ਨੇਪਾਲ ’ਚ ਹੜ੍ਹ ਨੇ ਮਚਾਈ ਭਾਰੀ ਤਬਾਹੀ, 40 ਘਰ ਤੇ 6 ਪੁਲ ਰੁੜ੍ਹੇ; 150 ਤੋਂ ਵੱਧ ਵਿਦੇਸ਼ੀ ਸੈਲਾਨੀ ਫਸੇ

ਡਿਜੀਟਲ ਡੈਸਕ, ਕਾਠਮੰਡੂ : ਨੇਪਾਲ ਦੇ ਮਨਾਸਲੂ ਟ੍ਰੈਕਿੰਗ ਖੇਤਰ ਵਿੱਚ ਐਤਵਾਰ ਤੜਕੇ ਬੁਢੀ ਗੰਡਕੀ ਨਦੀ ਵਿੱਚ ਆਏ ਵਿਨਾਸ਼ਕਾਰੀ ਹੜ੍ਹ ਨੇ ਇੱਕ ਵਾਰ ਫਿਰ ਭਾਰੀ ਤਬਾਹੀ ਮਚਾ ਦਿੱਤੀ ਹੈ। ਇਸ ਭਿਆਨਕ ਆਫ਼ਤ ਵਿੱਚ ਲਗਪਗ 40 ਘਰ, ਛੇ ਪੁਲ ਅਤੇ ਪਣ-ਬਿਜਲੀ ਨਾਲ ਸਬੰਧਤ ਬੁਨਿਆਦੀ ਢਾਂਚਾ ਰੁੜ੍ਹ ਗਿਆ, ਜਦਕਿ 10 ਲੋਕਾਂ ਦੇ ਲਾਪਤਾ ਹੋਣ ਦੀ ਸੂਚਨਾ ਹੈ।

ਟ੍ਰੈਕਿੰਗ ਦਾ ਸੀਜ਼ਨ ਹੋਣ ਕਾਰਨ ਇਸ ਹੜ੍ਹ ਦੇ ਚਲਦਿਆਂ 150 ਤੋਂ ਵੱਧ ਵਿਦੇਸ਼ੀ ਸੈਲਾਨੀ ਰਸਤੇ ਵਿੱਚ ਫਸ ਗਏ ਹਨ। ਰਾਹਤ ਦੀ ਗੱਲ ਇਹ ਰਹੀ ਕਿ ਸਮੇਂ ਸਿਰ ਭੇਜੇ ਗਏ ਐੱਸਐੱਮਐੱਸ ਅਲਰਟ ਕਾਰਨ ਕਈ ਸਥਾਨਕ ਲੋਕ ਸੁਰੱਖਿਅਤ ਥਾਵਾਂ ਅਤੇ ਉੱਚੇ ਇਲਾਕਿਆਂ ਵੱਲ ਚਲੇ ਗਏ, ਜਿਸ ਨਾਲ ਜਾਨ-ਮਾਲ ਦੇ ਵੱਡੇ ਨੁਕਸਾਨ ਤੋਂ ਬਚਾਅ ਹੋਇਆ। ਇਸ ਸਮੇਂ ਰਾਹਤ ਅਤੇ ਬਚਾਅ ਕਾਰਜ ਜੰਗੀ ਪੱਧਰ ’ਤੇ ਜਾਰੀ ਹਨ।

ਫ਼ੌਜ ਅਤੇ ਰਾਹਤ ਏਜੰਸੀਆਂ ਹੁਣ ਤੱਕ 49 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਚੁੱਕੀਆਂ ਹਨ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਜਾਣ ਦੇ ਹੁਕਮ ਦਿੱਤੇ ਹਨ ਅਤੇ ਨੀਵੇਂ ਇਲਾਕਿਆਂ ਵਾਲੇ ਜ਼ਿਲ੍ਹਿਆਂ ਲਈ ਅਲਰਟ ਜਾਰੀ ਕੀਤਾ ਹੈ।

