ਈਰਾਨ ਦਾ UAE 'ਤੇ ਜ਼ਬਰਦਸਤ ਹਮਲਾ, ਅਬੂ ਧਾਬੀ ਏਅਰਪੋਰਟ ਵਿਸਫੋਟ ’ਚ ਇੱਕ ਦੀ ਮੌਤ; ਦੁਬਈ ’ਚ ਕਈ ਧਮਾਕੇ

ਅਬੂ ਧਾਬੀ ਏਅਰਪੋਰਟਸ ਨੇ ਐਕਸ (X) 'ਤੇ ਇੱਕ ਪੋਸਟ ਵਿੱਚ ਕਿਹਾ ਕਿ ਘਟਨਾ ਵਿੱਚ ਇੱਕ ਏਸ਼ੀਆਈ ਨਾਗਰਿਕ ਦੀ ਮੌਤ ਹੋਈ ਹੈ ਅਤੇ ਸੱਤ ਲੋਕ ਜ਼ਖਮੀ ਹੋਏ ਹਨ, ਹਾਲਾਂਕਿ ਇਸ ਦਾ ਕਾਰਨ ਨਹੀਂ ਦੱਸਿਆ ਗਿਆ ਅਤੇ ਲੋਕਾਂ ਨੂੰ ਅਫ਼ਵਾਹਾਂ ਨਾ ਫੈਲਾਉਣ ਦੀ ਅਪੀਲ ਕੀਤੀ ਗਈ ਹੈ।

ਦੂਜੇ ਪਾਸੇ, ਦੁਬਈ ਦੇ ਮੀਡੀਆ ਆਫ਼ਿਸ ਅਨੁਸਾਰ, ਉੱਥੇ ਇੱਕ ਕੰਕੋਰਸ ਨੂੰ ਮਾਮੂਲੀ ਨੁਕਸਾਨ ਪਹੁੰਚਿਆ ਹੈ, ਜਿਸ ਵਿੱਚ ਚਾਰ ਕਰਮਚਾਰੀ ਜ਼ਖਮੀ ਹੋਏ ਹਨ।

ਟਰਮੀਨਲ ਨੂੰ ਪਹੁੰਚਿਆ ਨੁਕਸਾਨ

ਰਾਤ ਨੂੰ ਹੋਏ ਈਰਾਨੀ ਹਮਲੇ ਦੌਰਾਨ ਇੱਕ ਟਰਮੀਨਲ ਨੂੰ ਨੁਕਸਾਨ ਪਹੁੰਚਿਆ ਹੈ। ਸ਼ਨੀਵਾਰ ਨੂੰ ਇਹਤਿਆਤ ਵਜੋਂ ਦੋਵਾਂ ਹਵਾਈ ਅੱਡਿਆਂ ਤੋਂ ਉਡਾਣਾਂ ਰੋਕ ਦਿੱਤੀਆਂ ਗਈਆਂ। ਦੁਬਈ ਦੇ ਪ੍ਰਸਿੱਧ ਕਿਸ਼ਤੀ ਦੇ ਆਕਾਰ ਵਾਲੇ ਬੁਰਜ ਅਲ ਅਰਬ ਹੋਟਲ ਦੇ ਬਾਹਰੀ ਹਿੱਸੇ 'ਤੇ ਵੀ ਇੱਕ ਡਰੋਨ ਨੂੰ ਡੇਗਣ ਦੌਰਾਨ ਮਾਮੂਲੀ ਅੱਗ ਲੱਗ ਗਈ।

ਦੁਬਈ ਮੀਡੀਆ ਆਫ਼ਿਸ ਅਨੁਸਾਰ ਸਿਵਲ ਡਿਫੈਂਸ ਟੀਮਾਂ ਨੇ ਤੁਰੰਤ ਪਹੁੰਚ ਕੇ ਸਥਿਤੀ 'ਤੇ ਕਾਬੂ ਪਾ ਲਿਆ। ਕਿਸੇ ਦੇ ਜ਼ਖਮੀ ਹੋਣ ਦੀ ਸੂਚਨਾ ਨਹੀਂ ਹੈ। ਸ਼ਹਿਰ ਦੇ ਇੱਕ ਹੋਰ ਲਗਜ਼ਰੀ ਹੋਟਲ ਨੂੰ ਵੀ ਸ਼ਨੀਵਾਰ ਸਵੇਰੇ ਅੱਗ ਲੱਗਣ ਕਾਰਨ ਨੁਕਸਾਨ ਪਹੁੰਚਿਆ, ਜਿਸ ਨੂੰ ਡਿੱਗ ਰਹੀ ਮਿਜ਼ਾਈਲ ਦੇ ਮਲਬੇ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ।

