ਪ੍ਰਵਾਸੀਆਂ ਦੀ ਵਧੀ ਚਿੰਤਾ! ਅਮਰੀਕਾ ਦੇ ਟੈਕਸ ਫਾਰਮ ’ਚ ਹੁਣ ਪੁੱਛੀ ਜਾਵੇਗੀ ਨਾਗਰਿਕਤਾ, ਟਰੰਪ ਪ੍ਰਸ਼ਾਸਨ ਕਰ ਰਿਹਾ ਨਵੀਂ ਤਿਆਰੀ

ਨਿਊਯਾਰਕ ਟਾਈਮਜ਼, ਵਾਸ਼ਿੰਗਟਨ: ਟਰੰਪ ਪ੍ਰਸ਼ਾਸਨ ਅਗਲੇ ਸਾਲ ਟੈਕਸ ਰਿਟਰਨ ਭਰਨ ਵਾਲੇ ਲੋਕਾਂ ਤੋਂ ਉਨ੍ਹਾਂ ਦੀ ਨਾਗਰਿਕਤਾ ਅਤੇ ਅਮਰੀਕਾ ਵਿੱਚ ਕੰਮ ਕਰਨ ਦੇ ਕਾਨੂੰਨੀ ਅਧਿਕਾਰ ਬਾਰੇ ਜਾਣਕਾਰੀ ਮੰਗਣ ਦੀ ਤਿਆਰੀ ਕਰ ਰਿਹਾ ਹੈ।

ਅੰਦਰੂਨੀ ਰੈਵਨਿਊ ਸਰਵਿਸ (IRS) ਦੇ ਫਾਰਮ-1040 ਦੇ ਮਸੌਦੇ ਵਿੱਚ ਇੱਕ ਨਵਾਂ ਭਾਗ ਜੋੜਿਆ ਗਿਆ ਹੈ, ਜਿਸ ਵਿੱਚ ਟੈਕਸਦਾਤਾਵਾਂ ਨੂੰ ਦੱਸਣਾ ਹੋਵੇਗਾ ਕਿ ਉਹ ਅਮਰੀਕੀ ਨਾਗਰਿਕ, ਅਮਰੀਕੀ ਨੈਸ਼ਨਲ ਜਾਂ ਅਮਰੀਕਾ ਵਿੱਚ ਕੰਮ ਕਰਨ ਲਈ ਕਾਨੂੰਨੀ ਤੌਰ ’ਤੇ ਅਧਿਕਾਰਤ ਵਿਦੇਸ਼ੀ ਨਾਗਰਿਕ ਹਨ ਜਾਂ ਨਹੀਂ।

ਫਾਰਮ ਵਿੱਚ ਟੈਕਸਦਾਤਾਵਾਂ ਅਤੇ ਸਾਂਝੇ ਤੌਰ ’ਤੇ ਟੈਕਸ ਰਿਟਰਨ ਭਰਨ ਦੀ ਸਥਿਤੀ ਵਿੱਚ ਉਨ੍ਹਾਂ ਦੇ ਜੀਵਨ ਸਾਥੀ ਤੋਂ ‘ਹਾਂ’ ਜਾਂ ‘ਨਹੀਂ’ ਵਿੱਚ ਜਵਾਬ ਮੰਗਿਆ ਜਾਵੇਗਾ। ਪ੍ਰਸ਼ਾਸਨ ਦਾ ਇਹ ਕਦਮ ਉਨ੍ਹਾਂ ਪ੍ਰਵਾਸੀਆਂ ਨੂੰ ਸੰਘੀ ਟੈਕਸ ਲਾਭਾਂ ਤੋਂ ਦੂਰ ਰੱਖਣ ਦੀ ਵਿਆਪਕ ਕੋਸ਼ਿਸ਼ ਦਾ ਹਿੱਸਾ ਮੰਨਿਆ ਜਾ ਰਿਹਾ ਹੈ, ਜਿਨ੍ਹਾਂ ਦਾ ਅਮਰੀਕਾ ਵਿੱਚ ਕਾਨੂੰਨੀ ਦਰਜਾ ਪੱਕਾ ਨਹੀਂ ਹੈ।

