‘ਕਾਂਗਰਸ ਇੱਕ ਤੋਂ ਬਾਅਦ ਇੱਕ ਚੋਣ ਹਾਰੀ, ਆਉਣ ਵਾਲੇ ਸਮੇਂ ’ਚ ਹਾਰ ਦੀ ਸੈਂਚੁਰੀ ਲਗਾਉਣ ਵਾਲੀ...': PM ਮੋਦੀ ਦਾ ਕਾਂਗਰਸ 'ਤੇ ਤੰਜ

"ਆਪਣੇ ਹੀ ਕੱਪੜੇ ਪਾੜ ਰਹੀ ਹੈ ਕਾਂਗਰਸ"

ਪ੍ਰਧਾਨ ਮੰਤਰੀ ਮੋਦੀ ਨੇ ਪਿਛਲੇ ਮਹੀਨੇ AI ਸਮਿਟ ਦੌਰਾਨ 'ਭਾਰਤ ਮੰਡਪਮ' ਵਿਖੇ ਕਾਂਗਰਸੀ ਮੈਂਬਰਾਂ ਵੱਲੋਂ 'ਸ਼ਰਟਲੈੱਸ' ਹੋ ਕੇ ਕੀਤੇ ਗਏ ਵਿਰੋਧ ਪ੍ਰਦਰਸ਼ਨ ਦਾ ਜ਼ਿਕਰ ਕਰਦਿਆਂ ਕਿਹਾ, "AI ਸਮਿਟ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼ ਵਿੱਚ ਕਾਂਗਰਸ ਨੇ ਇੱਕ ਅਜੀਬੋ-ਗਰੀਬ ਵਿਰੋਧ ਪ੍ਰਦਰਸ਼ਨ ਕੀਤਾ ਅਤੇ ਜਨਤਕ ਤੌਰ 'ਤੇ ਆਪਣੇ ਹੀ ਕੱਪੜੇ ਪਾੜ ਲਏ।"

ਪੀਐਮ ਮੋਦੀ ਨੇ ਕਾਂਗਰਸ ਦੇ ਇਸ ਪ੍ਰਦਰਸ਼ਨ ਦੀ ਨਿੰਦਾ ਕਰਦਿਆਂ ਅੱਗੇ ਕਿਹਾ, "ਅਜਿਹਾ ਲੱਗਦਾ ਹੈ ਕਿ ਹੁਣ ਕਾਂਗਰਸ ਕੋਲ ਨਿਰਾਸ਼ਾ ਵਿੱਚ ਆਪਣੇ ਹੀ ਕੱਪੜੇ ਪਾੜਨ ਤੋਂ ਇਲਾਵਾ ਹੋਰ ਕੁਝ ਕਰਨ ਨੂੰ ਨਹੀਂ ਬਚਿਆ।"

'ਨੌਜਵਾਨਾਂ ਦੇ ਸਾਹਮਣੇ ਮੌਕਿਆਂ ਦਾ ਖੁੱਲ੍ਹਾ ਅਸਮਾਨ'

ਪੀਐਮ ਮੋਦੀ ਨੇ ਅਸਾਮ ਦੇ ਨੌਜਵਾਨਾਂ ਬਾਰੇ ਗੱਲ ਕਰਦਿਆਂ ਕਿਹਾ, "ਕਾਂਗਰਸ ਨੇ ਅਸਾਮ ਨੂੰ 'ਵੰਡੋ ਅਤੇ ਰਾਜ ਕਰੋ' ਦੀ ਨੀਤੀ ਦੀ ਪ੍ਰਯੋਗਸ਼ਾਲਾ ਬਣਾ ਦਿੱਤਾ ਸੀ। ਅੱਜ ਅਸਾਮ ਦੇ ਨੌਜਵਾਨਾਂ ਦੇ ਸਾਹਮਣੇ ਮੌਕਿਆਂ ਦਾ ਖੁੱਲ੍ਹਾ ਅਸਮਾਨ ਹੈ।"

