ਓਮਾਨ 'ਚ ਭਾਰਤੀ ਔਰਤ 'ਤੇ ਜ਼ੁਲਮ: ਨੌਕਰੀ ਦੇ ਬਹਾਨੇ ਬਣਾਇਆ ਬੰਧਕ, 15-15 ਘੰਟੇ ਕੰਮ ਕਰਵਾ ਕੇ ਤਨਖਾਹ ਤੇ ਰੋਟੀ ਤੋਂ ਰੱਖਿਆ ਵਾਂਝਾ

ਡਿਜੀਟਲ ਡੈਸਕ, ਹੈਦਰਾਬਾਦ। ਭਾਰਤੀ ਮਹਿਲਾ ਸ਼ਬਨਮ ਬੇਗਮ ਓਮਾਨ ਦੇ ਮਸਕਟ ਵਿੱਚ ਘਰੇਲੂ ਨੌਕਰਾਨੀ ਵਜੋਂ ਕੰਮ ਕਰਨ ਗਈ ਸੀ, ਪਰ ਉੱਥੇ ਉਸ ਨੂੰ ਨੌਕਰੀ ਦਾ ਝਾਂਸਾ ਦੇ ਕੇ ਗੰਭੀਰ ਜ਼ੁਲਮ ਦਾ ਸ਼ਿਕਾਰ ਬਣਾਇਆ ਗਿਆ।

ਸ਼ਬਨਮ ਦਾ ਦੋਸ਼ ਹੈ ਕਿ ਉਸ ਨੂੰ ਉੱਥੇ ਰੋਜ਼ਾਨਾ ਘੱਟੋ-ਘੱਟ 15 ਘੰਟੇ ਕੰਮ ਕਰਨ ਲਈ ਮਜਬੂਰ ਕੀਤਾ ਗਿਆ, ਕੁੱਟਿਆ ਗਿਆ ਅਤੇ ਤਿੰਨ ਮਹੀਨਿਆਂ ਤੋਂ ਵੱਧ ਸਮੇਂ ਤੱਕ ਤਨਖਾਹ ਅਤੇ ਭੋਜਨ ਤੋਂ ਵਾਂਝਾ ਰੱਖਿਆ ਗਿਆ।

ਸ਼ਬਨਮ ਤੇਲੰਗਾਨਾ ਦੇ ਹੈਦਰਾਬਾਦ ਦੀ ਰਹਿਣ ਵਾਲੀ ਹੈ। ਉਸਨੇ ਹੈਦਰਾਬਾਦ ਦੇ ਸਿਆਸਤਦਾਨ ਅਤੇ 'ਮਜਲਿਸ ਬਚਾਓ ਤਹਿਰੀਕ' ਦੇ ਆਗੂ ਅਮਜਦ ਉੱਲਾ ਖਾਨ ਨੂੰ ਭੇਜੀ ਇੱਕ ਭਾਵੁਕ ਵੀਡੀਓ ਵਿੱਚ ਕਹਾ, "ਮੈਨੂੰ ਡੇਢ ਮਹੀਨੇ ਤੱਕ ਮੋਬਾਈਲ ਫੋਨ ਵੀ ਨਹੀਂ ਦਿੱਤਾ ਗਿਆ, ਅਤੇ ਤਿੰਨ ਮਹੀਨਿਆਂ ਤੋਂ ਬਿਨਾਂ ਤਨਖਾਹ ਦਿੱਤੇ ਕੰਮ ਕਰਵਾ ਰਹੇ ਹਨ।"

26 ਮਾਰਚ ਨੂੰ ਗਈ ਸੀ ਓਮਾਨ

ਸ਼ਬਨਮ ਬੇਗਮ ਨੇ ਸਿਆਸਤਦਾਨ ਨੂੰ ਭੇਜੀ ਆਪਣੀ ਰਿਕਾਰਡ ਕੀਤੀ ਵੀਡੀਓ ਵਿੱਚ ਦੱਸਿਆ ਕਿ ਇੱਕ ਸਥਾਨਕ ਭਰਤੀ ਏਜੰਟ ਵੱਲੋਂ ਘਰੇਲੂ ਨੌਕਰਾਨੀ ਦੀ ਨੌਕਰੀ ਦਿਵਾਉਣ ਦੇ ਵਾਅਦੇ ਤੋਂ ਬਾਅਦ ਉਹ 26 ਮਾਰਚ ਨੂੰ ਓਮਾਨ ਗਈ ਸੀ। ਇੱਥੇ ਉਸ ਨੂੰ ਤਸੀਹੇ ਦਿੱਤੇ ਗਏ, ਕੁੱਟਿਆ ਗਿਆ ਅਤੇ ਸਹੀ ਤਰੀਕੇ ਨਾਲ ਖਾਣਾ ਦਿੱਤੇ ਬਿਨਾਂ ਰੱਖਿਆ ਗਿਆ।

