Credit Score : ਕਿਵੇਂ ਬਣਦਾ ਹੈ ਤੁਹਾਡਾ ਕ੍ਰੈਡਿਟ ਸਕੋਰ? ਜਾਣ ਲਓ ਕ੍ਰੈਡਿਟ ਰਿਪੋਰਟ ਨਾਲ ਜੁੜੀਆਂ ਇਹ ਜ਼ਰੂਰੀ ਗੱਲਾਂ

ਨਵੀਂ ਦਿੱਲੀ : ਕਰਜ਼ਾ ਲੈਣ ਜਾਂ ਕ੍ਰੈਡਿਟ ਕਾਰਡ ਹਾਸਲ ਕਰਨ ਤੋਂ ਪਹਿਲਾਂ ਬੈਂਕ ਸਭ ਤੋਂ ਪਹਿਲਾਂ ਜਿਸ ਚੀਜ਼ ਦੀ ਜਾਂਚ ਕਰਦੇ ਹਨ, ਉਹ ਹੈ ਤੁਹਾਡਾ ਕ੍ਰੈਡਿਟ ਸਕੋਰ। ਕ੍ਰੈਡਿਟ ਸਕੋਰ ਨੂੰ ਅਸੀਂ ਸਿਬਿਲ ਸਕੋਰ ਵੀ ਕਹਿ ਸਕਦੇ ਹਾਂ। ਇਹ 3 ਅੰਕਾਂ ਦਾ ਇੱਕ ਨੰਬਰ ਹੁੰਦਾ ਹੈ ਜੋ ਆਮ ਤੌਰ 'ਤੇ 300 ਤੋਂ 900 ਦੇ ਵਿਚਕਾਰ ਹੁੰਦਾ ਹੈ ਅਤੇ ਤੁਹਾਡੀ ਵਿੱਤੀ ਭਰੋਸੇਯੋਗਤਾ ਨੂੰ ਦਰਸਾਉਂਦਾ ਹੈ। ਇਸ ਨੂੰ ਇੰਝ ਸਮਝਿਆ ਜਾ ਸਕਦਾ ਹੈ ਕਿ ਤੁਹਾਡਾ ਕ੍ਰੈਡਿਟ ਸਕੋਰ ਜਿੰਨਾ ਜ਼ਿਆਦਾ ਹੋਵੇਗਾ, ਲੋਨ ਮਿਲਣਾ ਉੰਨਾ ਹੀ ਆਸਾਨ ਹੋਵੇਗਾ ਅਤੇ ਘੱਟ ਵਿਆਜ ਦਰ ਦਾ ਫਾਇਦਾ ਮਿਲੇਗਾ।

ਦਰਅਸਲ, ਕ੍ਰੈਡਿਟ ਸਕੋਰ ਕਿਸੇ ਇੱਕ ਫਾਰਮੂਲੇ ਨਾਲ ਨਹੀਂ, ਬਲਕਿ ਤੁਹਾਡੇ ਪੂਰੇ ਕ੍ਰੈਡਿਟ ਵਿਵਹਾਰ ਦੇ ਆਧਾਰ 'ਤੇ ਤਿਆਰ ਹੁੰਦਾ ਹੈ। ਇਹ ਡੇਟਾ ਤੁਹਾਡੀ ਕ੍ਰੈਡਿਟ ਰਿਪੋਰਟ ਤੋਂ ਲਿਆ ਜਾਂਦਾ ਹੈ, ਜਿਸ ਵਿੱਚ ਤੁਹਾਡੇ ਲੋਨ, ਕ੍ਰੈਡਿਟ ਕਾਰਡ ਅਤੇ ਭੁਗਤਾਨ ਦੀ ਪੂਰੀ ਹਿਸਟਰੀ ਦਰਜ ਹੁੰਦੀ ਹੈ।

ਕਿਵੇਂ ਤੈਅ ਹੁੰਦਾ ਹੈ ਤੁਹਾਡਾ ਕ੍ਰੈਡਿਟ ਸਕੋਰ

ਕ੍ਰੈਡਿਟ ਰਿਪੋਰਟ ਨੂੰ ਤੈਅ ਕਰਨ ਵਿੱਚ ਕਈ ਅਹਿਮ ਫੈਕਟਰ ਕੰਮ ਕਰਦੇ ਹਨ।

ਪੇਮੈਂਟ ਹਿਸਟਰੀ : ਇਸ ਵਿੱਚ ਸਭ ਤੋਂ ਵੱਡੀ ਭੂਮਿਕਾ ਤੁਹਾਡੀ ਪੇਮੈਂਟ ਹਿਸਟਰੀ ਦੀ ਹੁੰਦੀ ਹੈ। ਜੇਕਰ ਤੁਸੀਂ ਸਮੇਂ ਸਿਰ EMI ਜਾਂ ਕ੍ਰੈਡਿਟ ਕਾਰਡ ਦਾ ਬਿੱਲ ਚੁਕਾਉਂਦੇ ਹੋ ਤਾਂ ਸਕੋਰ ਬਿਹਤਰ ਹੁੰਦਾ ਹੈ, ਜਦੋਂ ਕਿ ਪੇਮੈਂਟ ਵਿੱਚ ਦੇਰੀ ਹੋਣ 'ਤੇ ਇਹ ਹੇਠਾਂ ਡਿੱਗਦਾ ਹੈ।

