ਪੌਦਿਆਂ ਦੀਆਂ ਜੜ੍ਹਾਂ ਨੂੰ ਖੋਖਲਾ ਕਰ ਰਹੀਆਂ ਹਨ ਕੀੜੀਆਂ? ਇਨ੍ਹਾਂ 5 ਦੇਸੀ ਨੁਸਖਿਆਂ ਨਾਲ ਮਿੰਟਾਂ 'ਚ ਭੱਜਣਗੀਆਂ ਦੂਰ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਘਰ ਵਿਚ ਹਰੇ-ਭਰੇ ਪੌਦੇ ਲਗਾਉਣਾ ਸਭ ਨੂੰ ਬਹੁਤ ਪਸੰਦ ਹੁੰਦਾ ਹੈ। ਇਹ ਨਾ ਸਿਰਫ਼ ਬਾਲਕੋਨੀ ਅਤੇ ਛੱਤ ਦੀ ਖ਼ੂਬਸੂਰਤੀ ਵਧਾਉਂਦੇ ਹਨ, ਬਲਕਿ ਸਾਨੂੰ ਸਕੂਨ ਵੀ ਦਿੰਦੇ ਹਨ। ਹਾਲਾਂਕਿ, ਕਈ ਵਾਰ ਅਸੀਂ ਦੇਖਦੇ ਹਾਂ ਕਿ ਸਾਡੇ ਪਿਆਰੇ ਪੌਦਿਆਂ ਦੇ ਗਮਲੇ 'ਚ ਕੀੜੀਆਂ ਨੇ ਆਪਣਾ ਘਰ ਬਣਾ ਲਿਆ ਹੈ। ਜੀ ਹਾਂ, ਇਹ ਹੌਲੀ-ਹੌਲੀ ਮਿੱਟੀ ਦੇ ਅੰਦਰ ਜਾ ਕੇ ਪੌਦਿਆਂ ਦੀਆਂ ਜੜ੍ਹਾਂ ਨੂੰ ਖੋਖਲਾ ਕਰਨ ਲੱਗਦੀਆਂ ਹਨ, ਜਿਸ ਨਾਲ ਹਰਾ-ਭਰਾ ਪੌਦਾ ਅਚਾਨਕ ਸੁੱਕਣ ਲੱਗਦਾ ਹੈ ਅਤੇ ਉਸਦੀ ਜਾਨ ਖ਼ਤਰੇ 'ਚ ਪੈ ਜਾਂਦੀ ਹੈ।

ਬਾਜ਼ਾਰ 'ਚ ਮਿਲਣ ਵਾਲੇ ਕੈਮੀਕਲ ਯੁਕਤ ਕੀਟਨਾਸ਼ਕ ਕੀੜੀਆਂ ਨੂੰ ਤਾਂ ਮਾਰ ਦਿੰਦੇ ਹਨ, ਪਰ ਉਹ ਤੁਹਾਡੇ ਨਾਜ਼ੁਕ ਪੌਦੇ ਨੂੰ ਵੀ ਨੁਕਸਾਨ ਪਹੁੰਚਾ ਸਕਦੇ ਹਨ। ਇਸ ਲਈ, ਜੇਕਰ ਤੁਸੀਂ ਵੀ ਇਸ ਪਰੇਸ਼ਾਨੀ ਨਾਲ ਜੂਝ ਰਹੇ ਹੋ, ਤਾਂ ਲੈ ਕੇ ਆਏ ਹਾਂ 5 ਅਜਿਹੇ ਅਸਰਦਾਰ ਘਰੇਲੂ ਨੁਸਖੇ, ਜਿਨ੍ਹਾਂ ਨਾਲ ਕੀੜੀਆਂ ਮਿੰਟਾਂ ਵਿੱਚ ਤੁਹਾਡੇ ਪੌਦਿਆਂ ਤੋਂ ਦੂਰ ਭੱਜ ਜਾਣਗੀਆਂ।

