ਵੱਡਾ ਹਾਦਸਾ ਟਲਿਆ: ਚਲਦੇ ਜਹਾਜ਼ ਦਾ ਇੰਜਣ ਹੋਇਆ ਫ਼ੇਲ੍ਹ! ਪਾਇਲਟ ਨੇ ਹਾਈਵੇਅ 'ਤੇ ਕਰਵਾਈ ਸ਼ਾਨਦਾਰ ਐਮਰਜੈਂਸੀ ਲੈਂਡਿੰਗ

ਡਿਜੀਟਲ ਡੈਸਕ, ਫਲੋਰੀਡਾ: ਫਲੋਰੀਡਾ ਦੇ ਸੇਬ੍ਰਿੰਗ ਨੇੜੇ ਸ਼ਨੀਵਾਰ ਸਵੇਰੇ ਇੱਕ ਸੈਸਨਾ 172 (Cessna 172) ਜਹਾਜ਼ ਦੀ ਐਮਰਜੈਂਸੀ ਲੈਂਡਿੰਗ ਹੋਈ। ਉਡਾਣ ਦੌਰਾਨ ਪਾਇਲਟ ਨੂੰ ਇੰਜਣ 'ਚ ਖ਼ਰਾਬੀ ਦਾ ਸਾਹਮਣਾ ਕਰਨਾ ਪਿਆ ਸੀ। ਜਦੋਂ ਜਹਾਜ਼ ਸੜਕ 'ਤੇ ਉਤਰਿਆ ਤਾਂ ਉਸ ਵਿੱਚ ਤਿੰਨ ਲੋਕ ਸਵਾਰ ਸਨ। ਫਿਲਹਾਲ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖ਼ਬਰ ਨਹੀਂ ਹੈ।

ਇਹ ਜਹਾਜ਼ ਫੋਰਟ ਮਾਇਰਸ ਤੋਂ ਸੇਬ੍ਰਿੰਗ ਜਾ ਰਿਹਾ ਸੀ, ਉਦੋਂ ਹੀ ਇਸ ਦੇ ਇੰਜਣ 'ਚ ਖ਼ਰਾਬੀ ਆ ਗਈ। ਇਹ ਮਹਿਸੂਸ ਕਰਦਿਆਂ ਕਿ ਏਅਰਪੋਰਟ ਤੱਕ ਪਹੁੰਚਣਾ ਸੰਭਵ ਨਹੀਂ ਹੈ, ਪਾਇਲਟ ਨੇ ਹਾਈਵੇਅ 'ਤੇ ਹੀ ਜਹਾਜ਼ ਉਤਾਰਨ ਦਾ ਫ਼ੈਸਲਾ ਕੀਤਾ।

ਕਿਉਂ ਖ਼ਾਸ ਸੀ ਇਹ ਲੈਂਡਿੰਗ?

ਇਸ ਲੈਂਡਿੰਗ ਲਈ ਬਹੁਤ ਜ਼ਿਆਦਾ ਮਹਾਰਤ ਦੀ ਲੋੜ ਸੀ। ਪਾਇਲਟ ਨੇ ਜਹਾਜ਼ ਨੂੰ ਰੇਲਵੇ ਕਰਾਸਿੰਗ ਦੇ ਬੈਰੀਅਰ ਦੇ ਉੱਪਰੋਂ ਅਤੇ ਬਿਜਲੀ ਦੀਆਂ ਤਾਰਾਂ ਦੇ ਹੇਠਾਂ ਤੋਂ ਲੰਘਾਉਂਦੇ ਹੋਏ ਸੁਰੱਖਿਅਤ ਰੂਪ ਨਾਲ ਹੇਵੁੱਡ ਟੇਲਰ ਬੁਲੇਵਾਰਡ ਨੇੜੇ ਸੜਕ 'ਤੇ ਉਤਾਰਿਆ।