ਹਾਲਾਂਕਿ ਕਈ ਟੈਕਸ ਕ੍ਰੈਡਿਟ ਲਈ ਪਹਿਲਾਂ ਤੋਂ ਹੀ ਵੈਧ ਸੋਸ਼ਲ ਸਿਕਿਊਰਿਟੀ ਨੰਬਰ ਲਾਜ਼ਮੀ ਹੈ। ਇਸ ਲਈ ਟੈਕਸ ਅਤੇ ਇਮੀਗ੍ਰੇਸ਼ਨ ਮਾਮਲਿਆਂ ਦੇ ਕਈ ਮਾਹਿਰਾਂ ਦਾ ਮੰਨਣਾ ਹੈ ਕਿ ਨਵੇਂ ਸਵਾਲ ਦਾ ਵਿਹਾਰਕ ਪ੍ਰਭਾਵ ਸੀਮਤ ਹੋ ਸਕਦਾ ਹੈ। ਪਰ ਇਸ ਨਾਲ ਪ੍ਰਵਾਸੀਆਂ ਵਿੱਚ ਇਹ ਡਰ ਵਧ ਸਕਦਾ ਹੈ ਕਿ ਟੈਕਸ ਭਰਨ ਦੌਰਾਨ ਦਿੱਤੀ ਗਈ ਜਾਣਕਾਰੀ ਦੀ ਵਰਤੋਂ ਇਮੀਗ੍ਰੇਸ਼ਨ ਕਾਰਵਾਈ ਲਈ ਕੀਤੀ ਜਾ ਸਕਦੀ ਹੈ।

IRS ਦੀ ਸਾਬਕਾ ਅਧਿਕਾਰੀ ਅਤੇ ਸੈਂਟਰ ਫਾਰ ਟੈਕਸਪੇਅਰ ਰਾਈਟਸ ਦੀ ਕਾਰਜਕਾਰੀ ਨਿਰਦੇਸ਼ਕ ਨੀਨਾ ਓਲਸਨ ਨੇ ਕਿਹਾ ਕਿ ਟੈਕਸ ਕਾਨੂੰਨ ਲਾਗੂ ਕਰਨ ਲਈ IRS ਨੂੰ ਇਸ ਜਾਣਕਾਰੀ ਦੀ ਲੋੜ ਨਹੀਂ ਹੈ।

ਉਨ੍ਹਾਂ ਦੀ ਸੰਸਥਾ ਨੇ ਪਹਿਲਾਂ ਡਾਟਾ ਸਾਂਝਾ ਕੀਤੇ ਜਾਣ ਨੂੰ ਲੈ ਕੇ IRS ਖ਼ਿਲਾਫ਼ ਮੁਕੱਦਮਾ ਵੀ ਕੀਤਾ ਸੀ। ਉਨ੍ਹਾਂ ਮੁਤਾਬਕ, ਇਹ ਜਾਣਕਾਰੀ ਮੰਗੇ ਜਾਣ ਨਾਲ ਲੋਕਾਂ ਵਿੱਚ ਡਰ ਪੈਦਾ ਹੋ ਸਕਦਾ ਹੈ।

ਦੂਜੇ ਪਾਸੇ, ਟ੍ਰੇਜ਼ਰੀ ਵਿਭਾਗ ਕਾਨੂੰਨੀ ਦਰਜਾ ਰੱਖਣ ਵਾਲੇ ਕੁਝ ਪ੍ਰਵਾਸੀਆਂ ਨੂੰ ਵੀ ਕਈ ਟੈਕਸ ਕ੍ਰੈਡਿਟ ਦਾ ਪੂਰਾ ਲਾਭ ਮਿਲਣ ਤੋਂ ਰੋਕਣ ਲਈ ਯੋਗਤਾ ਨਿਯਮ ਸਖ਼ਤ ਕਰਨ ਦੀ ਦਿਸ਼ਾ ਵਿੱਚ ਅੱਗੇ ਵੱਧ ਰਿਹਾ ਹੈ।

ਮਾਹਿਰਾਂ ਅਨੁਸਾਰ, ਇਸ ਦਾ ਅਸਰ DACA ਤਹਿਤ ਸੁਰੱਖਿਆ ਪ੍ਰਾਪਤ ਕਰਨ ਵਾਲਿਆਂ ਅਤੇ ਵਰਕ ਵੀਜ਼ਾ ’ਤੇ ਰਹਿ ਰਹੇ ਪ੍ਰਵਾਸੀਆਂ ’ਤੇ ਵੀ ਪੈ ਸਕਦਾ ਹੈ।

ਟੈਕਸ ਤਿਆਰ ਕਰਨ ਵਾਲਿਆਂ ਅਤੇ ਵਕੀਲਾਂ ਦਾ ਕਹਿਣਾ ਹੈ ਕਿ ਨਵੇਂ ਨਿਯਮਾਂ ਨਾਲ ਅਗਲੇ ਸਾਲ ਲੱਖਾਂ ਟੈਕਸਦਾਤਾਵਾਂ ਵਿੱਚ ਭੰਬਲਭੂਸਾ ਪੈਦਾ ਹੋ ਸਕਦਾ ਹੈ। ਉੱਥੇ ਹੀ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਇਨ੍ਹਾਂ ਬਦਲਾਵਾਂ ਦਾ ਉਦੇਸ਼ ਅਜਿਹੇ ਲੋਕਾਂ ਨੂੰ ਟੈਕਸ ਲਾਭਾਂ ਤੋਂ ਰੋਕਣਾ ਹੈ, ਜੋ ਇਸ ਦੇ ਯੋਗ ਨਹੀਂ ਹਨ।