ਤਮਾਮ ਤਿਆਰੀਆਂ ਦੇ ਬਾਵਜੂਦ CBSE ਦਾ ਰੀ-ਵੈਲਿਊਏਸ਼ਨ ਪੋਰਟਲ ਕਰ ਰਿਹਾ ਪਰੇਸ਼ਾਨ, ਲਾਗਇਨ ਤੋਂ ਲੈ ਕੇ ਭੁਗਤਾਨ ਤੱਕ ਦੀਆਂ ਆਈਆਂ ਸ਼ਿਕਾਇਤਾਂ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਕਾਫ਼ੀ ਇੰਤਜ਼ਾਰ ਅਤੇ ਤਿਆਰੀਆਂ ਤੋਂ ਬਾਅਦ ਕੇਂਦਰੀ ਮਾਧਿਅਮਿਕ ਸਿੱਖਿਆ ਬੋਰਡ (CBSE) ਨੇ 12ਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਰੀ-ਵੈਲਯੂਏਸ਼ਨ ਅਤੇ ਵੈਰੀਫਿਕੇਸ਼ਨ ਪੋਰਟਲ ਸ਼ੁਰੂ ਕਰ ਦਿੱਤਾ ਹੈ ਪਰ ਪੋਰਟਲ ਚਾਲੂ ਹੁੰਦੇ ਹੀ ਵਿਦਿਆਰਥੀਆਂ ਨੂੰ ਕਈ ਤਕਨੀਕੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ (X) 'ਤੇ ਬੋਰਡ ਦੇ ਅਧਿਕਾਰਤ ਹੈਂਡਲ ਦੀ ਪੋਸਟ ਦੇ ਹੇਠਾਂ ਵਿਦਿਆਰਥੀਆਂ ਅਤੇ ਮਾਪਿਆਂ ਨੇ ਆਪਣੀਆਂ ਸਮੱਸਿਆਵਾਂ ਸਾਂਝੀਆਂ ਕੀਤੀਆਂ ਹਨ। ਇਸ ਤੋਂ ਸਾਫ਼ ਹੈ ਕਿ ਪੋਰਟਲ ਦੇ ਸੰਚਾਲਨ ਨੂੰ ਲੈ ਕੇ ਅਜੇ ਵੀ ਕਈ ਚੁਣੌਤੀਆਂ ਬਣੀਆਂ ਹੋਈਆਂ ਹਨ। ਹਾਲਾਂਕਿ ਬੋਰਡ ਵੱਲੋਂ ਸਾਰਿਆਂ ਨੂੰ ਜਵਾਬ ਵੀ ਦਿੱਤਾ ਜਾ ਰਿਹਾ ਹੈ।

ਵਿਦਿਆਰਥੀਆਂ ਨੂੰ ਕਦੋਂ ਮਿਲੇਗਾ ਮੁਕੰਮਲ ਹੱਲ

ਵਿਦਿਆਰਥੀਆਂ ਦਾ ਕਹਿਣਾ ਹੈ ਕਿ ਪੋਰਟਲ 'ਤੇ ਲਾਗਇਨ ਕਰਨ ਵਿੱਚ ਪਰੇਸ਼ਾਨੀ ਆ ਰਹੀ ਹੈ। ਕਈ ਵਾਰ ਵੈੱਬਸਾਈਟ ਖੁੱਲ੍ਹਣ ਤੋਂ ਬਾਅਦ ਅਪਲਾਈ ਕਰਨ ਦੀ ਪ੍ਰਕਿਰਿਆ ਅੱਗੇ ਨਹੀਂ ਵੱਧ ਰਹੀ, ਜਦੋਂ ਕਿ ਕੁਝ ਵਿਦਿਆਰਥੀਆਂ ਨੂੰ ਵਾਰ-ਵਾਰ 'ਐਰਰ ਮੈਸੇਜ' ਦਿਖਾਈ ਦੇ ਰਹੇ ਹਨ। ਇਸ ਤੋਂ ਪਹਿਲਾਂ ਵੀ ਵਿਦਿਆਰਥੀਆਂ ਨੇ ਪੋਰਟਲ ਦੇ ਅਕਿਰਿਆਸ਼ੀਲ ਰਹਿਣ, ਲਿੰਕ ਨਾ ਖੁੱਲ੍ਹਣ ਅਤੇ ਅਪਲਾਈ ਕਰਨ ਵਾਲੀ ਵਿੰਡੋ ਬੰਦ ਦਿਖਣ ਵਰਗੀਆਂ ਸ਼ਿਕਾਇਤਾਂ ਦਰਜ ਕਰਵਾਈਆਂ ਸਨ।

