ਨੇਪਾਲ ਦੇ PM ਬਾਲੇਨ ਸ਼ਾਹ ਦਾ ਯੂ-ਟਰਨ, ਭਾਰਤ-ਚੀਨ ਦੇ ਰਾਜਦੂਤਾਂ ਨਾਲ ਮਿਲਣ ਦਾ ਕੀਤਾ ਐਲਾਨ; ਤੋੜਿਆ ਆਪਣਾ ਹੀ ਬਣਾਇਆ ਨਿਯਮ

ਡਿਜੀਟਲ ਡੈਸਕ, ਕਾਠਮਾਂਡੂ: ਨੇਪਾਲ ਦੇ ਪ੍ਰਧਾਨ ਮੰਤਰੀ ਬਾਲੇਨ ਸ਼ਾਹ ਭਾਰਤ ਅਤੇ ਚੀਨ ਨਾਲ ਸਬੰਧਾਂ 'ਚ ਸੰਤੁਲਨ ਬਣਾਈ ਰੱਖਣ ਲਈ ਕਾਠਮਾਂਡੂ 'ਚ ਮੌਜੂਦ ਰਾਜਦੂਤਾਂ ਨਾਲ ਆਹਮੋ-ਸਾਹਮਣੇ ਦੀ ਬੈਠਕ ਨਾ ਕਰਨ ਦੇ ਆਪਣੇ ਹੀ ਬਣਾਏ ਨਿਯਮ ਨੂੰ ਤੋੜਨ ਜਾ ਰਹੇ ਹਨ।

ਪੀਐੱਮ ਸ਼ਾਹ ਇਸ ਹਫ਼ਤੇ ਭਾਰਤ ਅਤੇ ਚੀਨ ਦੇ ਰਾਜਦੂਤਾਂ ਨਾਲ ਵੱਖ-ਵੱਖ ਬੈਠਕ ਕਰਨ ਦੀ ਯੋਜਨਾ ਬਣਾ ਰਹੇ ਹਨ। ਦ ਕਾਠਮਾਂਡੂ ਪੋਸਟ ਨੇ ਸਰੋਤਾਂ ਦੇ ਹਵਾਲੇ ਤੋਂ ਦੱਸਿਆ ਹੈ ਕਿ ਇਹ ਦਿਖਾਉਣ ਲਈ ਕਿ ਨੇਪਾਲ ਨਵੀਂ ਦਿੱਲੀ ਅਤੇ ਬੀਜਿੰਗ ਨੂੰ ਬਰਾਬਰ ਮਹੱਤਵ ਦਿੰਦਾ ਹੈ, ਸ਼ਾਹ ਇੱਕੋ ਦਿਨ ਭਾਰਤੀ ਰਾਜਦੂਤ ਨਵੀਨ ਸ਼੍ਰੀਵਾਸਤਵ ਅਤੇ ਚੀਨੀ ਰਾਜਦੂਤ ਝਾਂਗ ਮਾਓਮਿੰਗ ਨਾਲ ਮੁਲਾਕਾਤ ਕਰਨਗੇ।

ਮੁਲਾਕਾਤ ਦੀ ਤਰੀਕ ਦਾ ਨਹੀਂ ਹੋਇਆ ਐਲਾਨ

ਹਾਲਾਂਕਿ ਅਜੇ ਤਕ ਸਹੀ ਤਰੀਕਾਂ ਦਾ ਐਲਾਨ ਨਹੀਂ ਹੋਇਆ ਹੈ ਪਰ ਨੇਪਾਲ 'ਚ ਸਰਕਾਰ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਜਲਦ ਹੀ ਇਸ ਦੀ ਪੁਸ਼ਟੀ ਹੋਣ ਦੀ ਸੰਭਾਵਨਾ ਹੈ। ਇਹ ਫੈਸਲਾ ਬਾਲੇਨ ਸ਼ਾਹ ਸਰਕਾਰ ਦੇ ਕਾਰਜਕਾਲ ਦੇ ਪਹਿਲੇ 100 ਦਿਨ ਪੂਰੇ ਹੋਣ ਦੇ ਇਕ ਮਹੀਨੇ ਤੋਂ ਜ਼ਿਆਦਾ ਸਮੇਂ ਬਾਅਦ ਲਿਆ ਗਿਆ ਹੈ।

ਬਾਲੇਨ ਸ਼ਾਹ ਨੇ ਕੀ ਨਿਯਮ ਬਣਾਇਆ ਸੀ?

