6 ਮਹੀਨੇ ਦੇ ਬੱਚੇ ਦੇ ਦਿਲ ਵਿਚ ਨਹੀਂ ਸੀ ਖ਼ੂਨ ਦੀ ਨਾੜੀ, ਅੰਮ੍ਰਿਤਸਰ ਦੇ GMC ਹਸਪਤਾਲ 'ਚ ਹੋਇਆ ਦਿਲ ਦਾ ਦੁਰਲੱਭ ਆਪ੍ਰੇਸ਼ਨ

ਜਾਗਰਣ ਸੰਵਾਦਦਾਤਾ, ਅੰਮ੍ਰਿਤਸਰ : ਸਰਕਾਰੀ ਮੈਡੀਕਲ ਕਾਲਜ ਗੁਰੂ ਨਾਨਕ ਦੇਵ ਹਸਪਤਾਲ ਦੇ ਦਿਲ ਦੇ ਰੋਗਾਂ ਦੇ ਮਾਹਿਰਾਂ ਦੀ ਟੀਮ ਨੇ ਸਿਰਫ਼ ਛੇ ਮਹੀਨੇ ਦੇ ਬੱਚੇ ਦੇ ਜਨਮਜਾਤ ਦਿਲ ਦੇ ਨੁਕਸ ਦਾ ਇਲਾਜ ਕਰਕੇ ਡਾਕਟਰੀ ਖੇਤਰ ਵਿਚ ਇਕ ਮਹੱਤਵਪੂਰਨ ਪ੍ਰਾਪਤੀ ਹਾਸਲ ਕੀਤੀ ਹੈ। ਬੱਚੇ ਦਾ ਵਜ਼ਨ ਸਿਰਫ਼ 4.5 ਕਿਲੋਗ੍ਰਾਮ ਸੀ ਅਤੇ ਉਹ ਲੋੜੀਂਦਾ ਸਰੀਰਕ ਵਿਕਾਸ ਨਹੀਂ ਕਰ ਪਾ ਰਿਹਾ ਸੀ। ਡਾਕਟਰੀ ਭਾਸ਼ਾ ਵਿਚ ਇਸ ਸਥਿਤੀ ਨੂੰ ਪੀਡੀਏ (ਪੇਟੈਂਟ ਡਕਟਸ ਆਰਟੀਰੀਓਸਸ) ਕਿਹਾ ਜਾਂਦਾ ਹੈ। ਇਹ ਇਕ ਜਨਮਜਾਤ ਦਿਲ ਦਾ ਵਿਕਾਰ ਹੈ ਜਿਸ ਵਿਚ ਜਨਮ ਤੋਂ ਬਾਅਦ ਦਿਲ ਨਾਲ ਜੁੜੀ ਇੱਕ ਖੂਨ ਦੀ ਨਾੜੀ ਨਹੀਂ ਹੁੰਦੀ। ਘੱਟ ਵਜ਼ਨ ਵਾਲੇ ਬੱਚਿਆਂ ਵਿਚ ਇਸ ਬਿਮਾਰੀ ਦਾ ਇਲਾਜ ਕਰਨ ਦੀ ਪ੍ਰਕਿਰਿਆ ਹੋਰ ਵੀ ਚੁਣੌਤੀਪੂਰਨ ਹੁੰਦੀ ਹੈ।

ਦਿਲ ਦੇ ਰੋਗਾਂ ਦੇ ਮਾਹਿਰ ਡਾ. ਪਰਮਿੰਦਰ ਸਿੰਘ ਮਾਂਗੇੜਾ ਅਨੁਸਾਰ ਡਾਕਟਰਾਂ ਦੀ ਟੀਮ ਨੇ ਆਧੁਨਿਕ ਲਾਈਫਟੈਕ ਵੈਸਕੁਲਰ ਪਲੱਗ ਯੰਤਰ ਦੀ ਮਦਦ ਨਾਲ ਬੱਚੇ ਦੇ ਦਿਲ ਦੇ ਨੁਕਸ ਨੂੰ ਸਫਲਤਾਪੂਰਵਕ ਬੰਦ ਕੀਤਾ। ਮੈਡੀਕਲ ਟੀਮ ਨੇ ਇਸ ਸਫਲਤਾ ਦਾ ਸਿਹਰਾ ਪਰਮਾਤਮਾ ਦੀ ਮਿਹਰ, ਸੀਨੀਅਰ ਡਾਕਟਰਾਂ ਦੇ ਮਾਰਗਦਰਸ਼ਨ ਅਤੇ ਪੂਰੀ ਟੀਮ ਦੀ ਸਮੂਹਿਕ ਕੋਸ਼ਿਸ਼ ਨੂੰ ਦਿੱਤਾ। ਇਸ ਪ੍ਰਕਿਰਿਆ 'ਚ ਡਾ. ਵੀਣਾ, ਡਾ. ਮਿਲਿੰਦ ਅਤੇ ਐਨਸਥੀਸੀਆ ਵਿਭਾਗ ਦੀ ਪੂਰੀ ਟੀਮ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ।