'ਉਹ ਮੇਰੇ ਵਰਗੇ ਹਨ, ਸੌਂਦੇ ਨਹੀਂ...', ਜਦੋਂ ਸਵੇਰੇ 6 ਵਜੇ PM ਮੋਦੀ ਨੂੰ ਫੋਨ ਕਰਨ ਵਾਲੇ ਸਨ ਟਰੰਪ; ਅਮਰੀਕੀ ਰਾਜਦੂਤ ਨੇ ਸੁਣਾਇਆ ਕਿੱਸਾ

ਪੀਐਮ ਮੋਦੀ-ਟਰੰਪ ਦੀ ਦੋਸਤੀ ਦਾ ਅਣਸੁਣਿਆ ਕਿੱਸਾ

ਪੀਐਮ ਮੋਦੀ ਅਤੇ ਡੋਨਾਲਡ ਟਰੰਪ ਵਿਚਾਲੇ ਅਜਿਹਾ ਹੀ ਇੱਕ ਦਿਲਚਸਪ ਕਿੱਸਾ ਭਾਰਤ ਵਿੱਚ ਅਮਰੀਕਾ ਦੇ ਰਾਜਦੂਤ ਸਰਜੀਓ ਗੋਰ ਨੇ ਸੁਣਾਇਆ। ਗੋਰ ਨੇ ਦੱਸਿਆ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇੱਕ ਵਾਰ ਸਵੇਰੇ 6 ਵਜੇ ਹੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਫੋਨ ਮਿਲਾਉਣਾ ਚਾਹੁੰਦੇ ਸਨ। ਇਹ ਗੱਲ ਦੋਵਾਂ ਆਗੂਆਂ ਵਿਚਾਲੇ ਸ਼ਾਨਦਾਰ ਤਾਲਮੇਲ ਨੂੰ ਦਰਸਾਉਂਦੀ ਹੈ।

ਜਦੋਂ ਟਰੰਪ ਨੇ ਕਿਹਾ ਸੀ- 'ਮੋਦੀ ਬਿਲਕੁਲ ਮੇਰੇ ਵਰਗੇ ਨੇ'

ਯੂਐਸ-ਇੰਡੀਆ ਸਟ੍ਰੈਟੇਜਿਕ ਪਾਰਟਨਰਸ਼ਿਪ ਫੋਰਮ (USISPF) ਦੇ ਇੱਕ ਪ੍ਰੋਗਰਾਮ ਵਿੱਚ ਬੋਲਦਿਆਂ ਅਮਰੀਕੀ ਰਾਜਦੂਤ ਨੇ ਇਹ ਵਾਕਿਆ ਸਾਂਝਾ ਕੀਤਾ। ਉਨ੍ਹਾਂ ਦੱਸਿਆ ਕਿ ਕੁਝ ਮਹੀਨੇ ਪਹਿਲਾਂ ਮਿਆਮੀ ਵਿੱਚ ਇੱਕ UFC ਫਾਈਟ ਈਵੈਂਟ ਦੌਰਾਨ ਉਹ ਰਾਸ਼ਟਰਪਤੀ ਟਰੰਪ ਦੇ ਨਾਲ ਬੈਕਸਟੇਜ ਬੈਠੇ ਸਨ। ਅਚਾਨਕ ਟਰੰਪ ਨੇ ਉਨ੍ਹਾਂ ਨੂੰ ਕਿਹਾ ਕਿ ਚਲੋ, ਪ੍ਰਧਾਨ ਮੰਤਰੀ ਮੋਦੀ ਨੂੰ ਫੋਨ ਲਾਉਂਦੇ ਹਾਂ।

ਗੋਰ ਨੇ ਦੱਸਿਆ ਕਿ ਜਦੋਂ ਟਰੰਪ ਨੇ ਅਜਿਹੀ ਇੱਛਾ ਜਤਾਈ ਤਾਂ ਮੈਂ ਉਨ੍ਹਾਂ ਨੂੰ ਯਾਦ ਕਰਵਾਇਆ ਕਿ ਇਸ ਵੇਲੇ ਭਾਰਤ ਵਿੱਚ ਸਵੇਰੇ ਦੇ 6 ਵੱਜ ਰਹੇ ਹੋਣਗੇ, ਤਾਂ ਟਰੰਪ ਨੇ ਮੁਸਕਰਾਉਂਦੇ ਹੋਏ ਜਵਾਬ ਦਿੱਤਾ, "ਉਹ ਜਾਗ ਰਹੇ ਹੋਣਗੇ। ਉਹ ਬਿਲਕੁਲ ਮੇਰੇ ਵਰਗੇ ਹਨ, ਸਵੇਰੇ ਜਲਦੀ ਉੱਠਣ ਵਾਲੇ।"

