ਨੇਪਾਲ ਦੇ ਮਨਾਸਲੂ ਕੈਂਪ 'ਚ ਖਿਸਕੀ ਬਰਫ਼, ਭਾਰਤੀ ਮੂਲ ਦੇ ਪਰਬਤਾਰੋਹੀ ਧਰੁਵ ਜਯੋਤੀ ਗੁਹਾ ਤੇ ਗਾਈਡ ਦੀ ਮੌਤ

ਡਿਜੀਟਲ ਡੈਸਕ, ਕਾਠਮੰਡੂ: ਦੁਨੀਆ ਦੀ ਅੱਠਵੀਂ ਸਭ ਤੋਂ ਉੱਚੀ ਚੋਟੀ ਮਾਊਂਟ ਮਨਾਸਲੂ ਦੇ ਕੈਂਪ ਵਿੱਚ ਬਰਫ਼ ਖਿਸਕਣ ਦੀ ਘਟਨਾ ਦੀ ਲਪੇਟ ਵਿੱਚ ਆਉਣ ਕਾਰਨ ਭਾਰਤੀ ਮੂਲ ਦੇ ਜਰਮਨ ਪਰਬਤਾਰੋਹੀ ਅਤੇ ਉਨ੍ਹਾਂ ਦੇ ਨੇਪਾਲੀ ਗਾਈਡ ਦੀ ਮੌਤ ਹੋ ਗਈ।

ਪਰਬਤਾਰੋਹਣ ਮੁਹਿੰਮ ਕਰਨਵਾਉਣ ਵਾਲੀ ਕੰਪਨੀ ‘ਮਕਾਲੂ ਐਡਵੈਂਚਰ’ ਦੇ ਮੈਨੇਜਿੰਗ ਡਾਇਰੈਕਟਰ ਮੋਹਨ ਲਮਸਲ ਨੇ ਐਤਵਾਰ ਨੂੰ ਦੱਸਿਆ ਕਿ ਜਰਮਨੀ ਵਿੱਚ ਰਹਿਣ ਵਾਲੇ ਭਾਰਤੀ ਮੂਲ ਦੇ ਧਰੁਵ ਜਯੋਤੀ ਗੁਹਾ ਅਤੇ ਗਾਈਡ ਫੁਰਸੇਂਬਾ ਸ਼ੇਰਪਾ ਖ਼ਰਾਬ ਮੌਸਮ ਦੇ ਬਾਵਜੂਦ ਕੈਂਪ-2 ਤੋਂ ਉੱਪਰਲੇ ਕੈਂਪ ਵੱਲ ਵਧੇ ਸਨ। ਸ਼ਨੀਵਾਰ ਰਾਤ ਨੂੰ ਬਰਫ਼ ਖਿਸਕਣ ਦੀ ਘਟਨਾ ਦੀ ਲਪੇਟ ਵਿੱਚ ਆਉਣ ਕਾਰਨ ਦੋਵੇਂ ਬਰਫ਼ ਹੇਠਾਂ ਦੱਬ ਗਏ।

ਦੋਵਾਂ ਪਰਬਤਾਰੋਹੀਆਂ ਦਾ ਮੁਹਿੰਮ ਦੇ ਪ੍ਰਬੰਧਕਾਂ ਨਾਲ ਸੰਪਰਕ ਟੁੱਟਣ ਤੋਂ ਬਾਅਦ ਬਚਾਅ ਦਲ ਨੂੰ ਕੈਂਪ-3 ਵੱਲ ਭੇਜਿਆ ਗਿਆ। ਉਨ੍ਹਾਂ ਨਾਲ ਆਖ਼ਰੀ ਵਾਰ ਸ਼ਨੀਵਾਰ ਰਾਤ ਨੂੰ ਸੰਪਰਕ ਹੋਇਆ ਸੀ। ਜਦੋਂ ਬਚਾਅ ਦਲ ਕੈਂਪ-3 ਪਹੁੰਚਿਆ ਤਾਂ ਧਰੁਵ ਅਤੇ ਫੁਰਸੇਂਬਾ ਦੀਆਂ ਲਾਸ਼ਾਂ ਲਗਪਗ ਸੱਤ ਫੁੱਟ ਬਰਫ਼ ਹੇਠਾਂ ਮਿਲੀਆਂ।

ਲਮਸਲ ਨੇ ਦੱਸਿਆ ਕਿ ਕੰਪਨੀ ਦੇ ਛੇ ਹੋਰ ਪਰਬਤਾਰੋਹੀ, ਜਿਨ੍ਹਾਂ ਨੇ ਕੈਂਪ-2 ਤੋਂ ਵਾਪਸ ਪਰਤਣ ਦਾ ਫ਼ੈਸਲਾ ਕੀਤਾ ਸੀ, ਸੁਰੱਖਿਅਤ ਹਨ। ਪਰ ਖ਼ਰਾਬ ਮੌਸਮ ਦੇ ਬਾਵਜੂਦ ਅੱਗੇ ਵਧਣ ਵਾਲੇ ਦੋਵੇਂ ਪਰਬਤਾਰੋਹੀ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਇਸ ਪਰਬਤਾਰੋਹਣ ਸੀਜ਼ਨ ਵਿੱਚ ਮਾਊਂਟ ਮਨਾਸਲੂ 'ਤੇ ਜਾਨ ਗੁਆਉਣ ਵਾਲਿਆਂ ਦੀ ਗਿਣਤੀ ਚਾਰ ਹੋ ਗਈ ਹੈ।

ਇਸ ਤੋਂ ਪਹਿਲਾਂ ਸਿੰਗਾਪੁਰ ਦੇ ਇੱਕ ਪਰਬਤਾਰੋਹੀ ਅਤੇ ਇੱਕ ਨੇਪਾਲੀ ਗਾਈਡ ਦੀ ਪਹਾੜ 'ਤੇ ਵੱਖ-ਵੱਖ ਘਟਨਾਵਾਂ ਵਿੱਚ ਮੌਤ ਹੋ ਚੁੱਕੀ ਹੈ। ਮਾਊਂਟ ਮਨਾਸਲੂ ਦੀ ਸਮੁੰਦਰ ਤਲ ਤੋਂ ਉਚਾਈ 8,163 ਮੀਟਰ ਹੈ। ਇਹ ਨੇਪਾਲ ਦੇ ਗੋਰਖਾ ਜ਼ਿਲ੍ਹੇ ਵਿੱਚ ਸਥਿਤ ਹੈ। ਸੰਸਕ੍ਰਿਤ ਸ਼ਬਦ ‘ਮਨਾਸਲੂ’ ਦਾ ਅਰਥ ‘ਆਤਮਾ ਦਾ ਪਹਾੜ’ ਹੁੰਦਾ ਹੈ।

(ਸਮਾਚਾਰ ਏਜੰਸੀ ਪੀਟੀਆਈ ਦੇ ਇਨਪੁਟ ਨਾਲ)