ਐਤਵਾਰ ਸਵੇਰੇ ਚਾਰ ਵਜੇ ਬੁਢੀ ਗੰਡਕੀ ਨਦੀ ਵਿੱਚ ਅਚਾਨਕ ਮਲਬੇ ਨਾਲ ਭਰਿਆ ਤੇਜ਼ ਹੜ੍ਹ ਆ ਗਿਆ, ਜਿਸ ਨੇ ਭਾਰੀ ਤਬਾਹੀ ਮਚਾਈ। ਹੜ੍ਹ ਆਉਣ ਤੋਂ ਬਾਅਦ ਆਲੇ-ਦੁਆਲੇ ਦੀਆਂ ਧਾਰਾਵਾਂ ਵਿੱਚੋਂ ਤੇਜ਼ ਆਵਾਜ਼ਾਂ ਸੁਣ ਕੇ ਚੁਮਲਿੰਗ ਅਤੇ ਲੋਕਪਾ ਵਰਗੀਆਂ ਬਸਤੀਆਂ ਦੇ ਲੋਕ ਅਤੇ ਉੱਥੇ ਠਹਿਰੇ ਸੈਲਾਨੀ ਆਪਣੀ ਜਾਨ ਬਚਾਉਣ ਲਈ ਸੁਰੱਖਿਅਤ ਥਾਵਾਂ ਵੱਲ ਭੱਜ ਗਏ।

ਮਨਾਸਲੂ ਟ੍ਰੈਕਿੰਗ ਖੇਤਰ ਵਿੱਚ 150 ਤੋਂ ਵੱਧ ਵਿਦੇਸ਼ੀ ਸੈਲਾਨੀ ਫਸੇ ਹੋਏ ਹਨ। ਅਧਿਕਾਰੀਆਂ ਨੂੰ ਖ਼ਦਸ਼ਾ ਹੈ ਕਿ ਜ਼ਮੀਨ ਖਿਸਕਣ ਕਾਰਨ ਕਿਸੇ ਸਹਾਇਕ ਨਦੀ ਦਾ ਵਹਾਅ ਅਸਥਾਈ ਤੌਰ ’ਤੇ ਰੁਕ ਗਿਆ ਸੀ, ਜਿਸ ਕਾਰਨ ਵੱਡੀ ਮਾਤਰਾ ਵਿੱਚ ਪਾਣੀ ਅਤੇ ਮਲਬਾ ਇਕੱਠਾ ਹੋ ਗਿਆ।

ਬਾਅਦ ਵਿੱਚ ਜਦੋਂ ਰੁਕਾਵਟ ਹਟ ਗਈ ਤਾਂ ਪਾਣੀ ਤੇਜ਼ ਰਫ਼ਤਾਰ ਨਾਲ ਹੇਠਾਂ ਵੱਲ ਵਹਿ ਗਿਆ। ਹਾਲਾਂਕਿ, ਪ੍ਰਸ਼ਾਸਨ ਅਜੇ ਤੱਕ ਹੜ੍ਹ ਦੇ ਸਹੀ ਕਾਰਨਾਂ ਦਾ ਪਤਾ ਨਹੀਂ ਲਗਾ ਸਕਿਆ ਹੈ। ਇਸ ਆਫ਼ਤ ਵਿੱਚ ਉੰਗਿਲੁੰਗ ਨਦੀ ਦੇ ਨੇੜੇ ਰਹਿਣ ਵਾਲੇ ਪੰਜ ਲੋਕਾਂ, ਜਿਨ੍ਹਾਂ ਵਿੱਚ ਦੋ ਔਰਤਾਂ ਅਤੇ ਤਿੰਨ ਪੁਰਸ਼ ਸ਼ਾਮਲ ਹਨ, ਤੋਂ ਇਲਾਵਾ ਚਾਰ ਤੋਂ ਪੰਜ ਚਰਵਾਹੇ ਵੀ ਲਾਪਤਾ ਹਨ।

