ਹੱਡੀਆਂ ਨੂੰ ਮਜ਼ਬੂਤ ਕਰਨ ਵਾਲਾ ਵਿਟਾਮਿਨ-D ਬਣ ਸਕਦਾ ਹੈ ਕਿਡਨੀ ਤੇ ਦਿਲ ਦਾ ਦੁਸ਼ਮਣ, ਡਾਕਟਰ ਨੇ ਦਿੱਤੀ ਚਿਤਾਵਨੀ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਅੱਜ-ਕੱਲ੍ਹ ਮਾੜੀ ਜਿਹੀ ਥਕਾਵਟ ਜਾਂ ਕਮਜ਼ੋਰੀ ਮਹਿਸੂਸ ਹੁੰਦੇ ਹੀ ਲੋਕ ਤੁਰੰਤ ਵਿਟਾਮਿਨ-D ਦੇ ਸਪਲੀਮੈਂਟਸ ਲੈਣਾ ਸ਼ੁਰੂ ਕਰ ਦਿੰਦੇ ਹਨ। ਧੁੱਪ ਵਿਚ ਘੱਟ ਨਿਕਲਣਾ ਤੇ ਵਿਗੜੇ ਹੋਏ ਲਾਈਫਸਟਾਈਲ ਦੇ ਕਾਰਨ ਇਨ੍ਹਾਂ ਗੋਲੀਆਂ ਦਾ ਚਲਨ ਕਾਫ਼ੀ ਵਧ ਗਿਆ ਹੈ।

ਇਹ ਬਿਲਕੁਲ ਸੱਚ ਹੈ ਕਿ ਹੱਡੀਆਂ ਦੀ ਮਜ਼ਬੂਤੀ, ਚੰਗੀ ਇਮਿਊਨਿਟੀ ਤੇ ਬਿਹਤਰ ਸਿਹਤ ਲਈ ਵਿਟਾਮਿਨ-D ਬਹੁਤ ਜ਼ਰੂਰੀ ਹੈ, ਪਰ ਕੀ ਤੁਹਾਨੂੰ ਪਤਾ ਹੈ ਕਿ ਇਸ ਦੀ ਜ਼ਿਆਦਾ ਮਾਤਰਾ ਤੁਹਾਡੀ ਸਿਹਤ ਲਈ ਬਹੁਤ ਵੱਡਾ ਖਤਰਾ ਬਣ ਸਕਦੀ ਹੈ?

ਜੀ ਹਾਂ, ਜਿਸ ਤਰ੍ਹਾਂ ਵਿਟਾਮਿਨ-D ਦੀ ਕਮੀ ਸਰੀਰ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ, ਉਸੇ ਤਰ੍ਹਾਂ ਬਿਨਾਂ ਡਾਕਟਰੀ ਸਲਾਹ ਦੇ ਇਸ ਦੇ ਸਪਲੀਮੈਂਟਸ ਦਾ ਲੋੜ ਤੋਂ ਜ਼ਿਆਦਾ ਸੇਵਨ ਵੀ ਤੁਹਾਡੀ ਸਿਹਤ ਵਿਗਾੜ ਸਕਦਾ ਹੈ। ਆਓ, ਫੋਰਟਿਸ ਹਸਪਤਾਲ, ਸ਼ਾਲੀਮਾਰ ਬਾਗ ਦੇ ਕੰਸਲਟੈਂਟ-ਨੇਫ੍ਰੋਲੋਜਿਸਟ ਡਾ. ਭਾਨੂ ਮਿਸ਼ਰਾ ਤੋਂ ਸਮਝਦੇ ਹਾਂ ਇਸ ਗੰਭੀਰ ਖਤਰੇ ਬਾਰੇ।

Vitamin-D ਦੀ ਓਵਰਡੋਜ਼ ਆਖਿਰ ਖਤਰਨਾਕ ਕਿਉਂ ਹੈ?

