ਅਮਰਨਾਥ ਯਾਤਰੀਆਂ ਦੀ ਯਾਤਰਾ ਹੋਵੇਗੀ ਹੋਰ ਸੁਖਾਲੀ, ਬਜਟ ’ਚ ਉਮਰ ਸਰਕਾਰ ਨੇ ਦਿੱਤੇ 180 ਕਰੋੜ ਰੁਪਏ

ਸਦਨ ਵਿੱਚ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਕਿਹਾ ਕਿ ਸਰਕਾਰ ਸ਼੍ਰੀ ਬਾਬਾ ਅਮਰਨਾਥ ਜੀ ਦੀ ਯਾਤਰਾ 'ਤੇ ਆਉਣ ਵਾਲੇ ਸ਼ਰਧਾਲੂਆਂ ਦੀ ਸੁਰੱਖਿਆ, ਸਹੂਲਤ ਅਤੇ ਅਧਿਆਤਮਿਕ ਅਨੁਭਵ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ। ਸਾਲ 2025-26 ਦੌਰਾਨ ਯਾਤਰਾ ਨਾਲ ਸਬੰਧਤ 200 ਤੋਂ ਵੱਧ ਬੁਨਿਆਦੀ ਢਾਂਚਾ ਪ੍ਰੋਜੈਕਟ ਪੂਰੇ ਕੀਤੇ ਗਏ, ਜਿਸ ਨਾਲ ਯਾਤਰੀਆਂ ਦੀ ਸੁਰੱਖਿਆ ਅਤੇ ਸਹੂਲਤ ਵਿੱਚ ਸੁਧਾਰ ਹੋਇਆ ਹੈ। ਨਵੇਂ ਵਿੱਤੀ ਸਾਲ ਵਿੱਚ ਸੀਮਾ ਸੜਕ ਸੰਗਠਨ ਦੇ ਸਹਿਯੋਗ ਨਾਲ ਢਾਂਚਾਗਤ ਸਹੂਲਤਾਂ ਦਾ ਹੋਰ ਵਿਸਥਾਰ ਕੀਤਾ ਜਾਵੇਗਾ।

ਬਾਲਟਾਲ ਮਾਰਗ ਨੂੰ ਕੀਤਾ ਜਾਵੇਗਾ ਚੌੜਾ

ਇਸ ਪ੍ਰੋਜੈਕਟ ਅਧੀਨ ਸੜਕੀ ਸੰਪਰਕ, ਐਮਰਜੈਂਸੀ ਰਿਸਪਾਂਸ ਸਿਸਟਮ ਅਤੇ ਲੌਜਿਸਟਿਕ ਸਹਾਇਤਾ ਨੂੰ ਮਜ਼ਬੂਤ ਕੀਤਾ ਜਾਵੇਗਾ। ਇਸ ਪਹਿਲਕਦਮੀ ਨਾਲ ਯਾਤਰਾ ਨੂੰ ਹੋਰ ਵੀ ਸੁਰੱਖਿਅਤ ਅਤੇ ਸੁਖਾਲਾ ਬਣਾਇਆ ਜਾਵੇਗਾ। ਦੱਸਣਯੋਗ ਹੈ ਕਿ ਬਾਲਟਾਲ ਮਾਰਗ ਨੂੰ ਚੌੜਾ ਕੀਤਾ ਜਾਵੇਗਾ। ਰਸਤਿਆਂ 'ਤੇ ਸੰਵੇਦਨਸ਼ੀਲ ਥਾਵਾਂ ਦੀ ਪਛਾਣ ਕਰਕੇ ਉੱਥੇ ਗਰਿੱਲ ਲਗਾਈਆਂ ਜਾਣਗੀਆਂ।

ਮਾਰਗ ਨੂੰ ਵਧੇਰੇ ਸੁਵਿਧਾਜਨਕ ਬਣਾਉਣ 'ਤੇ ਕੰਮ ਕੀਤਾ ਜਾਵੇਗਾ। ਜੰਮੂ ਦੇ ਸਿੱਧੜਾ ਦੇ ਨੇੜੇ ਇੱਕ 'ਯਾਤਰੀ ਨਿਵਾਸ' ਬਣਾਇਆ ਜਾ ਰਿਹਾ ਹੈ। ਇਸ ਦਾ ਨਿਰਮਾਣ ਦੋ ਸਾਲ ਪਹਿਲਾਂ ਸ਼ੁਰੂ ਕੀਤਾ ਗਿਆ ਸੀ ਅਤੇ ਇਸ ਵੇਲੇ ਕੰਮ ਜਾਰੀ ਹੈ। ਸ਼੍ਰੀਨਗਰ ਦੇ ਪੰਥਾਚੌਕ ਵਿੱਚ ਯਾਤਰੀ ਨਿਵਾਸ ਦਾ ਇੱਕ ਪੜਾਅ ਪਿਛਲੇ ਸਾਲ ਖੋਲ੍ਹ ਦਿੱਤਾ ਗਿਆ ਸੀ।