‘ਦੋ ਸਾਲਾਂ ’ਚ ਮੇਰੇ ਤੇ ਗੌਤਮ ਭਾਈ ਵਿਚਕਾਰ ਕੋਈ ਬਹਿਸ ਨਹੀਂ ਹੋਈ…’, ਵਰਲਡ ਚੈਂਪੀਅਨ ਬਣਨ ਤੋਂ ਬਾਅਦ ਕਪਤਾਨ ਸੂਰਿਆਕੁਮਾਰ ਯਾਦਵ ਦਾ ਵੱਡਾ ਖੁਲਾਸਾ

ਭਾਰਤ ਦੇ ਟੀ-20 ਵਿਸ਼ਵ ਕੱਪ ਜੇਤੂ ਬਣਨ ਤੋਂ ਬਾਅਦ ਜਦੋਂ ਸੂਰਿਆਕੁਮਾਰ ਤੋਂ ਗੌਤਮ ਗੰਭੀਰ ਨਾਲ ਉਨ੍ਹਾਂ ਦੇ ਰਿਸ਼ਤੇ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਮੈਂ ਗੌਤਮ ਭਾਈ ਨਾਲ ਚਾਰ ਸਾਲ (ਕੋਲਕਾਤਾ ਨਾਈਟ ਰਾਈਡਰਜ਼ ਵਿੱਚ) ਕ੍ਰਿਕਟ ਖੇਡੀ ਹੈ।

ਅਤੇ ਮੈਨੂੰ ਪਤਾ ਸੀ ਕਿ ਉਹ ਕਿਵੇਂ ਸੋਚਦੇ ਹਨ। ਅਜਿਹੇ 'ਚ ਉਨ੍ਹਾਂ ਨੇ ਦੋ ਕਦਮ ਚੁੱਕੇ ਅਤੇ ਦੋ ਕਦਮ ਮੈਂ ਚੁੱਕੇ, ਤਾਂ ਹਰ ਵਾਰ ਵਿਚਕਾਰਲਾ ਰਸਤਾ ਨਿਕਲ ਆਇਆ।

ਸੂਰਿਆ ਦੀ ਕੋਚ ਗੰਭੀਰ ਨਾਲ ਕਦੇ ਨਹੀਂ ਹੋਈ ਬਹਿਸ

ਸੂਰਿਆਕੁਮਾਰ ਨੇ ਕਿਹਾ ਕਿ ਇਨ੍ਹਾਂ ਦੋ ਸਾਲਾਂ ਵਿੱਚ ਦੋਵਾਂ ਵਿਚਕਾਰ ਕਦੇ ਵੀ ਕੋਈ ਬਹਿਸ ਨਹੀਂ ਹੋਈ ਅਤੇ ਉਨ੍ਹਾਂ ਨੇ ਇੱਕ ਆਦਰਸ਼ ਟੀਮ ਤੈਅ ਕਰਨ ਲਈ ਕਦੇ ਰਾਤਾਂ ਦੀ ਨੀਂਦ ਨਹੀਂ ਗਵਾਈ। ਸੂਰਿਆਕੁਮਾਰ ਨੇ ਕਿਹਾ ਕਿ ਜਦੋਂ ਤੋਂ ਅਸੀਂ ਇਕੱਠੇ ਕੰਮ ਕਰਨਾ ਸ਼ੁਰੂ ਕੀਤਾ ਅਤੇ ਅਸੀਂ ਸ਼੍ਰੀਲੰਕਾ ਗਏ ਸੀ, ਉਦੋਂ ਤੋਂ ਲੈ ਕੇ ਹੁਣ ਤੱਕ ਮੈਨੂੰ ਯਾਦ ਨਹੀਂ ਕਿ ਕਦੇ ਕਿਸੇ ਖਿਡਾਰੀ ਨੂੰ ਲੈ ਕੇ ਸਾਡੀ ਕੋਈ ਬਹਿਸ ਹੋਈ ਹੋਵੇ।

