SRH vs RR: 'ਅਸੀਂ ਹੈਰਾਨ ਰਹਿ ਗਏ...', ਪਹਿਲੀ ਹਾਰ ਝੱਲਣ ਤੋਂ ਬਾਅਦ ਕਪਤਾਨ ਰਿਆਨ ਪਰਾਗ ਨੇ ਤੋੜੀ ਚੁੱਪੀ; ਇਸ ਫੈਸਲੇ 'ਤੇ ਜਤਾਇਆ ਅਫਸੋਸ

ਵਿਦਰਭ ਅਤੇ ਬਿਹਾਰ ਦੇ ਦੋ ਤੇਜ਼ ਗੇਂਦਬਾਜ਼ਾਂ, ਪ੍ਰਫੁੱਲ ਅਤੇ ਸਾਕਿਬ ਹੁਸੈਨ ਨੇ ਰਾਜਸਥਾਨ ਰਾਇਲਜ਼ ਦੀ ਜੇਤੂ ਮੁਹਿੰਮ ਨੂੰ ਰੋਕਣ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ ਦੀ ਮਦਦ ਕੀਤੀ। 217 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਰਾਜਸਥਾਨ ਦੀ ਟੀਮ 159 ਦੌੜਾਂ 'ਤੇ ਆਲ ਆਊਟ ਹੋ ਗਈ ਅਤੇ ਹੈਦਰਾਬਾਦ ਨੇ 57 ਦੌੜਾਂ ਨਾਲ ਜਿੱਤ ਦਰਜ ਕੀਤੀ। ਇਹ ਇਸ ਸੀਜ਼ਨ ਵਿੱਚ ਹੈਦਰਾਬਾਦ ਦੀ ਦੂਜੀ ਜਿੱਤ ਹੈ।

ਮੈਚ ਤੋਂ ਬਾਅਦ ਰਿਆਨ ਪਰਾਗ ਨੇ ਬੱਲੇਬਾਜ਼ੀ ਦੇ ਲੜਖੜਾਉਣ 'ਤੇ ਕਿਹਾ,

"ਭਾਵਨਾਵਾਂ ਨੂੰ ਮਹਿਸੂਸ ਕਰਨ ਲਈ ਬਹੁਤ ਸਮਾਂ ਨਹੀਂ ਹੈ। ਜਿਸ ਤਰ੍ਹਾਂ ਉਨ੍ਹਾਂ ਨੇ ਗੇਂਦਬਾਜ਼ੀ ਕੀਤੀ, ਉਸਦਾ ਸਿਹਰਾ ਉਨ੍ਹਾਂ ਨੂੰ ਜਾਂਦਾ ਹੈ। ਸਾਡੇ ਵੱਲੋਂ ਕੁਝ ਗਲਤ ਅੰਦਾਜ਼ੇ ਲੱਗੇ।"

ਜਦੋਂ ਪਿੱਚ ਬਾਰੇ ਸਵਾਲ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ, "ਪਿੱਚ ਕਾਫ਼ੀ ਚੰਗੀ ਸੀ। ਮੈਨੂੰ ਲੱਗਦਾ ਹੈ ਕਿ ਬਾਅਦ ਵਿੱਚ ਗੇਂਦਬਾਜ਼ੀ ਕਰਨਾ ਬਿਹਤਰ ਹੋ ਸਕਦਾ ਸੀ। ਨਵੀਂ ਗੇਂਦ ਨਾਲ ਪਿੱਚ ਥੋੜ੍ਹੀ ਚਿਪਚਿਪੀ ਸੀ, ਪਰ ਚਮਕ ਖ਼ਤਮ ਹੋਣ ਤੋਂ ਬਾਅਦ ਇਹ ਹੌਲੀ ਹੋ ਗਈ। ਪਰ ਇਹ ਸਭ ਬਾਅਦ ਦੀਆਂ ਗੱਲਾਂ ਹਨ, ਅਸੀਂ ਬਿਹਤਰ ਬੱਲੇਬਾਜ਼ੀ ਕਰ ਸਕਦੇ ਸੀ।"

ਉਨ੍ਹਾਂ ਅੱਗੇ ਕਿਹਾ ਕਿ 9 ਦੌੜਾਂ 'ਤੇ 5 ਵਿਕਟਾਂ ਗੁਆਉਣ ਦੇ ਬਾਵਜੂਦ 160 ਤੱਕ ਪਹੁੰਚਣਾ ਟੀਮ ਦੀ ਡੂੰਘਾਈ ਨੂੰ ਦਰਸਾਉਂਦਾ ਹੈ। ਇਹ ਸਿਰਫ਼ ਇੱਕ ਛੋਟੀ ਜਿਹੀ ਚੂਕ ਹੈ ਅਤੇ ਹੁਣ ਟੀਮ ਕੋਲਕਾਤਾ ਵਿੱਚ ਬਿਹਤਰ ਪ੍ਰਦਰਸ਼ਨ ਦੀ ਉਮੀਦ ਕਰ ਰਹੀ ਹੈ।

ਸਾਕਿਬ ਹੁਸੈਨ ਬਾਰੇ ਕੀ ਬੋਲੇ ਰਿਆਨ?

ਡੈਬਿਊ ਕਰਨ ਵਾਲੇ ਸਾਕਿਬ ਹੁਸੈਨ ਬਾਰੇ ਰਿਆਨ ਨੇ ਕਿਹਾ ਕਿ ਉਨ੍ਹਾਂ ਨੇ ਘਰੇਲੂ ਪੱਧਰ 'ਤੇ ਉਸ ਨੂੰ ਜ਼ਿਆਦਾ ਨਹੀਂ ਦੇਖਿਆ, ਪਰ ਇੱਕ ਵਾਰ ਅਸਾਮ ਬਨਾਮ ਬਿਹਾਰ ਮੈਚ ਦੌਰਾਨ ਉਸ ਵਿਰੁੱਧ ਖੇਡੇ ਸਨ। ਪਰਾਗ ਨੇ ਸਾਕਿਬ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਰੱਜ ਕੇ ਤਾਰੀਫ ਕੀਤੀ।

ਜਡੇਜਾ ਤੋਂ ਕਿਉਂ ਨਹੀਂ ਕਰਵਾਈ ਗੇਂਦਬਾਜ਼ੀ?

ਅਨੁਭਵੀ ਰਵਿੰਦਰ ਜਡੇਜਾ ਨੂੰ ਓਵਰ ਨਾ ਦੇਣ ਦੇ ਫੈਸਲੇ 'ਤੇ ਰਿਆਨ ਨੇ ਸਪੱਸ਼ਟ ਕੀਤਾ, "ਜੱਡੂ ਭਾਈ ਨੂੰ ਓਵਰ ਨਾ ਦੇਣਾ ਬਸ ਉਸ ਪਲ ਦਾ ਫੈਸਲਾ ਸੀ। ਈਸ਼ਾਨ ਕਿਸ਼ਨ ਬਹੁਤ ਵਧੀਆ ਲੈਅ ਵਿੱਚ ਬੱਲੇਬਾਜ਼ੀ ਕਰ ਰਹੇ ਸਨ, ਇਸ ਲਈ ਮੈਂ ਉਹ ਜੋਖਮ ਨਹੀਂ ਲੈਣਾ ਚਾਹੁੰਦਾ ਸੀ ਅਤੇ ਮੈਂ ਬਿਸ਼ਨੋਈ 'ਤੇ ਭਰੋਸਾ ਜਤਾਇਆ।"