ਜ਼ਿਆਦਾ ਵਜ਼ਨ ਵਾਲੇ ਕੇਬਿਨ ਕਰੂ ਨੂੰ ਫਲਾਈਟ ਤੋਂ ਹਟਾ ਸਕਦੀ ਹੈ ਏਅਰ ਇੰਡੀਆ, ਤਨਖਾਹ 'ਚ ਵੀ ਹੋਵੇਗੀ ਕਟੌਤੀ
ਜੇਕਰ ਕੋਈ ਕਰੂ ਮੈਂਬਰ ਤੈਅ ਸੀਮਾ ਤੋਂ ਬਾਹਰ ਪਾਇਆ ਗਿਆ ਤਾਂ ਉਸ ਨੂੰ ਉਡਾਣਾਂ ਤੋਂ ਹਟਾਇਆ ਜਾ ਸਕਦਾ ਹੈ, ਬਿਨਾਂ ਤਨਖਾਹ ਤੋਂ ਰੱਖਿਆ ਜਾ ਸਕਦਾ ਹੈ ਅਤੇ ਦੁਬਾਰਾ ਡਿਊਟੀ 'ਤੇ ਆਉਣ ਤੋਂ ਪਹਿਲਾਂ 'ਫੰਕਸ਼ਨਲ ਫਿਟਨੈਸ ਟੈਸਟ' ਪਾਸ ਕਰਨਾ ਹੋਵੇਗਾ। ਇਹ ਨਿਯਮ ਸਾਰੇ ਸਥਾਈ ਅਤੇ ਕੰਟਰੈਕਟ ਵਾਲੇ ਕਰੂ ਮੈਂਬਰਾਂ 'ਤੇ ਲਾਗੂ ਹੋਣਗੇ।
Posted By alisha
Publish Date: Sun, 22 Mar 2026 11:14 AM (IST)
Updated Date: Sun, 22 Mar 2026 11:19 AM (IST)
ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਏਅਰ ਇੰਡੀਆ ਨੇ ਆਪਣੇ ਕੇਬਿਨ ਕਰੂ ਮੈਂਬਰਾਂ ਦੀ ਸਿਹਤ ਅਤੇ ਫਿਟਨੈਸ ਨੂੰ ਲੈ ਕੇ ਇੱਕ ਨਵੀਂ ਸਿਹਤ ਨੀਤੀ ਜਾਰੀ ਕੀਤੀ ਹੈ, ਜੋ 1 ਮਈ 2026 ਤੋਂ ਲਾਗੂ ਹੋ ਜਾਵੇਗੀ। ਇਸ ਨੀਤੀ ਦੇ ਤਹਿਤ ਬਾਡੀ ਮਾਸ ਇੰਡੈਕਸ (BMI) ਦੇ ਆਧਾਰ 'ਤੇ ਕਰੂ ਦੀ ਜਾਂਚ ਕੀਤੀ ਜਾਵੇਗੀ।
ਜੇਕਰ ਕੋਈ ਕਰੂ ਮੈਂਬਰ ਤੈਅ ਸੀਮਾ ਤੋਂ ਬਾਹਰ ਪਾਇਆ ਗਿਆ ਤਾਂ ਉਸ ਨੂੰ ਉਡਾਣਾਂ ਤੋਂ ਹਟਾਇਆ ਜਾ ਸਕਦਾ ਹੈ, ਬਿਨਾਂ ਤਨਖਾਹ ਤੋਂ ਰੱਖਿਆ ਜਾ ਸਕਦਾ ਹੈ ਅਤੇ ਦੁਬਾਰਾ ਡਿਊਟੀ 'ਤੇ ਆਉਣ ਤੋਂ ਪਹਿਲਾਂ 'ਫੰਕਸ਼ਨਲ ਫਿਟਨੈਸ ਟੈਸਟ' ਪਾਸ ਕਰਨਾ ਹੋਵੇਗਾ। ਇਹ ਨਿਯਮ ਸਾਰੇ ਸਥਾਈ ਅਤੇ ਕੰਟਰੈਕਟ ਵਾਲੇ ਕਰੂ ਮੈਂਬਰਾਂ 'ਤੇ ਲਾਗੂ ਹੋਣਗੇ।
BMI ਦੇ ਆਧਾਰ 'ਤੇ ਚਾਰ ਸ਼੍ਰੇਣੀਆਂ
ਏਅਰਲਾਈਨ ਨੇ ਡਬਲਯੂ.ਐਚ.ਓ. (WHO) ਦੇ ਮਾਪਦੰਡਾਂ ਅਨੁਸਾਰ ਕਰੂ ਨੂੰ ਚਾਰ ਹਿੱਸਿਆਂ ਵਿੱਚ ਵੰਡਿਆ ਹੈ।
ਸਧਾਰਨ ਰੇਂਜ (18 ਤੋਂ 24.9): ਇਹ ਆਦਰਸ਼ ਮੰਨਿਆ ਗਿਆ ਹੈ। ਅਜਿਹੇ ਕਰੂ ਬਿਨਾਂ ਕਿਸੇ ਰੋਕ-ਟੋਕ ਦੇ ਉਡਾਣ ਭਰ ਸਕਦੇ ਹਨ।
