ਯੁੱਧ ਬਣਿਆ ਭਾਰਤ ਲਈ ਵਰਦਾਨ ? ਇੰਡੀਆ ਕੋਲ ਬੰਗਲਾਦੇਸ਼ ਦੀ ਟੈਕਸਟਾਈਲ ਇੰਡਸਟਰੀ ਨੂੰ ਪਿੱਛੇ ਛੱਡਣ ਦਾ ਮੌਕਾ

ਨਵੀਂ ਦਿੱਲੀ: ਭਾਰਤ ਦੀ ਕੱਪੜਾ ਇੰਡਸਟਰੀ ਇੰਨੀਂ ਦਿਨੀਂ ਚਰਚਾ ਵਿੱਚ ਹੈ। ਦੁਨੀਆ ਦੀ ਸਭ ਤੋਂ ਵੱਡੀ ਟੈਕਸਟਾਈਲ ਇੰਡਸਟਰੀ ਵਿੱਚ ਚੋਟੀ ਦੇ 5 ਦੇਸ਼ਾਂ ਵਿੱਚ ਭਾਰਤ ਵੀ ਸ਼ਾਮਲ ਹੈ। ਦੱਸ ਦੇਈਏ ਕਿ ਪੂਰੀ ਦੁਨੀਆ ਵਿੱਚ ਸਭ ਤੋਂ ਵੱਡਾ ਟੈਕਸਟਾਈਲ ਉਦਯੋਗ ਚੀਨ ਦਾ ਹੈ, ਅਤੇ ਦੂਜੇ ਸਥਾਨ 'ਤੇ ਬੰਗਲਾਦੇਸ਼ ਦਾ ਨਾਮ ਆਉਂਦਾ ਹੈ, ਜੋ ਦੱਖਣੀ ਏਸ਼ੀਆਈ ਦੇਸ਼ਾਂ ਵਿੱਚ ਭਾਰਤ ਦਾ ਸਭ ਤੋਂ ਵੱਡਾ ਪ੍ਰਤੀਯੋਗੀ ਦੇਸ਼ ਵੀ ਹੈ। ਭਾਰਤ ਦੇ ਗੁਆਂਢੀ ਦੇਸ਼ ਬੰਗਲਾਦੇਸ਼ ਦੀ ਆਰਥਿਕਤਾ ਵਿੱਚ ਕੱਪੜਾ ਉਦਯੋਗ ਸਭ ਤੋਂ ਵੱਡੀ ਭੂਮਿਕਾ ਨਿਭਾਉਂਦਾ ਹੈ ਪਰ ਇੰਨੀਂ ਦਿਨੀਂ ਬੰਗਲਾਦੇਸ਼ ਦੀ ਟੈਕਸਟਾਈਲ ਇੰਡਸਟਰੀ ਦੀ ਹਾਲਤ ਖ਼ਰਾਬ ਹੈ, ਜਦਕਿ ਭਾਰਤ ਕੋਲ ਬੜ੍ਹਤ ਬਣਾਉਣ ਦਾ ਇੱਕ ਵਧੀਆ ਮੌਕਾ ਹੈ।

ਮਿਡਲ ਈਸਟ ਯੁੱਧ ਦਾ ਬੰਗਲਾਦੇਸ਼ 'ਤੇ ਬੁਰਾ ਅਸਰ

ਈਰਾਨ ਅਤੇ ਅਮਰੀਕਾ ਵਿਚਾਲੇ ਚੱਲ ਰਹੇ ਟਕਰਾਅ ਕਾਰਨ ਦੁਨੀਆ ਦੇ ਕਈ ਦੇਸ਼ਾਂ ਵਿੱਚ ਬਾਲਣ ਅਤੇ ਊਰਜਾ ਦਾ ਸਪਲਾਈ ਸੰਕਟ ਵਧਿਆ ਹੈ, ਨਾਲ ਹੀ ਇਸ ਦੀਆਂ ਕੀਮਤਾਂ ਵਿੱਚ ਵੀ ਵਾਧਾ ਹੋਇਆ ਹੈ। ਇਸ ਕਾਰਨ ਕਈ ਕੰਪਨੀਆਂ ਸਮੇਂ ਸਿਰ ਨਿਰਯਾਤ ਨਹੀਂ ਕਰ ਪਾ ਰਹੀਆਂ ਹਨ। ਜਰਮਨ ਮੀਡੀਆ 'DW' ਦੀ ਇੱਕ ਰਿਪੋਰਟ ਅਨੁਸਾਰ, ਬੰਗਲਾਦੇਸ਼ ਦੇ ਕੱਪੜਾ ਉਦਯੋਗ ਦੇ ਹਾਲ ਬੇਹਾਲ ਹਨ। ਫੈਕਟਰੀ ਦੇ ਮੈਨੇਜਰ ਨਾਲ ਗੱਲਬਾਤ ਤੋਂ ਇਹ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਬੰਗਲਾਦੇਸ਼ ਵਿੱਚ ਬਿਜਲੀ ਕੱਟ ਵਧ ਗਏ ਹਨ, ਜਿਸ ਕਾਰਨ ਮਸ਼ੀਨਾਂ ਲਗਾਤਾਰ ਬੰਦ ਹੋ ਰਹੀਆਂ ਹਨ ਅਤੇ ਉਤਪਾਦਨ ਘਟ ਗਿਆ ਹੈ।

