ਸਪੀਡ ਬੋਟ ’ਚ 36 ਸੈਲਾਨੀ ਸੀ ਸਵਾਰ, ਸਮੁੰਦਰ ’ਚ ਪਲਟਣ ਨਾਲ 15 ਦੀ ਮੌਤ... ਵੀਅਤਨਾਮ ’ਚ ਵਾਪਰੇ ਹਾਦਸੇ ਦੀ ਪੂਰੀ ਡਿਟੇਲ

ਡਿਜੀਟਲ ਡੈਸਕ, ਹਨੋਈ: ਵੀਅਤਨਾਮ ਦੇ ਫੂ ਕੁਓਕ ਟਾਪੂ ਦੇ ਨੇੜੇ ਇਕ ਕਿਸ਼ਤੀ ਪਲਟਣ ਨਾਲ 15 ਸੈਲਾਨੀਆਂ ਦੀ ਮੌਤ ਹੋ ਗਈ। ਕਿਸ਼ਤੀ ਵਿਚ 32 ਸੈਲਾਨੀ ਤੇ ਚਾਲਕ ਦਲ ਦੇ ਚਾਰ ਮੈਂਬਰਾਂ ਨੂੰ ਹੋ ਚੀ ਮਿਨਹ ਸ਼ਹਿਰ ਦੇ ਰੁਤ ਨਗੋਈ ਤੋਂ ਐੱਨ ਥੋਈ ਬੰਦਰਗਾਹ ਲਿਜਾ ਰਹੀ ਸੀ।

ਵੀਅਤਨਾਮੀ ਸਮਾਚਾਰ ਪੋਰਟਲ ਵੀਐਨ ਐਕਸਪ੍ਰੈਸ ਇੰਟਰਨੈਸ਼ਨਲ ਨੇ ਦੱਸਿਆ ਕਿ ਕਿਸ਼ਤੀ ਹੋ ਚੀ ਮਿਨਹ ਸ਼ਹਿਰ ਦੇ ਰੁਤ ਨਗੋਈ ਤੋਂ 400 ਮੀਟਰ ਦੀ ਦੂਰੀ 'ਤੇ ਡੁੱਬ ਗਈ, ਜਿਸ ਨਾਲ ਸਾਰੇ ਸਵਾਰ ਸਮੁੰਦਰ ਵਿਚ ਡਿੱਗ ਗਏ।

ਹਨੋਈ ਵਿਚ ਭਾਰਤੀ ਦੂਤਾਵਾਸ ਨੇ ਕਿਹਾ ਕਿ ਉਸਨੇ ਕੰਟਰੋਲ ਰੂਮ ਸਥਾਪਤ ਕੀਤੇ ਹਨ ਕਿਉਂਕਿ ਖੋਜ ਅਤੇ ਬਚਾਅ ਕਾਰਜ ਜਾਰੀ ਰਹਿਣਗੇ। ਦੂਤਾਵਾਸ ਨੇ X 'ਤੇ ਕਿਹਾ ਕਿ ਇਕ ਦੁਖਦਾਈ ਘਟਨਾ ਵਿਚ, ਵੀਅਤਨਾਮ ਦੇ ਫੂ ਕੁਓਕ ਟਾਪੂ ਦੇ ਨੇੜੇ ਕਈ ਭਾਰਤੀ ਸੈਲਾਨੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਕਿਸ਼ਤੀ ਪਲਟ ਗਈ।

ਦੂਤਾਵਾਸ ’ਚ ਕੰਟਰੋਲ ਰੂਮ ਸਥਾਪਤ

ਜਾਣਕਾਰੀ ਅਤੇ ਸਹਾਇਤਾ ਪ੍ਰਦਾਨ ਕਰਨ ਲਈ ਹੋ ਚੀ ਮਿਨਹ ਸ਼ਹਿਰ ਵਿਚ ਭਾਰਤ ਦੇ ਕੌਂਸਲੇਟ ਜਨਰਲ ਅਤੇ ਹਨੋਈ ਵਿਚ ਦੂਤਾਵਾਸ ਵਿੱਚ ਕੰਟਰੋਲ ਰੂਮ ਸਥਾਪਤ ਕੀਤੇ ਗਏ ਹਨ।