ਜਦੋਂ ਅਸੀਂ ਆਪਣੀ ਮਰਜ਼ੀ ਨਾਲ ਸਪਲੀਮੈਂਟਸ ਖਾਂਦੇ ਹਾਂ ਤਾਂ ਸਰੀਰ 'ਚ ਵਿਟਾਮਿਨ-D ਦਾ ਪੱਧਰ ਆਮ ਨਾਲੋਂ ਬਹੁਤ ਜ਼ਿਆਦਾ ਵਧ ਜਾਂਦਾ ਹੈ। ਮੈਡੀਕਲ ਭਾਸ਼ਾ 'ਚ ਇਸ ਨੂੰ 'ਵਿਟਾਮਿਨ-ਡੀ ਟੌਕਸਿਸਿਟੀ' ਜਾਂ 'ਹਾਈਪਰਵਿਟਾਮਿਨੋਸਿਸ ਡੀ' ਕਿਹਾ ਜਾਂਦਾ ਹੈ। ਇਕ ਗੱਲ ਹਮੇਸ਼ਾ ਧਿਆਨ 'ਚ ਰੱਖੋ ਕਿ ਇਹ ਸਮੱਸਿਆ ਕਦੇ ਵੀ ਧੁੱਪ ਸੇਕਣ ਜਾਂ ਡਾਈਟ ਨਾਲ ਨਹੀਂ ਹੁੰਦੀ, ਬਲਕਿ ਸਿਰਫ਼ ਸਪਲੀਮੈਂਟਸ ਦੀ ਓਵਰਡੋਜ਼ ਨਾਲ ਹੁੰਦੀ ਹੈ।

ਵਿਟਾਮਿਨ-D ਦਾ ਮੁੱਖ ਕੰਮ ਸਾਡੇ ਸਰੀਰ 'ਚ ਕੈਲਸ਼ੀਅਮ ਨੂੰ ਸੋਖਣਾ ਹੈ, ਪਰ ਜਦੋਂ ਵਿਟਾਮਿਨ-D ਹੱਦ ਤੋਂ ਜ਼ਿਆਦਾ ਹੋ ਜਾਂਦਾ ਹੈ ਤਾਂ ਸਰੀਰ ਵਿਚ ਕੈਲਸ਼ੀਅਮ ਦਾ ਪੱਧਰ ਵੀ ਅਸਧਾਰਨ ਰੂਪ 'ਚ ਵਧ ਜਾਂਦਾ ਹੈ। ਇਸ ਸਥਿਤੀ ਨੂੰ 'ਹਾਇਪਰਕੈਲਸੀਮੀਆ' ਕਹਿੰਦੇ ਹਨ ਤੇ ਇਹੋ ਸਥਿਤੀ ਕਈ ਗੰਭੀਰ ਬਿਮਾਰੀਆਂ ਦੀ ਜੜ੍ਹ ਹੈ।

ਇਨ੍ਹਾਂ ਲੱਛਣਾਂ ਨੂੰ ਕਦੇ ਨਾ ਕਰੋ ਨਜ਼ਰਅੰਦਾਜ਼

ਵਿਟਾਮਿਨ-D ਦੀ ਓਵਰਡੋਜ਼ ਦੇ ਲੱਛਣ ਰਾਤੋ-ਰਾਤ ਨਹੀਂ ਬਲਕਿ ਹੌਲੀ-ਹੌਲੀ ਸਾਹਮਣੇ ਆਉਂਦੇ ਹਨ, ਇਸ ਲਈ ਇਨ੍ਹਾਂ ਨੂੰ ਪਛਾਣਨਾ ਥੋੜ੍ਹਾ ਮੁਸ਼ਕਲ ਹੋ ਸਕਦਾ ਹੈ। ਜੇਕਰ ਤੁਸੀਂ ਸਪਲੀਮੈਂਟਸ ਲੈ ਰਹੇ ਹੋ ਅਤੇ ਤੁਹਾਨੂੰ ਹੇਠਾਂ ਦਿੱਤੀ ਗਈ ਕੋਈ ਵੀ ਸਮੱਸਿਆ ਮਹਿਸੂਸ ਹੋ ਰਹੀ ਹੈ, ਤਾਂ ਤੁਰੰਤ ਡਾਕਟਰ ਨੂੰ ਮਿਲੋ:

