ਬ੍ਰਿਟੇਨ 'ਚ ਸ਼ਰਨਾਰਥੀਆਂ ਨੂੰ ਰਹਿਣ ਦਾ ਭਰਨਾ ਪਵੇਗਾ ਖ਼ਰਚਾ, ਆਉਣ ਵਾਲੇ ਦਹਾਕੇ 'ਚ 45 ਹਜ਼ਾਰ ਵਿਦੇਸ਼ੀਆਂ ਨੂੰ ਕੀਤਾ ਜਾਵੇਗਾ ਬਾਹਰ

ਲੰਡਨ ਪੀਟੀਆਈ: ਬ੍ਰਿਟੇਨ ਦੇ ਪਰਵਾਸ ਸੁਧਾਰਾਂ ਤਹਿਤ ਆਉਣ ਵਾਲੇ ਦਹਾਕੇ ਵਿਚ 45 ਹਜ਼ਾਰ ਤੋਂ ਵੱਧ ਵਿਦੇਸ਼ੀ ਅਪਰਾਧੀਆਂ ਅਤੇ ਉਹ ਸ਼ਰਨਾਰਥੀ, ਜਿਨ੍ਹਾਂ ਨੂੰ ਸ਼ਰਨ ਨਹੀਂ ਮਿਲੀ, ਨੂੰ ਦੇਸ਼ ਤੋਂ ਬਾਹਰ ਭੇਜ ਦਿੱਤਾ ਜਾਵੇਗਾ। ਇਸ ਦੇ ਨਾਲ-ਨਾਲ, ਸ਼ਰਨਾਰਥੀਆਂ ਨੂੰ ਰਹਿਣ ਦਾ ਖ਼ਰਚਾ ਵੀ ਭਰਨਾ ਪਵੇਗਾ।

ਇਸ ਹਫ਼ਤੇ ਕਈ ਨੀਤੀਗਤ ਪ੍ਰਸਤਾਵਾਂ ਦੌਰਾਨ ਗ੍ਰਹਿ ਮੰਤਰੀ ਸ਼ਬਾਨਾ ਮਹਿਮੂਦ ਨੇ ਕਿਹਾ ਕਿ ਹਿਰਾਸਤ ਸਮਰੱਥਾ ਵਿਚ ਵਾਧੇ ਤੋਂ ਬਾਅਦ ਹਜ਼ਾਰਾਂ ਹੋਰ ਵਿਦੇਸ਼ੀ ਅਪਰਾਧੀਆਂ ਅਤੇ ਗ਼ੈਰ ਕਾਨੂੰਨੀ ਪਰਵਾਸੀਆਂ ਨੂੰ ਹਟਾਇਆ ਜਾਵੇਗਾ, ਜਿਨ੍ਹਾਂ ਨੂੰ ਇੱਥੇ ਰਹਿਣ ਦਾ ਕੋਈ ਅਧਿਕਾਰ ਨਹੀਂ ਹੈ। ਸੰਸਦ ਵਿਚ ਪੇਸ਼ ਕੀਤੀਆਂ ਯੋਜਨਾਵਾਂ ਤਹਿਤ ਸ਼ਰਨ ਚਾਹੁਣ ਵਾਲੇ ਲੋਕਾਂ ਨੂੰ ਬ੍ਰਿਟਿਸ਼ ਸਰਕਾਰ ਦੁਆਰਾ ਉਨ੍ਹਾਂ ਦੇ ਰਹਿਣ ਦੇ ਖ਼ਰਚੇ ਨੂੰ ਭਰਨ ਲਈ ਕਿਹਾ ਜਾਵੇਗਾ। ਉਨ੍ਹਾਂ ਨੂੰ ਇਹ ਰਕਮ ਜਾਂ ਤਾਂ ਆਪਣੇ ਕੋਲ ਮੌਜੂਦ ਪੈਸਿਆਂ ’ਚੋਂ ਜਾਂ ਫਿਰ ਕਮਾਈ ਸ਼ੁਰੂ ਕਰਨ ਤੋਂ ਬਾਅਦ ਕਿਸ਼ਤਾਂ ਵਿਚ ਲਗਪਗ ਦਸ ਹਜ਼ਾਰ ਪੌਂਡ ਭਰਨੇ ਪੈਣਗੇ। ਮਹਿਮੂਦ ਨੇ ਕਿਹਾ, ‘‘ਸ਼ਰਨ ਲਈ ਸਹਾਇਤਾ ਪ੍ਰਾਪਤ ਕਰਨਾ ਇਕ ਅਧਿਕਾਰ ਹੈ, ਪਰ ਇਹ ਇਕ ਜ਼ਿੰਮੇਵਾਰੀ ਵੀ ਹੈ। ਜਦੋਂ ਲੋਕ ਯੋਗਦਾਨ ਕਰਨ ਅਤੇ ਬ੍ਰਿਟਿਸ਼ ਲੋਕਾਂ ਦੀ ਉਦਾਰਤਾ ਦਾ ਬਦਲਾ ਚੁੱਕਣ ਦੀ ਸਥਿਤੀ ਵਿਚ ਆ ਜਾਂਦੇ ਹਨ, ਤਾਂ ਅਸੀਂ ਉਨ੍ਹਾਂ ਤੋਂ ਇਹ ਕਰਨ ਦੀ ਉਮੀਦ ਕਰਦੇ ਹਾਂ।’’ ਗ੍ਰਹਿ ਮਾਮਲਿਆਂ ਦੇ ਦਫ਼ਤਰ ਅਨੁਸਾਰ, ਸ਼ਰਨਾਰਥੀਆਂ ਨੂੰ ਵਸਣ ਲਈ ਯੋਗ ਹੋਣ ਤੋਂ ਪਹਿਲਾਂ ਰਕਮ ਭਰਨੀ ਪਵੇਗੀ। ਇਹ ਕਦਮ ਇਸ ਲਈ ਜ਼ਰੂਰੀ ਹੈ, ਕਿਉਂਕਿ ਪਿਛਲੇ ਸਾਲ ਸ਼ਰਨ ਮੰਗਣ ਵਾਲਿਆਂ ਦੀ ਮਦਦ ’ਤੇ ਬ੍ਰਿਟਿਸ਼ ਕਰਦਾਤਿਆਂ ਦਾ ਲਗਪਗ ਚਾਰ ਅਰਬ ਪੌਂਡ ਖ਼ਰਚ ਹੋਇਆ ਸੀ।