ਕਪਤਾਨ ਨੇ ਕਿਹਾ ਕਿ ਅਸੀਂ ਗੱਲ ਕਰਦੇ ਹਾਂ ਕਿ ਸਾਨੂੰ ਕਿਸੇ ਖਾਸ ਖਿਡਾਰੀ ਨੂੰ ਖਿਡਾਉਣਾ ਚਾਹੀਦਾ ਹੈ ਜਾਂ ਨਹੀਂ। ਅਸੀਂ ਦੋਵੇਂ ਹਮੇਸ਼ਾ ਟੀਮ ਨੂੰ ਜਿਤਾਉਣ ਵਿੱਚ ਦਿਲਚਸਪੀ ਰੱਖਦੇ ਹਾਂ। ਅਸੀਂ ਸੋਚਦੇ ਹਾਂ ਕਿ ਕਿਸੇ ਖਿਡਾਰੀ ਨੂੰ ਅਜਿਹੀ ਸਥਿਤੀ ਵਿੱਚ ਕਿਵੇਂ ਰੱਖ ਸਕਦੇ ਹਾਂ, ਜਿਸ ਨਾਲ ਟੀਮ ਨੂੰ ਫਾਇਦਾ ਹੋ ਸਕੇ। ਕਈ ਵਾਰ ਅਸੀਂ ਟੀਮ ਬਾਰੇ, ਪਲੇਇੰਗ ਇਲੈਵਨ ਜਾਂ 15 ਖਿਡਾਰੀਆਂ ਬਾਰੇ ਗੱਲ ਕੀਤੀ ਹੈ ਕਿ ਸਾਨੂੰ ਕਿਨ੍ਹਾਂ ਨੂੰ ਚੁਣਨਾ ਹੈ ਅਤੇ 14 ਖਿਡਾਰੀ ਹਮੇਸ਼ਾ ਇੱਕੋ ਜਿਹੇ ਹੀ ਰਹੇ ਹਨ।

‘ਪਾਜੀ, ਕਦੇ ਹੱਸ ਵੀ ਲਿਆ ਕਰੋ’

ਭਾਰਤੀ ਕ੍ਰਿਕਟ ਟੀਮ ਦੇ ਇੰਟਰਨੈੱਟ ਮੀਡੀਆ ਸਟਾਰ ਅਰਸ਼ਦੀਪ ਸਿੰਘ ਨੇ ਟੀ-20 ਵਿਸ਼ਵ ਕੱਪ ਵਿੱਚ ਖਿਤਾਬੀ ਜਿੱਤ ਤੋਂ ਬਾਅਦ ਮੁੱਖ ਕੋਚ ਗੌਤਮ ਗੰਭੀਰ ਨੂੰ ਹੋਰ ਜ਼ਿਆਦਾ ਮੁਸਕਰਾਉਣ ਲਈ ਛੇੜਿਆ।

ਅਰਸ਼ਦੀਪ ਦੀ ਵੀਡੀਓ ਵਿੱਚ ਗੰਭੀਰ, ਸੈਮਸਨ, ਅਭਿਸ਼ੇਕ, ਬੁਮਰਾਹ, ਸਿਰਾਜ, ਅਕਸ਼ਰ ਅਤੇ ਸੂਰਿਆਕੁਮਾਰ ਨਜ਼ਰ ਆ ਰਹੇ ਹਨ। ਅਰਸ਼ਦੀਪ, ਪਹਿਲਾਂ ਹੀ ਮੁਸਕਰਾ ਰਹੇ ਗੰਭੀਰ ਨੂੰ ਥੋੜ੍ਹਾ ਹੋਰ ਹੱਸਣ ਲਈ ਇੱਕ ਮਸ਼ਹੂਰ ਬਾਲੀਵੁੱਡ ਕਾਮੇਡੀ ਫਿਲਮ ਦਾ ਡਾਇਲਾਗ ਬੋਲਦੇ ਹੋਏ ਕਹਿੰਦੇ ਹਨ ਕਿ, ‘‘ਪਾਜੀ, ਕਦੇ ਹੱਸ ਵੀ ਲਿਆ ਕਰੋ।’’ ਇਸ 'ਤੇ ਗੰਭੀਰ ਨੇ ਜਵਾਬ ਦਿੱਤਾ, ‘‘ਸਿੰਘ ਇਜ਼ ਕਿੰਗ।’’

ਆਈਸੀਸੀ ਦੀ ਟੀ-20 ਟੀਮ ਵਿੱਚ ਚਾਰ ਭਾਰਤੀ ਖਿਡਾਰੀ ਸ਼ਾਮਲ

ਤੀਜੀ ਵਾਰ ਟੀ-20 ਵਿਸ਼ਵ ਕੱਪ ਜਿੱਤਣ ਵਾਲੀ ਭਾਰਤੀ ਟੀਮ ਦੇ ਖਿਡਾਰੀ ਜਸਪ੍ਰੀਤ ਬੁਮਰਾਹ, ਸੰਜੂ ਸੈਮਸਨ, ਈਸ਼ਾਨ ਕਿਸ਼ਨ ਅਤੇ ਹਾਰਦਿਕ ਪਾਂਡਿਆ ਨੂੰ ਆਈਸੀਸੀ ਦੀ 2026 ਟੀ-20 ਵਿਸ਼ਵ ਕੱਪ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਸੈਮਸਨ ਨੇ ਪੰਜ ਪਾਰੀਆਂ ਵਿੱਚ 321 ਦੌੜਾਂ ਬਣਾ ਕੇ ਟੀਮ ਵਿੱਚ ਸ਼ਾਮਲ ਭਾਰਤੀ ਚੌਕੜੀ (ਚਾਰ ਖਿਡਾਰੀਆਂ) ਦੀ ਅਗਵਾਈ ਕੀਤੀ।