ਘੱਟ ਵਜ਼ਨ (18 ਤੋਂ ਘੱਟ): ਮੈਡੀਕਲ ਜਾਂਚ ਅਤੇ ਫੰਕਸ਼ਨਲ ਅਸੈਸਮੈਂਟ ਪਾਸ ਕਰਨ ਤੋਂ ਬਾਅਦ ਹੀ ਡਿਊਟੀ 'ਤੇ ਵਾਪਸੀ ਸੰਭਵ ਹੋਵੇਗੀ।
ਜ਼ਿਆਦਾ ਵਜ਼ਨ (25 ਤੋਂ 29.9): ਫੰਕਸ਼ਨਲ ਅਸੈਸਮੈਂਟ ਪਾਸ ਕਰਨਾ ਲਾਜ਼ਮੀ ਹੈ, ਨਹੀਂ ਤਾਂ ਡਿਊਟੀ ਪ੍ਰਭਾਵਿਤ ਹੋ ਸਕਦੀ ਹੈ।
ਮੋਟਾਪਾ (30 ਜਾਂ ਇਸ ਤੋਂ ਵੱਧ): ਇਹ ਪੂਰੀ ਤਰ੍ਹਾਂ ਅਸਵੀਕਾਰਨਯੋਗ ਹੈ। ਅਜਿਹੇ ਕਰੂ ਨੂੰ ਤੁਰੰਤ ਡਿਊਟੀ ਤੋਂ ਹਟਾਇਆ ਜਾਵੇਗਾ ਅਤੇ ਤਨਖਾਹ ਵਿੱਚ ਕਟੌਤੀ ਲਾਗੂ ਹੋਵੇਗੀ।
ਅਚਾਨਕ ਹੋਵੇਗੀ ਜਾਂਚ ਪ੍ਰਕਿਰਿਆ
ਏਅਰਲਾਈਨ ਹੁਣ ਫਲਾਈਟ ਤੋਂ ਪਹਿਲਾਂ ਜਾਂ ਬਾਅਦ ਵਿੱਚ ਟ੍ਰੇਨਿੰਗ ਦੌਰਾਨ ਜਾਂ ਅਕੈਡਮੀ ਵਿੱਚ ਬਿਨਾਂ ਕਿਸੇ ਸੂਚਨਾ ਦੇ ਵਜ਼ਨ ਅਤੇ BMI ਦੀ ਜਾਂਚ ਕਰ ਸਕਦੀ ਹੈ। ਮੋਟਾਪੇ ਵਾਲੀ ਸ਼੍ਰੇਣੀ ਵਿੱਚ ਆਉਣ ਵਾਲੇ ਕਰੂ ਨੂੰ 7 ਦਿਨਾਂ ਦੇ ਅੰਦਰ ਆਪਣੇ ਖਰਚੇ 'ਤੇ ਬਲੱਡ ਸ਼ੂਗਰ ਅਤੇ ਲਿਪਿਡ ਪ੍ਰੋਫਾਈਲ ਵਰਗੇ ਟੈਸਟ ਕਰਵਾਉਣੇ ਪੈਣਗੇ। ਵਾਰ-ਵਾਰ ਨਿਯਮ ਤੋੜਨ 'ਤੇ ਚਿਤਾਵਨੀ ਪੱਤਰ ਜਾਰੀ ਕੀਤੇ ਜਾਣਗੇ ਅਤੇ ਮਾਮਲਾ ਐਚ.ਆਰ. (HR) ਤੱਕ ਪਹੁੰਚ ਸਕਦਾ ਹੈ।
ਕੀ ਹੈ 'ਫੰਕਸ਼ਨਲ ਅਸੈਸਮੈਂਟ'?
ਏਅਰ ਇੰਡੀਆ ਦੀ ਟ੍ਰੇਨਿੰਗ ਅਕੈਡਮੀ ਵਿੱਚ ਹੋਣ ਵਾਲਾ ਇਹ ਟੈਸਟ ਕਰੂ ਦੀ ਸੁਰੱਖਿਆ ਅਤੇ ਐਮਰਜੈਂਸੀ ਡਿਊਟੀ ਨਿਭਾਉਣ ਦੀ ਸਮਰੱਥਾ ਨੂੰ ਪਰਖਦਾ ਹੈ। ਕਰੂ ਮੈਂਬਰਾਂ ਨੂੰ ਇਸ ਟੈਸਟ ਨੂੰ ਪਾਸ ਕਰਨ ਲਈ ਤਿੰਨ ਮੌਕੇ ਮਿਲਣਗੇ।
ਏਅਰ ਇੰਡੀਆ ਦੇ ਬੁਲਾਰੇ ਨੇ ਕਿਹਾ ਕਿ ਉਡਾਣ ਦੌਰਾਨ ਗੰਭੀਰ ਸਥਿਤੀਆਂ ਨੂੰ ਸੰਭਾਲਣ ਲਈ ਸਰੀਰਕ ਸਮਰੱਥਾ ਸਾਡੀ ਮੁੱਖ ਤਰਜੀਹ ਹੈ। ਦੱਸਣਯੋਗ ਹੈ ਕਿ 2015 ਅਤੇ 2022 ਵਿੱਚ ਵੀ ਵਜ਼ਨ ਨੂੰ ਲੈ ਕੇ ਸਖ਼ਤੀ ਕੀਤੀ ਗਈ ਸੀ, ਪਰ ਇਸ ਵਾਰ ਦੀ ਨੀਤੀ ਜ਼ਿਆਦਾ ਸਪੱਸ਼ਟ ਅਤੇ ਵਿਵਸਥਿਤ ਹੈ।