1. ਦਾਲਚੀਨੀ ਦਾ ਕਮਾਲ

ਕੀੜੀਆਂ ਨੂੰ ਦਾਲਚੀਨੀ ਦੀ ਤੇਜ਼ ਮਹਿਕ ਬਿਲਕੁਲ ਵੀ ਪਸੰਦ ਨਹੀਂ ਹੁੰਦੀ। ਇਹ ਉਨ੍ਹਾਂ ਲਈ 'ਲਕਸ਼ਮਣ ਰੇਖਾ' ਦਾ ਕੰਮ ਕਰਦੀ ਹੈ ਜਿਸ ਨੂੰ ਉਹ ਪਾਰ ਨਹੀਂ ਕਰਨਾ ਚਾਹੁੰਦੀਆਂ। ਇਸਦਾ ਇਸਤੇਮਾਲ ਕਰਨ ਲਈ ਬਸ ਥੋੜ੍ਹੀ ਜਿਹੀ ਪੀਸੀ ਹੋਈ ਦਾਲਚੀਨੀ ਲਓ ਅਤੇ ਉਸ ਨੂੰ ਗਮਲੇ ਦੀ ਮਿੱਟੀ ਦੇ ਉੱਪਰ ਚਾਰੋਂ ਪਾਸੇ ਛਿੜਕ ਦਿਓ। ਇਸ ਦੀ ਮਹਿਕ ਨਾਲ ਕੀੜੀਆਂ ਤੁਰੰਤ ਰਸਤਾ ਬਦਲ ਲੈਣਗੀਆਂ।

2. ਚਿੱਟੇ ਸਿਰਕੇ ਦਾ ਸਪ੍ਰੇ (White Vinegar Spray)

ਚਿੱਟੇ ਸਿਰਕੇ ਦੀ ਗੰਧ ਬਹੁਤ ਤੇਜ਼ ਹੁੰਦੀ ਹੈ, ਜੋ ਕੀੜੀਆਂ ਦੇ ਸੁੰਘਣ ਦੀ ਸਮਰੱਥਾ ਨੂੰ ਭਟਕਾ ਦਿੰਦੀ ਹੈ ਅਤੇ ਉਹ ਆਪਣਾ ਰਸਤਾ ਭੁੱਲ ਜਾਂਦੀਆਂ ਹਨ। ਇਸ ਲਈ, ਇਕ ਸਪ੍ਰੇ ਬੋਤਲ 'ਚ ਅੱਧਾ ਪਾਣੀ ਅਤੇ ਅੱਧਾ ਚਿੱਟਾ ਸਿਰਕਾ ਮਿਲਾ ਲਓ। ਹੁਣ ਇਸ ਮਿਸ਼ਰਨ ਨੂੰ ਗਮਲੇ ਦੇ ਆਸ-ਪਾਸ ਅਤੇ ਮਿੱਟੀ 'ਤੇ ਹਲਕਾ ਜਿਹਾ ਸਪ੍ਰੇ ਕਰ ਦਿਉ।

3. ਬਚੀ ਹੋਈ ਕਾਫ਼ੀ (Coffee Grounds)

ਜੇਕਰ ਤੁਸੀਂ ਫਿਲਟਰ ਕਾਫ਼ੀ ਪੀਣ ਦੇ ਸ਼ੌਕੀਨ ਹੋ ਤਾਂ ਬਚੀ ਹੋਈ ਕਾਫ਼ੀ ਦਾ ਚੂਰਾ ਤੁਹਾਡੇ ਪੌਦਿਆਂ ਲਈ ਕਿਸੇ ਵਰਦਾਨ ਨਾਲੋਂ ਘੱਟ ਨਹੀਂ ਹੈ। ਇਸਦੇ ਲਈ, ਇਸਤੇਮਾਲ ਕੀਤੀ ਹੋਈ ਕਾਫ਼ੀ ਨੂੰ ਸੁਕਾ ਲਓ ਅਤੇ ਉਸ ਨੂੰ ਮਿੱਟੀ ਦੇ ਉੱਪਰ ਫੈਲਾ ਦਿਓ। ਇਹ ਨਾ ਸਿਰਫ਼ ਕੀੜੀਆਂ ਨੂੰ ਦੂਰ ਭਗਾਉਂਦਾ ਹੈ, ਬਲਕਿ ਮਿੱਟੀ ਲਈ ਇੱਕ ਬਿਹਤਰੀਨ ਕੁਦਰਤੀ ਖਾਦ ਦਾ ਵੀ ਕੰਮ ਕਰਦਾ ਹੈ।

