ਮੌਤ ਦਾ ਤਾਂਡਵ! ਬੱਸ ਤੇ ਟਰੱਕ ਦੀ ਟੱਕਰ ਨੇ ਲਈਆਂ 22 ਜਾਨਾਂ, ਤਿੰਨ ਹਫ਼ਤੇ ਪਹਿਲਾਂ ਵੀ ਇਸੇ ਹਾਈਵੇਅ 'ਤੇ ਹੋਈਆਂ ਸੀ 17 ਮੌਤਾਂ

ਡਿਜੀਟਲ ਡੈਸਕ, ਨੈਰੋਬੀ : ਕੀਨੀਆ ਦੇ ਮੁੱਖ ਹਾਈਵੇਅ 'ਤੇ ਐਤਵਾਰ ਸਵੇਰੇ ਇਕ ਯਾਤਰੀ ਬੱਸ ਅਤੇ ਟਰੱਕ ਵਿਚਾਲੇ ਹੋਈ ਭਿਆਨਕ ਟੱਕਰ 'ਚ ਘੱਟੋ-ਘੱਟ 22 ਲੋਕਾਂ ਦੀ ਮੌਤ ਹੋ ਗਈ। ਸਥਾਨਕ ਪੁਲਿਸ ਮੁਤਾਬਕ, ਇਸ ਦਰਦਨਾਕ ਹਾਦਸੇ 'ਚ ਕਈ ਹੋਰ ਲੋਕ ਗੰਭੀਰ ਜ਼ਖ਼ਮੀ ਹੋਏ ਹਨ, ਜਿਨ੍ਹਾਂ ਨੂੰ ਨੇੜਲੇ ਹਸਪਤਾਲਾਂ 'ਚ ਦਾਖ਼ਲ ਕਰਵਾਇਆ ਗਿਆ ਹੈ।

ਮਾਕੁਏਨੀ ਕਾਊਂਟੀ ਦੇ ਕਮਿਸ਼ਨਰ ਅਬਦੁੱਲਾਹੀ ਖਲੀਫ ਨੇ ਖ਼ਦਸ਼ਾ ਜਤਾਇਆ ਹੈ ਕਿ ਮ੍ਰਿਤਕਾਂ ਦੀ ਗਿਣਤੀ ਅਜੇ ਹੋਰ ਵਧ ਸਕਦੀ ਹੈ। ਰਿਪੋਰਟਾਂ ਮੁਤਾਬਕ, ਬੱਸ 'ਚ ਸਵਾਰ ਯਾਤਰੀ ਇਕ ਅੰਤਿਮ ਸੰਸਕਾਰ ਸਮਾਗਮ ਤੋਂ ਵਾਪਸ ਪਰਤ ਰਹੇ ਸਨ, ਜਦੋਂ ਇਹ ਹਾਦਸਾ ਵਾਪਰਿਆ।

ਰਾਜਧਾਨੀ ਨੈਰੋਬੀ ਨੂੰ ਤੱਟਵਰਤੀ ਸ਼ਹਿਰ ਮੋਮਬਾਸਾ ਨਾਲ ਜੋੜਨ ਵਾਲੇ ਇਸ ਪ੍ਰਮੁੱਖ ਹਾਈਵੇਅ 'ਤੇ ਹੋਏ ਹਾਦਸੇ ਦੇ ਸਹੀ ਕਾਰਨਾਂ ਦਾ ਅਜੇ ਪੂਰੀ ਤਰ੍ਹਾਂ ਪਤਾ ਨਹੀਂ ਲੱਗ ਸਕਿਆ ਹੈ। ਹਾਲਾਂਕਿ, ਕੀਨੀਆ 'ਚ ਤੇਜ਼ ਰਫ਼ਤਾਰ ਅਤੇ ਸੜਕਾਂ ਦੀ ਮਾੜੀ ਹਾਲਤ ਨੂੰ ਅਕਸਰ ਅਜਿਹੇ ਵੱਡੇ ਹਾਦਸਿਆਂ ਦਾ ਮੁੱਖ ਕਾਰਨ ਮੰਨਿਆ ਜਾਂਦਾ ਹੈ।

ਤਿੰਨ ਹਫ਼ਤੇ ਪਹਿਲਾਂ ਵੀ ਇਸੇ ਹਾਈਵੇਅ 'ਤੇ ਗਈਆਂ ਸਨ 17 ਜਾਨਾਂ

ਇਹ ਹਾਦਸਾ ਉਸੇ ਹਾਈਵੇਅ 'ਤੇ ਵਾਪਰਿਆ ਹੈ, ਜਿੱਥੇ ਮਹਿਜ਼ ਤਿੰਨ ਹਫ਼ਤੇ ਪਹਿਲਾਂ ਇਕ ਹੋਰ ਹਾਦਸੇ 'ਚ 17 ਲੋਕਾਂ ਦੀ ਜਾਨ ਚਲੀ ਗਈ ਸੀ। ਕੀਨੀਆ ਦੇ ਰਾਸ਼ਟਰੀ ਆਵਾਜਾਈ ਅਤੇ ਸੁਰੱਖਿਆ ਅਥਾਰਟੀ ਨੇ ਦੱਸਿਆ ਕਿ ਹਾਈਵੇਅ ਦਾ ਇਹ ਹਿੱਸਾ ਪਹਿਲਾਂ ਹੀ ਹਾਦਸਿਆਂ ਦੇ ਖ਼ਤਰਨਾਕ ਸਥਾਨ ਵਜੋਂ ਚਿੰਨ੍ਹਿਤ ਹੈ। ਇੱਥੇ ਸੁਰੱਖਿਆ ਪ੍ਰਬੰਧਾਂ 'ਚ ਸੁਧਾਰ ਲਈ ਪਹਿਲਾਂ ਵੀ ਕਈ ਸਿਫ਼ਾਰਸ਼ਾਂ ਕੀਤੀਆਂ ਜਾ ਚੁੱਕੀਆਂ ਸਨ।