ਇੰਡੋਨੇਸ਼ੀਆ 'ਚ ਹਾਦਸੇ ਦਾ ਸ਼ਿਕਾਰ ਹੋਈ ਸਪੀਡਬੋਟ: 12 ਲੋਕਾਂ ਨੂੰ ਬਚਾਇਆ, ਕੈਪਟਨ ਦੀ ਭਾਲ ਜਾਰੀ

ਪਾਲੂ, ਏਪੀ : ਇੰਡੋਨੇਸ਼ੀਆ ਵਿਚ ਇਕ ਸਪੀਡਬੋਟ ਦੇ ਡੁੱਬਣ ਤੋਂ ਬਾਅਦ 12 ਲੋਕਾਂ ਨੂੰ ਬਚਾਇਆ ਗਿਆ ਹੈ। ਇਸ ਵਿਚ 11 ਯੂਰਪੀ ਸੈਲਾਨੀ ਅਤੇ ਇਕ ਸਥਾਨਕ ਕ੍ਰੂ ਮੈਂਬਰ ਸ਼ਾਮਲ ਹਨ। ਹਾਲਾਂਕਿ, ਬੋਟ ਦੇ ਕੈਪਟਨ ਦੀ ਭਾਲ ਜਾਰੀ ਹੈ। ਗੋਰੋਂਟਾਲੋ ਸੂਬੇ ਦੇ ਖੋਜ ਅਤੇ ਬਚਾਅ ਦਫ਼ਤਰ ਦੇ ਮੁਖੀ ਹੇਰੀਆਂਟੋ ਨੇ ਦੱਸਿਆ ਕਿ ਸ਼ੁੱਕਰਵਾਰ ਸਵੇਰੇ ਸੈਂਟਰਲ ਸੁਲਾਵੇਸੀ ਸੂਬੇ ਦੀ ਤੋਜੋ ਉਨਾਉਨਾ ਰੀਜੈਂਸੀ ਦੇ ਇਕ ਡਾਈਵ ਰਿਜ਼ਾਰਟ ਤੋਂ ਸਪੀਡਬੋਟ ਮਾਰਿਸਾ ਪੋਰਟ ਲਈ ਨਿਕਲੀ ਸੀ ਪਰ ਇਹ ਨਿਰਧਾਰਤ ਸਮੇਂ ’ਤੇ ਨਹੀਂ ਪਹੁੰਚੀ।

ਇਕ ਸਥਾਨਕ ਟੂਰ ਗਾਈਡ ਨੇ ਸ਼ੁੱਕਰਵਾਰ ਦੁਪਹਿਰ 3:40 ਵਜੇ ਬੋਟ ਦੇ ਲਾਪਤਾ ਹੋਣ ਦੀ ਜਾਣਕਾਰੀ ਦਿੱਤੀ ਜਿਸ ਤੋਂ ਬਾਅਦ ਤੁਰੰਤ ਭਾਲ ਮੁਹਿੰਮ ਸ਼ੁਰੂ ਕੀਤੀ ਗਈ। ਜਦੋਂ ਦੁਪਹਿਰ ਤੱਕ ਸਪੀਡਬੋਟ ਨਹੀਂ ਪਹੁੰਚੀ ਤਾਂ ਚਿੰਤਾ ਵਧ ਗਈ। ਅਸੀਂ ਤੁਰੰਤ ਰਾਤ ਭਰ ਚੱਲਣ ਵਾਲਾ ਸਰਚ ਆਪ੍ਰੇਸ਼ਨ ਸ਼ੁਰੂ ਕੀਤਾ। ਇੰਡੋਨੇਸ਼ੀਆਈ ਅਧਿਕਾਰੀਆਂ ਅਨੁਸਾਰ, ਇਸ ਬੋਟ ’ਤੇ ਪੰਜ ਡੱਚ, ਤਿੰਨ ਜਰਮਨ, ਇਕ ਚੈੱਕ ਨਾਗਰਿਕ, ਇਕ ਬੈਲਜੀਅਮ ਦਾ ਵਾਸੀ, ਇਕ ਫਰਾਂਸੀਸੀ ਔਰਤ ਅਤੇ ਦੋ ਇੰਡੋਨੇਸ਼ੀਆਈ ਕ੍ਰੂ ਮੈਂਬਰ ਸਵਾਰ ਸਨ। ਸੈਲਾਨੀਆਂ ਦੇ ਦੇਸ਼ਾਂ ਦੇ ਦੂਤਘਰਾਂ ਵੱਲੋਂ ਇਸ ਮਾਮਲੇ ’ਤੇ ਤੁਰੰਤ ਕੋਈ ਟਿੱਪਣੀ ਨਹੀਂ ਕੀਤੀ ਗਈ ਹੈ।