ਕੋਚ ਸਾਹਿਬ, ਤੁਹਾਡੀ ਮੁਸਕਾਨ ਚੰਗੀ ਲੱਗਦੀ ਹੈ

ਭਾਰਤ ਦੀ ਖਿਤਾਬੀ ਜਿੱਤ ਨੇ ਲਗਭਗ ਦੋ ਸਾਲਾਂ ਬਾਅਦ ਮਹਾਨ ਕ੍ਰਿਕਟਰ ਮਹਿੰਦਰ ਸਿੰਘ ਧੋਨੀ ਨੂੰ ਇੰਟਰਨੈੱਟ ਮੀਡੀਆ 'ਤੇ ਮੁੜ ਸਰਗਰਮ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਇੰਸਟਾਗ੍ਰਾਮ 'ਤੇ ਪੋਸਟ ਕਰਕੇ ਕਿਹਾ, "ਤੁਸੀਂ ਸਾਰਿਆਂ ਨੂੰ ਖੇਡਦੇ ਹੋਏ ਦੇਖ ਕੇ ਬਹੁਤ ਖੁਸ਼ੀ ਹੋਈ।" ਉਨ੍ਹਾਂ ਨੇ ਗੌਤਮ ਗੰਭੀਰ ਲਈ ਕਿਹਾ ਕਿ "ਕੋਚ ਸਾਹਿਬ, ਤੁਹਾਡੀ ਮੁਸਕਾਨ ਬਹੁਤ ਚੰਗੀ ਲੱਗ ਰਹੀ ਹੈ।" ਦੱਸ ਦੇਈਏ ਕਿ ਧੋਨੀ ਨੇ ਇੰਸਟਾਗ੍ਰਾਮ 'ਤੇ ਆਪਣੀ ਪਿਛਲੀ ਪੋਸਟ 2024 ਵਿੱਚ ਕੀਤੀ ਸੀ।

ਈਸ਼ਾਨ ਤੋਂ ਸੂਰਿਆ ਨੇ ਪੁੱਛਿਆ ਸੀ, ਵਿਸ਼ਵ ਕੱਪ ਜਿਤਾਏਗਾ?

ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ ਜਦੋਂ ਭਾਰਤ ਦੀ ਟੀ-20 ਵਿਸ਼ਵ ਕੱਪ ਟੀਮ ਵਿੱਚ ਥਾਂ ਦੀ ਪੁਸ਼ਟੀ ਕਰਨ ਲਈ ਈਸ਼ਾਨ ਕਿਸ਼ਨ ਨੂੰ ਫ਼ੋਨ ਕੀਤਾ ਸੀ, ਤਾਂ ਉਨ੍ਹਾਂ ਕੋਲ ਇਸ ਹਮਲਾਵਰ ਵਿਕਟਕੀਪਰ-ਬੱਲੇਬਾਜ਼ ਤੋਂ ਪੁੱਛਣ ਲਈ ਬੱਸ ਇੱਕ ਹੀ ਸਵਾਲ ਸੀ ਕਿ ਕੀ ਉਹ 'ਵਿਸ਼ਵ ਕੱਪ ਜਿਤਾਏਗਾ?' ਈਸ਼ਾਨ ਨੇ ਇਸ ਦਾ ਜਵਾਬ ਇੱਕ ਸਵਾਲ ਨਾਲ ਦਿੰਦਿਆਂ ਸੂਰਿਆਕੁਮਾਰ ਨੂੰ ਕਿਹਾ, "ਭਰੋਸਾ ਕਰੋਗੇ?" ਇਹ ਗੱਲਬਾਤ ਸੂਰਿਆਕੁਮਾਰ ਦੇ 'ਹਾਂ' ਵਿੱਚ ਜਵਾਬ ਦੇਣ ਨਾਲ ਖਤਮ ਹੋਈ ਸੀ। ਈਸ਼ਾਨ ਨੇ ਹੁਣ ਇਸ ਬਾਰੇ ਸਾਰਿਆਂ ਨੂੰ ਦੱਸਿਆ ਹੈ।