ਇਜ਼ਰਾਇਲੀ ਟੂਰਿਸਟ ਨਾਲ ਗੈਂਗਰੇਪ ਦੇ ਤਿੰਨ ਦੋਸ਼ੀਆਂ ਨੂੰ ਮੌਤ ਦੀ ਸਜ਼ਾ, ਸਾਥੀ ਟ੍ਰੈਵਲਰ ਦੀ ਨਹਿਰ 'ਚ ਧੱਕਾ ਕੇ ਕਰ ਦਿੱਤੀ ਸੀ ਹੱਤਿਆ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਕਰਨਾਟਕ ਦੇ ਕੋਪੱਲ ਜ਼ਿਲ੍ਹੇ ਦੀ ਇਕ ਸੈਸ਼ਨ ਕੋਰਟ ਨੇ ਸੋਮਵਾਰ ਨੂੰ ਤਿੰਨ ਜਣਿਆਂ ਨੂੰ ਮੌਤ ਦੀ ਸਜ਼ਾ ਸੁਣਾਈ। ਇਨ੍ਹਾਂ ਨੂੰ ਇੱਕ ਇਜ਼ਰਾਇਲੀ ਨਾਗਰਿਕ ਸਣੇ ਦੋ ਔਰਤਾਂ ਦੇ ਗੈਂਗਰੇਪ ਅਤੇ ਇੱਕ ਪੁਰਸ਼ ਟੂਰਿਸਟ ਦੀ ਹੱਤਿਆ ਦਾ ਦੋਸ਼ੀ ਪਾਇਆ ਗਿਆ ਸੀ। ਇਸ ਅਪਰਾਧ ਨੇ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਸੀ ਅਤੇ ਇਸ ਦੀ ਬਹੁਤ ਨਿੰਦਾ ਹੋਈ ਸੀ।

ਗੰਗਾਵਤੀ ਜ਼ਿਲ੍ਹਾ ਅਤੇ ਸੈਸ਼ਨ ਅਦਾਲਤ 'ਚ ਮੌਤ ਦੀ ਸਜ਼ਾ ਸੁਣਾਈ ਗਈ ਹੈ। ਜੱਜ ਨੇ ਕਿਹਾ ਕਿ ਇਹ ਜੁਰਮ ਰੇਅਰੈਸਟ ਆਫ਼ ਰੇਅਰ ਕੈਟਾਗਰੀ 'ਚ ਆਉਣਾ ਹੈ, ਜਿਸ ਲਈ ਵੱਧ ਤੋਂ ਵੱਧ ਸਜ਼ਾ ਮਿਲਣੀ ਚਾਹੀਦੀ ਹੈ।

ਪਿਛਲੇ ਸਾਲ ਮਾਰਚ 'ਚ ਵਾਪਰੀ ਸੀ ਘਟਨਾ

ਦੋਸ਼ੀਆਂ ਦੀ ਪਛਾਣ ਮੱਲੇਸ਼ ਉਰਫ਼ ਹੰਡੀਮੱਲਾ, ਸਾਈ ਅਤੇ ਸ਼ਰਨੱਪਾ ਵਜੋਂ ਹੋਈ ਹੈ। ਅਦਾਲਤ ਨੇ ਪਿਛਲੇ ਸਾਲ ਮਾਰਚ 'ਚ ਵਾਪਰੇ ਇਸ ਮਾਮਲੇ 'ਚ ਉਨ੍ਹਾਂ ਨੂੰ ਜਬਰ ਜਨਾਹ ਅਤੇ ਹੱਤਿਆ ਦਾ ਦੋਸ਼ੀ ਠਹਿਰਾਉਂਦੇ ਹੋਏ ਇਹ ਸਜ਼ਾ ਸੁਣਾਈ।

ਪੈਸੇ ਨਾ ਦੇਣ 'ਤੇ ਕਰ ਦਿੱਤੀ ਹੱਤਿਆ

ਇਹ ਘਟਨਾ ਹੰਪੀ ਨੇੜੇ ਸਨਾਪੁਰਾ 'ਚ ਤੁੰਗਭੱਦਰਾ ਲੈਫਟ ਬੈਂਕ ਕੈਨਾਲ ਕੋਲ ਵਾਪਰੀ ਸੀ। ਪੁਲਿਸ ਨੇ ਦੱਸਿਆ ਕਿ ਤਿੰਨੇ ਦੋਸ਼ੀਆਂ ਨੇ 6 ਮਾਰਚ, 2025 ਦੀ ਰਾਤ ਨੂੰ ਦੋ ਔਰਤਾਂ ਸਰਵਾਈਵਰ, ਇਕ ਇਜ਼ਰਾਇਲੀ ਟੂਰਿਸਟ ਅਤੇ ਇਕ ਹੋਮਸਟੇ ਆਪ੍ਰੇਟਰ, ਅਤੇ ਤਿੰਨ ਹੋਰ ਪੁਰਸ਼ ਟੂਰਿਸਟ ਦੋਸਤਾਂ ਤੋਂ ਪੈਸੇ ਮੰਗੇ ਸਨ।

ਮਨ੍ਹਾ ਕਰਨ 'ਤੇ, ਤਿੰਨਾਂ ਨੇ ਕਥਿਤ ਤੌਰ 'ਤੇ ਤਿੰਨ ਪੁਰਸ਼ ਟੂਰਿਸਟਾਂ ਨੂੰ ਨਹਿਰ ਵਿੱਚ ਧੱਕਾ ਦੇ ਦਿੱਤਾ ਅਤੇ ਦੋ ਔਰਤਾਂ ਨਾਲ ਜਬਰ ਜਨਾਹ ਕੀਤਾ। ਨਹਿਰ 'ਚ ਸੁੱਟੇ ਗਏ ਦੋ ਪੁਰਸ਼ ਤੈਰ ਕੇ ਸੁਰੱਖਿਅਤ ਨਿਕਲ ਗਏ, ਜਦੋਂਕਿ ਓਡਿਸ਼ਾ ਦਾ ਇਕ ਟੂਰਿਸਟ ਨਹਿਰ ਵਿੱਚ ਡੁੱਬ ਗਿਆ।