17 ਮੁਟਿਆਰਾਂ, ਵੱਡੇ ਕਾਰੋਬਾਰੀਆਂ ਨਾਲ ਸਬੰਧ ਤੇ ਖ਼ੁਦ ਨੂੰ ਬਚਾਉਣ ਦੀ ਆਖ਼ਰੀ ਕੋਸ਼ਿਸ਼...ਐਪਸਟੀਨ ਦੇ ਰੂਸ ਕਨੈਕਸ਼ਨ ਦਾ ਖੁਲਾਸਾ
ਰੂਸ ਅਤੇ ਸਾਬਕਾ ਸੋਵੀਅਤ ਦੇਸ਼ਾਂ ਦੀਆਂ ਘੱਟੋ-ਘੱਟ 17 ਔਰਤਾਂ ਨੂੰ ਇਸ ਸੈਕਸ-ਟ੍ਰੈਫਿਕਿੰਗ ਨੈੱਟਵਰਕ 'ਚ ਸ਼ਾਮਲ ਕੀਤਾ ਗਿਆ ਸੀ। ਐਪਸਟੀਨ ਦੇ ਰੂਸੀ ਸੰਪਰਕਾਂ ਬਾਰੇ ਜਾਣਕਾਰੀ ਰੱਖਣ ਵਾਲੇ ਦੋ ਦਰਜਨ ਤੋਂ ਵੱਧ ਲੋਕਾਂ ਦੇ ਇੰਟਰਵਿਊ ਅਤੇ ਸੈਂਕੜੇ ਪੰਨਿਆਂ ਦੇ ਦਸਤਾਵੇਜ਼ਾਂ ਦੀ ਸਮੀਖਿਆ ਦੇ ਆਧਾਰ 'ਤੇ ਸਮਾਚਾਰ ਏਜੰਸੀ ਰਾਇਟਰਜ਼ ਨੇ ਇਹ ਜਾਣਕਾਰੀ ਸਾਹਮਣੇ ਰੱਖੀ ਹੈ।
Publish Date: Sun, 22 Nov 2026 01:44 PM (IST)
Updated Date: Sun, 22 Nov 2026 01:46 PM (IST)
ਡਿਜੀਟਲ ਡੈਸਕ, ਵਾਸ਼ਿੰਗਟਨ : ਅਮਰੀਕਾ ਹੀ ਨਹੀਂ, ਸਗੋਂ ਦੁਨੀਆ ਦੇ ਕਈ ਦੇਸ਼ਾਂ ਦੀ ਸਿਆਸਤ ਨੂੰ ਹਿਲਾ ਕੇ ਰੱਖਣ ਵਾਲੇ ਜਿਨਸੀ ਅਪਰਾਧੀ ਜੈਫਰੀ ਐਪਸਟੀਨ ਬਾਰੇ ਇੱਕ ਤੋਂ ਵਧ ਕੇ ਇੱਕ ਖੁਲਾਸੇ ਹੋ ਰਹੇ ਹਨ। ਤਾਜ਼ਾ ਖੁਲਾਸੇ 'ਚ ਇਸ ਜਿਨਸੀ ਅਪਰਾਧੀ ਬਾਰੇ ਇੱਕ ਹੋਰ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਉਸ ਨੇ ਆਪਣੀ ਛਵੀ ਸੁਧਾਰਨ ਦੀ ਕੋਸ਼ਿਸ਼ 'ਚ ਰੂਸ ਦੀਆਂ ਕਈ ਔਰਤਾਂ ਨੂੰ ਆਪਣੇ ਜਾਲ 'ਚ ਫਸਾਇਆ ਸੀ।
ਕਈ ਔਰਤਾਂ ਨੂੰ ਜਾਲ 'ਚ ਫਸਾਇਆ
