ਲਗਾਤਾਰ ਘਟਦਾ ਜਾ ਰਿਹਾ ਤਾਪਮਾਨ, ਮੀਂਹ ਨਾਲ ਨਵੇਂ ਸਾਲ ਦੀ ਸ਼ੁਰੂਆਤ

- ਦਸੰਬਰ ਮਹੀਨੇ ’ਚ ਇੱਕ ਵੀ ਦਿਨ ਨਹੀਂ ਰਿਹਾ ਕੋਲਡ ਡੇ ਗੁਰਤੇਜ ਸਿੰਘ ਸਿੱਧੂ, ਪੰਜਾਬੀ ਜਾਗਰਣ ਬਠਿੰਡਾ : ਸਾਲ 2025 ਦੇ ਆਖ਼ਰੀ ਦਿਨ ਬਠਿੰਡਾ ਵਿੱਚ ਮੌਸਮ ਨੇ ਅਚਾਨਕ ਕਰਵਟ ਲਈ ਅਤੇ ਠੰਢ ਵਿੱਚ ਵਾਧਾ ਦਰਜ ਕੀਤਾ ਗਿਆ। ਸਾਲ ਦੇ ਆਖ਼ਰੀ ਦਿਨ 31 ਦਸੰਬਰ ਨੂੰ ਵੱਧ ਤੋਂ ਵੱਧ ਤਾਪਮਾਨ ਘਟ ਕੇ 14 ਡਿਗਰੀ ਸੈਲਸੀਅਸ ਤਕ ਪਹੁੰਚ ਗਿਆ, ਜਦਕਿ ਘੱਟ ਤੋਂ ਘੱਟ ਤਾਪਮਾਨ 7.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਹਾਲਾਂਕਿ ਮੌਸਮ ਵਿਭਾਗ ਦੇ ਮਾਪਦੰਡਾਂ ਅਨੁਸਾਰ ਇਹ ਤਾਪਮਾਨ ਕੋਲਡ-ਡੇ ਦੀ ਸ਼੍ਰੇਣੀ ਵਿੱਚ ਨਹੀਂ ਆਉਂਦਾ, ਪਰ ਫਿਰ ਵੀ ਦਿਨ ਭਰ ਚੱਲਦੀਆਂ ਠੰਢੀਆਂ ਹਵਾਵਾਂ ਅਤੇ ਧੁੰਦ ਕਾਰਨ ਠੰਢ ਦਾ ਅਹਿਸਾਸ ਕਾਫ਼ੀ ਵੱਧ ਰਿਹਾ। ਇਸ ਤੋਂ ਇਕ ਦਿਨ ਪਹਿਲਾਂ 30 ਦਸੰਬਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 16 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਸੀ, ਜਿਸ ਤੋਂ ਸਾਫ਼ ਹੁੰਦਾ ਹੈ ਕਿ ਸਾਲ ਦੇ ਆਖ਼ਰੀ ਦੋ ਦਿਨਾਂ ਦੌਰਾਨ ਤਾਪਮਾਨ ਵਿੱਚ ਲਗਾਤਾਰ ਗਿਰਾਵਟ ਵੇਖਣ ਨੂੰ ਮਿਲੀ ਰਹੀ ਹੈ। ਬੁੱਧਵਾਰ ਦੇਰ ਸ਼ਾਮ ਮੌਸਮ ਨੇ ਹੋਰ ਰੁਖ ਬਦਲਿਆ, ਜਦੋਂ ਸ਼ਹਿਰ ਵਿੱਚ ਹਲਕੀ ਤੋਂ ਦਰਮਿਆਨੀ ਵਰਖਾ ਸ਼ੁਰੂ ਹੋ ਗਈ। ਇਹ ਮੀਂਹ ਨਵੇਂ ਸਾਲ ਦੀ ਸਵੇਰ ਤਕ ਰੁਕ-ਰੁਕ ਕੇ ਜਾਰੀ ਰਿਹਾ, ਜਿਸ ਨਾਲ ਸਾਲ 2026 ਦੀ ਸ਼ੁਰੂਆਤ ਵਰਖਾ ਨਾਲ ਹੋਈ। ਮੀਂਹ ਤੋਂ ਬਾਅਦ ਵਾਤਾਵਰਣ ਵਿੱਚ ਨਮੀ ਵੱਧ ਗਈ ਅਤੇ ਧੁੰਦ ਤੇ ਕੋਹਰੇ ਦਾ ਅਸਰ ਹੋਰ ਵੀ ਗਹਿਰਾ ਹੋ ਗਿਆ। ਵੀਰਵਾਰ ਨੂੰ ਦਿਨ ਭਰ ਸੂਰਜ ਦੇ ਦਰਸ਼ਨ ਨਹੀਂ ਹੋ ਸਕੇ। ਆਸਮਾਨ ਵਿੱਚ ਬੱਦਲ ਛਾਏ ਰਹੇ ਅਤੇ ਵੇਖਣ ਦ੍ਰਿਸ਼ਟਤਾ ਕਾਫ਼ੀ ਘੱਟ ਰਹੀ, ਜਿਸ ਕਾਰਨ ਸੜਕਾਂ ‘ਤੇ ਵਾਹਨਾਂ ਦੀ ਰਫ਼ਤਾਰ ਵੀ ਹੌਲੀ ਪੈ ਗਈ। ਮੌਸਮ ਵਿਭਾਗ ਅਨੁਸਾਰ ਜੇਕਰ ਕਿਸੇ ਦਿਨ ਵੱਧ ਤੋਂ ਵੱਧ ਤਾਪਮਾਨ 10 ਡਿਗਰੀ ਸੈਲਸੀਅਸ ਤੋਂ ਘੱਟ ਜਾਂ ਆਮ ਨਾਲੋਂ 4.5 ਤੋਂ 6.5 ਡਿਗਰੀ ਘੱਟ ਹੋਵੇ ਤਾਂ ਉਸਨੂੰ ਕੋਲਡ-ਡੇ ਮੰਨਿਆ ਜਾਂਦਾ ਹੈ। ਜਦਕਿ ਆਮ ਨਾਲੋਂ 6.5 ਡਿਗਰੀ ਤੋਂ ਵੱਧ ਕਮੀ ਹੋਣ ’ਤੇ ਉਸ ਨੂੰ ਸੀਵੀਅਰ ਕੋਲਡ-ਡੇ ਦੀ ਸ਼੍ਰੇਣੀ ਵਿੱਚ ਰੱਖਿਆ ਜਾਂਦਾ ਹੈ। ਇਸ ਵਾਰ ਦਸੰਬਰ ਮਹੀਨੇ ਦੌਰਾਨ ਰਾਤਾਂ ਤਾਂ ਉਮੀਦ ਨਾਲੋਂ ਠੰਢੀਆਂ ਰਹੀਆਂ, ਪਰ ਦਿਨ ਦਾ ਤਾਪਮਾਨ ਆਮ ਦੇ ਆਸ-ਪਾਸ ਹੀ ਬਣਿਆ ਰਿਹਾ। ਇਸ ਕਾਰਨ ਪੂਰੇ ਮਹੀਨੇ ਦੌਰਾਨ ਇਕ ਵੀ ਕੋਲਡ-ਡੇ ਦਰਜ ਨਹੀਂ ਹੋ ਸਕਿਆ, ਜੋ ਆਪਣੇ ਆਪ ਵਿੱਚ ਇੱਕ ਰਿਕਾਰਡ ਹੈ। ਮੌਸਮ ਵਿਸ਼ੇਸ਼ਗਿਆਨ ਦਾ ਮੰਨਣਾ ਹੈ ਕਿ ਕਮਜ਼ੋਰ ਪੱਛਮੀ ਵਿਘਨ (ਵੈਸਟਰਨ ਡਿਸਟਰਬੈਂਸ) ਇਸਦਾ ਮੁੱਖ ਕਾਰਨ ਰਹੇ। ਦਸੰਬਰ ਦੌਰਾਨ ਪਹਾੜੀ ਖੇਤਰਾਂ ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਵਿੱਚ ਪੂਰੀ ਬਰਫ਼ਬਾਰੀ ਨਹੀਂ ਹੋ ਸਕੀ, ਜਿਸ ਕਾਰਨ ਉੱਤਰ ਵੱਲੋਂ ਆਉਣ ਵਾਲੀਆਂ ਠੰਢੀਆਂ ਹਵਾਵਾਂ ਪੰਜਾਬ ਦੇ ਮੈਦਾਨੀ ਇਲਾਕਿਆਂ ਤਕ ਨਹੀਂ ਪਹੁੰਚ ਸਕੀਆਂ। ਇਸ ਤੋਂ ਇਲਾਵਾ ਪ੍ਰਦੂਸ਼ਣ, ਧੁੰਦ ਅਤੇ ਬੱਦਲ ਰਾਤ ਸਮੇਂ ਧਰਤੀ ਦੀ ਗਰਮੀ ਨੂੰ ਬਾਹਰ ਨਿਕਲਣ ਤੋਂ ਰੋਕ ਰਹੇ ਹਨ, ਜਿਸ ਨਾਲ ਘੱਟ ਤੋਂ ਘੱਟ ਤਾਪਮਾਨ ਵਿੱਚ ਉਮੀਦ ਮੁਤਾਬਿਕ ਗਿਰਾਵਟ ਨਹੀਂ ਆ ਰਹੀ। ਮੌਸਮ ਵਿਭਾਗ ਦਾ ਅਨੁਮਾਨ ਹੈ ਕਿ ਆਉਣ ਵਾਲੇ ਕੁਝ ਦਿਨਾਂ ਤਕ ਕੋਹਰਾ ਅਤੇ ਧੁੰਦ ਬਣੀ ਰਹਿ ਸਕਦੀ ਹੈ। ਤਾਪਮਾਨ ਵਿੱਚ ਹਲਕੀ ਗਿਰਾਵਟ ਦੇ ਆਸਾਰ ਹਨ, ਪਰ ਫਿਲਹਾਲ ਕੜਾਕੇ ਦੀ ਸ਼ੀਤਲ ਲਹਿਰ ਘਟਣ ਦੀ ਸੰਭਾਵਨਾ ਘੱਟ ਹੈ। ਇਸ ਤਰ੍ਹਾਂ ਦਸੰਬਰ 2025 ਬਠਿੰਡਾ ਲਈ ਬਿਨਾਂ ਕੋਲਡ-ਡੇ ਦੇ ਇਤਿਹਾਸ ਵਿੱਚ ਦਰਜ ਹੋ ਗਿਆ, ਜਦਕਿ ਨਵੇਂ ਸਾਲ ਦੀ ਸ਼ੁਰੂਆਤ ਮੀਂਹ ਅਤੇ ਵਧਦੀ ਠੰਢ ਨਾਲ ਹੋਈ।