ਪਾਕਿਸਤਾਨ 'ਚ HIV ਦਾ ਕਹਿਰ: ਹਸਪਤਾਲ ’ਚ 94 ਬੱਚੇ ਇਨਫੈਕਟਿਡ , ਅੱਠ ਮਹੀਨੇ ’ਚ ਛੇ ਬੱਚਿਆਂ ਦੀ ਮੌਤ

ਕਰਾਚੀ (ਪੀਟੀਆਈ) : ਪਾਕਿਸਤਾਨ ’ਚ ਕਰਾਚੀ ਦੇ ਇਕ ਸਰਕਾਰੀ ਹਸਪਤਾਲ ’ਚ ਐੱਚਆਈਵੀ ਇਨਫੈਕਸ਼ਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਕਾਰਨ ਨਵੰਬਰ 2025 ਤੋਂ ਬਾਅਦ ਤੋਂ ਹੁਣ ਤੱਕ ਛੇ ਬੱਚਿਆਂ ਦੀ ਮੌਤ ਹੋ ਗਈ ਹੈ ਤੇ 94 ਬੱਚੇ ਇਨਫੈਕਟਿਡ ਹੋਏ ਹਨ। ਸਿੰਧ ਸੂਬੇ ਦੇ ਸਿਹਤ ਸਕੱਤਰ ਤਾਹਿਰ ਹੁਸੈਨ ਸੰਗੀ ਨੇ ਕਿਹਾ ਕਿ ਇਨਫੈਕਸ਼ਨ ਦਾ ਪਤਾ ਸਭ ਤੋਂ ਪਹਿਲਾਂ ਨਵੰਬਰ 2025 ’ਚ ਕਰਾਚੀ ਦੇ ਕੁਲਸੂਮ ਬਾਈ ਚਿਲਡਰਨ ਹਸਪਤਾਲ ’ਚ ਚੱਲਿਆ ਸੀ ਜਿਸ ਨੂੰ ਸਿੰਧ ਇੰਪਲਾਈਜ਼ ਸੋਸ਼ਲ ਸਕਿਉਰਿਟੀ ਇੰਸਟੀਚਿਊਸ਼ਨ ਚਲਾਉਂਦਾ ਹੈ।

ਉਨ੍ਹਾਂ ਕਿਹਾ ਕਿ ਇਸ ਮਹੀਨੇ ਬੱਚਿਆਂ ’ਚ ਐੱਚਆਈਵੀ ਦੇ 16 ਨਵੇਂ ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ ਜਿਸ ਨਾਲ ਪਿਛਲੇ ਸਾਲ ਨਵੰਬਰ ਤੋਂ ਹੁਣ ਤੱਕ ਪੀੜਤ ਬੱਚਿਆਂ ਦੀ ਕੁੱਲ ਗਿਣਤੀ 94 ਹੋ ਗਈ ਹੈ। ਇਨਫੈਕਸ਼ਨ ਫੈਲਣ ਤੋਂ ਬਾਅਦ, ਸਿੰਧ ਸਿਹਤ ਵਿਭਾਗ ਨੇ ਹਸਪਤਾਲ ਦੇ ਆਸਪਾਸ ਦੇ ਇਲਾਕਿਆਂ ਦੀ ਜਾਂਚ ਲਈ ਟੀਮਾਂ ਤਾਇਨਾਤ ਕੀਤੀਆਂ। ਹਸਪਤਾਲ ਦੇ ਨਜ਼ਦੀਕ ਰਹਿਣ ਵਾਲੇ 10 ਹਜ਼ਾਰ ਲੋਕਾਂ ’ਚੋਂ 120 ਲੋਕ ਐੱਚਆਈਵੀ ਪਾਜ਼ੇਟਿਵ ਪਾਏ ਗਏ, ਜਿਨ੍ਹਾਂ ’ਚ ਬਾਲਗ ਤੇ ਬੱਚੇ, ਦੋਵੇਂ ਸ਼ਾਮਲ ਹਨ। ਐੱਚਆਈਵੀ ਪਾਜ਼ੇਟਿਵ ਪਾਏ ਗਏ ਲੋਕਾਂ ਦਾ ਇਲਾਜ ਵੀ ਸਰਕਾਰੀ ਖ਼ਰਚੇ ’ਤੇ ਕੀਤਾ ਜਾ ਰਿਹਾ ਹੈ।

ਸਿੰਧ ਦੇ ਕਿਰਤ ਮੰਤਰੀ ਸਈਦ ਗਨੀ ਨੇ ਦੱਸਿਆ ਕਿ ਪ੍ਰਭਾਵਿਤ ਬੱਚਿਆਂ ਦੇ ਲੰਬੇ ਸਮੇਂ ਤੱਕ ਚੱਲਣ ਵਾਲੇ ਇਲਾਜ ਲਈ ਬਣਾਏ ਗਏ ਦੋ ਅਰਬ ਪਾਕਿਸਤਾਨੀ ਰੁਪਏ ਦੇ ਐਂਡੋਮੈਂਟ ਫੰਡ ਦੇ ਪ੍ਰਬੰਧਨ ਤੇ ਇਲਾਜ ਦੀ ਰਣਨੀਤੀ, ਦੋਵਾਂ ਦੀ ਨਿਗਰਾਨੀ ਲਈ ਮੁੱਖ ਮੈਡੀਕਲ ਮਾਹਿਰਾਂ ਦੀ ਇਕ ਸਥਾਈ ਕਮੇਟੀ ਬਣਾਈ ਜਾਵੇਗੀ।