ਵੱਧ ਰਹੇ ਡਿਜ਼ੀਟਲ ਖਤਰਿਆਂ ਤੋਂ ਜਾਗਰੂਕ ਰਹਿਣ ਦੀ ਲੋੜ : ਰਿਸ਼ਿਤ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਅੰਮ੍ਰਿਤਸਰ : 2025 ’ਚ ਭਾਰਤ ਵਿਚ ਲੋਕਾਂ ਨੂੰ 4,000 ਕਰੋੜ ਤੋਂ ਵੱਧ ਸਪੈਮ ਕਾਲਾਂ ਪ੍ਰਾਪਤ ਹੋਈਆਂ, ਜੋ ਠੱਗੀ, ਪ੍ਰੇਸ਼ਾਨੀ ਤੇ ਡਿਜ਼ੀਟਲ ਖਤਰਿਆਂ ਦੇ ਵੱਧਦੇ ਖਤਰੇ ਨੂੰ ਦਰਸਾਉਂਦੀਆਂ ਹਨ। ਟਰੂਕਾਲਰ ਦੀ ਨਵੀਂ ਰਿਪੋਰਟ ਅਨੁਸਾਰ ਇਨ੍ਹਾਂ ’ਚੋਂ 1,189 ਕਰੋੜ ਅਣਚਾਹੀਆਂ ਕਾਲਾਂ ਉਪਭੋਗਤਾਵਾਂ ਤੱਕ ਪਹੁੰਚਣ ਤੋਂ ਪਹਿਲਾਂ ਹੀ ਬਲੌਕ ਕਰ ਦਿੱਤੀਆਂ ਗਈਆਂ। ਟਰੂਕਾਲਰ ਦੇ ਸੀਈਓ ਰਿਸ਼ਿਤ ਝੁਨਝੁਨਵਾਲਾ ਨੇ ਇਕ ਜਾਗਰੂਕਤਾ ਸੈਮੀਨਾਰ ਦੌਰਾਨ ਕਿਹਾ ਕਿ ਇਸ ਨਾਲ ਲੱਖਾਂ ਲੋਕਾਂ ਨੂੰ ਠੱਗੀ, ਸਮੇਂ ਦੀ ਬਰਬਾਦੀ ਤੇ ਬੇਵਜ੍ਹਾ ਤਣਾਅ ਤੋਂ ਬਚਾਇਆ ਗਿਆ, ਖਾਸ ਕਰਕੇ ਉਸ ਸਮੇਂ ਜਦੋਂ ਦੇਸ਼ ਦੀ ਅਰਥਵਿਵਸਥਾ ਤੇਜ਼ੀ ਨਾਲ ਡਿਜ਼ੀਟਲ ਤੌਰ ‘ਤੇ ਜੁੜ ਰਹੀ ਹੈ। ਦੇਸ਼ ਵਿਚ 100 ਕਰੋੜ ਤੋਂ ਵੱਧ ਸਰਗਰਮ ਫੋਨ ਕੁਨੈਕਸ਼ਨ ਹਨ, ਜੋ ਵਪਾਰ, ਸ਼ਾਸਨ ਤੇ ਨਿੱਜੀ ਸੰਬੰਧਾਂ ਨੂੰ ਅੱਗੇ ਵਧਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾ ਰਹੇ ਹਨ। ਇਸ ਪ੍ਰਸੰਗ ’ਚ ਟਰੂਕਾਲਰ ਨੇ ਆਪਣੀ 2025 ਇੰਡੀਆ ਇਨਸਾਈਟਸ ਰਿਪੋਰਟ ਜਾਰੀ ਕੀਤੀ ਹੈ, ਜੋ ਡਾਟਾ ਦੇ ਜ਼ਰੀਏ ਦਰਸਾਉਂਦੀ ਹੈ ਕਿ ਸਪੈਮ ਅਤੇ ਠੱਗੀ ਦੇ ਮਾਮਲੇ ਦੇਸ਼ ਦੇ ਸੰਚਾਰ ਮਾਹੌਲ ਨੂੰ ਕਿਵੇਂ ਬਦਲ ਰਹੇ ਹਨ ਅਤੇ ਟੈਕਨੋਲੋਜੀ ਹਰ ਰੋਜ਼ ਕਰੋੜਾਂ ਲੋਕਾਂ ਦੀ ਸੁਰੱਖਿਆ ਕਿਵੇਂ ਕਰ ਰਹੀ ਹੈ। ਇਹ ਰਿਪੋਰਟ 2025 ਦੌਰਾਨ ਲਏ ਗਏ ਕਦਮਾਂ ਦੇ ਪ੍ਰਭਾਵ ਨੂੰ ਉਜਾਗਰ ਕਰਦੀ ਹੈ ਅਤੇ ਡਿਜ਼ੀਟਲ ਖਤਰਿਆਂ ਦੇ ਵਿਆਪਕ ਪੱਧਰ ਅਤੇ ਉਨ੍ਹਾਂ ਤੋਂ ਬਚਾਅ ਦੀ ਵੱਧਦੀ ਲੋੜ ਨੂੰ ਵੀ ਸਪੱਸ਼ਟ ਕਰਦੀ ਹੈ। ਅਜਿਹੇ ਦੇਸ਼ ਵਿੱਚ ਜਿੱਥੇ ਕਨੈਕਟਿਵਿਟੀ ਹਰ ਪੱਧਰ ’ਤੇ ਮੌਕਿਆਂ ਨੂੰ ਅੱਗੇ ਵਧਾ ਰਹੀ ਹੈ, ਉੱਥੇ ਭਰੋਸਾ ਸਾਡੀ ਸਭ ਤੋਂ ਕੀਮਤੀ ਡਿਜ਼ੀਟਲ ਸੰਪਤੀ ਬਣ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਠੱਗੀ ਸਿਰਫ਼ ਇੱਕ ਤਕਨੀਕੀ ਸਮੱਸਿਆ ਨਹੀਂ, ਸਗੋਂ ਇਕ ਮਨੁੱਖੀ ਸਮੱਸਿਆ ਵੀ ਹੈ। ਇਹ ਉਨ੍ਹਾਂ ਪਲਾਂ ਵਿਚ ਡਰ, ਜਲਦੀਬਾਜ਼ੀ ਅਤੇ ਅਣਸ਼ਚਿਤਤਾ ਦਾ ਫਾਇਦਾ ਚੁੱਕਦੀ ਹੈ ਜੋ ਸਭ ਤੋਂ ਵੱਧ ਮਹੱਤਵਪੂਰਨ ਹੁੰਦੇ ਹਨ।