ਜੈਨ-ਜੀ (Gen Z) ਦੇ ਵਿਰੋਧ-ਪ੍ਰਦਰਸ਼ਨ ਤੋਂ ਬਾਅਦ ਸੱਤਾ ਵਿੱਚ ਆਉਣ ਤੋਂ ਬਾਅਦ ਤੋਂ ਨੇਪਾਲ ਦੇ ਪ੍ਰਧਾਨ ਮੰਤਰੀ ਨੇ ਲੰਬੇ ਸਮੇਂ ਤੋਂ ਚੱਲੀ ਆ ਰਹੀ ਰਾਜਨਾਇਕ ਪਰੰਪਰਾ ਤੋਂ ਹਟ ਕੇ ਵਿਦੇਸ਼ੀ ਦੂਤਾਂ ਨਾਲ ਵੱਖ-ਵੱਖ ਮਿਲਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਸ ਦੀ ਬਜਾਏ ਉਨ੍ਹਾਂ ਨੇ ਕਾਠਮਾਂਡੂ 'ਚ ਤਾਇਨਾਤ ਰਾਜਦੂਤਾਂ ਨਾਲ ਦੋ ਵਾਰ ਸਾਂਝੀਆਂ ਕੂਟਨੀਤਕ ਬੈਠਕਾਂ ਕੀਤੀਆਂ ਹਨ।

ਕੂਟਨੀਤਕ ਪਰੰਪਰਾ ਇਹ ਰਹੀ ਹੈ ਕਿ ਹਰ ਨਵੇਂ ਚੁਣੇ ਗਏ ਪ੍ਰਧਾਨ ਮੰਤਰੀ ਪਦ ਸੰਭਾਲਣ ਦੇ ਕੁਝ ਹੀ ਦਿਨਾਂ ਦੇ ਅੰਦਰ ਪ੍ਰਧਾਨ ਮੰਤਰੀ ਦਫ਼ਤਰ ਜਾਂ ਆਪਣੇ ਸਰਕਾਰੀ ਨਿਵਾਸ 'ਤੇ ਵਿਦੇਸ਼ੀ ਰਾਜਦੂਤਾਂ ਨਾਲ ਵੱਖ-ਵੱਖ ਮੁਲਾਕਾਤ ਕਰਦੇ ਹਨ।

ਉਨ੍ਹਾਂ ਨੇ ਕੂਟਨੀਤਕ ਅਪਵਾਦ ਉਦੋਂ ਕੀਤਾ ਜਦੋਂ ਜੁਲਾਈ ਦੀ ਸ਼ੁਰੂਆਤ ਵਿੱਚ ਨੇਪਾਲ ਦੀ ਆਪਣੀ ਤਿੰਨ ਦਿਨਾਂ ਯਾਤਰਾ ਦੌਰਾਨ ਉਹ ਏਸ਼ੀਅਨ ਡਿਵੈਲਪਮੈਂਟ ਬੈਂਕ ਦੇ ਪ੍ਰੈਜ਼ੀਡੈਂਟ ਮਾਸਾਤੋ ਕਾਂਡਾ ਨਾਲ ਮਿਲੇ। ਕਾਠਮਾਂਡੂ ਦੀਆਂ ਮੀਡੀਆ ਰਿਪੋਰਟਾਂ ਅਨੁਸਾਰ, ਸ਼ਾਹ ਨੇ ਹਾਲ ਹੀ 'ਚ ਵਪਾਰੀਆਂ, ਠੇਕੇਦਾਰਾਂ, ਉਦਯੋਗਪਤੀਆਂ ਅਤੇ ਨਿਰਯਾਤਕਾਂ ਸਮੇਤ ਕਾਰੋਬਾਰੀ ਭਾਈਚਾਰੇ ਨਾਲ ਨਿਯਮਤ ਰੂਪ 'ਚ ਗੱਲਬਾਤ ਕਰਨਾ ਵੀ ਸ਼ੁਰੂ ਕਰ ਦਿੱਤਾ ਹੈ।