ਥਕਾਵਟ ਅਤੇ ਮਾਸਪੇਸ਼ੀਆਂ 'ਚ ਕਮਜ਼ੋਰੀ: ਕੈਲਸ਼ੀਅਮ ਦੀ ਜ਼ਿਆਦਾ ਮਾਤਰਾ ਦੇ ਕਾਰਨ ਤੁਹਾਡੀਆਂ ਮਾਸਪੇਸ਼ੀਆਂ ਕਮਜ਼ੋਰ ਪੈਣ ਲੱਗਦੀਆਂ ਹਨ ਅਤੇ ਤੁਸੀਂ ਹਮੇਸ਼ਾ ਥਕਿਆ ਹੋਇਆ ਮਹਿਸੂਸ ਕਰਦੇ ਹੋ।

ਪੇਟ ਦੀਆਂ ਦਿੱਕਤਾਂ ਤੇ ਕਬਜ਼: ਸਰੀਰ 'ਚ ਵਧਿਆ ਹੋਇਆ ਕੈਲਸ਼ੀਅਮ ਪਾਚਨ ਪ੍ਰਣਾਲੀ ਨੂੰ ਵਿਗਾੜ ਦਿੰਦਾ ਹੈ। ਇਸ ਨਾਲ ਜੀਅ ਮਿਚਲਾਉਣਾ, ਉਲਟੀ ਆਉਣਾ, ਪੇਟ ਦਰਦ ਤੇ ਕਬਜ਼ ਦੀ ਸ਼ਿਕਾਇਤ ਹੋ ਸਕਦੀ ਹੈ।

ਵਾਰ-ਵਾਰ ਪਿਸ਼ਾਬ ਆਉਣਾ ਤੇ ਬਹੁਤ ਜ਼ਿਆਦਾ ਪਿਆਸ: ਵਧੇ ਹੋਏ ਕੈਲਸ਼ੀਅਮ ਨੂੰ ਕਿਡਨੀ ਸਰੀਰ 'ਚੋਂ ਬਾਹਰ ਕੱਢਣ ਦੀ ਕੋਸ਼ਿਸ਼ ਕਰਦੀ ਹੈ। ਇਸ ਨਾਲ ਤੁਹਾਨੂੰ ਵਾਰ-ਵਾਰ ਪਿਸ਼ਾਬ ਆਉਂਦਾ ਹੈ ਤੇ ਸਰੀਰ 'ਚ ਪਾਣੀ ਦੀ ਕਮੀ ਹੋ ਸਕਦੀ ਹੈ।

ਭੁੱਖ ਅਤੇ ਵਜ਼ਨ 'ਚ ਕਮੀ: ਪਾਚਨ ਦੀਆਂ ਸਮੱਸਿਆਵਾਂ ਅਤੇ ਲਗਾਤਾਰ ਬਿਮਾਰ ਮਹਿਸੂਸ ਕਰਨ ਦੀ ਵਜ੍ਹਾ ਕਰ ਕੇ ਭੁੱਖ ਲੱਗਣੀ ਬੰਦ ਹੋ ਸਕਦੀ ਹੈ ਜਿਸ ਨਾਲ ਤੇਜ਼ੀ ਨਾਲ ਵਜ਼ਨ ਡਿੱਗਣ ਲੱਗਦਾ ਹੈ।

ਹੱਡੀਆਂ ਵਿਚ ਦਰਦ: ਜ਼ਿਆਦਾ ਵਿਟਾਮਿਨ-D ਹੱਡੀਆਂ ਨੂੰ ਮਜ਼ਬੂਤ ਕਰਨ ਦੀ ਬਜਾਏ ਉਨ੍ਹਾਂ ਵਿਚ ਮੌਜੂਦ ਕੈਲਸ਼ੀਅਮ ਨੂੰ ਹੀ ਬਾਹਰ ਕੱਢਣ ਲੱਗਦਾ ਹੈ, ਜਿਸ ਨਾਲ ਹੱਡੀਆਂ ਕਮਜ਼ੋਰ ਹੋ ਜਾਂਦੀਆਂ ਹਨ ਅਤੇ ਦਰਦ ਰਹਿਣ ਲੱਗਦਾ ਹੈ।

ਕਿਡਨੀ 'ਤੇ ਸਿੱਧਾ ਅਸਰ: ਕੈਲਸ਼ੀਅਮ ਦਾ ਪੱਧਰ ਲੰਬੇ ਸਮੇਂ ਤਕ ਜ਼ਿਆਦਾ ਰਹੇ ਤਾਂ ਕਿਡਨੀ 'ਚ ਪੱਥਰੀ ਬਣ ਸਕਦੀ ਹੈ। ਗੰਭੀਰ ਮਾਮਲਿਆਂ 'ਚ ਇਹ ਕਿਡਨੀ ਫੇਲ੍ਹ ਹੋਣ ਦਾ ਕਾਰਨ ਵੀ ਬਣ ਸਕਦਾ ਹੈ।