ਪ੍ਰਧਾਨ ਮੰਤਰੀ ਨੇ ਅੱਗੇ ਕਿਹਾ, "ਕਾਂਗਰਸ ਪਾਰਟੀ ਨੇ ਉੱਤਰ-ਪੂਰਬ ਨੂੰ ਉਸ ਦੇ ਹਾਲ 'ਤੇ ਛੱਡ ਦਿੱਤਾ ਸੀ। ਜਦੋਂ ਦੇਸ਼ ਆਜ਼ਾਦ ਹੋਇਆ, ਤਾਂ ਕਾਂਗਰਸ ਨੇ ਸੀਮਾ ਨਿਰਧਾਰਨ ਇਸ ਤਰ੍ਹਾਂ ਹੋਣ ਦਿੱਤਾ ਕਿ ਬਰਾਕ ਘਾਟੀ ਦਾ ਸਮੁੰਦਰ ਨਾਲੋਂ ਸੰਪਰਕ ਪੂਰੀ ਤਰ੍ਹਾਂ ਕੱਟ ਗਿਆ।"

ਬਰਾਕ ਘਾਟੀ ਦੀ ਅਣਦੇਖੀ

ਪੀਐਮ ਮੋਦੀ ਨੇ ਅੱਗੇ ਕਿਹਾ, "ਬਰਾਕ ਘਾਟੀ, ਜੋ ਕਦੇ ਇੱਕ ਪ੍ਰਮੁੱਖ ਵਪਾਰਕ ਰੂਟ ਅਤੇ ਉਦਯੋਗਿਕ ਕੇਂਦਰ ਵਜੋਂ ਮਸ਼ਹੂਰ ਸੀ, ਉਸ ਦੀ ਆਪਣੀ ਤਾਕਤ ਖੋਹ ਲਈ ਗਈ। ਆਜ਼ਾਦੀ ਤੋਂ ਬਾਅਦ ਵੀ ਕਾਂਗਰਸ ਦੀਆਂ ਸਰਕਾਰਾਂ ਦਹਾਕਿਆਂ ਤੱਕ ਸੱਤਾ ਵਿੱਚ ਰਹੀਆਂ, ਫਿਰ ਵੀ ਬਰਾਕ ਘਾਟੀ ਦੇ ਵਿਕਾਸ ਨੂੰ ਹੁਲਾਰਾ ਦੇਣ ਲਈ ਕੁਝ ਵੀ ਠੋਸ ਨਹੀਂ ਕੀਤਾ ਗਿਆ।"

ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ, "ਅਸਾਮ ਵਿੱਚ ਭਾਜਪਾ ਦੀ ਅਗਵਾਈ ਵਾਲੀ ਡਬਲ-ਇੰਜਣ ਸਰਕਾਰ ਬਰਾਕ ਘਾਟੀ ਨੂੰ ਬਦਲਣ ਅਤੇ ਉਸ ਨੂੰ ਵਪਾਰ ਤੇ ਵਣਜ ਦੇ ਇੱਕ ਪ੍ਰਮੁੱਖ ਕੇਂਦਰ ਵਜੋਂ ਮੁੜ ਸਥਾਪਿਤ ਕਰਨ ਲਈ ਕੰਮ ਕਰ ਰਹੀ ਹੈ।"

"ਜਿੱਥੇ ਕਾਂਗਰਸ ਦੀ ਸੋਚ ਖ਼ਤਮ ਹੁੰਦੀ ਹੈ, ਉੱਥੋਂ ਸਾਡਾ ਕੰਮ ਸ਼ੁਰੂ ਹੁੰਦਾ ਹੈ"

ਪੀਐਮ ਨੇ ਕਿਹਾ, "ਜਿੱਥੇ ਕਾਂਗਰਸ ਵਾਲਿਆਂ ਦੀ ਸੋਚ ਖ਼ਤਮ ਹੁੰਦੀ ਹੈ, ਉੱਥੋਂ ਹੀ ਸਾਡਾ ਕੰਮ ਸ਼ੁਰੂ ਹੁੰਦਾ ਹੈ। ਇਹ ਉੱਤਰ-ਪੂਰਬ ਦਾ ਪਹਿਲਾ ਐਕਸੈਸ-ਕੰਟਰੋਲਡ ਹਾਈ-ਸਪੀਡ ਕਾਰੀਡੋਰ ਹੋਵੇਗਾ। ਇਹ ਸਿਰਫ਼ ਇੱਕ ਹਾਈਵੇਅ ਪ੍ਰੋਜੈਕਟ ਨਹੀਂ ਹੈ, ਇਹ ਉੱਤਰ-ਪੂਰਬ ਦੇ ਲੋਕਾਂ ਦੇ ਦਹਾਕਿਆਂ ਦੇ ਇੰਤਜ਼ਾਰ ਦਾ ਅੰਤ ਹੈ।"