ਇੱਕ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਜਿਨਸੀ ਅਪਰਾਧ ਦੇ ਦੋਸ਼ੀ ਜੈਫਰੀ ਐਪਸਟੀਨ ਨੇ 2008 'ਚ ਦੋਸ਼ੀ ਠਹਿਰਾਏ ਜਾਣ ਤੋਂ ਬਾਅਦ, ਦੁਨੀਆ ਦੇ ਕੁਲੀਨ ਲੋਕਾਂ (Elite) ਵਿਚਾਲੇ ਆਪਣੀ ਸਾਖ ਮੁੜ ਬਣਾਉਣ ਦੀ ਕੋਸ਼ਿਸ਼ 'ਚ ਰੂਸ ਅਤੇ ਸਾਬਕਾ ਸੋਵੀਅਤ ਦੇਸ਼ਾਂ ਦੀਆਂ ਔਰਤਾਂ ਨੂੰ ਆਪਣੇ ਜਾਲ 'ਚ ਫਸਾਉਣਾ ਜਾਰੀ ਰੱਖਿਆ। ਇਸ ਦੌਰਾਨ ਉਸ ਨੇ ਦੇਸ਼ ਦੇ ਅਮੀਰ ਕਾਰੋਬਾਰੀਆਂ ਅਤੇ ਸੀਨੀਅਰ ਅਧਿਕਾਰੀਆਂ ਨਾਲ ਵੀ ਆਪਣੇ ਸਬੰਧ ਬਣਾਈ ਰੱਖੇ।
17 ਔਰਤਾਂ ਨੂੰ ਬਣਾਇਆ ਨਿਸ਼ਾਨਾ
ਰੂਸ ਅਤੇ ਸਾਬਕਾ ਸੋਵੀਅਤ ਦੇਸ਼ਾਂ ਦੀਆਂ ਘੱਟੋ-ਘੱਟ 17 ਔਰਤਾਂ ਨੂੰ ਇਸ ਸੈਕਸ-ਟ੍ਰੈਫਿਕਿੰਗ ਨੈੱਟਵਰਕ 'ਚ ਸ਼ਾਮਲ ਕੀਤਾ ਗਿਆ ਸੀ। ਐਪਸਟੀਨ ਦੇ ਰੂਸੀ ਸੰਪਰਕਾਂ ਬਾਰੇ ਜਾਣਕਾਰੀ ਰੱਖਣ ਵਾਲੇ ਦੋ ਦਰਜਨ ਤੋਂ ਵੱਧ ਲੋਕਾਂ ਦੇ ਇੰਟਰਵਿਊ ਅਤੇ ਸੈਂਕੜੇ ਪੰਨਿਆਂ ਦੇ ਦਸਤਾਵੇਜ਼ਾਂ ਦੀ ਸਮੀਖਿਆ ਦੇ ਆਧਾਰ 'ਤੇ ਸਮਾਚਾਰ ਏਜੰਸੀ ਰਾਇਟਰਜ਼ ਨੇ ਇਹ ਜਾਣਕਾਰੀ ਸਾਹਮਣੇ ਰੱਖੀ ਹੈ।
ਪ੍ਰਭਾਵਸ਼ਾਲੀ ਲੋਕਾਂ ਵਿਚਾਲੇ ਬਣਾਈ ਪਹੁੰਚ
ਸਮਾਚਾਰ ਏਜੰਸੀ ਨੇ ਪਾਇਆ ਕਿ ਰੂਸ ਨਾ ਸਿਰਫ਼ ਉਸ ਦੇ ਸੈਕਸ-ਟ੍ਰੈਫਿਕਿੰਗ ਨੈੱਟਵਰਕ ਲਈ ਔਰਤਾਂ ਦਾ ਸਰੋਤ ਸੀ, ਸਗੋਂ ਪ੍ਰਭਾਵਸ਼ਾਲੀ ਲੋਕਾਂ ਵਿਚਾਲੇ ਮੁੜ ਆਪਣੀ ਪਹੁੰਚ ਬਣਾਉਣ ਦਾ ਇੱਕ ਸੰਭਾਵੀ ਜ਼ਰੀਆ ਵੀ ਸੀ।
ਜਾਂਚ 'ਚ ਸਾਹਮਣੇ ਆਈਆਂ ਇਨ੍ਹਾਂ 17 ਔਰਤਾਂ 'ਚੋਂ ਤਿੰਨ ਨੇ ਬਾਅਦ 'ਚ ਉਸ ਵੱਲੋਂ ਕੀਤੇ ਗਏ ਦੁਰਵਿਵਹਾਰ ਅਤੇ ਸ਼ੋਸ਼ਣ ਖ਼ਿਲਾਫ਼ ਇਨਸਾਫ਼ ਦੀ ਮੰਗ ਕੀਤੀ।