ਇਸ ਮਾਮਲੇ ਸਬੰਧੀ ਆਗੂ ਅਮਜਦ ਉੱਲਾ ਨੇ ਦੱਸਿਆ ਕਿ ਸ਼ਬਨਮ ਨੂੰ ਮਸਕਟ ਵਿੱਚ ਘਰੇਲੂ ਨੌਕਰਾਨੀ ਵਜੋਂ ਕੰਮ ਕਰਨ ਲਈ ਲਾਲਚ ਦਿੱਤਾ ਗਿਆ ਸੀ, ਜਿੱਥੇ ਉਸ ਨੂੰ ਪ੍ਰਤੀ ਮਹੀਨਾ 200 ਓਮਾਨੀ ਰਿਆਲ (ਲਗਭਗ 50,000 ਰੁਪਏ) ਤਨਖਾਹ ਮਿਲਣੀ ਸੀ। ਉਨ੍ਹਾਂ ਨੇ ਸ਼ਬਨਮ ਨੂੰ ਸੁਰੱਖਿਅਤ ਵਾਪਸ ਲਿਆਉਣ ਦੇ ਨਾਲ-ਨਾਲ ਇਹ ਵੀ ਮੰਗ ਕੀਤੀ ਕਿ ਝੂਠੇ ਵਾਅਦਿਆਂ ਤਹਿਤ ਉਸ ਨੂੰ ਭੇਜਣ ਵਾਲੇ ਜ਼ਿੰਮੇਵਾਰ ਭਰਤੀ ਏਜੰਟ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ।

ਭਾਰਤੀ ਦੂਤਾਵਾਸ ਨੇ ਸ਼ੁਰੂ ਕੀਤੀ ਕਾਰਵਾਈ

ਇਸ ਬੁਰੇ ਸਲੂਕ ਨੂੰ ਬਰਦਾਸ਼ਤ ਨਾ ਕਰਦੇ ਹੋਏ ਸ਼ਬਨਮ ਕਿਸੇ ਤਰ੍ਹਾਂ ਮਾਲਕ ਦੇ ਚੁੰਗਲ ਵਿੱਚੋਂ ਭੱਜ ਕੇ ਮਸਕਟ ਸਥਿਤ ਭਾਰਤੀ ਦੂਤਾਵਾਸ ਪਹੁੰਚੀ। ਮਹਿਲਾ ਨੇ ਦੱਸਿਆ ਕਿ ਉਸ ਦਾ ਪਾਸਪੋਰਟ ਏਜੰਟ ਲੈ ਗਿਆ ਹੈ। ਜਿਸ ਤੋਂ ਬਾਅਦ ਦੂਤਾਵਾਸ ਨੇ ਮਾਮਲੇ ਦਾ ਨੋਟਿਸ ਲੈਂਦਿਆਂ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਸ਼ਬਨਮ ਦੇ ਪਰਿਵਾਰ ਨੇ ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਨੂੰ ਅਪੀਲ ਕੀਤੀ ਹੈ ਕਿ ਉਹ ਮਸਕਟ ਸਥਿਤ ਭਾਰਤੀ ਦੂਤਾਵਾਸ ਨੂੰ ਉਸਦੀ ਸੁਰੱਖਿਆ ਯਕੀਨੀ ਬਣਾਉਣ ਅਤੇ ਉਸ ਨੂੰ ਤੁਰੰਤ ਹੈਦਰਾਬਾਦ ਵਾਪਸ ਲਿਆਉਣ ਦੇ ਪ੍ਰਬੰਧ ਕਰਨ ਦੇ ਨਿਰਦੇਸ਼ ਦੇਣ। ਇਸ ਤੋਂ ਬਾਅਦ ਦੂਤਾਵਾਸ ਨੇ ਉਨ੍ਹਾਂ ਦੀ ਸੋਸ਼ਲ ਮੀਡੀਆ ਪੋਸਟ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਉਸ ਨੇ ਇਸ ਮਾਮਲੇ ਦਾ ਨੋਟਿਸ ਲੈ ਲਿਆ ਹੈ।