ਪਤੀ ਦੇ ਰੂਪ ’ਚ ਦਰਿੰਦਾ: ਨਸ਼ੀਲੀਆਂ ਦਵਾਈਆਂ ਦੇ ਕੇ ਕਰਦਾ ਰਿਹਾ 20 ਸਾਲਾਂ ਤੱਕ ਆਪਣੀ ਪਤਨੀ ਨਾਲ ਦਰਿੰਦਗੀ, ਅਦਾਲਤ ’ਚ ਕਬੂਲੇ ਜੁਰਮ

ਡਿਜੀਟਲ ਡੈਸਕ, ਲੰਡਨ। ਯੂਨਾਈਟਿਡ ਕਿੰਗਡਮ ਵਿੱਚ ਰਹਿਣ ਵਾਲੇ ਇੱਕ ਵਿਅਕਤੀ ਨੇ 20 ਸਾਲ ਤੋਂ ਵੱਧ ਸਮੇਂ ਤੱਕ ਆਪਣੀ ਪਤਨੀ ਨਾਲ ਜਬਰ-ਜਨਾਹ ਕੀਤਾ। ਦੋਸ਼ ਹੈ ਕਿ ਉਹ ਇੰਨੇ ਸਾਲਾਂ ਤੱਕ ਪਤਨੀ ਨੂੰ ਨਸ਼ੀਲੀ ਦਵਾਈ ਦਿੰਦਾ ਰਿਹਾ ਅਤੇ ਉਸ ਦੀ ਸਹਿਮਤੀ ਤੋਂ ਬਿਨਾਂ ਉਸ ਨਾਲ ਜਬਰ-ਜਨਾਹ ਕਰਦਾ ਰਿਹਾ।

ਪੀੜਤ ਔਰਤ ਦੀ ਪਛਾਣ ਗੁਪਤ ਰੱਖਣ ਦੇ ਕਾਨੂੰਨੀ ਅਧਿਕਾਰ ਦੀ ਰੱਖਿਆ ਲਈ ਮੁਲਜ਼ਮ ਦਾ ਨਾਮ ਜਨਤਕ ਨਹੀਂ ਕੀਤਾ ਗਿਆ ਹੈ। ਮੁਲਜ਼ਮ ਨੇ 2004 ਤੋਂ 2025 ਦਰਮਿਆਨ ਪਤਨੀ ਨਾਲ ਜਬਰ-ਜਨਾਹ ਕਰਨ ਸਮੇਤ ਕੁੱਲ 60 ਅਪਰਾਧਾਂ ਲਈ ਆਪਣਾ ਜੁਰਮ ਕਬੂਲ ਕੀਤਾ ਹੈ।

20 ਸਾਲਾਂ ਤੱਕ ਪਤਨੀ ਨਾਲ ਕਰਦਾ ਰਿਹਾ ਜਬਰ-ਜਨਾਹ

BBC ਦੀ ਰਿਪੋਰਟ ਮੁਤਾਬਕ, ਮੈਨਚੈਸਟਰ ਦੀ ਮਿਨਸ਼ੁਲ ਸਟ੍ਰੀਟ ਕ੍ਰਾਊਨ ਕੋਰਟ ਵਿੱਚ ਮੁਲਜ਼ਮ ਨੇ ਆਪਣੇ ਜੁਰਮ ਕਬੂਲ ਕੀਤੇ। ਉਸ ਸਮੇਂ ਅਦਾਲਤ ਵਿੱਚ ਪੀੜਤ ਔਰਤ ਵੀ ਮੌਜੂਦ ਸੀ। ਉਹ ਆਪਣੇ ਪਰਿਵਾਰਕ ਮੈਂਬਰਾਂ ਦੇ ਨਾਲ ਪਬਲਿਕ ਗੈਲਰੀ ਤੋਂ ਅਦਾਲਤੀ ਕਾਰਵਾਈ ਦੇਖ ਰਹੀ ਸੀ।

