ਦੇਸ਼ ਭਰ ’ਚ ਰੁਕਣਗੇ Ola, Uber ਤੇ Rapido ਦੇ ਪਹੀਏ, ਅੱਜ ਹੜਤਾਲ ਦਾ ਐਲਾਨ; ਕੀ ਹਨ ਮੰਗਾਂ?

ਡਿਜੀਟਲ ਡੈਸਕ, ਨਵੀਂ ਦਿੱਲੀ। ਅੱਜ ਯਾਨੀ 7 ਫਰਵਰੀ, ਸ਼ਨੀਵਾਰ ਨੂੰ ਦੇਸ਼ ਭਰ ਵਿੱਚ ਓਲਾ, ਊਬਰ ਅਤੇ ਰੈਪੀਡੋ ਨਾਲ ਜੁੜੇ ਡਰਾਈਵਰਾਂ ਨੇ ਕੰਮ ਬੰਦ ਕਰਨ ਦਾ ਐਲਾਨ ਕੀਤਾ ਹੈ। ਊਬਰ ਅਤੇ ਰੈਪਿਡੋ ਨਾਲ ਜੁੜੇ ਡਰਾਈਵਰ ਆਪਣੀਆਂ ਮੋਬਾਈਲ ਐਪਾਂ ਬੰਦ ਰੱਖਣਗੇ, ਜਿਸ ਕਾਰਨ ਲੋਕ ਆਨਲਾਈਨ ਕਾਰ, ਆਟੋ ਜਾਂ ਬਾਈਕ-ਟੈਕਸੀ ਬੁੱਕ ਨਹੀਂ ਕਰ ਸਕਣਗੇ। ਇਸ ਨਾਲ ਲੋਕਾਂ ਨੂੰ ਭਾਰੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਦਰਅਸਲ, ਤੇਲੰਗਾਨਾ ਗਿਗ ਐਂਡ ਪਲੇਟਫਾਰਮ ਵਰਕਰਜ਼ ਯੂਨੀਅਨ (TGPWU) ਨੇ ਰਾਸ਼ਟਰੀ ਮਜ਼ਦੂਰ ਜਥੇਬੰਦੀਆਂ ਨਾਲ ਮਿਲ ਕੇ ਇਸ ਹੜਤਾਲ ਦਾ ਐਲਾਨ ਕੀਤਾ ਹੈ। ਇਸ ਹੜਤਾਲ ਨੂੰ 'ਆਲ ਇੰਡੀਆ ਬ੍ਰੇਕਡਾਊਨ' (All India Breakdown) ਦਾ ਨਾਂ ਦਿੱਤਾ ਗਿਆ ਹੈ।

ਕਿਉਂ ਕਰ ਰਹੇ ਹਨ ਹੜਤਾਲ?

ਤੇਲੰਗਾਨਾ ਗਿਗ ਐਂਡ ਪਲੇਟਫਾਰਮ ਵਰਕਰਜ਼ ਯੂਨੀਅਨ ਦਾ ਕਹਿਣਾ ਹੈ ਕਿ ਨਾ ਤਾਂ ਉਨ੍ਹਾਂ ਦਾ ਕੋਈ ਕਿਰਾਇਆ ਤੈਅ ਹੈ ਅਤੇ ਨਾ ਹੀ ਕੋਈ ਨਿਯਮ, ਬੱਸ ਉਨ੍ਹਾਂ ਦਾ ਸ਼ੋਸ਼ਣ ਹੋ ਰਿਹਾ ਹੈ। ਇਸ ਯੂਨੀਅਨ ਨੇ ਕੇਂਦਰੀ ਸੜਕ ਆਵਾਜਾਈ ਮੰਤਰੀ ਨਿਤਿਨ ਗਡਕਰੀ ਨੂੰ ਇਸ ਸਬੰਧੀ ਇੱਕ ਚਿੱਠੀ ਲਿਖੀ ਹੈ।

ਕੈਬ ਡਰਾਈਵਰਾਂ ਦਾ ਕਹਿਣਾ ਹੈ ਕਿ ਸਰਕਾਰ ਵੱਲੋਂ ਕੋਈ ਰੇਟ ਨਿਰਧਾਰਤ ਨਹੀਂ ਹੈ, ਇਸ ਲਈ ਕੰਪਨੀਆਂ ਆਪਣੀ ਮਰਜ਼ੀ ਨਾਲ ਪੈਸੇ ਕੱਟਦੀਆਂ ਹਨ। ਪੱਤਰ ਵਿੱਚ ਲਿਖਿਆ ਗਿਆ, 'ਕੰਪਨੀਆਂ ਵੱਲੋਂ ਹੀ ਕਿਰਾਇਆ ਤੈਅ ਕਰਨ ਕਾਰਨ ਲੱਖਾਂ ਟ੍ਰਾਂਸਪੋਰਟ ਵਰਕਰਾਂ ਵਿੱਚ ਆਮਦਨ ਨੂੰ ਲੈ ਕੇ ਅਸੁਰੱਖਿਆ ਹੈ, ਇਸ ਨਾਲ ਸ਼ੋਸ਼ਣ ਅਤੇ ਖ਼ਰਾਬ ਵਰਕਿੰਗ ਕੰਡੀਸ਼ਨਜ਼ ਪੈਦਾ ਹੁੰਦੀਆਂ ਹਨ।'

