'ਚੁੱਪਚਾਪ ਆਪਣਾ ਕੰਮ ਕਰੋ', ਅਜਿੰਕਿਆ ਰਹਾਣੇ ਦੇ 'ਜਲਣ' ਵਾਲੇ ਬਿਆਨ 'ਤੇ ਵੀਰੇਂਦਰ ਸਹਿਵਾਗ ਨੇ ਸੁਣਾਈਆਂ ਖਰੀਆਂ-ਖਰੀਆਂ; ਸਚਿਨ-ਅਮਿਤਾਭ ਦੀ ਦਿੱਤੀ ਮਿਸਾਲ

ਸਹਿਵਾਗ ਨੂੰ ਪਸੰਦ ਨਹੀਂ ਆਈ ਰਹਾਣੇ ਦੀ ਗੱਲ

ਮੈਚ ਤੋਂ ਬਾਅਦ ਰਹਾਣੇ ਨੇ 'ਜਲਣ' ਬਾਰੇ ਜੋ ਬਿਆਨ ਦਿੱਤਾ, ਉਹ ਸਹਿਵਾਗ ਨੂੰ ਪਸੰਦ ਨਹੀਂ ਆਇਆ ਹੈ। ਸਹਿਵਾਗ ਨੇ ਗੱਲਬਾਤ ਕਰਦਿਆਂ ਕਹਾ, "ਮੈਨੂੰ ਨਹੀਂ ਲੱਗਦਾ ਕਿ ਖਿਡਾਰੀਆਂ ਨੂੰ ਇਸ ਤਰ੍ਹਾਂ ਦੀ ਕੋਈ ਗੱਲ ਕਹਿਣੀ ਚਾਹੀਦੀ ਹੈ। ਮੈਂ ਜਾਣਦਾ ਹਾਂ ਕਿ ਉਹ ਕਪਤਾਨ ਹਨ। ਜਦੋਂ ਉਨ੍ਹਾਂ ਤੋਂ ਕੈਮਰੂਨ ਗ੍ਰੀਨ ਦੇ ਗੇਂਦਬਾਜ਼ੀ ਨਾ ਕਰਨ ਬਾਰੇ ਪੁੱਛਿਆ ਗਿਆ ਸੀ, ਤਾਂ ਵੀ ਉਨ੍ਹਾਂ ਨੇ ਸਿੱਧਾ ਜਵਾਬ ਨਹੀਂ ਦਿੱਤਾ ਸੀ। ਉਨ੍ਹਾਂ ਨੇ ਕਿਹਾ ਸੀ ਕਿ ਕ੍ਰਿਕਟ ਆਸਟ੍ਰੇਲੀਆ ਤੋਂ ਪੁੱਛਣਾ ਚਾਹੀਦਾ ਹੈ।"

ਸਹਿਵਾਗ ਨੇ ਅੱਗੇ ਕਿਹਾ, "ਮੈਂ ਇਸ ਗੱਲ ਨੂੰ ਸਮਝ ਸਕਦਾ ਹਾਂ। ਲੋਕ ਤੁਹਾਡੀ ਆਲੋਚਨਾ ਵੀ ਕਰਨਗੇ ਅਤੇ ਤਾਰੀਫ਼ ਵੀ, ਪਰ ਤੁਹਾਨੂੰ ਦੋਵਾਂ ਸਥਿਤੀਆਂ ਵਿੱਚ ਨਿਰਪੱਖ ਰਹਿਣਾ ਚਾਹੀਦਾ ਹੈ। ਇਸ ਤਰ੍ਹਾਂ ਦੀ ਲੜਾਈ ਵਿੱਚ ਪੈਣ ਦੀ ਕੀ ਲੋੜ ਹੈ?"

ਸਚਿਨ ਅਤੇ ਅਮਿਤਾਭ ਦੀ ਦਿੱਤੀ ਉਦਾਹਰਨ

ਸਹਿਵਾਗ ਨੇ ਰਹਾਣੇ ਨੂੰ ਸਬਕ ਦਿੰਦਿਆਂ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਅਤੇ ਬਾਲੀਵੁੱਡ ਦੇ ਦਿੱਗਜ ਅਮਿਤਾਭ ਬੱਚਨ ਦੀ ਮਿਸਾਲ ਦਿੱਤੀ। ਸੱਜੇ ਹੱਥ ਦੇ ਇਸ ਸਾਬਕਾ ਬੱਲੇਬਾਜ਼ ਨੇ ਕਿਹਾ, "ਇਹ ਲੋਕ ਆਲੋਚਕਾਂ ਨੂੰ ਜਵਾਬ ਦੇਣਾ ਚਾਹੁੰਦੇ ਹਨ, ਪਰ ਬੱਚਨ ਸਾਹਿਬ ਨੇ ਵੀ ਆਪਣੇ ਆਲੋਚਕਾਂ ਨੂੰ ਕਦੇ ਜਵਾਬ ਨਹੀਂ ਦਿੱਤਾ। ਤੇਂਦੁਲਕਰ ਤੋਂ ਵੱਡੀ ਉਦਾਹਰਨ ਕੋਈ ਹੋਰ ਨਹੀਂ ਹੋ ਸਕਦੀ। ਇੱਕ ਅਖ਼ਬਾਰ ਨੇ ਤਾਂ ਉਨ੍ਹਾਂ ਦੇ ਨਾਮ ਨੂੰ ਵਿਗਾੜ ਕੇ 'ਐਂਡੁਲਕਰ' ਵੀ ਲਿਖ ਦਿੱਤਾ ਸੀ।"

ਸਹਿਵਾਗ ਨੇ ਅੱਗੇ ਕਿਹਾ, "ਇਸ ਲਈ ਮੈਨੂੰ ਲੱਗਦਾ ਹੈ ਕਿ ਤੁਹਾਨੂੰ ਚੁੱਪ ਰਹਿਣਾ ਚਾਹੀਦਾ ਹੈ। ਸੈਂਕੜਾ ਬਣਾਓ, ਸਾਰਿਆਂ ਦੇ ਮੂੰਹ ਆਪਣੇ ਆਪ ਬੰਦ ਹੋ ਜਾਣਗੇ। ਸ਼ਾਂਤ ਰਹੋ ਅਤੇ ਆਪਣਾ ਕੰਮ ਕਰੋ। ਮੈਨੂੰ ਨਹੀਂ ਲੱਗਦਾ ਕਿ ਇਸ ਤਰ੍ਹਾਂ ਦੀਆਂ ਚੀਜ਼ਾਂ ਦੀ ਕੋਈ ਲੋੜ ਹੈ।"

ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਦੀ ਹਾਲਤ

ਜਿੱਥੋਂ ਤੱਕ ਕੋਲਕਾਤਾ ਦੀ ਗੱਲ ਹੈ, ਉਸ ਨੂੰ ਆਪਣੇ ਸ਼ੁਰੂਆਤੀ ਦੋਵਾਂ ਮੈਚਾਂ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਤੀਜੇ ਮੈਚ ਵਿੱਚ ਉਹ ਆਪਣੇ ਘਰ ਵਿੱਚ ਹਾਰ ਦਾ ਸਿਲਸਿਲਾ ਤੋੜਨ ਦੇ ਇਰਾਦੇ ਨਾਲ ਉਤਰੀ ਸੀ, ਪਰ ਮੀਂਹ ਨੇ ਉਸ ਦੀਆਂ ਉਮੀਦਾਂ 'ਤੇ ਪਾਣੀ ਫੇਰ ਦਿੱਤਾ।