ਹੌਂਡਾ ਏਜੰਸੀ ’ਚ ਲੱਖਾਂ ਦੀ ਚੋਰੀ, ਘਟਨਾ ਸੀਸੀਟੀਵੀ ’ਚ ਕੈਦ

ਸੀਸੀਟੀਵੀ ’ਚ ਘਟਨਾ ਕੈਦ, ਚੋਰ ਤਿਜ਼ੌਰੀ ਲੈ ਜਾਂਦਾ ਦਿਖਾਈ ਦਿੱਤਾ ਵਰਕਸ਼ਾਪ ਵਾਲੇ ਪਾਸੇ ਤੋਂ ਸ਼ਟਰ ਕੱਟ ਕੇ ਸ਼ੋਰੂਮ ’ਚ ਦਾਖਲ ਹੋਇਆ ਮੁਲਜਮ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਅੰਮ੍ਰਿਤਸਰ : ਸ਼ੁੱਕਰਵਾਰ ਦੇਰ ਰਾਤ ਮੋਹਕਮਪੁਰਾ ਥਾਣੇ ਦੇ ਅਧਿਕਾਰ ਖੇਤਰ ਅਧੀਨ ਬਟਾਲਾ ਰੋਡ ਤੇ ਸਥਿਤ ਅਰਨੇਜਾ ਹੌਂਡਾ ਕੰਪਨੀ ਦੇ ਸ਼ੋਰੂਮ ਨੂੰ ਲੁਟੇਰਿਆਂ ਦੇ ਇਕ ਗਿਰੋਹ ਨੇ ਨਿਸ਼ਾਨਾ ਬਣਾਇਆ ਤੇ ਤਿਜ਼ੌਰੀ ਲੈ ਕੇ ਭੱਜ ਗਏ। ਇਹ ਘਟਨਾ ਸੀਸੀਟੀਵੀ ਵਿਚ ਕੈਦ ਹੋ ਗਈ ਹੈ। ਇਕ ਮੁਲਜਮ ਆਪਣੇ ਮੋਢੇ ਤੇ ਤਿਜੋਰੀ ਲੈ ਕੇ ਜਾਂਦਾ ਦਿਖਾਈ ਦੇ ਰਿਹਾ ਹੈ। ਇਸ ਤੋਂ ਪਹਿਲਾਂ ਮੁਲਜਮ ਲੋਹੇ ਦਾ ਸ਼ਟਰ ਕੱਟ ਕੇ ਅੰਦਰ ਦਾਖਲ ਹੋਇਆ ਸੀ। ਸਬ-ਇੰਸਪੈਕਟਰ ਹਰਪਾਲ ਸਿੰਘ ਨੇ ਕਿਹਾ ਕਿ ਕੰਪਨੀ ਦੇ ਮੁਲਾਜਮਾਂ ਦੇ ਬਿਆਨ ਦਰਜ ਕੀਤੇ ਗਏ ਹਨ। ਇਕ ਅਣਪਛਾਤੇ ਦੋਸ਼ੀ ਵਿਰੁੱਧ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਸੀਸੀਟੀਵੀ ਫੁਟੇਜ ਦੇ ਅਧਾਰ ਤੇ ਦੋਸ਼ੀ ਦੀ ਪਛਾਣ ਕੀਤੀ ਜਾ ਰਹੀ ਹੈ। ਪੁਲਿਸ ਨੂੰ ਸ਼ੱਕ ਹੈ ਕਿ ਇਹ ਘਟਨਾ ਕਿਸੇ ਕਰੀਬੀ ਜਾਂ ਭੇਤੀ ਨੇ ਕੀਤੀ ਹੈ। ਕੰਪਨੀ ਮੈਨੇਜਰ ਮਨਜਿੰਦਰ ਸਿੰਘ ਨੇ ਦੱਸਿਆ ਕਿ ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਸੇਫ ਵਿਚ ਕਿੰਨੀ ਨਕਦੀ ਸੀ। ਉਨ੍ਹਾਂ ਨੇ ਇਹ ਜ਼ਰੂਰ ਕਿਹਾ ਕਿ ਉਨ੍ਹਾਂ ਇਕ ਦਿਨ ਦੀ ਸੇਲ ਦੇ ਪੈਸੇ ਸੇਫ ਵਿਚ ਰੱਖੇ ਸਨ। ਮਨਜਿੰਦਰ ਸਿੰਘ ਨੇ ਦੱਸਿਆ ਕਿ ਉਹ ਬਟਾਲਾ ਰੋਡ ਤੇ ਸਥਿਤ ਅਰਨੇਜਾ ਹੌਂਡਾ ਕੰਪਨੀ ਦੇ ਮਾਲਕ ਤ੍ਰਿਮਤ ਇੰਦਰ ਸਿੰਘ ਲਈ ਕਈ ਸਾਲਾਂ ਤੋਂ ਕੰਮ ਕਰ ਰਿਹਾ ਹੈ। ਉਸ ਦੀ ਕੰਪਨੀ ਵਿਚ ਦਰਜਨਾਂ ਮੁਲਾਜਮ ਕੰਮ ਕਰਦੇ ਹਨ। ਸ਼ੁੱਕਰਵਾਰ ਰਾਤ ਨੂੰ ਉਹ ਸਮੇਂ ਸਿਰ ਸ਼ੋਰੂਮ ਬੰਦ ਕਰ ਕੇ ਘਰ ਚਲਾ ਗਿਆ। ਸਵੇਰੇ 8 ਵਜੇ ਦੇ ਕਰੀਬ ਸ਼ੋਰੂਮ ਦੇ ਬਾਹਰ ਤਾਇਨਾਤ ਨਿੱਜੀ ਕੰਪਨੀ ਦੇ ਇੱਕ ਸੁਰੱਖਿਆ ਗਾਰਡ ਨੇ ਉਸ ਨੂੰ ਦੱਸਿਆ ਕਿ ਕਿਸੇ ਨੇ ਇਮਾਰਤ ਦੀ ਕੰਧ ਤੋੜੀ ਹੋਈ ਹੈ। ਇਸ ਬਾਰੇ ਪਤਾ ਲੱਗਣ ਤੇ ਉਹ ਮੌਕੇ ਤੇ ਪਹੁੰਚ ਗਿਆ। ਜਦੋਂ ਸ਼ੋਰੂਮ ਖੋਲ੍ਹਿਆ ਗਿਆ ਤਾਂ ਉਸ ਨੂੰ ਪਤਾ ਲੱਗਾ ਕਿ ਦੋਸ਼ੀ ਵਰਕਸ਼ਾਪ ਰਾਹੀਂ ਕੰਧ ਤੋੜ ਕੇ ਕਮਰੇ ਵਿਚ ਦਾਖਲ ਹੋਇਆ ਸੀ। ਫਿਰ ਦੋਸ਼ੀ ਲੋਹੇ ਦਾ ਸ਼ਟਰ ਕੱਟ ਕੇ ਤਿਜੋਰੀ ਵਾਲੇ ਕਮਰੇ ਵਿਚ ਦਾਖਲ ਹੋ ਗਏ। ਉਹ ਸੇਫ ਨੂੰ ਕੰਧ ਤੋਂ ਹਿਲਾਉਣ ਵਿਚ ਕਾਮਯਾਬ ਹੋ ਗਏ ਅਤੇ ਇਸ ਨੂੰ ਆਪਣੇ ਨਾਲ ਲੈ ਗਏ। ਇਹ ਦੇਖ ਕੇ ਉਸ ਨੇ ਤੁਰੰਤ ਕੰਪਨੀ ਦੇ ਮਾਲਕ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ। ਸੀਸੀਟੀਵੀ ਫੁਟੇਜ ਤੋਂ ਪਤਾ ਲੱਗਾ ਹੈ ਕਿ ਲੁਟੇਰਿਆਂ ਦੇ ਇਕ ਗਿਰੋਹ ਦੇ ਮੈਂਬਰਾਂ ਨੇ ਇਹ ਘਟਨਾ ਨੂੰ ਅੰਜਾਮ ਦਿੱਤਾ ਹੈ।