90 ਦਿਨਾਂ ਦਾ ਨੋਟਿਸ ਪੀਰੀਅਡ : ਸੁਰੱਖਿਆ ਜਾਂ ਸੋਸ਼ਣ? ਸੋਸ਼ਲ ਮੀਡੀਆ 'ਤੇ ਭਖੀ ਬਹਿਸ, ਯੂਜ਼ਰਜ਼ ਨੇ ਕਾਰਪੋਰੇਟ ਜਗਤ ਨੂੰ ਘੇਰਿਆ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਭਾਰਤੀ ਕਾਰਪੋਰੇਟ ਜਗਤ ਵਿੱਚ ਪ੍ਰਚਲਿਤ '90 ਦਿਨਾਂ ਦੇ ਨੋਟਿਸ ਪੀਰੀਅਡ' (Notice Period) ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਇੱਕ ਨਵੀਂ ਜੰਗ ਛਿੜ ਗਈ ਹੈ। ਇੱਕ ਸੀਨੀਅਰ ਕੰਟੈਂਟ ਰਾਈਟਰ ਨਿਸ਼ਾਂਤ ਜੋਸ਼ੀ ਦੀ ਪੋਸਟ ਤੋਂ ਬਾਅਦ ਇਹ ਚਰਚਾ ਸ਼ੁਰੂ ਹੋਈ ਕਿ ਕੀ ਇਹ ਨਿਯਮ ਕੰਮ ਦੇ ਸੁਚਾਰੂ ਪ੍ਰਬੰਧ ਲਈ ਹੈ ਜਾਂ ਕਰਮਚਾਰੀਆਂ ਨੂੰ ਬਿਹਤਰ ਮੌਕਿਆਂ ਤੋਂ ਰੋਕਣ ਦਾ ਇੱਕ ਹਥਿਆਰ?

ਕੀ ਹੈ ਪੂਰਾ ਮਾਮਲਾ

ਨਿਸ਼ਾਂਤ ਜੋਸ਼ੀ ਨੇ ਦਿੱਲੀ ਦੀ ਇੱਕ ਏਜੰਸੀ ਵਿੱਚ ਕੰਮ ਕਰਦੇ ਆਪਣੇ ਇੱਕ ਜੂਨੀਅਰ ਦਾ ਅਨੁਭਵ ਸਾਂਝਾ ਕੀਤਾ। ਉਸ ਕਰਮਚਾਰੀ ਨੂੰ ਦੂਜੀ ਕੰਪਨੀ ਵਿੱਚ ਨੌਕਰੀ ਮਿਲ ਗਈ ਸੀ ਪਰ ਨਵੀਂ ਕੰਪਨੀ ਚਾਹੁੰਦੀ ਸੀ ਕਿ ਉਹ 30 ਦਿਨਾਂ ਦੇ ਅੰਦਰ ਜੁਆਇਨ ਕਰੇ। ਜਦੋਂ ਕਰਮਚਾਰੀ ਨੇ ਆਪਣੀ ਮੌਜੂਦਾ ਕੰਪਨੀ ਦੇ ਐੱਚਆਰ (HR) ਨੂੰ ਜਲਦੀ ਰਿਲੀਜ਼ ਕਰਨ ਦੀ ਬੇਨਤੀ ਕੀਤੀ ਤਾਂ ਐੱਚਆਰ ਨੇ 'ਪ੍ਰੋਫੈਸ਼ਨਲ ਇਥਿਕਸ' ਅਤੇ 'ਸਮੂਥ ਹੈਂਡਓਵਰ' ਦਾ ਹਵਾਲਾ ਦੇ ਕੇ ਮਨ੍ਹਾ ਕਰ ਦਿੱਤਾ।

ਕਰਮਚਾਰੀ ਦਾ ਤਿੱਖਾ ਸਵਾਲ: "ਜਦੋਂ ਕੱਢਣਾ ਹੋਵੇ ਤਾਂ ਨਿਯਮ ਕਿੱਥੇ ਜਾਂਦੇ ਨੇ?"

