Research Update ; ਬਿਨਾਂ ਸਪੱਸ਼ਟ ਕਾਰਨ ਵਜ਼ਨ ਘਟਣ ’ਤੇ ਬਲੱਡ ਟੈਸਟ ’ਚ ਤਬਦੀਲੀਆਂ ਨਾਲ ਹੋ ਸਕਦੀ ਹੈ ਕੈਂਸਰ ਦੀ ਪਛਾਣ

ਇਕ ਅਧਿਐਨ ਦੇ ਅਨੁਸਾਰ, ਜਿਨ੍ਹਾਂ ਮਰੀਜ਼ਾਂ ਦਾ ਵਜ਼ਨ ਬਿਨਾ ਕਿਸੇ ਸਪੱਸ਼ਟ ਕਾਰਨ ਦੇ ਘੱਟ ਰਿਹਾ ਹੈ, ਉਨ੍ਹਾਂ ਦੇ ਨਿਯਮਤ ਬਲੱਡ ਟੈਸਟ ਵਿਚ ਹੋਣ ਵਾਲੇ ਬਦਲਾਅ ਕੈਂਸਰ ਦੀ ਪੱਛਾਣ ਨਾਲ ਜੁੜੇ ਹੋ ਸਕਦੇ ਹਨ। ਇਹ ਭਾਲ ਪੀਐਲਓਐਸ ਮੈਡੀਸਨ ਮੈਗਜ਼ੀਨ ’ਚ ਪ੍ਰਕਾਸ਼ਿਤ ਹੋਈ ਹੈ। ਖੋਜਕਰਤਾਵਾਂ ਨੇ ਕਿਹਾ, 'ਬਲੱਡ ਟੈਸਟ ਵਿਚ ਪਾਈਆਂ ਗਈਆਂ ਅਸਾਮਾਨਤਾਵਾਂ ਦਾ ਵਿਸ਼ਲੇਸ਼ਣ ਉਮਰ ਤੇ ਲਿੰਗ ਮੁਤਾਬਕ ਸਹੀ ਕੀਤਾ ਜਾਣਾ ਚਾਹੀਦਾ ਹੈ, ਤਾਂ ਜੋ ਮੁੱਢਲਾ ਦੇਖਭਾਲ ਵਿਚ ਆਉਣ ਵਾਲੇ ਬਿਨਾ ਕਿਸੇ ਸਪੱਸ਼ਟ ਕਾਰਨ ਦੇ ਵਜ਼ਨ ਘਟਣ ਵਾਲੇ ਮਰੀਜ਼ਾਂ ਵਿਚ ਕੈਂਸਰ ਦੀ ਜਾਂਚ ਲਈ ਤਰਜੀਹਾਂ ਨਿਰਧਾਰਣ ਵਿਚ ਸੁਧਾਰ ਕੀਤਾ ਜਾ ਸਕੇ।"

ਬ੍ਰਿਟੇਨ ਦੀ ਆਕਸਫੋਰਡ ਯੂਨੀਵਰਸਿਟੀ ਦੇ ਖੋਜਕਰਤਾ ਬ੍ਰਾਇਨ ਨਿਕੋਲਸਨ ਨੇ ਕਿਹਾ, "ਅਸੀਂ ਪਾਇਆ ਹੈ ਕਿ ਮਰੀਜ਼ ਦੀ ਉਮਰ ਤੇ ਲਿੰਗ ਨੂੰ ਸ਼ਾਮਲ ਕਰ ਕੇ ਕੈਂਸਰ ਲਈ ਬਲੱਡ ਟੈਸਟ ਦੇ ਨਤੀਜਿਆਂ ਨੂੰ ਜ਼ਿਆਦਾ ਸਟੀਕ ਬਣਾਇਆ ਜਾ ਸਕਦਾ ਹੈ।" ਉਨ੍ਹਾਂ ਕਿਹਾ ਕਿ ਹਾਲਾਂਕਿ ਬਲੱਡ ਟੈਸਟ ਦੇ ਅਸਮਾਨ ਨਤੀਜੇ, ਜਿਵੇਂ ਕਿ ਹੀਮੋਗਲੋਬਿਨ ਦਾ ਘਟਣਾ ਜਾਂ ਪਲੇਟਲੈਟ ਗਿਣਤੀ ਦਾ ਵਧਣਾ, ਮਰੀਜ਼ ਵਿਚ ਕੈਂਸਰ ਦੇ ਖਤਰੇ ਬਾਰੇ ਸੰਕੇਤ ਦੇ ਸਕਦੇ ਹਨ, ਪਰ ਵਾਰ-ਵਾਰ ਟੈਸਟ ਕਰ ਕੇ ਰੁਝਾਨਾਂ ’ਤੇ ਨਜ਼ਰ ਰੱਖਣ ਨਾਲ ਕੁਝ ਮਾਮਲਿਆਂ ਵਿਚ ਹੋਰ ਜਾਣਕਾਰੀ ਮਿਲ ਸਕਦੀ ਹੈ। ਇਸ ਨਾਲ ਬਲੱਡ ਟੈਸਟ ਦੇ ਉਹ ਨਤੀਜੇ, ਜੋ ਆਮ ਲੱਗਦੇ ਹਨ, ਵਿਚ ਕੈਂਸਰ ਨਾਲ ਜੁੜੀਆਂ ਤਬਦੀਲੀਆਂ ਦੀ ਪੱਛਾਣ ਕੀਤੀ ਜਾ ਸਕਦੀ ਹੈ। ਬਿਨਾ ਕਿਸੇ ਸਾਫ਼ ਵਜ੍ਹਾ ਦੇ ਵਜ਼ਨ ਘਟਣ ਦੇ ਨਾਲ-ਨਾਲ ਬਲੱਡ ਟੈਸਟ ਵਿਚ ਅਸਮਾਨਤਾਵਾਂ ਅਤੇ ਰੁਝਾਨਾਂ ਦੇ ਪੈਟਰਨ ਦਾ ਅੰਦਾਜ਼ਾ ਕਰਨ ਨਾਲ ਕੈਂਸਰ ਦੇ ਖਤਰੇ ਦਾ ਬਿਹਤਰ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਅਤੇ ਬਿਮਾਰੀ ਦਾ ਜਲਦੀ ਪਤਾ ਲਗਾਉਣ ਵਿਚ ਮਦਦ ਮਿਲ ਸਕਦੀ ਹੈ। (ਪੀਟੀਆਈ)