ਹਾਲਾਂਕਿ, ਉਹ ਫੋਨ ਕਾਲ ਅਗਲੇ ਦਿਨ ਕੀਤੀ ਗਈ, ਪਰ ਰਾਜਦੂਤ ਨੇ ਕਿਹਾ ਕਿ ਇਸ ਕਿੱਸੇ ਤੋਂ ਪਤਾ ਲੱਗਦਾ ਹੈ ਕਿ ਦੋਵਾਂ ਆਗੂਆਂ ਵਿਚਾਲੇ ਕਿੰਨਾ ਦੋਸਤਾਨਾ ਰਿਸ਼ਤਾ ਹੈ। ਜਦੋਂ ਤੁਸੀਂ ਕਿਸੇ ਦੇ ਚੰਗੇ ਦੋਸਤ ਹੁੰਦੇ ਹੋ ਤਾਂ ਹਰ ਗੱਲ ਲਈ ਪਹਿਲਾਂ ਤੋਂ ਸਮਾਂ ਤੈਅ ਕਰਨ ਦੀ ਲੋੜ ਨਹੀਂ ਹੁੰਦੀ।

ਟਰੰਪ ਦੇ ਦਿਲ ਵਿੱਚ ਭਾਰਤ ਲਈ ਖ਼ਾਸ ਥਾਂ

ਰਾਜਦੂਤ ਗੋਰ ਨੇ ਦੱਸਿਆ ਕਿ ਰਾਸ਼ਟਰਪਤੀ ਟਰੰਪ ਅੱਜ ਵੀ ਆਪਣੇ ਭਾਰਤ ਦੌਰੇ ਦੀਆਂ ਯਾਦਾਂ ਨੂੰ ਬਹੁਤ ਪਸੰਦ ਕਰਦੇ ਹਨ। ਉਨ੍ਹਾਂ ਦੇ ਪਹਿਲੇ ਕਾਰਜਕਾਲ ਦੌਰਾਨ ਹੋਏ 'ਹਾਊਡੀ ਮੋਦੀ' ਅਤੇ 'ਨਮਸਤੇ ਟਰੰਪ' ਵਰਗੇ ਵੱਡੇ ਪ੍ਰੋਗਰਾਮਾਂ ਨੇ ਦੋਵਾਂ ਦੇਸ਼ਾਂ ਨੂੰ ਬਹੁਤ ਨੇੜੇ ਲਿਆਂਦਾ ਸੀ। ਟਰੰਪ ਆਪਣੇ ਇਸ ਦੂਜੇ ਕਾਰਜਕਾਲ ਵਿੱਚ ਵੀ ਭਾਰਤ ਆਉਣ ਦੀ ਇੱਛਾ ਰੱਖਦੇ ਹਨ।

ਅਗਲੇ 2 ਸਾਲ ਭਾਰਤ-ਅਮਰੀਕਾ ਲਈ ਬੇਹਦੇ ਅਹਿਮ

ਅਮਰੀਕੀ ਰਾਜਦੂਤ ਦੇ ਮੁਤਾਬਕ, ਦੋਵਾਂ ਦੇਸ਼ਾਂ ਦੀਆਂ ਸਰਕਾਰਾਂ ਸਿਰਫ਼ ਗੱਲਾਂ 'ਤੇ ਨਹੀਂ, ਸਗੋਂ ਕੰਮ 'ਤੇ ਭਰੋਸਾ ਰੱਖਦੀਆਂ ਹਨ। ਆਉਣ ਵਾਲੇ ਦੋ ਸਾਲ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਲਈ ਬਹੁਤ ਜ਼ਰੂਰੀ ਹਨ। ਵਪਾਰ, ਨਿਵੇਸ਼, ਰੱਖਿਆ ਅਤੇ ਟੈਕਨਾਲੋਜੀ ਵਰਗੇ ਖੇਤਰਾਂ ਵਿੱਚ ਅੱਜ ਜੋ ਫ਼ੈਸਲੇ ਲਏ ਜਾਣਗੇ, ਉਹ ਅਗਲੇ ਕਈ ਦਹਾਕਿਆਂ ਤੱਕ ਭਾਰਤ-ਅਮਰੀਕਾ ਦੀ ਦੋਸਤੀ ਅਤੇ ਭਾਈਵਾਲੀ ਨੂੰ ਮਜ਼ਬੂਤ ਬਣਾਈ ਰੱਖਣਗੇ।