4. ਨਿੰਬੂ ਜਾਂ ਸੰਤਰੇ ਦੇ ਛਿਲਕੇ

ਖੱਟੇ ਫਲਾਂ ਦੀ ਤਾਜ਼ਾ ਖ਼ੁਸ਼ਬੂ ਸਾਨੂੰ ਤਾਂ ਬਹੁਤ ਚੰਗੀ ਲੱਗਦੀ ਹੈ ਪਰ ਕੀੜੀਆਂ ਇਸ ਤੋਂ ਨਫ਼ਰਤ ਕਰਦੀਆਂ ਹਨ। ਅਜਿਹੇ ਵਿਚ, ਤੁਸੀਂ ਨਿੰਬੂ ਜਾਂ ਸੰਤਰੇ ਦੇ ਛਿਲਕਿਆਂ ਨੂੰ ਛੋਟੇ-ਛੋਟੇ ਟੁਕੜਿਆਂ 'ਚ ਕੱਟ ਕੇ ਪੌਦੇ ਦੀਆਂ ਜੜ੍ਹਾਂ ਦੇ ਕੋਲ ਰੱਖ ਦਿਓ। ਤੁਸੀਂ ਚਾਹੋ ਤਾਂ ਇਨ੍ਹਾਂ ਛਿਲਕਿਆਂ ਨੂੰ ਪਾਣੀ 'ਚ ਉਬਾਲ ਕੇ ਅਤੇ ਠੰਢਾ ਕਰਕੇ ਉਸਦਾ ਸਪ੍ਰੇ ਵੀ ਬਣਾ ਸਕਦੇ ਹੋ।

5. ਹਲਦੀ ਪਾਊਡਰ ਦੀ ਵਰਤੋਂ

ਹਲਦੀ ਨਾ ਸਿਰਫ਼ ਸਾਡੀ ਸਿਹਤ ਲਈ ਚੰਗੀ ਹੈ, ਬਲਕਿ ਪੌਦਿਆਂ ਨੂੰ ਕੀੜਿਆਂ ਤੋਂ ਬਚਾਉਣ ਵਿਚ ਵੀ ਮਾਹਿਰ ਹੈ। ਗਮਲੇ ਦੀ ਮਿੱਟੀ ਦੀ ਹਲਕੀ ਜਿਹੀ ਗੁਡਾਈ ਕਰੋ ਅਤੇ ਉਸ ਵਿੱਚ ਇਕ ਜਾਂ ਦੋ ਚਮਚ ਹਲਦੀ ਪਾਊਡਰ ਚੰਗੀ ਤਰ੍ਹਾਂ ਮਿਲਾ ਦਿਓ। ਇਸ ਨਾਲ ਕੀੜੀਆਂ ਦੇ ਨਾਲ-ਨਾਲ ਫੰਗਸ ਵਰਗੀਆਂ ਹੋਰ ਬਿਮਾਰੀਆਂ ਵੀ ਪੌਦੇ ਤੋਂ ਕੋਸੋ ਦੂਰ ਰਹਿਣਗੀਆਂ।

ਇਹ ਸਾਰੇ ਨੁਸਖੇ ਪੂਰੀ ਤਰ੍ਹਾਂ ਨਾਲ ਕੁਦਰਤੀ ਹਨ ਤੇ ਇਨ੍ਹਾਂ ਦਾ ਤੁਹਾਡੇ ਪੌਦਿਆਂ 'ਤੇ ਕੋਈ ਬੁਰਾ ਅਸਰ ਨਹੀਂ ਪਵੇਗਾ। ਇਸ ਤੋਂ ਇਲਾਵਾ, ਗਮਲੇ 'ਚ ਪਾਣੀ ਉਦੋਂ ਹੀ ਪਾਓ ਜਦੋਂ ਮਿੱਟੀ ਉੱਪਰੋਂ ਸੁੱਕੀ ਲੱਗੇ, ਕਿਉਂਕਿ ਗਮਲੇ ਵਿੱਚ ਹਮੇਸ਼ਾ ਚਿੱਕੜ ਜਾਂ ਨਮੀ ਬਣੀ ਰਹਿਣ ਨਾਲ ਵੀ ਕੀੜੀਆਂ ਤੇ ਕੀੜੇ ਜਲਦੀ ਆਉਂਦੇ ਹਨ।