ਰਿਪੋਰਟ ਮੁਤਾਬਕ, ਗ੍ਰੇਟਰ ਮੈਨਚੈਸਟਰ ਦੇ ਸਟਾਕਪੋਰਟ ਇਲਾਕੇ ਵਿੱਚ ਰਹਿਣ ਵਾਲੇ 60 ਸਾਲਾ ਬ੍ਰਿਟਿਸ਼ ਵਿਅਕਤੀ ਨੇ ਕਈ ਵਾਰ ਜਬਰ-ਜਨਾਹ, ਪੇਨੇਟ੍ਰੇਸ਼ਨ ਰਾਹੀਂ ਹਮਲਾ ਕਰਨ ਅਤੇ ਜਾਣਬੁੱਝ ਕੇ ਕੋਈ ਪਦਾਰਥ ਦੇਣ ਸਮੇਤ ਦਰਜਨਾਂ ਦੋਸ਼ਾਂ ਵਿੱਚ ਖੁਦ ਨੂੰ ਦੋਸ਼ੀ ਮੰਨਿਆ। ਮੁਲਜ਼ਮ ਦੇ ਜੁਰਮ ਕਬੂਲ ਕਰਨ ਤੋਂ ਬਾਅਦ ਗ੍ਰੇਟਰ ਮੈਨਚੈਸਟਰ ਦੇ ਅਸਿਸਟੈਂਟ ਚੀਫ ਕਾਂਸਟੇਬਲ ਰਿਕ ਜੈਕਸਨ ਨੇ ਕਿਹਾ ਕਿ ਪੁਲਿਸ ਦਾ ਧਿਆਨ ਪੀੜਤ ਔਰਤ ਨੂੰ ਸਹਾਇਤਾ ਦੇਣ ’ਤੇ ਹੈ, ਕਿਉਂਕਿ ਇਹ ਜਾਂਚ ਬਹੁਤ ਗੁੰਝਲਦਾਰ ਹੈ।

ਟਰਾਇਲ ਖ਼ਤਮ ਹੋਣ ਤੋਂ ਬਾਅਦ ਹੋਵੇਗਾ ਸਜ਼ਾ ਦਾ ਐਲਾਨ

ਟਰਾਇਲ ਪੂਰਾ ਹੋਣ ਤੋਂ ਬਾਅਦ ਮੁਲਜ਼ਮ ਨੂੰ ਉਸ ਦੇ ਅਪਰਾਧਾਂ ਲਈ ਸਜ਼ਾ ਸੁਣਾਈ ਜਾਵੇਗੀ। ਮੁਲਜ਼ਮ ਨੇ ਇਹ ਵੀ ਮੰਨਿਆ ਕਿ ਉਸ ਨੇ ਜਿਨਸੀ ਸੰਤੁਸ਼ਟੀ ਲਈ ਆਪਣੀ ਪਤਨੀ ਦੀਆਂ ਨਿੱਜੀ ਤਸਵੀਰਾਂ ਅਤੇ ਵੀਡੀਓ ਉਸ ਦੀ ਮਰਜ਼ੀ ਤੋਂ ਬਿਨਾਂ ਸਾਂਝੀਆਂ ਕੀਤੀਆਂ। ਇਸ ਮਾਮਲੇ ਵਿੱਚ 12 ਹੋਰ ਮੁਲਜ਼ਮਾਂ ਦੀ ਪਛਾਣ ਕੀਤੀ ਗਈ ਹੈ। ਇਨ੍ਹਾਂ ਦੇ ਨਾਮ ਫਿਲਿਪ ਵਾਈਲਡ (58), ਸ਼ੌਨ ਪੀਅਰਸ (38), ਜੌਰਡਨ ਵਾਲੇਸ (31), ਐਲਨ ਕੀਲਨ (42), ਜੋਨਾਥਨ ਕਰਕ (43), ਰੌਬਰਟ ਸਟੀਵਰਟ (70), ਮੁਹੰਮਦ ਸਾਬਿਰ (28), ਗ੍ਰਾਹਮ ਬ੍ਰੌਘਮ (74), ਰਿਚਰਡ ਟਾਊਨਸੈਂਡ (37), ਕਾਰਲ ਲਿੰਡਸੇ (55), ਡੈਨੀਅਲ ਰੇਨਰ (42) ਅਤੇ ਡੇਵਿਡ ਗ੍ਰੇਵਜ਼ (59) ਦੱਸੇ ਗਏ ਹਨ।

ਇਸ ਮਾਮਲੇ ਦੀ ਸੁਣਵਾਈ ਆਉਣ ਵਾਲੇ ਹਫ਼ਤਿਆਂ ਵਿੱਚ ਜਾਰੀ ਰਹੇਗੀ। ਆਇਰਿਸ਼ ਟਾਈਮਜ਼ ਮੁਤਾਬਕ, ਗ੍ਰੇਟਰ ਮੈਨਚੈਸਟਰ ਦੇ ਅਸਿਸਟੈਂਟ ਚੀਫ ਕਾਂਸਟੇਬਲ ਨੇ ਕਿਹਾ ਕਿ ਇਸ ਮਾਮਲੇ ਵਿੱਚ ਪੀੜਤ ਔਰਤ ਨੂੰ ਵਿਸ਼ੇਸ਼ ਸਹਾਇਤਾ ਦਿੱਤੀ ਜਾ ਰਹੀ ਹੈ।