ਹਾਦਸਿਆਂ ਤੋਂ ਬਚਣ ਲਈ ਗਊਆਂ ’ਤੇ ਰਿਫਲੈਕਟਰ ਲਗਾਏ

ਧੁੰਦ ਦੇ ਦਿਨਾਂ ’ਚ ਗੱਡੀ ਹੌਲੀ ਚਲਾਉਣੀ ਚਾਹੀਦੀ : ਡਾ. ਰੋਹਨ ਮਹਿਰਾ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ ਅੰਮ੍ਰਿਤਸਰ : ਐਂਟੀ-ਕਰਾਈਮ ਐਂਡ ਐਨੀਮਲ ਪ੍ਰੋਟੈਕਸ਼ਨ ਐਸੋਸੀਏਸ਼ਨ ਨੇ ਅੰਮ੍ਰਿਤਸਰ ਟ੍ਰੈਫਿਕ ਪੁਲਿਸ ਦੇ ਸਹਿਯੋਗ ਨਾਲ ਲੋਹਗੜ੍ਹ ਚੌਕ ਤੇ ਸੜਕ ਤੇ ਘੁੰਮਦੀਆਂ ਗਾਵਾਂ ਤੇ ਰਿਫਲੈਕਟਰ ਲਗਾਏ। ਇਸ ਮੌਕੇ ਐਸੋਸੀਏਸ਼ਨ ਦੇ ਚੇਅਰਮੈਨ ਡਾ. ਰੋਹਨ ਮਹਿਰਾ ਨੇ ਕਿਹਾ ਕਿ ਅੰਮ੍ਰਿਤਸਰ ਪੁਲਿਸ ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਭੂਲਰ ਅਤੇ ਏਡੀਸੀਪੀ ਟ੍ਰੈਫਿਕ ਅਮਨਦੀਪ ਕੌਰ, ਏਸੀਪੀ ਪਰਮਜੀਤ ਸਿੰਘ, ਇੰਸਪੈਕਟਰ ਵਿਕਰਾਂਤ ਸ਼ਰਮਾ, ਹੈੱਡ ਕਾਂਸਟੇਬਲ ਸਲਵੰਤ ਸਿੰਘ ਅਤੇ ਲੇਡੀ ਹੈੱਡ ਕਾਂਸਟੇਬਲ ਲਵਪ੍ਰੀਤ ਕੌਰ ਨੇ ਸੰਸਥਾ ਨਾਲ ਮਿਲ ਕੇ ਗਾਵਾਂ ਤੇ ਰਿਫਲੈਕਟਰ ਲਗਾਏ। ਡਾ. ਰੋਹਨ ਮਹਿਰਾ ਨੇ ਕਿਹਾ ਕਿ ਹਰ ਸਾਲ, ਉਨ੍ਹਾਂ ਦੀ ਸੰਸਥਾ ਪੰਜਾਬ ਪੁਲਿਸ (ਟ੍ਰੈਫਿਕ ਐਜੂਕੇਸ਼ਨ ਸੈੱਲ) ਦੇ ਸਹਿਯੋਗ ਨਾਲ ਗਾਵਾਂ ਤੇ ਰਿਫਲੈਕਟਰ ਲਗਾਉਂਦੀ ਹੈ ਤਾਂ ਜੋ ਜਨਤਾ ਸੜਕ ਤੇ ਘੁੰਮਦੀਆਂ ਗਾਵਾਂ ਨੂੰ ਆਸਾਨੀ ਨਾਲ ਦੇਖ ਸਕੇ ਅਤੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ। ਉਨ੍ਹਾਂ ਜਨਤਾ ਨੂੰ ਧੁੰਦ ਦੇ ਦਿਨਾਂ ਵਿਚ ਹੌਲੀ ਗੱਡੀ ਚਲਾਉਣ ਦੀ ਵੀ ਅਪੀਲ ਕੀਤੀ ਤਾਂ ਜੋ ਉਨ੍ਹਾਂ ਦੇ ਨਾਲ-ਨਾਲ ਜਾਨਵਰ ਸੁਰੱਖਿਅਤ ਰਹਿ ਸਕਣ। ਜਿਕਰਯੋਗ ਹੈ ਕਿ ਧੁੰਦ ਦੇ ਦਿਨਾਂ ਵਿਚ ਅਕਸਰ ਹੀ ਅਵਾਰਾ ਪਸ਼ੂ ਵਾਹਨਾਂ ਅੱਗੇ ਆਉਣ ਕਾਰਨ ਹਾਦਸੇ ਵਾਪਰਦੇ ਹਨ। ਇਸ ਮੌਕੇ ਏਸੀਪੀ ਟ੍ਰੈਫਿਕ ਪਰਮਜੀਤ ਸਿੰਘ ਨੇ ਕਿਹਾ ਕਿ ਪੰਜਾਬ ਪੁਲਿਸ ਧੁੰਦ ਦੇ ਦਿਨਾਂ ਵਿਚ ਜਿੱਥੇ ਵੀ ਲੋੜ ਹੋਵੇ ਉੱਥੇ ਰਿਫਲੈਕਟਰ ਲਗਾ ਰਹੀ ਹੈ, ਤਾਂ ਜੋ ਲੋਕ ਤੇ ਜਾਨਵਰ ਸੁਰੱਖਿਅਤ ਰਹਿ ਸਕਣ। ਇਸ ਮੌਕੇ ਸਮਾਜ ਸੇਵਕ ਗੁਲਸ਼ਨ ਭਾਟੀਆ, ਐਸੋਸੀਏਸ਼ਨ ਦੇ ਦੇਵ ਪਾਂਡੇ, ਦਿਵਯਾਂਸ਼, ਸੰਜੀਵ ਸ਼ਰਮਾ, ਬਾਬਾ ਤਰਸੇਮ ਸਿੰਘ, ਪੰਕਜ ਕੇਸ਼ਵ, ਪਵਨ ਕੁਮਾਰ, ਅਕਸ਼ੈ ਸ਼ਰਮਾ, ਕਰਨ ਅਰੋੜਾ ਆਦਿ ਮੌਜੂਦ ਸਨ।