ਕ੍ਰੈਡਿਟ ਯੂਟੀਲਾਈਜ਼ੇਸ਼ਨ : ਦੂਜਾ ਮਹੱਤਵਪੂਰਨ ਪਹਿਲੂ ਇਹ ਹੈ ਕਿ ਤੁਸੀਂ ਆਪਣੇ ਕੁੱਲ ਉਪਲਬਧ ਕ੍ਰੈਡਿਟ ਦਾ ਕਿੰਨਾ ਹਿੱਸਾ ਵਰਤਿਆ ਹੈ। ਮਾਹਰ ਸਲਾਹ ਦਿੰਦੇ ਹਨ ਕਿ ਇਹ ਵਰਤੋਂ ਹਮੇਸ਼ਾ 30% ਦੇ ਅੰਦਰ ਰੱਖਣੀ ਚਾਹੀਦੀ ਹੈ ਕਿਉਂਕਿ ਜ਼ਿਆਦਾ ਵਰਤੋਂ ਵਿੱਤੀ ਦਬਾਅ ਦਾ ਸੰਕੇਤ ਦਿੰਦੀ ਹੈ।

ਕ੍ਰੈਡਿਟ ਹਿਸਟਰੀ ਦੀ ਲੰਬਾਈ: ਤੁਹਾਡੀ ਕ੍ਰੈਡਿਟ ਹਿਸਟਰੀ ਜਿੰਨੀ ਪੁਰਾਣੀ ਅਤੇ ਸਥਿਰ ਹੋਵੇਗੀ, ਉੰਨਾ ਹੀ ਬਿਹਤਰ ਸਕੋਰ ਬਣਨ ਦੀ ਸੰਭਾਵਨਾ ਰਹਿੰਦੀ ਹੈ।

ਕ੍ਰੈਡਿਟ ਮਿਕਸ : ਹੋਮ ਲੋਨ, ਕਾਰ ਲੋਨ ਅਤੇ ਕ੍ਰੈਡਿਟ ਕਾਰਡ ਦਾ ਸੁਮੇਲ ਇਹ ਦਿਖਾਉਂਦਾ ਹੈ ਕਿ ਤੁਸੀਂ ਵੱਖ-ਵੱਖ ਤਰ੍ਹਾਂ ਦੇ ਕਰਜ਼ਿਆਂ ਨੂੰ ਕਿਵੇਂ ਸੰਭਾਲਦੇ ਹੋ।

ਨਵਾਂ ਕ੍ਰੈਡਿਟ ਜਾਂ ਇਨਕੁਆਰੀ : ਜੇਕਰ ਤੁਸੀਂ ਵਾਰ-ਵਾਰ ਲੋਨ ਜਾਂ ਕਾਰਡ ਲਈ ਅਪਲਾਈ ਕਰਦੇ ਹੋ ਤਾਂ ਇਹ ਸਕੋਰ 'ਤੇ ਨਕਾਰਾਤਮਕ ਅਸਰ ਪਾ ਸਕਦਾ ਹੈ ਕਿਉਂਕਿ ਇਸ ਨਾਲ ਤੁਹਾਡੀ ਵਿੱਤੀ ਸਥਿਤੀ 'ਤੇ ਸਵਾਲ ਉੱਠਦੇ ਹਨ।

ਕਿਉਂ ਜ਼ਰੂਰੀ ਹੈ ਕ੍ਰੈਡਿਟ ਰਿਪੋਰਟ

ਕ੍ਰੈਡਿਟ ਰਿਪੋਰਟ ਉਹ ਅਧਾਰ ਹੈ ਜਿਸ ਤੋਂ ਤੁਹਾਡਾ ਸਕੋਰ ਤਿਆਰ ਹੁੰਦਾ ਹੈ। ਇਸ ਵਿੱਚ ਤੁਹਾਡੇ ਸਾਰੇ ਬੈਂਕ ਖਾਤੇ, ਭੁਗਤਾਨ ਰਿਕਾਰਡ ਅਤੇ ਲੋਨ ਦੀ ਜਾਣਕਾਰੀ ਸ਼ਾਮਲ ਹੁੰਦੀ ਹੈ। ਬੈਂਕ ਇਸੇ ਰਿਪੋਰਟ ਦੇ ਆਧਾਰ 'ਤੇ ਤੈਅ ਕਰਦੇ ਹਨ ਕਿ ਤੁਹਾਨੂੰ ਕਰਜ਼ਾ ਦੇਣਾ ਸੁਰੱਖਿਅਤ ਹੈ ਜਾਂ ਨਹੀਂ। ਇਸ ਲਈ ਕ੍ਰੈਡਿਟ ਰਿਪੋਰਟ ਬੇਹੱਦ ਜ਼ਰੂਰੀ ਹੈ।