'100% ਆਟਾ ਬਿਸਕੁਟ' ਦਾ ਖੁੱਲ੍ਹਿਆ ਪੋਲ! ਜਾਂਚ 'ਚ ਨਿਕਲਿਆ ਸਿਰਫ਼ 72% ਆਟਾ, FSSAI ਨੇ ਕੰਪਨੀਆਂ ਨੂੰ ਪਾਈ ਨੱਥ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਅਸੀਂ ਅਕਸਰ ਬਾਜ਼ਾਰ ਵਿੱਚੋਂ ਕੋਈ ਵੀ ਪ੍ਰੋਡਕਟ ਇਹ ਸੋਚ ਕੇ ਖਰੀਦ ਲੈਂਦੇ ਹਾਂ ਕਿ ਪੈਕੇਟ 'ਤੇ ਲਿਖੇ ਵੱਡੇ-ਵੱਡੇ ਵਾਅਦੇ ਸਾਡੀ ਸਿਹਤ ਲਈ ਫਾਇਦੇਮੰਦ ਹੋਣਗੇ। ਖ਼ਾਸ ਤੌਰ 'ਤੇ 'ਸ਼ੂਗਰ-ਫ੍ਰੀ' ਜਾਂ 'ਪੂਰੀ ਤਰ੍ਹਾਂ ਆਟੇ ਨਾਲ ਬਣੇ' ਹੋਣ ਦੇ ਦਾਅਵਿਆਂ 'ਤੇ ਅਸੀਂ ਅੱਖਾਂ ਮੀਟ ਕੇ ਭਰੋਸਾ ਕਰ ਲੈਂਦੇ ਹਾਂ।

ਹਾਲਾਂਕਿ, ਇੱਕ ਉਪਭੋਗਤਾ (Consumer) ਦੀ ਸ਼ਿਕਾਇਤ ਤੋਂ ਬਾਅਦ ਭਾਰਤੀ ਖਾਧ ਸੁਰੱਖਿਆ ਅਤੇ ਮਾਨਕ ਅਥਾਰਟੀ (FSSAI) ਨੇ ਜਦੋਂ ਜਾਂਚ ਕੀਤੀ, ਤਾਂ ਜੋ ਹਕੀਕਤ ਸਾਹਮਣੇ ਆਈ, ਉਹ ਹੈਰਾਨ ਕਰਨ ਵਾਲੀ ਸੀ। ਆਓ, ਡਿਟੇਲ ਵਿੱਚ ਜਾਣਦੇ ਹਾਂ ਇਸ ਬਾਰੇ।

ਪੈਕੇਟ ਦੇ ਦਾਅਵਿਆਂ ਤੇ ਅਸਲੀਅਤ ਵਿੱਚ ਵੱਡਾ ਫ਼ਰਕ

ਜਦੋਂ ਤੁਸੀਂ ਕਿਸੇ ਡੱਬੇ 'ਤੇ '100% ਆਟਾ' ਲਿਖਿਆ ਦੇਖਦੇ ਹੋ, ਤਾਂ ਤੁਹਾਨੂੰ ਲੱਗਦਾ ਹੈ ਕਿ ਇਸ ਵਿੱਚ ਮੈਦੇ ਜਾਂ ਹੋਰ ਚੀਜ਼ਾਂ ਦੀ ਮਿਲਾਵਟ ਨਹੀਂ ਹੋਵੇਗੀ, ਪਰ ਜਾਂਚ ਵਿੱਚ ਪਤਾ ਲੱਗਿਆ ਕਿ ਜਿਸ ਪ੍ਰੋਡਕਟ 'ਤੇ ਇਹ ਦਾਅਵਾ ਕੀਤਾ ਜਾ ਰਿਹਾ ਸੀ, ਉਸਦੀ ਸਮੱਗਰੀ ਦੀ ਸੂਚੀ ਵਿੱਚ ਆਟੇ ਦੀ ਅਸਲ ਮਾਤਰਾ ਸਿਰਫ਼ 72.33% ਹੀ ਸੀ।

