ਯੂਏਈ ਦੇ ਫੁਜੈਰਾਹ ’ਚ ਭਿਆਨਕ ਸੜਕ ਹਾਦਸਾ, 18 ਕਾਰਾਂ ਤੇ 5 ਟਰੱਕਾਂ ਦੀ ਟੱਕਰ ’ਚ ਭਾਰਤੀਆਂ ਸਮੇਤ 14 ਮੌਤਾਂ, 30 ਜ਼ਖ਼ਮੀ

ਦੁਬਈ : ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਦੇ ਫੁਜੈਰਾਹ ਵਿਚ ਵੀਰਵਾਰ ਨੂੰ 18 ਵਾਹਨਾਂ ਅਤੇ ਪੰਜ ਟਰੱਕਾਂ ਦੀ ਟੱਕਰ ਕਾਰਨ ਵਾਪਰੇ ਸੜਕ ਹਾਦਸੇ ਵਿਚ 14 ਲੋਕਾਂ ਦੀ ਮੌਤ ਹੋ ਗਈ ਅਤੇ 30 ਹੋਰ ਜ਼ਖ਼ਮੀ ਹੋ ਗਏ। ਯੂਏਈ ਦੇ ਗ੍ਰਹਿ ਮੰਤਰਾਲੇ ਨੇ ਸ਼ੁਰੂਆਤੀ ਜਾਣਕਾਰੀ ਦੇ ਆਧਾਰ ’ਤੇ ਇਹ ਜਾਣਕਾਰੀ ਦਿੱਤੀ ਹੈ। ਮੰਤਰਾਲੇ ਨੇ ਐਕਸ ’ਤੇ ਦੱਸਿਆ ਕਿ ਹਾਦਸੇ ਤੋਂ ਬਾਅਦ ਐਮਰਜੈਂਸੀ ਅਤੇ ਵਿਸ਼ੇਸ਼ ਬਚਾਅ ਦਲ ਮੌਕੇ ’ਤੇ ਤਾਇਨਾਤ ਹਨ। ਰਾਹਤ ਤੇ ਬਚਾਅ ਮੁਲਾਜ਼ਮ ਹਾਦਸੇ ਦੇ ਅਸਰਾਂ ਨਾਲ ਨਜਿੱਠਣ ਅਤੇ ਜ਼ਖ਼ਮੀਆਂ ਦੀ ਮਦਦ ਕਰਨ ਵਿਚ ਜੁਟੇ ਹੋਏ ਹਨ। ਯੂ.ਏ.ਈ. (UAE) ਵਿੱਚ ਭਾਰਤੀ ਕੌਂਸਲੇਟ ਨੇ ਪੁਸ਼ਟੀ ਕੀਤੀ ਹੈ ਕਿ ਮ੍ਰਿਤਕਾਂ ਵਿੱਚ ਭਾਰਤੀ ਨਾਗਰਿਕ ਵੀ ਸ਼ਾਮਲ ਹਨ ਅਤੇ ਉਨ੍ਹਾਂ ਨੇ ਪੀੜਤ ਪਰਿਵਾਰਾਂ ਨੂੰ ਹਰ ਸੰਭਵ ਮਦਦ ਦਾ ਭਰੋਸਾ ਦਿੱਤਾ ਹੈ।

ਹਾਦਸੇ ਵਿਚ ਸ਼ਾਮਲ ਵਾਹਨਾਂ ਦੀ ਗਿਣਤੀ ਤੋਂ ਹੀ ਇਸ ਦੀ ਗੰਭੀਰਤਾ ਦਾ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ। ਹਾਲਾਂਕਿ, ਹਾਦਸਾ ਕਿਸ ਕਾਰਨ ਵਾਪਰਿਆ ਅਤੇ ਵਾਹਨਾਂ ਦੀ ਟੱਕਰ ਕਿਹੜੇ ਹਾਲਾਤ ਵਿਚ ਹੋਈ, ਇਸ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਹਾਲੇ ਸਾਹਮਣੇ ਨਹੀਂ ਆਈ ਹੈ।