ਮਾਲ ਦੀ ਡਿਲੀਵਰੀ ਬਣੀ ਚਿੰਤਾ ਦਾ ਵਿਸ਼ਾ

ਯੁੱਧ ਦੇ ਕਾਰਨ ਸ਼ਿਪਮੈਂਟ ਇੱਕ ਵੱਡੀ ਚੁਣੌਤੀ ਬਣ ਕੇ ਉਭਰਿਆ ਹੈ। ਬਾਲਣ ਦੀ ਕੀਮਤ ਵਧਣ ਨਾਲ ਮਾਲ ਢੋਆ-ਢੁਆਈ ਦਾ ਖ਼ਰਚਾ ਵੀ ਵਧ ਗਿਆ ਹੈ। ਬੰਗਲਾਦੇਸ਼ ਦੀ ਪ੍ਰਮੁੱਖ ਟੈਕਸਟਾਈਲ ਐਸੋਸੀਏਸ਼ਨ ਦੇ ਪ੍ਰਧਾਨ ਨੇ 'DW' ਨੂੰ ਦੱਸਿਆ ਕਿ ਜਦੋਂ ਅਸੀਂ ਖਰੀਦਦਾਰਾਂ ਨੂੰ ਸਹੀ ਤਾਰੀਖ਼ 'ਤੇ ਡਿਲੀਵਰੀ ਨਹੀਂ ਦੇ ਪਾਉਂਦੇ, ਤਾਂ ਉਨ੍ਹਾਂ ਨਾਲ ਮੋਲ-ਭਾਅ ਕਰਨਾ ਪੈਂਦਾ ਹੈ। ਉਨ੍ਹਾਂ ਅੱਗੇ ਦੱਸਿਆ ਕਿ ਹੁਣ ਸਾਨੂੰ ਹਵਾਈ ਰਸਤੇ ਰਾਹੀਂ ਮਾਲ ਭੇਜਣਾ ਪੈ ਰਿਹਾ ਹੈ, ਜਿਸ ਕਾਰਨ ਮਾਲ ਦੀ 50-60 ਫ਼ੀਸਦੀ ਕੀਮਤ ਸਿਰਫ਼ ਢੋਆ-ਢੁਆਈ ਵਿੱਚ ਹੀ ਚਲੀ ਜਾਂਦੀ ਹੈ।

ਪੂਰੇ ਦੇਸ਼ 'ਤੇ ਪਵੇਗਾ ਬੁਰਾ ਅਸਰ

ਟੈਕਸਟਾਈਲ ਇੰਡਸਟਰੀ ਦੀ ਇਸ ਚੁਣੌਤੀ ਦਾ ਅਸਰ ਪੂਰੇ ਦੇਸ਼ 'ਤੇ ਪੈਣ ਦੀ ਸ਼ੰਕਾ ਹੈ। ਰਿਪੋਰਟਾਂ ਮੁਤਾਬਕ ਲਗਪਗ 40 ਲੱਖ ਲੋਕ ਕੱਪੜਾ ਉਦਯੋਗ ਨਾਲ ਜੁੜੇ ਹੋਏ ਹਨ। ਬੰਗਲਾਦੇਸ਼ ਵਿੱਚ ਕੋਰੋਨਾ ਕਾਲ ਤੋਂ ਬਾਅਦ ਹੀ ਇਹ ਇੰਡਸਟਰੀ ਲਗਾਤਾਰ ਦਬਾਅ ਵਿੱਚ ਹੈ; ਰੂਸ-ਯੂਕ੍ਰੇਨ ਯੁੱਧ, ਅਮਰੀਕੀ ਟੈਰਿਫ ਅਤੇ ਹੁਣ ਮਿਡਲ ਈਸਟ ਦੇ ਤਣਾਅ ਕਾਰਨ ਇਸ ਵਾਰ ਹਾਲਾਤ ਬੇਹੱਦ ਖ਼ਰਾਬ ਹਨ। ਮਾਹਰਾਂ ਦਾ ਮੰਨਣਾ ਹੈ ਕਿ ਇਸ ਦਾ ਅਸਰ ਬੰਗਲਾਦੇਸ਼ ਦੀ ਆਰਥਿਕਤਾ 'ਤੇ ਵੀ ਦੇਖਣ ਨੂੰ ਮਿਲੇਗਾ।

