲ ਕਲਿਆਣੀ, ਸੁਰਜ ਰਤਨ ਮਹੇਸ਼ਵਰੀ, ਅਸ਼ਵਨੀ ਮਹੇਸ਼ਵਰੀ, ਤਰਸੇਮ ਮਲਕਾਣਾ, ਡਿਕੀ ਮਿੱਤਲ, ਯੁਵਾ ਮੋਰਚਾ ਪ੍ਰਧਾਨ ਜਸਪ੍ਰੀਤ ਸਿੰਘ ਜੱਸਾ ਅਤੇ ਜ਼ਿਲ੍ਹਾ ਮੀਡੀਆ ਕਨਵੀਨਰ ਰਤਨ ਸ਼ਰਮਾ ਮਲੂਕਾ ਹਾਜ਼ਰ ਸਨ।