ਇਸੇ ਤਰ੍ਹਾਂ, ਪੈਕੇਟ 'ਤੇ 'ਨੋ ਐਡਿਡ ਸ਼ੂਗਰ' (No Added Sugar) ਦਾ ਵੀ ਪ੍ਰਚਾਰ ਕੀਤਾ ਗਿਆ ਸੀ। ਰੈਗੂਲੇਟਰ (FSSAI) ਨੇ ਇਸਨੂੰ ਪੂਰੀ ਤਰ੍ਹਾਂ ਗੁੰਮਰਾਹਕੁੰਨ ਮੰਨਿਆ ਕਿਉਂਕਿ ਇਸ ਬਿਸਕੁਟ ਦੇ ਅੰਦਰ ਮਾਲਟੋਡੈਕਸਟ੍ਰਿਨ (Maltodextrin) ਅਤੇ ਗਲੂਕੋਜ਼ ਸਿਰਪ ਸੌਲਿਡਸ ਵਰਗੀਆਂ ਚੀਜ਼ਾਂ ਮਿਲਾਈਆਂ ਗਈਆਂ ਸਨ। FSSAI ਨੇ ਸਾਫ਼ ਕਰ ਦਿੱਤਾ ਹੈ ਕਿ ਜਦੋਂ ਕਿਸੇ ਪ੍ਰੋਡਕਟ ਵਿੱਚ ਹੋਰ ਐਡਿਟਿਵਜ਼ ਅਤੇ ਸਮੱਗਰੀਆਂ ਸ਼ਾਮਲ ਹੋਣ, ਤਾਂ ਉਸ ਲਈ '100%' ਸ਼ਬਦ ਦੀ ਵਰਤੋਂ ਕਰਨਾ ਉਨ੍ਹਾਂ ਦੇ ਦਿਸ਼ਾ-ਨਿਰਦੇਸ਼ਾਂ ਦੀ ਸਿੱਧੀ ਉਲੰਘਣਾ ਹੈ।

'ਡਾਈਜੈਸਟਿਵ' ਸ਼ਬਦ ਲਈ ਚਾਹੀਦਾ ਹੈ ਵਿਗਿਆਨਕ ਪ੍ਰਮਾਣ

ਸਿਰਫ਼ ਡੱਬੇ 'ਤੇ ਲਿਖ ਦੇਣ ਨਾਲ ਹੀ ਕੋਈ ਪ੍ਰੋਡਕਟ ਪਾਚਨ ਲਈ ਚੰਗਾ ਨਹੀਂ ਹੋ ਜਾਂਦਾ। FSSAI ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਪ੍ਰੋਡਕਟ ਦੇ ਨਾਮ ਨਾਲ 'ਡਾਈਜੈਸਟਿਵ' ਸ਼ਬਦ ਜੋੜਨ ਲਈ ਕੰਪਨੀਆਂ ਨੂੰ 'ਖਾਧ ਸੁਰੱਖਿਆ ਅਤੇ ਮਾਨਕ ਨਿਯਮ, 2018' ਦੇ ਤਹਿਤ ਠੋਸ ਵਿਗਿਆਨਕ ਪ੍ਰਮਾਣ ਦੇਣੇ ਹੋਣਗੇ।

ਦੱਸ ਦੇਈਏ ਕਿ ਇਹ ਕੋਈ ਪਹਿਲਾ ਮੌਕਾ ਨਹੀਂ ਹੈ ਜਦੋਂ FSSAI ਨੇ ਅਜਿਹਾ ਕਦਮ ਚੁੱਕਿਆ ਹੈ। ਇਸ ਤੋਂ ਪਹਿਲਾਂ ਵੀ ਕਈ ਫੂਡ ਬਿਜ਼ਨੈੱਸ ਆਪਰੇਟਰਾਂ ਨੂੰ ਅਜਿਹੇ ਗੁੰਮਰਾਹਕੁੰਨ ਬ੍ਰਾਂਡ ਨਾਮਾਂ ਜਾਂ ਦਾਅਵਿਆਂ ਲਈ ਰਡਾਰ 'ਤੇ ਲਿਆ ਗਿਆ ਹੈ, ਜੋ ਗਾਹਕਾਂ ਦੇ ਮਨ ਵਿੱਚ ਪ੍ਰੋਡਕਟ ਦੇ ਪੋਸ਼ਣ ਜਾਂ ਸਮੱਗਰੀ ਨੂੰ ਲੈ ਕੇ ਗਲਤ ਧਾਰਨਾਵਾਂ ਪੈਦਾ ਕਰਦੇ ਹਨ।

