'ICC ਨੇ ਪਿੱਛੇ ਖਿੱਚੇ ਕਦਮ, ਪਾਕਿਸਤਾਨ ਉਸ 'ਤੇ ਨਿਰਭਰ ਨਹੀਂ'; ਬਾਈਕਾਟ ਦੇ ਮੁੱਦੇ 'ਤੇ ਨਜਮ ਸੇਠੀ ਨੇ ਖੜ੍ਹਾ ਕੀਤਾ ਨਵਾਂ ਬਖੇੜਾ
ਪਾਕਿਸਤਾਨ ਸਰਕਾਰ ਨੇ ਪਹਿਲਾਂ ਐਲਾਨ ਕੀਤਾ ਸੀ ਕਿ ਉਹ ਕੋਲੰਬੋ ਵਿੱਚ ਭਾਰਤ ਵਿਰੁੱਧ ਹੋਣ ਵਾਲੇ ਮੈਚ ਦਾ ਬਾਈਕਾਟ ਕਰੇਗੀ। ਹਾਲਾਂਕਿ, ICC ਅਤੇ ਬੰਗਲਾਦੇਸ਼ ਕ੍ਰਿਕਟ ਬੋਰਡ (BCB) ਨਾਲ ਗੱਲਬਾਤ ਤੋਂ ਬਾਅਦ ਪਾਕਿਸਤਾਨ ਖੇਡਣ ਲਈ ਰਾਜ਼ੀ ਹੋ ਗਿਆ
Posted By alisha
Publish Date: Wed, 11 Feb 2026 12:54 PM (IST)
Updated Date: Wed, 11 Feb 2026 12:58 PM (IST)
ਨਵੀਂ ਦਿੱਲੀ : ਟੀ-20 ਵਿਸ਼ਵ ਕੱਪ 2026 ਵਿੱਚ ਭਾਰਤ ਅਤੇ ਪਾਕਿਸਤਾਨ ਦੇ ਮੈਚ ਨੂੰ ਲੈ ਕੇ ਖਿੱਚੋਤਾਣ ਜਾਰੀ ਹੈ। ਪੀਸੀਬੀ ਦੇ ਸਾਬਕਾ ਚੇਅਰਮੈਨ ਨਜਮ ਸੇਠੀ ਨੇ ਦਾਅਵਾ ਕੀਤਾ ਹੈ ਕਿ ਇਸ ਵਿਵਾਦ ਵਿੱਚ ਆਈਸੀਸੀ (ICC) ਨੇ ਹਾਰ ਮੰਨੀ ਹੈ ਅਤੇ ਕਦਮ ਪਿੱਛੇ ਖਿੱਚੇ ਹਨ, ਨਾ ਕਿ ਪਾਕਿਸਤਾਨ ਨੇ। ਇਹੀ ਕਾਰਨ ਹੈ ਕਿ ਪਾਕਿਸਤਾਨ ਹੁਣ 15 ਫਰਵਰੀ ਨੂੰ ਕੋਲੰਬੋ ਵਿੱਚ ਮੈਚ ਖੇਡਣ ਲਈ ਸਹਿਮਤ ਹੋਇਆ ਹੈ।
ਕੀ ਹੈ ਪੂਰਾ ਵਿਵਾਦ
ਪਾਕਿਸਤਾਨ ਸਰਕਾਰ ਨੇ ਪਹਿਲਾਂ ਐਲਾਨ ਕੀਤਾ ਸੀ ਕਿ ਉਹ ਕੋਲੰਬੋ ਵਿੱਚ ਭਾਰਤ ਵਿਰੁੱਧ ਹੋਣ ਵਾਲੇ ਮੈਚ ਦਾ ਬਾਈਕਾਟ ਕਰੇਗੀ। ਹਾਲਾਂਕਿ, ICC ਅਤੇ ਬੰਗਲਾਦੇਸ਼ ਕ੍ਰਿਕਟ ਬੋਰਡ (BCB) ਨਾਲ ਗੱਲਬਾਤ ਤੋਂ ਬਾਅਦ ਪਾਕਿਸਤਾਨ ਖੇਡਣ ਲਈ ਰਾਜ਼ੀ ਹੋ ਗਿਆ। ਪਾਕਿਸਤਾਨ ਹੁਣ ਇਹ ਦਿਖਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਕਿ ICC ਉਸ ਅੱਗੇ ਝੁਕਿਆ ਹੈ।
ਨਜਮ ਸੇਠੀ ਦੇ ਵੱਡੇ ਦਾਅਵੇ
ਨਜਮ ਸੇਠੀ ਨੇ ਇੱਕ ਨਿੱਜੀ ਨਿਊਜ਼ ਚੈਨਲ ਨਾਲ ਗੱਲਬਾਤ ਕਰਦਿਆਂ ਕਿਹਾ, "ਅਸੀਂ ਵਕੀਲਾਂ ਨਾਲ ਸਲਾਹ ਕੀਤੀ ਸੀ। ਜੇ ਅਸੀਂ ਮੈਚ ਨਾ ਖੇਡਦੇ ਤਾਂ ਵੱਧ ਤੋਂ ਵੱਧ ਸਾਡਾ ਇੱਕ ਅੰਕ ਕੱਟਿਆ ਜਾਂਦਾ। ਸਾਡੇ 'ਤੇ ਕੋਈ ਵੱਡਾ ਜੁਰਮਾਨਾ ਜਾਂ ਪਾਬੰਦੀ ਨਹੀਂ ਲੱਗ ਸਕਦੀ ਸੀ।" ਸੇਠੀ ਨੇ ਹੈਰਾਨੀਜਨਕ ਦਾਅਵਾ ਕੀਤਾ ਕਿ ਪਾਕਿਸਤਾਨ ਹੁਣ ਪੈਸਿਆਂ ਲਈ ICC 'ਤੇ ਨਿਰਭਰ ਨਹੀਂ ਹੈ। ਉਨ੍ਹਾਂ ਮੁਤਾਬਕ ਪਾਕਿਸਤਾਨ ਸੁਪਰ ਲੀਗ (PSL) ਇੰਨੀ ਸਫਲ ਹੋ ਚੁੱਕੀ ਹੈ ਕਿ ਇਹ ICC ਦੇ ਫੰਡਾਂ ਨਾਲੋਂ ਜ਼ਿਆਦਾ ਪੈਸਾ ਕਮਾ ਕੇ ਦੇ ਰਹੀ ਹੈ।
ਮੌਜੂਦਾ ਚੀਫ ਦਾ ਸਟੈਂਡ
ਦੂਜੇ ਪਾਸੇ, ਪੀਸੀਬੀ ਦੇ ਮੌਜੂਦਾ ਚੀਫ ਮੋਹਸਿਨ ਨਕਵੀ ਦਾ ਕਹਿਣਾ ਹੈ ਕਿ ਉਹ ਭਾਰਤ ਵਿਰੁੱਧ ਮੈਚ ਖੇਡਣ ਲਈ ਉਦੋਂ ਰਾਜ਼ੀ ਹੋਏ ਜਦੋਂ ਉਨ੍ਹਾਂ ਨੇ ਬੰਗਲਾਦੇਸ਼ ਲਈ 'ਇੱਜ਼ਤ' ਹਾਸਲ ਕਰ ਲਈ। ICC ਨੇ ਭਰੋਸਾ ਦਿੱਤਾ ਹੈ ਕਿ ਬੰਗਲਾਦੇਸ਼ ਕ੍ਰਿਕਟ ਬੋਰਡ 'ਤੇ ਕੋਈ ਬੈਨ ਨਹੀਂ ਲੱਗੇਗਾ ਅਤੇ ਉਸ ਨੂੰ 2028-2031 ਦੇ ਚੱਕਰ ਵਿੱਚ ਇੱਕ ICC ਟੂਰਨਾਮੈਂਟ ਦੀ ਮੇਜ਼ਬਾਨੀ ਵੀ ਦਿੱਤੀ ਜਾਵੇਗੀ।