ਬ੍ਰਿਟੇਨ ਦੇ ਵਿਦੇਸ਼ ਦਫ਼ਤਰ (FCDO) ਨੇ ਮਿਡਲ ਈਸਟ ਦੇ ਕਈ ਦੇਸ਼ਾਂ ਵਿੱਚ ਰਹਿ ਰਹੇ ਬ੍ਰਿਟਿਸ਼ ਨਾਗਰਿਕਾਂ ਨੂੰ “ਤੁਰੰਤ ਸੁਰੱਖਿਅਤ ਸਥਾਨ 'ਤੇ ਸ਼ਰਨ ਲੈਣ” ਅਤੇ ਇਜ਼ਰਾਈਲ ਤੇ ਫਲਸਤੀਨ ਦੀ ਯਾਤਰਾ ਤੋਂ ਬਚਣ ਦੀ ਸਲਾਹ ਦਿੱਤੀ ਹੈ।

FCDO ਨੇ ਕਿਹਾ ਕਿ ਸੁਰੱਖਿਅਤ ਸਥਾਨ 'ਤੇ ਘਰ ਦੇ ਅੰਦਰ ਰਹੋ, ਯਾਤਰਾ ਤੋਂ ਬਚੋ ਅਤੇ ਸਥਾਨਕ ਪ੍ਰਸ਼ਾਸਨ ਦੇ ਨਿਰਦੇਸ਼ਾਂ ਦੀ ਪਾਲਣਾ ਕਰੋ। ਹਵਾਈ ਖੇਤਰ ਅਤੇ ਏਅਰਪੋਰਟ ਬੰਦ ਹੋਣ ਕਾਰਨ ਸੰਯੁਕਤ ਅਰਬ ਅਮੀਰਾਤ (UAE) ਅਤੇ ਕਤਰ ਵਰਗੇ ਦੇਸ਼ਾਂ ਵਿੱਚ ਹਜ਼ਾਰਾਂ ਬ੍ਰਿਟਿਸ਼ ਨਾਗਰਿਕ ਫਸੇ ਹੋ ਸਕਦੇ ਹਨ।

ਬ੍ਰਿਟਿਸ਼ ਏਅਰਵੇਜ਼ ਨੇ ਸ਼ਨੀਵਾਰ ਨੂੰ ਦੁਬਈ, ਦੋਹਾ, ਅੰਮਾਨ ਅਤੇ ਅਬੂ ਧਾਬੀ ਦੀਆਂ ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ, ਨਾਲ ਹੀ ਤੇਲ ਅਵੀਵ ਅਤੇ ਬਹਿਰੀਨ ਲਈ ਉਡਾਣਾਂ 3 ਮਾਰਚ ਤੱਕ ਰੱਦ ਕੀਤੀਆਂ ਗਈਆਂ ਹਨ।

ਲੰਡਨ ਤੋਂ ਦੋਹਾ ਜਾ ਰਹੀ ਫਲਾਈਟ ਵਾਪਸ ਮੁੜੀ

ਲੰਡਨ ਤੋਂ ਕਤਰ ਦੀ ਰਾਜਧਾਨੀ ਦੋਹਾ ਜਾ ਰਹੀ ਬ੍ਰਿਟਿਸ਼ ਏਅਰਵੇਜ਼ ਦੀ ਇੱਕ ਉਡਾਣ ਨੂੰ ਵੀ ਅੱਧ ਵਿਚਕਾਰੋਂ ਵਾਪਸ ਮੁੜਨਾ ਪਿਆ। ਲੰਡਨ ਹੀਥਰੋ ਹਵਾਈ ਅੱਡੇ ਨੇ ਦੱਸਿਆ ਕਿ ਕੁਝ ਉਡਾਣਾਂ ਰੱਦ ਜਾਂ ਦੇਰੀ ਨਾਲ ਚੱਲ ਰਹੀਆਂ ਹਨ। ਐਮੀਰੇਟਸ, ਕਤਰ ਏਅਰਵੇਜ਼ ਅਤੇ ਇਤਿਹਾਦ ਏਅਰਵੇਜ਼ ਵਰਗੀਆਂ ਪ੍ਰਮੁੱਖ ਏਅਰਲਾਈਨਾਂ ਦੀਆਂ ਉਡਾਣਾਂ ਵੀ ਪ੍ਰਭਾਵਿਤ ਹੋਈਆਂ ਹਨ।

ਭਾਰਤ ਦੀਆਂ ਏਅਰਲਾਈਨਾਂ 'ਤੇ ਵੀ ਗੰਭੀਰ ਅਸਰ ਪਿਆ ਹੈ। ਭਾਰਤ ਦੇ ਨਾਗਰਿਕ ਉਡਾਣ ਮੰਤਰਾਲੇ ਨੇ ਦੱਸਿਆ ਕਿ ਸ਼ਨੀਵਾਰ ਨੂੰ ਘਰੇਲੂ ਏਅਰਲਾਈਨਾਂ ਦੀਆਂ 400 ਤੋਂ ਵੱਧ ਉਡਾਣਾਂ ਰੱਦ ਕੀਤੀਆਂ ਗਈਆਂ ਅਤੇ ਐਤਵਾਰ ਨੂੰ ਵੀ ਇੰਨੀਆਂ ਹੀ ਉਡਾਣਾਂ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ।