ਜਦੋਂ ਐੱਚਆਰ ਨੇ ਨਿਯਮਾਂ ਦੀ ਕਿਤਾਬ ਦਾ ਹਵਾਲਾ ਦਿੱਤਾ, ਤਾਂ ਕਰਮਚਾਰੀ ਨੇ ਇੱਕ ਅਜਿਹਾ ਸਵਾਲ ਪੁੱਛਿਆ ਜਿਸ ਨੇ ਸਭ ਨੂੰ ਸੋਚਣ ਲਈ ਮਜਬੂਰ ਕਰ ਦਿੱਤਾ। ਉਸ ਨੇ ਪੁੱਛਿਆ, "ਪਿਛਲੇ ਮਹੀਨੇ ਜਦੋਂ ਕੰਪਨੀ ਨੇ ਸ਼ੁੱਕਰਵਾਰ ਦੀ ਸ਼ਾਮ ਨੂੰ ਪੂਰੀ ਡਿਜ਼ਾਈਨ ਟੀਮ ਨੂੰ ਅਚਾਨਕ ਨੌਕਰੀ ਤੋਂ ਕੱਢ ਦਿੱਤਾ ਸੀ, ਉਦੋਂ ਇਹ 90 ਦਿਨਾਂ ਵਾਲਾ 'ਸਮੂਥ ਹੈਂਡਓਵਰ' ਦਾ ਨਿਯਮ ਕਿੱਥੇ ਸੀ?"

ਸੋਸ਼ਲ ਮੀਡੀਆ 'ਤੇ ਲੋਕਾਂ ਦਾ ਗੁੱਸਾ

ਨਿਸ਼ਾਂਤ ਜੋਸ਼ੀ ਨੇ ਇਸ ਪ੍ਰਥਾ ਨੂੰ "ਭਾਰਤੀ ਕਾਰਪੋਰੇਟ ਜਗਤ ਦੀ ਸਭ ਤੋਂ ਵੱਡੀ ਇੱਕਪਾਸੜ ਸੜਕ" ਕਰਾਰ ਦਿੱਤਾ ਹੈ। ਸੋਸ਼ਲ ਮੀਡੀਆ ਯੂਜ਼ਰਸ ਨੇ ਇਸ 'ਤੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ:

ਦੋਹਰੇ ਮਾਪਦੰਡ: ਇੱਕ ਯੂਜ਼ਰ ਨੇ ਲਿਖਿਆ, "ਕੰਪਨੀਆਂ ਚਾਹੁੰਦੀਆਂ ਹਨ ਕਿ ਨਵਾਂ ਬੰਦਾ ਤੁਰੰਤ ਜੁਆਇਨ ਕਰੇ, ਪਰ ਆਪਣੇ ਕਰਮਚਾਰੀ ਨੂੰ 3 ਮਹੀਨੇ ਤੱਕ ਲਟਕਾ ਕੇ ਰੱਖਦੀਆਂ ਹਨ।"

ਘੱਟ ਉਤਪਾਦਕਤਾ: ਕਈਆਂ ਦਾ ਮੰਨਣਾ ਹੈ ਕਿ ਨੋਟਿਸ ਪੀਰੀਅਡ ਦੌਰਾਨ ਕਰਮਚਾਰੀ ਦਾ ਮਨ ਕੰਮ ਵਿੱਚ ਨਹੀਂ ਹੁੰਦਾ, ਜਿਸ ਨਾਲ ਬਾਕੀ ਟੀਮ ਦਾ ਮਨੋਬਲ ਵੀ ਡਿੱਗਦਾ ਹੈ।

ਸਿਰਫ਼ ਪ੍ਰੇਸ਼ਾਨੀ: ਕੁਝ ਯੂਜ਼ਰਸ ਨੇ ਕਿਹਾ ਕਿ ਇਸ ਨਿਯਮ ਦਾ ਮਕਸਦ ਸਿਰਫ਼ ਕਰਮਚਾਰੀ ਨੂੰ ਦੂਜੀ ਥਾਂ ਜਾਣ ਤੋਂ ਰੋਕਣਾ ਜਾਂ ਪ੍ਰੇਸ਼ਾਨ ਕਰਨਾ ਹੈ।