ਮਾਡਲਿੰਗ ਇੰਡਸਟਰੀ ਤੋਂ ਸ਼ੁਰੂ ਹੋਈ ਦਿਲਚਸਪੀ
ਰੂਸ 'ਚ ਐਪਸਟੀਨ ਦੀ ਦਿਲਚਸਪੀ ਉੱਥੇ ਦੇ ਮਾਡਲਿੰਗ ਉਦਯੋਗ ਤੋਂ ਸ਼ੁਰੂ ਹੋਈ ਸੀ। 1991 'ਚ ਸੋਵੀਅਤ ਸੰਘ ਦੇ ਟੁੱਟਣ ਤੋਂ ਬਾਅਦ ਦੇ ਸਾਲਾਂ 'ਚ ਮਾਡਲਿੰਗ ਸਕਾਊਟ ਨਵੇਂ ਟੈਲੇਂਟ ਦੀ ਭਾਲ 'ਚ ਪੂਰੇ ਇਲਾਕੇ 'ਚ ਘੁੰਮਦੇ ਰਹੇ। ਰਾਇਟਰਜ਼ ਵੱਲੋਂ ਇੰਟਰਵਿਊ ਕੀਤੇ ਗਏ ਲੋਕਾਂ ਮੁਤਾਬਕ, ਐਪਸਟੀਨ ਨਾਲ ਕੰਮ ਕਰਨ ਵਾਲੇ ਫਰਾਂਸੀਸੀ ਸਕਾਊਟ ਜੀਨ-ਲਿਊਕ ਬਰੂਨੇਲ ਨੇ ਪੂਰਬੀ ਯੂਰਪ ਤੋਂ ਔਰਤਾਂ ਦੀ ਚੋਣ ਕੀਤੀ ਅਤੇ ਉਨ੍ਹਾਂ ਨੂੰ ਪੈਰਿਸ ਤੇ ਅਮਰੀਕਾ ਲੈ ਆਏ।
ਸਾਬਕਾ ਮਾਡਲ ਥੇਸੀਆ ਹੁਇਸਮੈਨ ਨੇ ਦੱਸਿਆ ਕਿ ਸਤੰਬਰ 1991 'ਚ ਪੈਰਿਸ ਵਿਖੇ ਬਰੂਨੇਲ ਵੱਲੋਂ ਆਯੋਜਿਤ ਇੱਕ ਪਾਰਟੀ 'ਚ ਉਸ ਦੀ ਮੁਲਾਕਾਤ ਐਪਸਟੀਨ ਨਾਲ ਹੋਈ ਸੀ। ਦੱਸਣਯੋਗ ਹੈ ਕਿ 2019 'ਚ ਮੈਨਹਟਨ ਦੀ ਇੱਕ ਜੇਲ੍ਹ 'ਚ ਐਪਸਟੀਨ ਦੀ ਮੌਤ ਹੋ ਗਈ ਸੀ। ਉਸ ਸਮੇਂ ਉਸ 'ਤੇ ਨਾਬਾਲਗਾਂ ਨਾਲ ਜੁੜੇ ਸੈਕਸ-ਟ੍ਰੈਫਿਕਿੰਗ ਦੇ ਸੰਘੀ ਦੋਸ਼ ਸਨ।
ਹਾਲਾਂਕਿ, ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਰੂਸ 'ਚ ਆਪਣਾ ਪ੍ਰਭਾਵ ਵਧਾਉਣ ਦੀਆਂ ਕੋਸ਼ਿਸ਼ਾਂ ਨਾਲ ਕੋਈ ਵੱਡਾ ਕਾਰੋਬਾਰੀ ਸਮਝੌਤਾ ਨਹੀਂ ਹੋਇਆ ਅਤੇ ਨਾ ਹੀ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਤੱਕ ਉਸ ਦੀ ਕੋਈ ਸਪੱਸ਼ਟ ਪਹੁੰਚ ਬਣ ਸਕੀ।