ਜਦੋਂ ਸਿੰਗਲ-ਇੰਜਣ ਵਾਲੇ ਜਹਾਜ਼ ਦਾ ਇੰਜਣ ਖ਼ਰਾਬ ਹੋ ਜਾਂਦਾ ਹੈ, ਤਾਂ ਪਾਇਲਟ ਕੋਲ ਸੀਮਤ ਆਪਸ਼ਨ ਹੁੰਦੇ ਹਨ ਅਤੇ ਉਸ ਨੂੰ ਲੈਂਡਿੰਗ ਲਈ ਤੁਰੰਤ ਇੱਕ ਸਹੀ ਜਗ੍ਹਾ ਚੁਣਨੀ ਪੈਂਦੀ ਹੈ। ਹਾਈਵੇਅ 'ਤੇ ਲੈਂਡਿੰਗ ਕਰਨਾ ਭਾਵੇਂ ਨਾਟਕੀ ਲੱਗੇ, ਪਰ ਆਸ-ਪਾਸ ਦੇ ਇਲਾਕੇ ਦੀ ਤੁਲਨਾ 'ਚ ਉੱਥੇ ਕਾਫ਼ੀ ਲੰਮੀ ਅਤੇ ਸਮਤਲ ਜਗ੍ਹਾ ਮਿਲ ਸਕਦੀ ਹੈ। ਇਹ ਘਟਨਾ ਦਰਸਾਉਂਦੀ ਹੈ ਕਿ ਪਾਇਲਟ ਦੀ ਸਿਖਲਾਈ ਅਤੇ ਸਮਝਦਾਰੀ ਨਾਲ ਕਿਸੇ ਵੀ ਤਕਨੀਕੀ ਐਮਰਜੈਂਸੀ ਨੂੰ ਸਫ਼ਲਤਾਪੂਰਵਕ ਸੰਭਾਲਿਆ ਜਾ ਸਕਦਾ ਹੈ।

ਪਾਇਲਟ ਦੀ ਹੋ ਰਹੀ ਤਾਰੀਫ਼

ਹਾਈਲੈਂਡਜ਼ ਕਾਉਂਟੀ ਸ਼ੈਰਿਫ਼ ਦਫ਼ਤਰ ਨੇ ਸੁਰੱਖਿਅਤ ਲੈਂਡਿੰਗ ਲਈ ਪਾਇਲਟ ਦੀ ਤਾਰੀਫ਼ ਕੀਤੀ। ਬਾਅਦ ਵਿੱਚ ਪਲੇਨ ਨੂੰ ਸੜਕ ਤੋਂ ਹਟਾ ਦਿੱਤਾ ਗਿਆ ਅਤੇ ਟ੍ਰੈਫਿਕ ਆਮ ਵਾਂਗ ਚੱਲ ਪਿਆ। ਏਵੀਏਸ਼ਨ ਸੇਫ਼ਟੀ ਨਾਲ ਜੁੜੇ ਸਰੋਤਾਂ ਅਨੁਸਾਰ, ਦੁਨੀਆ ਵਿੱਚ ਸਭ ਤੋਂ ਜ਼ਿਆਦਾ ਵਰਤੇ ਜਾਣ ਵਾਲੇ ਟ੍ਰੇਨਿੰਗ ਏਅਰਕ੍ਰਾਫ਼ਟਾਂ ਵਿੱਚੋਂ ਇੱਕ ਸੈਸਨਾ 172 ਵਿੱਚ ਇੰਜਣ ਫ਼ੇਲ੍ਹ ਹੋਣ ਦੀਆਂ ਘਟਨਾਵਾਂ ਅਕਸਰ ਈਂਧਨ ਦੀਆਂ ਸਮੱਸਿਆਵਾਂ, ਖ਼ਰਾਬ ਦੇਖਭਾਲ ਜਾਂ ਚਿਤਾਵਨੀ ਦੇ ਸੰਕੇਤਾਂ ਨੂੰ ਨਜ਼ਰਅੰਦਾਜ਼ ਕਰਨ ਕਾਰਨ ਹੁੰਦੀਆਂ ਹਨ।

ਇਸ ਮਾਮਲੇ ਵਿੱਚ ਪਾਇਲਟ ਨੂੰ ਇੰਜਣ 'ਚ ਆ ਰਹੀ ਖ਼ਰਾਬੀ ਦਾ ਪਤਾ ਚੱਲ ਗਿਆ ਸੀ, ਜਿਸ ਨਾਲ ਉਹ ਜਹਾਜ਼ ਦੇ ਬੇਕਾਬੂ ਹੋ ਕੇ ਹੇਠਾਂ ਡਿੱਗਣ ਦੀ ਬਜਾਏ ਸਥਿਤੀ ਨੂੰ ਕੰਟਰੋਲ ਕਰਦੇ ਹੋਏ ਕਦਮ ਚੁੱਕ ਸਕਿਆ।