'ਮੈਨੂੰ ਉਸ ਨਾਲ ਬਿਤਾਏ ਹਰ ਮਿੰਟ 'ਤੇ ਪਛਤਾਵਾ', ਜੈਫਰੀ ਐਪਸਟੀਨ ਮਾਮਲੇ 'ਚ ਬਿਲ ਗੇਟਸ ਨੇ ਤੋੜੀ ਚੁੱਪੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਐਪਸਟੀਨ ਫਾਈਲਾਂ ਨਾਲ ਜੁੜੇ ਦੋਸ਼ਾਂ 'ਤੇ ਮਾਈਕ੍ਰੋਸਾਫਟ ਦੇ ਸਹਿ-ਸੰਸਥਾਪਕ ਬਿਲ ਗੇਟਸ ਨੇ ਡੂੰਘੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਹੈ। ਅਮਰੀਕੀ ਨਿਆਂ ਵਿਭਾਗ ਵੱਲੋਂ ਜਾਰੀ ਨਵੇਂ ਦਸਤਾਵੇਜ਼ਾਂ ਅਤੇ ਈਮੇਲਾਂ ਤੋਂ ਬਾਅਦ ਉੱਠੇ ਵਿਵਾਦਾਂ ਨੂੰ ਬਿਲ ਗੇਟਸ ਨੇ ਸਿਰੇ ਤੋਂ ਖਾਰਜ ਕਰਦਿਆਂ ਮਾਫੀ ਮੰਗੀ ਹੈ।

ਦਰਅਸਲ, ਅਮਰੀਕੀ ਨਿਆਂ ਵਿਭਾਗ ਵੱਲੋਂ ਜਾਰੀ ਐਪਸਟੀਨ ਫਾਈਲ ਦੇ ਨਵੇਂ ਦਸਤਾਵੇਜ਼ਾਂ ਅਤੇ ਈਮੇਲਾਂ ਵਿੱਚ ਇਹ ਖੁਲਾਸਾ ਹੋਇਆ ਸੀ ਕਿ ਬਿਲ ਗੇਟਸ ਨੇ ਰੂਸੀ ਕੁੜੀਆਂ ਨਾਲ ਸਬੰਧ ਬਣਾਏ ਸਨ, ਜਿਸ ਕਾਰਨ ਉਨ੍ਹਾਂ ਨੂੰ ਜਿਨਸੀ ਸੰਕਰਮਣ (STD) ਹੋਇਆ ਸੀ।

ਬਿਲ ਗੇਟਸ ਦੀ ਸਫ਼ਾਈ

ਇਨ੍ਹਾਂ ਦੋਸ਼ਾਂ ਤੋਂ ਬਾਅਦ ਬਿਲ ਗੇਟਸ ਦੀ ਸਫ਼ਾਈ ਆਈ ਹੈ। ਬਿਲ ਗੇਟਸ ਨੇ ਆਸਟ੍ਰੇਲੀਆ ਦੇ ਚੈਨਲ ਨੂੰ ਦਿੱਤੇ ਇੰਟਰਵਿਊ ਵਿੱਚ ਕਿਹਾ, 'ਜੈਫਰੀ ਐਪਸਟੀਨ ਨੇ ਖੁਦ ਨੂੰ ਇੱਕ ਈਮੇਲ ਲਿਖੀ ਸੀ, ਜੋ ਕਦੇ ਭੇਜੀ ਨਹੀਂ ਗਈ ਸੀ। ਉਹ ਈਮੇਲ ਝੂਠੀ ਹੈ। ਮੈਨੂੰ ਨਹੀਂ ਪਤਾ ਕਿ ਉਸ ਦੇ ਪਿੱਛੇ ਉਸ ਦੀ ਕੀ ਸੋਚ ਸੀ। ਉਸ ਨਾਲ ਬਿਤਾਏ ਹਰ ਮਿੰਟ 'ਤੇ ਮੈਨੂੰ ਪਛਤਾਵਾ ਹੈ ਅਤੇ ਮੈਂ ਮਾਫੀ ਮੰਗਦਾ ਹਾਂ ਕਿ ਮੈਂ ਉਸ ਨਾਲ ਸਮਾਂ ਬਿਤਾਇਆ।'

ਜ਼ਿਕਰਯੋਗ ਹੈ ਕਿ 2019 ਵਿੱਚ ਜੇਲ੍ਹ ਵਿੱਚ ਬੰਦ ਜਿਨਸੀ ਅਪਰਾਧੀ ਜੈਫਰੀ ਐਪਸਟੀਨ ਦੀ ਖੁਦਕੁਸ਼ੀ ਦੀ ਜਾਂਚ ਨਾਲ ਸਬੰਧਤ ਲੱਖਾਂ ਪੰਨਿਆਂ ਦੇ ਨਵੇਂ ਦਸਤਾਵੇਜ਼ ਅਮਰੀਕੀ ਨਿਆਂ ਵਿਭਾਗ ਵੱਲੋਂ ਹਾਲ ਹੀ ਵਿੱਚ ਜਾਰੀ ਕੀਤੇ ਗਏ ਹਨ, ਜਿਸ ਵਿੱਚ ਬਿਲ ਗੇਟਸ ਸਮੇਤ ਕਈ ਹਸਤੀਆਂ ਦੇ ਨਾਂ ਸ਼ਾਮਲ ਹਨ।

ਫਸਾਉਣ ਅਤੇ ਬਦਨਾਮ ਕਰਨ ਲਈ...

ਬਿਲ ਗੇਟਸ ਦਾ ਨਾਂ ਸਾਹਮਣੇ ਆਉਣ ਤੋਂ ਬਾਅਦ ਉਨ੍ਹਾਂ ਦੇ ਬੁਲਾਰੇ ਨੇ ਕਿਹਾ, "ਇਹ ਦਸਤਾਵੇਜ਼ ਸਿਰਫ਼ ਐਪਸਟੀਨ ਦੀ ਇਸ ਨਿਰਾਸ਼ਾ ਨੂੰ ਦਰਸਾਉਂਦੇ ਹਨ ਕਿ ਗੇਟਸ ਨਾਲ ਉਨ੍ਹਾਂ ਦਾ ਕੋਈ ਸਥਾਈ ਸਬੰਧ ਨਹੀਂ ਸੀ ਅਤੇ ਉਨ੍ਹਾਂ ਨੂੰ ਫਸਾਉਣ ਅਤੇ ਬਦਨਾਮ ਕਰਨ ਲਈ ਉਹ ਕਿਸ ਹੱਦ ਤੱਕ ਜਾ ਸਕਦੇ ਸਨ।"

ਬਿਲ ਗੇਟਸ ਦੀ ਸਾਬਕਾ ਪਤਨੀ ਮੇਲਿੰਡਾ ਫ੍ਰੈਂਚ ਗੇਟਸ ਨੇ ਵੀ ਇਨ੍ਹਾਂ ਈਮੇਲਾਂ 'ਤੇ ਪ੍ਰਤੀਕਿਰਿਆ ਦਿੱਤੀ ਅਤੇ ਇਨ੍ਹਾਂ ਨੂੰ 'ਬਹੁਤ ਦਿਲ ਤੋੜਨ ਵਾਲਾ' ਦੱਸਿਆ। ਮੇਲਿੰਡਾ ਫ੍ਰੈਂਚ ਨੇ ਕਿਹਾ ਕਿ ਦਸਤਾਵੇਜ਼ਾਂ ਦੇ ਲੀਕ ਹੋਣ ਨਾਲ ਉਨ੍ਹਾਂ ਨੂੰ ਆਪਣੇ ਵਿਆਹੁਤਾ ਜੀਵਨ ਦੇ ਕੁਝ ਬਹੁਤ ਹੀ ਦਰਦਨਾਕ ਪਲਾਂ ਦੀਆਂ ਯਾਦਾਂ ਤਾਜ਼ਾ ਹੋ ਗਈਆਂ। ਉਨ੍ਹਾਂ ਕਿਹਾ, "ਜਦੋਂ ਵੀ ਉਨ੍ਹਾਂ ਵੇਰਵਿਆਂ ਦਾ ਜ਼ਿਕਰ ਹੁੰਦਾ ਹੈ, ਤਾਂ ਮੈਨੂੰ ਨਿੱਜੀ ਤੌਰ 'ਤੇ ਬਹੁਤ ਮੁਸ਼ਕਲ ਹੁੰਦੀ ਹੈ।"