ਘਰ ਵਿੱਚ ਬਣਾਓ 100% ਅਸਲੀ ਆਟਾ ਬਿਸਕੁਟ

ਜਦੋਂ ਬਾਜ਼ਾਰ ਵਿੱਚ ਵਿਕਣ ਵਾਲੇ ਪ੍ਰੋਡਕਟਾਂ ਦੇ ਦਾਅਵਿਆਂ 'ਤੇ ਸਵਾਲੀਆ ਨਿਸ਼ਾਨ ਖੜ੍ਹੇ ਹੋ ਗਏ ਹਨ, ਤਾਂ ਸਭ ਤੋਂ ਬਿਹਤਰ ਇਹੀ ਹੈ ਕਿ ਅਸੀਂ ਆਪਣੀ ਸਿਹਤ ਦੀ ਬਾਗਡੋਰ ਖੁਦ ਸੰਭਾਲੀਏ। ਆਓ ਜਾਣਦੇ ਹਾਂ ਕਿ ਬਿਨਾਂ ਕਿਸੇ ਮਿਲਾਵਟ ਦੇ ਤੁਸੀਂ ਆਪਣੇ ਘਰ ਦੀ ਰਸੋਈ ਵਿੱਚ ਇੱਕਦਮ ਸ਼ੁੱਧ ਆਟਾ ਬਿਸਕੁਟ ਕਿਵੇਂ ਤਿਆਰ ਕਰ ਸਕਦੇ ਹੋ।

ਆਟਾ ਬਿਸਕੁਟ ਬਣਾਉਣ ਲਈ ਜ਼ਰੂਰੀ ਸਮੱਗਰੀ:

ਸ਼ੁੱਧ ਕਣਕ ਦਾ ਆਟਾ - 1 ਕੱਪ

ਘਿਓ ਜਾਂ ਮੱਖਣ - 1/2 ਕੱਪ

ਪੀਸੀ ਹੋਈ ਖੰਡ ਜਾਂ ਗੁੜ ਦਾ ਪਾਊਡਰ - 1/2 ਕੱਪ

ਇਲਾਇਚੀ ਪਾਊਡਰ - 1/2 ਛੋਟੀ ਚਮਚ (ਖੁਸ਼ਬੂ ਅਤੇ ਸਵਾਦ ਲਈ)

ਦੁੱਧ - 2 ਤੋਂ 3 ਚਮਚ

ਆਟਾ ਬਿਸਕੁਟ ਬਣਾਉਣ ਦੀ ਆਸਾਨ ਰੈਸਿਪੀ:

