ਫੇਕ VIDEO 'ਤੇ ਭੜਕੇ ਰਾਜੀਵ ਸ਼ੁਕਲਾ : ਪਾਕਿਸਤਾਨੀ ਟੀਵੀ ਦੀ 'AI ਵਾਲੀ ਚਾਲ' ਦਾ BCCI ਨੇ ਦਿੱਤਾ ਕਰਾਰਾ ਜਵਾਬ
ਪਾਕਿਸਤਾਨ ਦੇ ਮਸ਼ਹੂਰ ਨਿਊਜ਼ ਚੈਨਲ 'ARY News' 'ਤੇ ਸਾਬਕਾ ਕਪਤਾਨ ਸ਼ੋਏਬ ਮਲਿਕ ਦੇ ਇੱਕ ਸ਼ੋਅ ਦੌਰਾਨ ਰਾਜੀਵ ਸ਼ੁਕਲਾ ਦਾ ਇੱਕ ਵੀਡੀਓ ਚਲਾਇਆ ਗਿਆ। ਇਸ ਵੀਡੀਓ ਵਿੱਚ ਦਾਅਵਾ ਕੀਤਾ ਗਿਆ ਕਿ ਸ਼ੁਕਲਾ ਪਾਕਿਸਤਾਨ ਦੇ 'ਯੂ-ਟਰਨ' 'ਤੇ ਆਪਣੀ ਪ੍ਰਤੀਕਿਰਿਆ ਦੇ ਰਹੇ ਹਨ।
Posted By alisha
Publish Date: Thu, 12 Feb 2026 01:19 PM (IST)
Updated Date: Thu, 12 Feb 2026 01:24 PM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ : ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਹੋਣ ਵਾਲੇ ਮੈਚ ਤੋਂ ਪਹਿਲਾਂ ਅਕਸਰ ਜ਼ੁਬਾਨੀ ਜੰਗ ਦੇਖਣ ਨੂੰ ਮਿਲਦੀ ਹੈ ਪਰ ਇਸ ਵਾਰ ਟੀ-20 ਵਿਸ਼ਵ ਕੱਪ 2026 ਨੂੰ ਲੈ ਕੇ ਇੱਕ ਪਾਕਿਸਤਾਨੀ ਨਿਊਜ਼ ਚੈਨਲ ਵੱਲੋਂ ਫੈਲਾਏ ਗਏ ਝੂਠ 'ਤੇ ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਦੇ ਉਪ-ਪ੍ਰਧਾਨ ਰਾਜੀਵ ਸ਼ੁਕਲਾ ਨੇ ਮੂੰਹ-ਤੋੜ ਜਵਾਬ ਦਿੱਤਾ ਹੈ।
ਪਾਕਿਸਤਾਨੀ ਟੀਵੀ ਨੇ ਦਿਖਾਇਆ ਫਰਜ਼ੀ ਵੀਡੀਓ
ਪਾਕਿਸਤਾਨ ਦੇ ਮਸ਼ਹੂਰ ਨਿਊਜ਼ ਚੈਨਲ 'ARY News' 'ਤੇ ਸਾਬਕਾ ਕਪਤਾਨ ਸ਼ੋਏਬ ਮਲਿਕ ਦੇ ਇੱਕ ਸ਼ੋਅ ਦੌਰਾਨ ਰਾਜੀਵ ਸ਼ੁਕਲਾ ਦਾ ਇੱਕ ਵੀਡੀਓ ਚਲਾਇਆ ਗਿਆ। ਇਸ ਵੀਡੀਓ ਵਿੱਚ ਦਾਅਵਾ ਕੀਤਾ ਗਿਆ ਕਿ ਸ਼ੁਕਲਾ ਪਾਕਿਸਤਾਨ ਦੇ 'ਯੂ-ਟਰਨ' 