ਦੱਖਣੀ ਕੋਰੀਆ ਦੇ ਸਾਬਕਾ ਰਾਸ਼ਟਰਪਤੀ ਯੂਨ ਨੂੰ ਡਰੋਨ ਮਾਮਲੇ ਵਿੱਚ 30 ਸਾਲ ਦੀ ਸਜ਼ਾ, ਪਿਓਂਗਯਾਂਗ ਦੇ ਉੱਪਰ ਡਰੋਨ ਉਡਾਉਣ ਦਾ ਦਿੱਤਾ ਸੀ ਹੁਕਮ

ਸਿਓਲ ਸੈਂਟਰਲ ਡਿਸਟ੍ਰਿਕਟ ਕੋਰਟ ਨੇ ਯੂਨ ਨੂੰ ਦੁਸ਼ਮਣ ਦੀ ਮਦਦ ਕਰਨ ਅਤੇ ਸੱਤਾ ਦੀ ਦੁਰਵਰਤੋਂ ਕਰਨ ਦਾ ਦੋਸ਼ੀ ਪਾਇਆ। ਅਦਾਲਤ ਨੇ ਕਿਹਾ ਕਿ ਉਨ੍ਹਾਂ ਨੇ ਅਕਤੂਬਰ 2024 ਵਿੱਚ ਪਿਓਂਗਯਾਂਗ ਵਿੱਚ ਡਰੋਨ ਭੇਜਣ ਦੀ ਸਾਜ਼ਿਸ਼ ਸ਼ੁਰੂ ਤੋਂ ਹੀ ਰਚੀ ਸੀ।

ਯੂਨ ਨੇ ਡਰੋਨ ਭੇਜਣ ਦੇ ਮਾਮਲੇ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਗੜਬੜੀ ਤੋਂ ਇਨਕਾਰ ਕੀਤਾ ਸੀ। ਉਨ੍ਹਾਂ ਦੇ ਵਕੀਲਾਂ ਦਾ ਕਹਿਣਾ ਸੀ ਕਿ ਨਾ ਤਾਂ ਉਨ੍ਹਾਂ ਨੇ ਇਸ ਆਪ੍ਰੇਸ਼ਨ ਦਾ ਹੁਕਮ ਦਿੱਤਾ ਸੀ ਅਤੇ ਨਾ ਹੀ ਬਾਅਦ ਵਿੱਚ ਇਸ ਨੂੰ ਮਨਜ਼ੂਰੀ ਦਿੱਤੀ ਸੀ।

ਉਨ੍ਹਾਂ ਮੁਤਾਬਕ, ਇਸ ਦਾ ਮਾਰਸ਼ਲ ਲਾਅ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ, ਸਗੋਂ ਇਹ ਉੱਤਰੀ ਕੋਰੀਆ ਵੱਲੋਂ ਸਰਹੱਦ ਪਾਰ ਕੂੜੇ ਨਾਲ ਭਰੇ ਗੁਬਾਰੇ ਭੇਜਣ ਦੀ ਕਈ ਮਹੀਨਿਆਂ ਤੋਂ ਜਾਰੀ ਹਰਕਤ ਦਾ ਜਵਾਬ ਸੀ। ਪ੍ਰੌਸੀਕਿਊਟਰਾਂ (ਸਰਕਾਰੀ ਵਕੀਲਾਂ) ਨੇ ਅਪ੍ਰੈਲ ਵਿੱਚ ਯੂਨ ਲਈ 30 ਸਾਲ ਦੀ ਜੇਲ੍ਹ ਦੀ ਸਜ਼ਾ ਦੀ ਮੰਗ ਕੀਤੀ ਸੀ। ਫਰਵਰੀ ਵਿੱਚ, ਦੱਖਣੀ ਕੋਰੀਆ ਦੀ ਇੱਕ ਅਦਾਲਤ ਨੇ ਯੂਨ ਨੂੰ ਮਾਰਸ਼ਲ ਲਾਅ ਲਗਾਉਣ ਦੀ ਕੋਸ਼ਿਸ਼ ਨਾਲ ਜੁੜੇ ਵਿਦਰੋਹ ਦੀ ਅਗਵਾਈ ਕਰਨ ਦਾ ਦੋਸ਼ੀ ਪਾਉਂਦਿਆਂ ਉਮਰਕੈਦ ਦੀ ਸਜ਼ਾ ਸੁਣਾਈ ਸੀ।

ਪਿਛਲੇ ਸਾਲ ਸੰਵਿਧਾਨਕ ਅਦਾਲਤ ਵੱਲੋਂ ਉਨ੍ਹਾਂ ਦੇ ਮਹਾਂਦੋਸ਼ (ਇੰਪੀਚਮੈਂਟ) ਨੂੰ ਸਹੀ ਠਹਿਰਾਉਣ ਤੋਂ ਬਾਅਦ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਅਚਾਨਕ ਚੋਣਾਂ ਹੋਈਆਂ ਅਤੇ ਲਿਬਰਲ ਰਾਸ਼ਟਰਪਤੀ ਲੀ ਜੇ-ਮਿਊਂਗ ਨੇ ਜਿੱਤ ਹਾਸਲ ਕੀਤੀ।