ਰੂਸ ਨੇ ਯੂਕਰੇਨ ’ਚ ਮੁੜ ਕੀਤਾ ਡਰੋਨ ਹਮਲਾ, ਭਾਰਤੀ ਫਾਰਮਾ ਕੰਪਨੀ ਦਾ ਪਲਾਂਟ ਤਬਾਹ; 1 ਦੀ ਮੌਤ

ਡਿਜੀਟਲ ਡੈਸਕ, ਕੀਵ: ਯੂਕਰੇਨ ਵਿੱਚ ਭਾਰਤੀ ਦਵਾ ਕੰਪਨੀ ਕੂਸਮ ਗਰੁੱਪ ਦੇ ਫਾਰਮਾਸਿਊਟੀਕਲ ਪਲਾਂਟ ’ਤੇ ਰੂਸੀ ਡਰੋਨ ਨਾਲ ਭਿਆਨਕ ਹਮਲਾ ਕੀਤਾ ਗਿਆ ਹੈ। ਇਸ ਹਮਲੇ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ, ਜਦਕਿ ਕਈ ਹੋਰ ਲੋਕ ਜ਼ਖਮੀ ਹੋ ਗਏ।

ਅਧਿਕਾਰੀਆਂ ਮੁਤਾਬਕ ਇਹ ਹਮਲਾ ਯੂਕਰੇਨ ਦੇ ਸੂਮੀ ਸ਼ਹਿਰ ਸਥਿਤ ਪਲਾਂਟ ’ਤੇ ਹੋਇਆ, ਜਿਸ ਕਾਰਨ ਇਮਾਰਤ ਦਾ ਮੁੱਖ ਢਾਂਚਾ ਲਗਭਗ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ ਹੈ। ਮ੍ਰਿਤਕਾਂ ਅਤੇ ਜ਼ਖਮੀਆਂ ਦੀ ਗਿਣਤੀ ਵਿੱਚ ਅਜੇ ਬਦਲਾਅ ਹੋ ਸਕਦਾ ਹੈ।

ਹਮਲੇ ਤੋਂ ਤੁਰੰਤ ਬਾਅਦ ਸਾਹਮਣੇ ਆਏ ਵੀਡੀਓ ਅਤੇ ਤਸਵੀਰਾਂ ਵਿੱਚ ਡਰੋਨ ਦੇ ਟਕਰਾਉਣ ਵਾਲੀ ਥਾਂ ਤੋਂ ਧੂੰਏਂ ਦਾ ਬਹੁਤ ਵੱਡਾ ਗੁਬਾਰ ਉੱਠਦਾ ਦਿਖਾਈ ਦਿੱਤਾ।

ਰੂਸ-ਯੂਕਰੇਨ ਜੰਗ ਦੌਰਾਨ ਵੀ ਇਹ ਪਲਾਂਟ ਲਗਾਤਾਰ ਕੰਮ ਕਰਦਾ ਰਿਹਾ ਸੀ, ਪਰ ਇਸ ਹਮਲੇ ਨਾਲ ਇਸ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਮੁੱਢਲੇ ਅਨੁਮਾਨਾਂ ਮੁਤਾਬਕ ਇਸ ਹਮਲੇ ਵਿੱਚ ਕੰਪਨੀ ਨੂੰ ਘੱਟੋ-ਘੱਟ 400 ਕਰੋੜ ਰੁਪਏ ਦਾ ਭਾਰੀ ਆਰਥਿਕ ਨੁਕਸਾਨ ਹੋਇਆ ਹੈ।

ਕੀ ਹੈ ਕੂਸਮ ਗਰੁੱਪ ਦਾ ਇਤਿਹਾਸ?