'ਤੇ ਆਪਣੀ ਪ੍ਰਤੀਕਿਰਿਆ ਦੇ ਰਹੇ ਹਨ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਵੀਡੀਓ ਨੂੰ AI (ਆਰਟੀਫੀਸ਼ੀਅਲ ਇੰਟੈਲੀਜੈਂਸ) ਦੀ ਮਦਦ ਨਾਲ ਐਡਿਟ ਕੀਤਾ ਗਿਆ ਸੀ। ਇਸ ਵਿੱਚ ਰਾਜੀਵ ਸ਼ੁਕਲਾ ਦੀ ਆਵਾਜ਼ ਨੂੰ ਬਦਲ ਕੇ ਇਹ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਬੀਸੀਸੀਆਈ, ਪਾਕਿਸਤਾਨ ਅੱਗੇ ਮਿੰਨਤਾਂ ਕਰ ਰਿਹਾ ਹੈ।
ਰਾਜੀਵ ਸ਼ੁਕਲਾ ਦਾ ਸਪੱਸ਼ਟੀਕਰਨ
ਰਾਜੀਵ ਸ਼ੁਕਲਾ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'X' (ਪਹਿਲਾਂ ਟਵਿੱਟਰ) 'ਤੇ ਲਿਖਿਆ,"ਭਾਰਤ-ਪਾਕਿਸਤਾਨ ਵਿਸ਼ਵ ਕੱਪ ਮੈਚ 'ਤੇ ਮੇਰੀਆਂ ਟਿੱਪਣੀਆਂ ਦੇ ਵੀਡੀਓ ਵਿੱਚ AI ਦੀ ਵਰਤੋਂ ਕਰਕੇ ਹੇਰਾਫੇਰੀ ਕੀਤੀ ਗਈ ਹੈ। ਇਹ ਬਿਆਨ ਮੇਰੇ ਨਹੀਂ ਹਨ। ਮੈਂ ਸਾਰਿਆਂ ਨੂੰ ਅਪੀਲ ਕਰਦਾ ਹਾਂ ਕਿ ਇਸ ਗੁੰਮਰਾਹਕੁੰਨ ਸਮੱਗਰੀ 'ਤੇ ਵਿਸ਼ਵਾਸ ਨਾ ਕਰੋ ਅਤੇ ਇਸ ਦੀ ਰਿਪੋਰਟ ਕਰੋ।"
ਵੀਡੀਓ 'ਚ ਕੀ ਸੀ ਝੂਠ
ਫੇਕ ਵੀਡੀਓ ਵਿੱਚ ਦਿਖਾਇਆ ਗਿਆ ਕਿ ਰਾਜੀਵ ਸ਼ੁਕਲਾ ਕਹਿ ਰਹੇ ਹਨ ਕਿ ਬੀਸੀਸੀਆਈ ਦੀਆਂ ਵਾਰ-ਵਾਰ ਬੇਨਤੀਆਂ ਤੋਂ ਬਾਅਦ ਪਾਕਿਸਤਾਨ ਖੇਡਣ ਲਈ ਰਾਜ਼ੀ ਹੋਇਆ ਹੈ। ਅਸਲ ਵਿੱਚ ਸ਼ੁਕਲਾ ਨੇ ਸਿਰਫ਼ ਇੰਨਾ ਕਿਹਾ ਸੀ ਕਿ ਉਹ ਖੁਸ਼ ਹਨ ਕਿ ਆਈਸੀਸੀ (ICC) ਨੇ ਪਾਕਿਸਤਾਨ ਅਤੇ ਬੰਗਲਾਦੇਸ਼ ਕ੍ਰਿਕਟ ਬੋਰਡ ਨਾਲ ਗੱਲ ਕਰਕੇ ਇੱਕ 'ਹੱਲ' ਕੱਢ ਲਿਆ ਹੈ, ਜਿਸ ਨਾਲ ਖੇਡ ਨੂੰ ਪਹਿਲ ਮਿਲੀ ਅਤੇ ਪਾਕਿਸਤਾਨ ਨੇ ਬਾਈਕਾਟ ਦਾ ਆਪਣਾ ਫੈਸਲਾ ਵਾਪਸ ਲਿਆ।