ਇੱਕ ਵਿਦਿਆਰਥੀ ਨੇ ਐਕਸ (X) 'ਤੇ ਟਿੱਪਣੀ ਕਰਦਿਆਂ ਲਿਖਿਆ ਕਿ ਕਾਫ਼ੀ ਇੰਤਜ਼ਾਰ ਤੋਂ ਬਾਅਦ ਪੋਰਟਲ ਤਾਂ ਸ਼ੁਰੂ ਹੋਇਆ ਪਰ ਲਾਗਇਨ ਕਰਨ ਤੋਂ ਬਾਅਦ ਅਪਲਾਈ ਨਹੀਂ ਹੋ ਪਾ ਰਿਹਾ ਹੈ। ਦੂਜੇ ਵਿਦਿਆਰਥੀ ਨੇ ਕਿਹਾ ਕਿ ਭੁਗਤਾਨ ਪ੍ਰਕਿਰਿਆ ਪੂਰੀ ਹੋਣ ਦੇ ਬਾਵਜੂਦ ਅਪਲਾਈ ਹੋਣ ਦੀ ਪੁਸ਼ਟੀ ਨਹੀਂ ਮਿਲ ਰਹੀ ਹੈ। ਇੱਕ ਹੋਰ ਮਾਪੇ ਨੇ ਪੋਰਟਲ ਦੀ ਹੌਲੀ ਰਫ਼ਤਾਰ ਅਤੇ ਵਾਰ-ਵਾਰ ਸਰਵਰ ਡਾਊਨ ਹੋਣ ਦੀ ਸ਼ਿਕਾਇਤ ਕੀਤੀ। ਉੱਥੇ ਹੀ ਇੱਕ ਵਿਦਿਆਰਥੀ ਨੇ ਮੰਗ ਕੀਤੀ ਕਿ ਤਕਨੀਕੀ ਸਮੱਸਿਆਵਾਂ ਨੂੰ ਦੇਖਦੇ ਹੋਏ ਅਪਲਾਈ ਕਰਨ ਦੀ ਆਖ਼ਰੀ ਤਾਰੀਖ਼ ਵਧਾਈ ਜਾਣੀ ਚਾਹੀਦੀ ਹੈ।

ਪਹਿਲਾਂ ਵੀ ਸਾਹਮਣੇ ਆਈਆਂ ਸਨ ਮੁਸ਼ਕਲਾਂ

ਜ਼ਿਕਰਯੋਗ ਹੈ ਕਿ ਪਿਛਲੇ ਕੁਝ ਦਿਨਾਂ ਤੋਂ ਸੀ.ਬੀ.ਐੱਸ.ਈ. ਦੇ ਪੋਸਟ-ਰਿਜ਼ਲਟ ਸਿਸਟਮ ਅਤੇ ਰੀ-ਵੈਲਯੂਏਸ਼ਨ ਪ੍ਰਕਿਰਿਆ ਨੂੰ ਲੈ ਕੇ ਲਗਾਤਾਰ ਸਵਾਲ ਉੱਠ ਰਹੇ ਹਨ। ਵਿਦਿਆਰਥੀਆਂ ਨੇ ਭੁਗਤਾਨ ਫੇਲ੍ਹ ਹੋਣ, ਵਾਧੂ ਫ਼ੀਸ ਕੱਟੀ ਜਾਣ, ਰਸੀਦ ਨਾ ਮਿਲਣ ਅਤੇ ਪੋਰਟਲ ਤੱਕ ਪਹੁੰਚ ਨਾ ਹੋਣ ਵਰਗੀਆਂ ਸਮੱਸਿਆਵਾਂ ਦੀ ਸ਼ਿਕਾਇਤ ਕੀਤੀ ਸੀ। ਇਨ੍ਹਾਂ ਸ਼ਿਕਾਇਤਾਂ ਤੋਂ ਬਾਅਦ ਬੋਰਡ ਨੂੰ ਪੋਰਟਲ ਲਾਂਚ ਕਰਨ ਦੀ ਸਮਾਂ-ਸੀਮਾ ਵੀ ਅੱਗੇ ਵਧਾਉਣੀ ਪਈ ਸੀ।

ਹਾਲਾਂਕਿ, ਸੀ.ਬੀ.ਐੱਸ.ਈ. ਦਾ ਕਹਿਣਾ ਹੈ ਕਿ ਵਿਦਿਆਰਥੀਆਂ ਨੂੰ ਵਧੇਰੇ ਪਾਰਦਰਸ਼ੀ ਅਤੇ ਡਿਜੀਟਲ ਸਹੂਲਤ ਉਪਲਬਧ ਕਰਵਾਉਣ ਲਈ ਨਵੀਂ ਪ੍ਰਣਾਲੀ ਲਾਗੂ ਕੀਤੀ ਗਈ ਹੈ। ਬੋਰਡ ਨੇ ਪਹਿਲਾਂ ਵੀ ਭਰੋਸਾ ਦਿੱਤਾ ਸੀ ਕਿ ਤਕਨੀਕੀ ਖ਼ਾਮੀਆਂ ਨੂੰ ਦੂਰ ਕਰਨ ਅਤੇ ਪੋਰਟਲ ਨੂੰ ਮਜ਼ਬੂਤ ਬਣਾਉਣ ਦਾ ਕੰਮ ਜਾਰੀ ਹੈ। ਹੁਣ ਵਿਦਿਆਰਥੀਆਂ ਅਤੇ ਮਾਪਿਆਂ ਦੀ ਨਜ਼ਰ ਇਸ ਗੱਲ 'ਤੇ ਹੈ ਕਿ ਬੋਰਡ ਇਨ੍ਹਾਂ ਸ਼ਿਕਾਇਤਾਂ ਦਾ ਹੱਲ ਕਿੰਨੀ ਜਲਦੀ ਕਰਦਾ ਹੈ ਅਤੇ ਕੀ ਅਪਲਾਈ ਕਰਨ ਦੀ ਪ੍ਰਕਿਰਿਆ ਦੀ ਸਮਾਂ-ਸੀਮਾ ਵਿੱਚ ਕੋਈ ਹੋਰ ਰਾਹਤ ਦਿੱਤੀ ਜਾਂਦੀ ਹੈ ਜਾਂ ਨਹੀਂ।