ਹੜ੍ਹ ਕਾਰਨ ਲਗਪਗ 40 ਘਰ ਅਤੇ ਇੱਕ ਪ੍ਰਾਇਮਰੀ ਸਕੂਲ ਪੂਰੀ ਤਰ੍ਹਾਂ ਤਬਾਹ ਹੋ ਗਏ ਹਨ, ਜਦਕਿ 20 ਤੋਂ 22 ਹੋਰ ਮਕਾਨਾਂ ’ਤੇ ਵੀ ਡਿੱਗਣ ਦਾ ਖ਼ਤਰਾ ਮੰਡਰਾ ਰਿਹਾ ਹੈ। ਹੜ੍ਹ ਦੇ ਪਾਣੀ ਵਿੱਚ ਛੇ ਪੁਲ ਰੁੜ੍ਹ ਗਏ ਹਨ, ਜਿਸ ਕਾਰਨ ਦੂਰ-ਦੁਰਾਡੇ ਦੇ ਪੇਂਡੂ ਇਲਾਕਿਆਂ ਦਾ ਸੰਪਰਕ ਪੂਰੀ ਤਰ੍ਹਾਂ ਟੁੱਟ ਗਿਆ ਹੈ।

ਪਣ-ਬਿਜਲੀ ਪ੍ਰਾਜੈਕਟ ਵੀ ਪ੍ਰਭਾਵਿਤ

ਸੱਲੇਰੀ ਵਿੱਚ ਉਸਾਰੀ ਅਧੀਨ 341 ਮੈਗਾਵਾਟ ਸਮਰੱਥਾ ਵਾਲੇ ਬੁਢੀ ਗੰਡਕੀ ਪਣ-ਬਿਜਲੀ ਪ੍ਰਾਜੈਕਟ ਦੇ ਨਿਰਮਾਣ ਕੈਂਪ ਅਤੇ ਉਪਕਰਨਾਂ ਨੂੰ ਵੀ ਹੜ੍ਹ ਦੇ ਪਾਣੀ ਨੇ ਪੂਰੀ ਤਰ੍ਹਾਂ ਤਬਾਹ ਕਰ ਦਿੱਤਾ ਹੈ। ਅਰੂਘਾਟ ਵਿੱਚ ਬੁਢੀ ਗੰਡਕੀ ਨਦੀ ਦਾ ਪਾਣੀ ਦਾ ਪੱਧਰ ਖ਼ਤਰੇ ਦੇ ਪੰਜ ਮੀਟਰ ਦੇ ਨਿਸ਼ਾਨ ਨੂੰ ਪਾਰ ਕਰ ਕੇ 8.4 ਮੀਟਰ ਤੱਕ ਪਹੁੰਚ ਗਿਆ। ਪਾਣੀ ਦੇ ਤੇਜ਼ ਵਹਾਅ ਵਿੱਚ ਨਿਗਰਾਨੀ ਸਟੇਸ਼ਨ ਵੀ ਰੁੜ੍ਹ ਗਿਆ, ਜਿਸ ਕਾਰਨ ਪਾਣੀ ਦੇ ਪੱਧਰ ਦੇ ਸਹੀ ਅੰਕੜੇ ਇਕੱਠੇ ਕਰਨ ਵਿੱਚ ਮੁਸ਼ਕਲ ਆ ਰਹੀ ਹੈ।

ਪ੍ਰਸ਼ਾਸਨ ਨੇ ਜਾਰੀ ਕੀਤੀ ਚਿਤਾਵਨੀ

ਪ੍ਰਸ਼ਾਸਨ ਨੇ ਧਾਡਿੰਗ, ਤਨਾਹੁਨ, ਚਿਤਵਨ ਅਤੇ ਪੂਰਬੀ ਤੇ ਪੱਛਮੀ ਨਵਲਪਰਾਸੀ ਜ਼ਿਲ੍ਹਿਆਂ ਵਿੱਚ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਜਾਣ ਦੀ ਚਿਤਾਵਨੀ ਜਾਰੀ ਕੀਤੀ ਹੈ। ਇਸ ਦੇ ਨਾਲ ਹੀ ਤ੍ਰਿਸ਼ੂਲੀ ਅਤੇ ਨਾਰਾਇਣੀ ਨਦੀਆਂ ਦੇ ਕੰਢੇ ਰਹਿਣ ਵਾਲੇ ਲੋਕਾਂ ਨੂੰ ਨਦੀ ਦੇ ਕਿਨਾਰਿਆਂ ਤੋਂ ਦੂਰ ਰਹਿਣ ਦੀ ਸਖ਼ਤ ਸਲਾਹ ਦਿੱਤੀ ਗਈ ਹੈ।