• ਇੱਕ ਡੂੰਘੇ ਬਰਤਨ ਵਿੱਚ ਘਿਓ ਅਤੇ ਪੀਸੀ ਹੋਈ ਖੰਡ ਲਓ। ਇਸਨੂੰ ਚਮਚ ਜਾਂ ਵਿਸਕਰ ਦੀ ਮਦਦ ਨਾਲ ਉਦੋਂ ਤੱਕ ਫੇਂਟਦੇ ਰਹੋ ਜਦੋਂ ਤੱਕ ਕਿ ਮਿਸ਼ਰਣ ਬਿਲਕੁਲ ਹਲਕਾ, ਫੁੱਲਿਆ ਹੋਇਆ ਅਤੇ ਕ੍ਰੀਮੀ ਨਾ ਹੋ ਜਾਵੇ।
• ਹੁਣ ਇਸ ਤਿਆਰ ਕ੍ਰੀਮ ਵਿੱਚ ਕਣਕ ਦਾ ਆਟਾ ਅਤੇ ਥੋੜ੍ਹਾ ਜਿਹਾ ਇਲਾਇਚੀ ਪਾਊਡਰ ਪਾ ਦਿਓ। ਇਸਨੂੰ ਉਂਗਲਾਂ ਦੀ ਮਦਦ ਨਾਲ ਬਹੁਤ ਹਲਕੇ ਹੱਥਾਂ ਨਾਲ ਮਿਲਾਓ।
• ਇਸ ਮਿਸ਼ਰਣ ਨੂੰ ਇੱਕਠਾ ਬੰਨ੍ਹਣ ਲਈ ਇਸ ਵਿੱਚ ਥੋੜ੍ਹਾ-ਥੋੜ੍ਹਾ ਕਰਕੇ ਦੁੱਧ ਪਾਓ ਅਤੇ ਇੱਕ ਸਖ਼ਤ ਆਟਾ ਗੁੰਨ੍ਹ ਲਓ। ਧਿਆਨ ਰਹੇ ਕਿ ਇਸਨੂੰ ਰੋਟੀ ਦੇ ਆਟੇ ਵਾਂਗ ਬਹੁਤ ਜ਼ਿਆਦਾ ਮਲਣਾ ਜਾਂ ਗੁੰਨ੍ਹਣਾ ਨਹੀਂ ਹੈ।
• ਇਸ ਤਿਆਰ ਆਟੇ ਵਿੱਚੋਂ ਛੋਟੇ-ਛੋਟੇ ਪੇੜੇ ਤੋੜੋ ਅਤੇ ਆਪਣੀਆਂ ਹਥੇਲੀਆਂ ਦੇ ਵਿਚਕਾਰ ਦਬਾ ਕੇ ਉਹਨਾਂ ਨੂੰ ਬਿਸਕੁਟ ਦਾ ਮਨਚਾਹਿਆ ਆਕਾਰ ਦਿਓ।
• ਇੱਕ ਬੇਕਿੰਗ ਟ੍ਰੇ ਲਓ ਅਤੇ ਉਸ 'ਤੇ ਬਟਰ ਪੇਪਰ ਵਿਛਾ ਲਓ। ਹੁਣ ਆਪਣੇ ਤਿਆਰ ਕੱਚੇ ਬਿਸਕੁਟਾਂ ਨੂੰ ਥੋੜ੍ਹੀ-ਥੋੜ੍ਹੀ ਦੂਰੀ 'ਤੇ ਇਸ ਟ੍ਰੇ ਵਿੱਚ ਸਜਾ ਦਿਓ।
• ਆਪਣੇ ਓਵਨ ਨੂੰ ਪਹਿਲਾਂ ਹੀ 180°C 'ਤੇ ਗਰਮ ਕਰ ਲਓ। ਹੁਣ ਇਸ ਟ੍ਰੇ ਨੂੰ ਓਵਨ ਦੇ ਅੰਦਰ ਰੱਖੋ ਅਤੇ 15 ਤੋਂ 20 ਮਿੰਟ ਤੱਕ ਬੇਕ ਹੋਣ ਦਿਓ, ਜਦੋਂ ਤੱਕ ਕਿ ਬਿਸਕੁਟਾਂ ਦੇ ਕਿਨਾਰੇ ਸੁਨਹਿਰੀ ਨਾ ਦਿਖਣ ਲੱਗ ਜਾਣ।
• ਓਵਨ ਵਿੱਚੋਂ ਬਾਹਰ ਕੱਢਣ 'ਤੇ ਬਿਸਕੁਟ ਥੋੜ੍ਹੇ ਨਰਮ ਲੱਗ ਸਕਦੇ ਹਨ। ਇਹਨਾਂ ਨੂੰ ਜਾਲੀ ਵਾਲੇ ਸਟੈਂਡ 'ਤੇ ਰੱਖ ਕੇ ਪੂਰੀ ਤਰ੍ਹਾਂ ਠੰਢਾ ਹੋਣ ਦਿਓ। ਠੰਢੇ ਹੁੰਦੇ ਹੀ ਇਹ ਬਾਜ਼ਾਰ ਵਰਗੇ ਇੱਕਦਮ ਕੁਰਕੁਰੇ ਹੋ ਜਾਣਗੇ।
• ਹੁਣ ਤੁਹਾਡੇ ਕੋਲ ਚਾਹ ਦੇ ਨਾਲ ਖਾਣ ਲਈ 100% ਸ਼ੁੱਧ, ਅਸਲੀ ਅਤੇ ਪੌਸ਼ਟਿਕ ਬਿਸਕੁਟ ਤਿਆਰ ਹਨ। ਇਹਨਾਂ ਨੂੰ ਇੱਕ ਐਂਅਰਟਾਈਟ ਡੱਬੇ ਵਿੱਚ ਬੰਦ ਕਰਕੇ ਰੱਖੋ ਅਤੇ ਬੇਫ਼ਿਕਰ ਹੋ ਕੇ ਆਪਣੇ ਪਰਿਵਾਰ ਨਾਲ ਇਸਦਾ ਆਨੰਦ ਲਓ।