ਲੁਧਿਆਣਾ 'ਚ ਬਿਜਲੀ ਸੰਕਟ: ਅਣ-ਐਲਾਨੇ ਕੱਟਾਂ ਨਾਲ ਤਾਜਪੁਰ ਰੋਡ ਡਾਇੰਗ ਇੰਡਸਟਰੀ ਬੇਹਾਲ; ਰੋਜ਼ਾਨਾ ਦੇ ਕੱਟਾਂ ਦੀ ਬਜਾਏ ਹਫ਼ਤੇ 'ਚ ਇੱਕ ਦਿਨ 24 ਘੰਟੇ ਕੱਟ ਦੀ ਕੀਤੀ ਮੰਗ!

ਪ੍ਰਿੰਸ ਸ਼ਰਮਾ, ਪੰਜਾਬੀ ਜਾਗਰਣ, ਲੁਧਿਆਣਾ : ਲੁਧਿਆਣਾ ਦੇ ਤਾਜਪੁਰ ਰੋਡ ਇਲਾਕੇ ਸਥਿਤ ਡਾਇੰਗ ਇੰਡਸਟਰੀ ਅਨਐਲਾਨੇ ਅਤੇ ਲੰਬੇ ਬਿਜਲੀ ਕੱਟਾਂ ਕਾਰਨ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੀ ਹੈ। ਸਨਅਤਕਾਰਾਂ ਦਾ ਕਹਿਣਾ ਹੈ ਕਿ ਰਾਤ ਦੇ ਸਮੇਂ ਲਗਾਏ ਜਾ ਰਹੇ 7 ਤੋਂ 8 ਘੰਟਿਆਂ ਦੇ ਪਾਵਰ ਕੱਟਾਂ ਕਾਰਨ ਡਾਇੰਗ ਯੂਨਿਟਾਂ ਦੀ ਉਤਪਾਦਨ ਪ੍ਰਕਿਰਿਆ ਪ੍ਰਭਾਵਿਤ ਹੋ ਰਹੀ ਹੈ।

ਡਾਇੰਗ ਇੰਡਸਟਰੀ ਵਿੱਚ ਬੋਇਲਰ ਅਤੇ ਸਟੀਮ ਸਿਸਟਮ ਲਗਾਤਾਰ ਚੱਲਣ ਵਾਲੀ ਪ੍ਰਕਿਰਿਆ ਦਾ ਹਿੱਸਾ ਹੁੰਦੇ ਹਨ। ਅਚਾਨਕ ਬਿਜਲੀ ਬੰਦ ਹੋਣ ਨਾਲ ਬੋਇਲਰ ਦੀ ਕਾਰਗੁਜ਼ਾਰੀ ਪ੍ਰਭਾਵਿਤ ਹੁੰਦੀ ਹੈ ਅਤੇ ਕੱਪੜੇ ਦੀ ਪ੍ਰੋਸੈਸਿੰਗ ਦੌਰਾਨ ਸਮੱਸਿਆਵਾਂ ਪੈਦਾ ਹੋ ਜਾਂਦੀਆਂ ਹਨ। ਇਸ ਨਾਲ ਕਈ ਵਾਰ ਮਾਲ ਦੀ ਗੁਣਵੱਤਾ ਪ੍ਰਭਾਵਿਤ ਹੋਣ ਅਤੇ ਉਤਪਾਦਨ ਵਿੱਚ ਦੇਰੀ ਦਾ ਖਤਰਾ ਰਹਿੰਦਾ ਹੈ। ਸਨਅਤਕਾਰਾਂ ਅਨੁਸਾਰ ਵਾਰ-ਵਾਰ ਬਿਜਲੀ ਬੰਦ ਹੋਣ ਕਾਰਨ ਮਸ਼ੀਨਾਂ ਨੂੰ ਮੁੜ ਚਾਲੂ ਕਰਨ ਵਿੱਚ ਸਮਾਂ ਲੱਗਦਾ ਹੈ। ਇਸ ਨਾਲ ਉਤਪਾਦਨ ਸਮਰੱਥਾ ਘਟਦੀ ਹੈ ਅਤੇ ਸਮੇਂ ਸਿਰ ਆਰਡਰ ਪੂਰੇ ਕਰਨ ਵਿੱਚ ਦਿੱਕਤ ਆਉਂਦੀ ਹੈ। ਬਿਜਲੀ ਦੀ ਕਮੀ ਪੂਰੀ ਕਰਨ ਲਈ ਡੀਜ਼ਲ ਜਨਰੇਟਰ ਚਲਾਉਣੇ ਪੈਂਦੇ ਹਨ, ਜਿਸ ਨਾਲ ਡੀਜ਼ਲ ਖਰਚ ਅਤੇ ਉਤਪਾਦਨ ਲਾਗਤ ਵਿੱਚ ਵਾਧਾ ਹੋ ਰਿਹਾ ਹੈ। ਡਾਇੰਗ ਯੂਨਿਟਾਂ ਨਾਲ ਜੁੜੇ ਸਨਅਤਕਾਰਾਂ ਨੇ ਪਾਵਰਕਾਮ ਤੋਂ ਮੰਗ ਕੀਤੀ ਹੈ ਕਿ ਜੇਕਰ ਬਿਜਲੀ ਕੱਟ ਲਗਾਉਣੇ ਜ਼ਰੂਰੀ ਹਨ ਤਾਂ ਉਨ੍ਹਾਂ ਦਾ ਸਮਾਂ ਪਹਿਲਾਂ ਤੋਂ ਨਿਰਧਾਰਤ ਕੀਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਰੋਜ਼ਾਨਾ ਅਚਾਨਕ ਕੱਟਾਂ ਦੀ ਬਜਾਏ ਹਫ਼ਤੇ ਵਿੱਚ ਇੱਕ ਵਾਰ 24 ਘੰਟਿਆਂ ਦਾ ਯੋਜਨਾਬੱਧ ਕੱਟ ਲਗਾਇਆ ਜਾਵੇ, ਤਾਂ ਜੋ ਉਦਯੋਗ ਆਪਣੀ ਉਤਪਾਦਨ ਯੋਜਨਾ ਬਣਾ ਸਕਣ। ਸਨਅਤਕਾਰਾਂ ਦਾ ਕਹਿਣਾ ਹੈ ਕਿ ਬਿਜਲੀ ਸਪਲਾਈ ਵਿੱਚ ਸਥਿਰਤਾ ਆਉਣ ਨਾਲ ਡਾਇੰਗ ਇੰਡਸਟਰੀ ਦੀ ਕਾਰਗੁਜ਼ਾਰੀ ਬਿਹਤਰ ਹੋਵੇਗੀ ਅਤੇ ਉਦਯੋਗਿਕ ਉਤਪਾਦਨ ਨੂੰ ਨੁਕਸਾਨ ਤੋਂ ਬਚਾਇਆ ਜਾ ਸਕੇਗਾ।