ਦਿਲ ਨਾਲ ਜੁੜੀਆਂ ਬਿਮਾਰੀਆਂ: ਜੇਕਰ ਸਥਿਤੀ ਜ਼ਿਆਦਾ ਗੰਭੀਰ ਹੋ ਜਾਵੇ, ਤਾਂ ਇਹ ਤੁਹਾਡੇ ਦਿਲ ਦੀ ਧੜਕਣ ਨੂੰ ਵੀ ਪ੍ਰਭਾਵਿਤ ਕਰ ਸਕਦਾ ਹੈ।

ਵਿਟਾਮਿਨ-ਡੀ ਦੇ ਓਵਰਡੋਜ਼ ਤੋਂ ਕਿਵੇਂ ਬਚੀਏ?

ਵਿਟਾਮਿਨ-D ਦੀ ਓਵਰਡੋਜ਼ ਤੋਂ ਬਚਣਾ ਬਹੁਤ ਆਸਾਨ ਹੈ, ਬੱਸ ਤੁਹਾਨੂੰ ਇਨ੍ਹਾਂ ਜ਼ਰੂਰੀ ਗੱਲਾਂ ਦਾ ਧਿਆਨ ਰੱਖਣਾ ਹੈ:

ਡੋਜ਼ ਦਾ ਸਖ਼ਤੀ ਨਾਲ ਪਾਲਣ ਕਰੋ: ਡਾਕਟਰ ਨੇ ਸਪਲੀਮੈਂਟਸ ਦੀ ਜੋ ਮਾਤਰਾ ਅਤੇ ਜਿੰਨੇ ਦਿਨਾਂ ਦਾ ਕੋਰਸ ਤੈਅ ਕੀਤਾ ਹੈ, ਸਿਰਫ਼ ਓਨਾ ਹੀ ਲਓ। ਆਪਣੀ ਮਰਜ਼ੀ ਨਾਲ ਡੋਜ਼ ਵਧਾਉਣ ਦੀ ਗਲਤੀ ਨਾ ਕਰੋ।

ਬਿਨਾਂ ਡਾਕਟਰ ਤੋਂ ਪੁੱਛੇ ਦਵਾਈ ਨਾ ਲਓ: ਆਪਣੀ ਮਰਜ਼ੀ ਨਾਲ ਕੋਈ ਵੀ ਸਪਲੀਮੈਂਟ ਨਾ ਖਾਓ। ਸਭ ਤੋਂ ਪਹਿਲਾਂ ਬਲੱਡ ਟੈਸਟ ਕਰਵਾਓ ਅਤੇ ਡਾਕਟਰ ਦੀ ਸਲਾਹ ਲਓ। ਉਹ ਤੁਹਾਡੀ ਟੈਸਟ ਰਿਪੋਰਟ ਦੇ ਅਧਾਰ 'ਤੇ ਸਹੀ ਡੋਜ਼ ਦੱਸਣਗੇ।

ਕੁਦਰਤੀ ਤਰੀਕਿਆਂ ਨੂੰ ਅਪਣਾਓ: ਆਪਣੇ ਸਰੀਰ ਲਈ ਜ਼ਰੂਰੀ ਵਿਟਾਮਿਨ-D ਦਾ ਜ਼ਿਆਦਾਤਰ ਹਿੱਸਾ ਕੁਦਰਤੀ ਧੁੱਪ ਤੋਂ ਲੈਣ ਦੀ ਕੋਸ਼ਿਸ਼ ਕਰੋ। ਇਸ ਤੋਂ ਇਲਾਵਾ ਆਪਣੀ ਡਾਈਟ ਵਿੱਚ ਫੈਟੀ ਫਿਸ਼, ਆਂਡੇ ਦੀ ਜ਼ਰਦੀ ਅਤੇ ਫੋਰਟੀਫਾਈਡ ਦੁੱਧ ਵਰਗੀਆਂ ਚੀਜ਼ਾਂ ਨੂੰ ਸ਼ਾਮਲ ਕਰੋ।