ਦੁਬਈ ਦੇ ਹਵਾਈ ਅੱਡਿਆਂ 'ਤੇ ਠੱਪ ਹੋਈ ਆਵਾਜਾਈ

ਸਭ ਤੋਂ ਜ਼ਿਆਦਾ ਅਸਰ ਦੁਬਈ ਦੇ ਮੁੱਖ ਹਵਾਈ ਅੱਡੇ 'ਤੇ ਪਿਆ ਹੈ, ਜੋ ਅੰਤਰਰਾਸ਼ਟਰੀ ਆਵਾਜਾਈ ਲਈ ਦੁਨੀਆ ਦਾ ਸਭ ਤੋਂ ਵਿਅਸਤ ਹਵਾਈ ਅੱਡਾ ਹੈ। ਸੰਯੁਕਤ ਅਰਬ ਅਮੀਰਾਤ (UAE) ਵੱਲੋਂ ਹਵਾਈ ਖੇਤਰ ਬੰਦ ਕੀਤੇ ਜਾਣ ਤੋਂ ਬਾਅਦ ਦੁਬਈ ਇੰਟਰਨੈਸ਼ਨਲ, ਦੁਬਈ ਵਰਲਡ ਸੈਂਟਰਲ (ਅਲ ਮਕਤੂਮ) ਅਤੇ ਅਬੂ ਧਾਬੀ ਦੇ ਜ਼ਾਇਦ ਇੰਟਰਨੈਸ਼ਨਲ ਹਵਾਈ ਅੱਡੇ 'ਤੇ ਸਾਰੀਆਂ ਉਡਾਣਾਂ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ।

90,000 ਯਾਤਰੀਆਂ ਦਾ ਬੋਝ

ਵਿਸ਼ਲੇਸ਼ਣ ਕੰਪਨੀ Cirium ਦੇ ਅਨੁਸਾਰ, ਦੁਬਈ, ਦੋਹਾ ਅਤੇ ਅਬੂ ਧਾਬੀ ਵਿੱਚ ਰੋਜ਼ਾਨਾ ਕਰੀਬ 90,000 ਯਾਤਰੀ ਕੇਵਲ ਤਿੰਨ ਏਅਰਲਾਈਨਾਂ—ਐਮੀਰੇਟਸ, ਕਤਰ ਏਅਰਵੇਜ਼ ਅਤੇ ਇਤਿਹਾਦ ਏਅਰਵੇਜ਼ ਦੇ ਜ਼ਰੀਏ ਟ੍ਰਾਂਜ਼ਿਟ (ਇੱਕ ਥਾਂ ਤੋਂ ਦੂਜੀ ਥਾਂ ਜਾਣ ਲਈ ਰੁਕਣਾ) ਕਰਦੇ ਹਨ।

ਇਸ ਤੋਂ ਪਹਿਲਾਂ ਦੁਬਈ ਵਿੱਚ ਹਵਾਈ ਹਮਲੇ ਦੇ ਸਾਈਰਨ ਵੱਜਣ ਤੋਂ ਬਾਅਦ ਲੋਕ ਸ਼ਰਨ ਲੈਣ ਲਈ ਭੱਜਦੇ ਦੇਖੇ ਗਏ। ਚਸ਼ਮਦੀਦਾਂ ਨੇ ਦੱਸਿਆ ਕਿ ਸ਼ਹਿਰ ਦੇ ਉੱਪਰ ਘੱਟੋ-ਘੱਟ ਤਿੰਨ ਵੱਡੇ ਧਮਾਕੇ ਸੁਣੇ ਗਏ। ਦੋਹਾ ਦੇ ਇੱਕ ਰਿਹਾਇਸ਼ੀ ਇਲਾਕੇ ਵਿੱਚ ਇੱਕ ਮਿਜ਼ਾਈਲ (ਸੰਭਵ ਤੌਰ 'ਤੇ ਜਿਸ ਨੂੰ ਰੋਕਿਆ ਗਿਆ ਸੀ) ਡਿੱਗਣ ਤੋਂ ਬਾਅਦ ਵਿਸਫੋਟ ਹੋਇਆ।

ਅਮਰੀਕਾ ਦਾ ਸਭ ਤੋਂ ਵੱਡਾ ਖੇਤਰੀ ਏਅਰ ਬੇਸ ਅਲ ਉਦੈਦ , ਦੋਹਾ ਦੇ ਕੋਲ ਸਥਿਤ ਹੈ ਅਤੇ ਈਰਾਨ ਨੇ ਖੇਤਰ ਵਿੱਚ ਮੌਜੂਦ ਸਾਰੇ ਅਮਰੀਕੀ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਉਣ ਦੇ ਯੋਗ ਦੱਸਿਆ ਹੈ।