ਕੂਸਮ ਗਰੁੱਪ ਦੀ ਸ਼ੁਰੂਆਤ 1994 ਵਿੱਚ ਭਾਰਤ ਤੋਂ ਯੂਕਰੇਨ ਨੂੰ ਦਵਾਈਆਂ ਬਰਾਮਦ ਕਰਨ ਵਾਲੀ ਇੱਕ ਡਿਸਟ੍ਰੀਬਿਊਟਰ ਕੰਪਨੀ ਵਜੋਂ ਹੋਈ ਸੀ। ਇਸ ਸਮੇਂ ਇਸ ਦਾ ਸੰਚਾਲਨ ਭਾਰਤੀ ਨਾਗਰਿਕ ਰਾਜੀਵ ਗੁਪਤਾ ਕਰ ਰਹੇ ਹਨ। ਸਾਲ 2002 ਵਿੱਚ ਕੰਪਨੀ ਨੇ ਦੂਜੀਆਂ ਕੰਪਨੀਆਂ ਦੇ ਉਤਪਾਦ ਵੇਚਣੇ ਬੰਦ ਕਰਕੇ ਆਪਣੇ ਖੁਦ ਦੇ ਬ੍ਰਾਂਡ ਬਾਜ਼ਾਰ ਵਿੱਚ ਉਤਾਰਨੇ ਸ਼ੁਰੂ ਕਰ ਦਿੱਤੇ।

ਇਸ ਤੋਂ ਬਾਅਦ ਕੰਪਨੀ ਦਵਾਈ ਨਿਰਮਾਣ ਦੇ ਖੇਤਰ ਵਿੱਚ ਦਾਖਲ ਹੋਈ। ਇਸ ਨੇ 2007 ਵਿੱਚ ਭਾਰਤ ਅਤੇ 2009 ਵਿੱਚ ਯੂਕਰੇਨ ਦੇ ਸੂਮੀ ਵਿੱਚ ਆਪਣੇ ਨਿਰਮਾਣ ਪਲਾਂਟ ਸਥਾਪਤ ਕੀਤੇ। ਬਾਅਦ ਵਿੱਚ ਕੰਪਨੀ ਨੇ ਭਾਰਤ ਵਿੱਚ ਦੋ ਹੋਰ ਨਵੇਂ ਪਲਾਂਟ ਵੀ ਸ਼ੁਰੂ ਕੀਤੇ।

ਕੂਸਮ ਗਰੁੱਪ ਮੁੱਖ ਤੌਰ ’ਤੇ 50 ਤੋਂ ਵੱਧ ਜੈਨੇਰਿਕ ਦਵਾਈਆਂ ਬਣਾਉਂਦਾ ਹੈ ਅਤੇ ਇਨ੍ਹਾਂ ਦੀ ਵਿਕਰੀ 9 ਤੋਂ ਵੱਧ ਦੇਸ਼ਾਂ ਵਿੱਚ ਕਰਦਾ ਹੈ। ਇਨ੍ਹਾਂ ਵਿੱਚ ਮੁੱਖ ਤੌਰ ’ਤੇ ਯੂਕਰੇਨ, ਉਜ਼ਬੇਕਿਸਤਾਨ, ਕਜ਼ਾਕਿਸਤਾਨ ਅਤੇ ਫਿਲੀਪੀਨਜ਼ ਸ਼ਾਮਲ ਹਨ।

ਖੁਦ ਨੂੰ ਭਾਰਤੀ ਜੜ੍ਹਾਂ ਵਾਲੀ ਯੂਕਰੇਨੀ ਕੰਪਨੀ ਦੱਸਣ ਵਾਲੇ ਇਸ ਗਰੁੱਪ ਦੇ ਸੂਮੀ ਸਥਿਤ ਪਲਾਂਟ ’ਤੇ ਹੋਏ ਹਮਲੇ ਨਾਲ ਸਥਾਨਕ ਪੱਧਰ ’ਤੇ ਦਵਾਈਆਂ ਦੀ ਸਪਲਾਈ ’ਤੇ ਵੀ ਡੂੰਘਾ ਅਸਰ ਪੈਣ ਦਾ ਖਦਸ਼ਾ ਹੈ।