ਯੂਨੀਅਨ ਨੇ ਸਰਕਾਰ ਨੂੰ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ। ਯੂਨੀਅਨ ਦਾ ਦਾਅਵਾ ਹੈ ਕਿ ਲੱਖਾਂ ਐਪ-ਅਧਾਰਿਤ ਡਰਾਈਵਰਾਂ ਨੂੰ ਗ਼ਰੀਬੀ ਵਿੱਚ ਧੱਕਿਆ ਜਾ ਰਿਹਾ ਹੈ, ਜਦਕਿ ਐਗਰੀਗੇਟਰ ਕੰਪਨੀਆਂ ਮੁਨਾਫ਼ਾ ਕਮਾ ਰਹੀਆਂ ਹਨ।

ਪੈਨਿਕ ਬਟਨ ਲਗਾਉਣ ਨਾਲ ਵਧੇਗਾ ਬੋਝ

ਇੱਕ ਬਿਆਨ ਵਿੱਚ, ਮਹਾਰਾਸ਼ਟਰ ਕਾਮਗਾਰ ਸਭਾ ਨੇ ਕਿਹਾ ਕਿ ਦੇਸ਼ ਭਰ ਵਿੱਚ ਐਪ-ਅਧਾਰਿਤ ਟੈਕਸੀਆਂ ਅਤੇ ਆਟੋ ਰਿਕਸ਼ਾ ਦੇ ਡਰਾਈਵਰ 7 ਫਰਵਰੀ ਨੂੰ ਬਾਈਕ ਟੈਕਸੀ ਸੇਵਾਵਾਂ ਅਤੇ ਓਲਾ, ਊਬਰ ਅਤੇ ਰੈਪਿਡੋ ਵਰਗੇ ਰਾਈਡ ਐਗਰੀਗੇਟਰਾਂ ਦੀਆਂ "ਮਨਮਾਨੀਆਂ" ਕਿਰਾਇਆ ਨੀਤੀਆਂ ਦੇ ਵਿਰੋਧ ਵਿੱਚ ਦੇਸ਼ ਵਿਆਪੀ ਇੱਕ ਦਿਨ ਦੀ ਹੜਤਾਲ ਕਰਨਗੇ। ਉਨ੍ਹਾਂ ਦਾਅਵਾ ਕੀਤਾ ਕਿ ਲਾਜ਼ਮੀ ਪੈਨਿਕ ਬਟਨ ਲਗਾਉਣ ਨਾਲ ਡਰਾਈਵਰਾਂ 'ਤੇ ਵਿੱਤੀ ਬੋਝ ਵਧਿਆ ਹੈ।

ਡਰਾਈਵਰਾਂ ਦੀਆਂ ਜਥੇਬੰਦੀਆਂ ਨੇ ਓਪਨ ਪਰਮਿਟ ਪਾਲਿਸੀ ਦੇ ਤਹਿਤ ਆਟੋ ਰਿਕਸ਼ਾ ਦੀ ਗਿਣਤੀ ਵਿੱਚ ਹੋਏ ਵਾਧੇ ਕਾਰਨ ਆਮਦਨ ਵਿੱਚ ਹੋ ਰਹੇ ਨੁਕਸਾਨ 'ਤੇ ਵੀ ਚਿੰਤਾ ਜਤਾਈ ਹੈ। ਉਨ੍ਹਾਂ ਨੇ ਇਹ ਵੀ ਦੋਸ਼ ਲਾਇਆ ਕਿ ਗੈਰ-ਕਾਨੂੰਨੀ ਬਾਈਕ ਟੈਕਸੀਆਂ ਨਾਲ ਜੁੜੇ ਹਾਦਸਿਆਂ ਦੇ ਪੀੜਤਾਂ ਨੂੰ ਬੀਮਾ ਲਾਭਾਂ ਤੋਂ ਵਾਂਝਾ ਰੱਖਿਆ ਜਾ ਰਿਹਾ ਹੈ।