ਭਾਰਤ ਕੋਲ ਬੜ੍ਹਤ ਬਣਾਉਣ ਦਾ ਮੌਕਾ

ਰਿਪੋਰਟਾਂ ਅਨੁਸਾਰ ਭਾਰਤ ਦੀ ਟੈਕਸਟਾਈਲ ਇੰਡਸਟਰੀ ਦੁਨੀਆ ਵਿੱਚ ਪੰਜਵੇਂ ਸਥਾਨ 'ਤੇ ਹੈ। ਭਾਰਤ ਦਾ ਸਭ ਤੋਂ ਵੱਡਾ ਪ੍ਰਤੀਯੋਗੀ ਦੇਸ਼ ਬੰਗਲਾਦੇਸ਼ ਹੀ ਹੈ, ਜੋ ਗਲੋਬਲ ਪੱਧਰ 'ਤੇ ਦੂਜੇ ਸਥਾਨ 'ਤੇ ਹੈ। ਮਾਹਰਾਂ ਦਾ ਮੰਨਣਾ ਹੈ ਕਿ ਬੰਗਲਾਦੇਸ਼ ਦੀ ਟੈਕਸਟਾਈਲ ਇੰਡਸਟਰੀ ਵਿੱਚ ਆ ਰਹੀਆਂ ਚੁਣੌਤੀਆਂ ਦਰਮਿਆਨ ਭਾਰਤ ਕੋਲ ਅੱਗੇ ਲੰਘਣ ਦਾ ਸੁਨਹਿਰੀ ਮੌਕਾ ਹੈ।

ਮਾਹਰ ਦੱਸਦੇ ਹਨ ਕਿ ਤੇਲ ਦੀ ਪਹੁੰਚ ਅਤੇ ਉਪਲਬਧਤਾ ਦੇ ਮਾਮਲੇ ਵਿੱਚ ਭਾਰਤ, ਬੰਗਲਾਦੇਸ਼ ਦੇ ਮੁਕਾਬਲੇ ਬਹੁਤ ਚੰਗੀ ਸਥਿਤੀ ਵਿੱਚ ਹੈ। ਇਸ ਤੋਂ ਇਲਾਵਾ ਭਾਰਤ ਕੋਲ ਬਿਹਤਰ ਰਿਜ਼ਰਵ ਅਤੇ ਚੰਗੇ ਸਰੋਤ ਵੀ ਮੌਜੂਦ ਹਨ। ਬੰਗਲਾਦੇਸ਼ ਨੇ ਖ਼ੁਦ ਮੰਨਿਆ ਹੈ ਕਿ ਇਸ ਸੰਕਟ ਦੀ ਘੜੀ ਵਿੱਚ ਭਾਰਤ ਅਤੇ ਪਾਕਿਸਤਾਨ ਤੋਂ ਉਨ੍ਹਾਂ ਨੂੰ ਕੜੀ ਟੱਕਰ ਮਿਲੇਗੀ।

ਬੰਗਲਾਦੇਸ਼ ਤੋਂ ਕਿੰਨਾ ਪਿੱਛੇ ਹੈ ਭਾਰਤ

ਪੂਰੀ ਦੁਨੀਆ ਦੇ ਟੈਕਸਟਾਈਲ ਬਾਜ਼ਾਰ ਵਿੱਚ ਚੀਨ ਦੀ ਪਕੜ ਸਭ ਤੋਂ ਮਜ਼ਬੂਤ ਹੈ, ਜੋ ਗਲੋਬਲ ਮਾਰਕੀਟ ਵਿੱਚ 40% ਦਾ ਯੋਗਦਾਨ ਪਾਉਂਦਾ ਹੈ। ਚੀਨ ਤੋਂ ਬਾਅਦ ਬੰਗਲਾਦੇਸ਼ ਦਾ ਨਾਮ ਆਉਂਦਾ ਹੈ।

ਜੇਕਰ ਬੰਗਲਾਦੇਸ਼ ਵਿੱਚ ਸ਼ਿਪਮੈਂਟ ਅਤੇ ਬਿਜਲੀ ਦੀ ਇਹ ਸਮੱਸਿਆ ਲੰਬੀ ਚੱਲੀ ਤਾਂ ਭਾਰਤ ਕੋਲ ਇਸ ਫ਼ਰਕ ਨੂੰ ਮਿਟਾ ਕੇ ਅੱਗੇ ਵਧਣ ਦਾ ਇੱਕ ਬਹੁਤ ਹੀ ਸ਼ਾਨਦਾਰ ਮੌਕਾ ਹੋਵੇਗਾ।